Сей и́же во святы́х оте́ц наш Вави́ла, благоро́ден сый и вели́к, от со́лнечнаго восто́ка. Роди́ся от благоро́дных и боголюби́вых роди́телей, в наро́читем Феупо́ли. И учи́вся в том гра́де, уче́нием и наказа́нием Госпо́дним: и свяще́нная пи́смена, я́же к Бо́гу вы́ну приноси́мая ско́ро и приле́жно проше́д. И от мла́да во́зраста возлюби́в Христа́, возненави́дев мир, и ско́ро от роди́телю отто́ргся: и расточи́ свое́ бога́тство ни́щым, и си́рым, и вдови́цам. И оттря́с себе́ от вся́каго жите́йскаго ка́ла, взы́де на го́ру и молча́ше. Име́я же с собо́ю два ученика́ своя́, Ага́пия, и Тимофе́я. Бысть же и святи́тель, и досто́йно свяще́нническое достоя́ние почте́. Елма́ же непокори́вии кровопия́вии е́ллини тща́хуся преда́ти того́ кня́зю, оста́вль Рим, и отъи́де в Сикели́ю со обе́ма ученико́ма свои́ма: и та́мо бысть ле́то еди́но. Мно́ги у́бо и при́сно Бо́жиею благода́тию просвети́в, и к богоразу́мию приведе́. Но град укры́тися не мо́жет верху́ горы́ стоя́, ниже́ сей утаи́ся та́мо су́щему кня́зю. Тем ят бысть со обема ученико́ма свои́ма. Да я́ко его́ ви́де со мно́гим дерзнове́нием испове́дающа Христа́. Пе́рвее у́бо бив его́, и ра́ны разли́чны нань возложи́в, и обагри́в телеса́ их. Та́же по вся гра́ды води́ми бы́вше, разли́чно и безчелове́чно томя́ше: си́ми Сикели́йский град страда́ше. Святи́и же му́ченицы возмога́ху к ве́чным благи́м взира́юще. Последи́ же ножи́ закла́ни бы́ша, и во огнь вве́ржени, и не косну́ся весма́ огнь и́стинным во́ином Христо́вым, но це́лы и невреди́мы сохрани́. И́хже взе́мше ве́рнии не́цыи, в то́мже о́строве Сикели́йстем че́стне погребо́ша.