Преподо́бный оте́ц наш и му́ченик Пафну́тий, бысть при Диоклитиа́не царе́, еги́птянин ро́дом, от гра́да Некту́рия. Мно́жайшая ле́та своего́ живота́ в пусты́ни живя́ше, и мно́ги от е́ллин обраща́ше к Бо́гу. Взыска́емь же бя́ше на уби́йство страны́ тоя́ кня́зем, и а́нгел Госпо́день повеле́ ему́ ити́ ко кня́зю. И прише́д ста пред ним, и дерзну́ испове́дати Христа́ Бо́га на́шего. И свя́зан бысть желе́зы, и пове́шен на дре́ве, и стро́ган толми́, я́ко утро́бе его́ па́сти на зе́млю. Но па́ки чудо бысть пресла́вно: а́нгелу бо прило́жшу утро́бу его́, и бысть здрав, и прише́д яви́ся кня́зю. И от чудесе́ того́ мно́зи ве́роваша во Христа́. Тогда́ по́слан бысть кня́зем, к Диоклитиа́ну царю́, и от того́ ра́спят бысть на фи́нице, и та́мо у́мре. И с ним убие́ни бы́ша, пятьсо́т и четы́редесять и седмь му́чеников.