Стихи́:

Устра́шившися сего́ жития́ Ксе́ния,

Ему́же испе́рва бя́ше живу́ща,

И, я́ко пои́стинне бя́ше Ксе́ния ,

Умира́ют ку́пно Ксени́и рабы́ня,

И́же ни́ тоя́ доброде́телем су́ще стра́нныя:

В небе́сная странноприя́тия Ксе́ния вни́де в два́десять четве́ртый.

Блаже́нная сия́ присновоспомина́емая Ксе́ния от великосла́внаго бя́ше гра́да Ри́мскаго, ро́да че́стна и сла́вна. Роди́телем у́бо ея́ бра́ку вда́ти ю́ хотя́щым, е́йже на брак вся́кая угото́вльше. Сия́ же от сама́го черто́га со обои́ми отрокови́цами избе́гши, и к мо́рю ше́ствие сотво́рши, и на друга́я ина́я ме́ста преходя́щи, доне́леже до́йде в Ми́лас град. Па́че же от богоуго́днаго Па́вла монаха, и́же к ней Бо́гом от Александри́и я́влься, наста́вник ей бысть к лу́чшым. В том же гра́де уст́авися, иде́же ма́лу це́рковь созда́вши во и́мя свята́го первому́ченика Стефа́на, со обе́ма рабы́няма, и ма́лыми прочими деви́цами, я́же стеко́шася та́мо. Показа́ мно́гий пост, нося́щи себе́ на небе́сное жи́тельство, со вся́ким терпе́нием и оша́янием сласте́й чу́вства, проводя́щи про́чее до́бре живо́т свой.

По преподо́бней о́ной и блаже́нной кончи́не вы́ше имя́ше свиде́тельство: Ибо в полудне со́лнцу сия́ющу, яви́ся крест зве́здами, и́же со́лнце воспяти́, и лик зве́здный, я́ко мне́тися мно́зем венцу́ бы́ти блаже́нныя, до́браго ра́ди и до́лгаго поста́ ея́, и издруче́ния телесе́, и неистле́ния возда́ние, е́же от Бо́га восприя́. И та́ко себе́ явля́я, я́ко е́же в земли́ те́лу ея́ положе́ну, неви́димь бысть зве́здный лик и круг. Уведено́ же бысть о преподо́бней от еди́ныя рабы́ни ея́, внегда́ умре́ти хотя́ше, пове́даше блаже́нныя оте́чество и ро́да вели́чество: Евсе́вия бо нарица́шеся. Но за е́же утаи́тися тща́щися, Ксе́нию себе́ нарече́.

Сей и́же во святы́х оте́ц наш Вави́ла, благоро́ден сый и вели́к, от со́лнечнаго восто́ка. Роди́ся от благоро́дных и боголюби́вых роди́телей, в наро́читем Феупо́ли. И учи́вся в том гра́де, уче́нием и наказа́нием Госпо́дним: и свяще́нная пи́смена, я́же к Бо́гу вы́ну приноси́мая ско́ро и приле́жно проше́д. И от мла́да во́зраста возлюби́в Христа́, возненави́дев мир, и ско́ро от роди́телю отто́ргся: и расточи́ свое́ бога́тство ни́щым, и си́рым, и вдови́цам. И оттря́с себе́ от вся́каго жите́йскаго ка́ла, взы́де на го́ру и молча́ше. Име́я же с собо́ю два ученика́ своя́, Ага́пия, и Тимофе́я. Бысть же и святи́тель, и досто́йно свяще́нническое достоя́ние почте́. Елма́ же непокори́вии кровопия́вии е́ллини тща́хуся преда́ти того́ кня́зю, оста́вль Рим, и отъи́де в Сикели́ю со обе́ма ученико́ма свои́ма: и та́мо бысть ле́то еди́но. Мно́ги у́бо и при́сно Бо́жиею благода́тию просвети́в, и к богоразу́мию приведе́. Но град укры́тися не мо́жет верху́ горы́ стоя́, ниже́ сей утаи́ся та́мо су́щему кня́зю. Тем ят бысть со обема ученико́ма свои́ма. Да я́ко его́ ви́де со мно́гим дерзнове́нием испове́дающа Христа́. Пе́рвее у́бо бив его́, и ра́ны разли́чны нань возложи́в, и обагри́в телеса́ их. Та́же по вся гра́ды води́ми бы́вше, разли́чно и безчелове́чно томя́ше: си́ми Сикели́йский град страда́ше. Святи́и же му́ченицы возмога́ху к ве́чным благи́м взира́юще. Последи́ же ножи́ закла́ни бы́ша, и во огнь вве́ржени, и не косну́ся весма́ огнь и́стинным во́ином Христо́вым, но це́лы и невреди́мы сохрани́. И́хже взе́мше ве́рнии не́цыи, в то́мже о́строве Сикели́йстем че́стне погребо́ша.

Стихи́:

Оби́телем несве́домым твоего́ оте́ческаго веле́ния,

Македо́ния Христо́с еди́ная оби́тель прие́млет.

И́же во святы́х оте́ц наш Македо́ний, имя́ше бори́ще и стоя́лище го́рския верхи́: не во еди́но вмести́лище себе́ составля́я, но вы́ну по сих преходя, в Финики́и, и Си́рии, и Килики́и, и и́же приходя́щих молвы́ бе́гаше. Четы́редесять и пять лет в такове́м житии́ соверши́в, ни в хи́жину входя́, ни в коли́бу, но в глубо́це рве стоя́лище име́я. Стар же быв, и рече́ к приходя́щым: и потко́ша ему́ ма́лу коли́бу, и ни к свои́м, ни е́же та́мо пребыва́ющым, ни чужи́м приближа́яся, два́десять и пять лет в коли́бе соверши́в. Я́ко собра́тися ле́том по́двига его́ седми́десятим. Ячме́нем же и водо́ю за четы́редесять лет вита́емь. По́сле же в неду́г впад, ма́ло хле́ба вкуша́ше и воды́. Сей ве́лий чудотво́рец быв, бе́сы от челове́к прогоня́я, и неду́ги вся́кия уврачеваше, и ина́я нема́лая сотвори́ пресла́вная. Тому́ не́когда приведо́ша жену́ от бесо́вскаго наве́та, мно́го па́че естества́ яду́щую: и мно́го свои́м ея́ пла́чущым о ней, помоли́ша свята́го е́же исцели́ти о́ну. О́ному же помо́льшуся, преложи́ ю́ по естеству́ я́сти. Глаго́лаше: я́ко три́десять ку́щных ко́кошей изъяда́ше. Моли́твами же свята́го не возмо́же че́тверть от ко́коши изъя́сти. И Бо́гу приле́жне на еди́не порабо́тав за се́дмьдесять лет, и отъи́де ко Го́споду.

Стихи́:

Сим стяжа́ Анаста́сиеву главу́,

Цельбу́ душа́м точа́щу и телесе́м.

Царю́ Иракли́ю ше́дшу в Перси́ду, и Хосро́ю уме́ршу, мона́х не́который от оби́тели му́чениковы ви́дев царе́вы поя́ и пора́довася, идя́ше со христиа́ны. И я́ко в во́инстве возвраща́ющься во своя́, и до́йде ко игу́мену своему́, и принесе́ ему́ ковче́г му́ченика, и пове́да ему́, ка́ко в Перси́де бе́сна челове́ка исцели́. Иракли́ю же в двадеся́тое ле́то ца́рства своего́, прине́сшу во Иерусали́м честно́е дре́во. Епи́скоп же не́который от собо́рныя епи́скопии к ри́мским страна́м иды́й прии́м свято́е те́ло свята́го, и изнесе́ в Кесари́ю: и та́мо оста́ви ма́лу не́кую часть, про́чее же с собо́ю занесе́. Честна́я же глава́ му́ченикова и ико́на покланя́ема быва́ет ве́рными, в ста́ром и вели́цем Ри́ме.