Во инди́йстей стране́, воста́ не́кто царь бога́т зело́, и вельми́ сла́вен, и́менем Авени́р. Сей воздви́же гоне́ние на христиа́ны, и изгоня́ше мона́хи из градов свои́х, и из пусты́нь, еще́ не христиа́н сый. Иду́щу же ему́ на лови́тву звери́ную, и ви́де два мона́ха в пусты́ни ше́ствующа, и́хже я́ти повеле́, и к престо́лу своему привести́. И со гне́вом воззре́ на ня, сло́вом же я́ко огне́м дхнув, рече́: Не́сте ли слы́шали, о́ блазни́тели и преле́стницы, пропове́дником вопию́щым: да не обря́щется кто ва́шего чи́на, и злобесо́встия, за три дни, или́ в стране́ мое́й, или́ во о́бласти. А́ще ли обря́щется, отню́д огне́м сожгу́. Мона́хи же отвеща́ста: я́коже повеле́л еси́ исходи́хом от твое́й страны, и от града, далече жили́ще творя́ще: ны́не же путь нам предлежи́т, да до́йдем к бра́тии свое́й: тре́буют бо пи́щи. И се у́бо доно́сим, да и́мут пи́щу, да не гла́дни бу́дут. Царь же рече́: сме́рти боя́йся, или преще́ния, не тре́бует на отше́ствие пи́щи. До́бре рекл еси́ царю́, я́ко сме́рти боя́щиися, в печа́ли суть, но мимотеку́щаго сего́ жития́ предстоя́щым, ни тем ужаса́ющымся: Сим у́бо бла́га ничто́же обрести́ та́мо, ни удо́бь отторгнове́ния и́мут от ви́димых: и сего́ ра́ди боя́тся сме́рти. Мы же оста́вивше сей мир, и су́щая в ми́ре, у́зкий и приско́рбный путь ше́ствующе Христа́ ра́ди, ни сме́рти бои́мся, ни су́щих зде лю́бим, но бу́дущих жела́ем: зане́ ва́ми приноси́мая нам смерть, преи́тие быва́ет к ве́чней жи́зни, и лу́чшей. И рече́ царь: Веща́йта, чесо́ ра́ди за ма́ло отъидо́ста, я́коже повеле́х? И а́ще не бои́тася сме́рти, ка́ко избе́гнути хоте́ста, тем всу́е хвали́тася лжуще. Отвеща́ша мона́си: Не тоя́ сме́рти прети́мыя тобо́ю бе́гаем, но ми́лующа тя, да не бо́льшу ти осужде́нию вина́ бу́дем, замы́слихом отъити́. А́ще ли еси́ на сие́ прише́л, то прещения твоего́ николи́же устраша́емся. Сего ра́ди царь разгне́вася, и повеле́ я́ огне́м сожещи. Смерть же прия́ша Христо́вы уго́дники огне́м, му́ченический по́двиг и венцы́ получи́ша. Но оба́че прия́ посе́м крещение Авени́р царь, со смире́нным сы́ном свои́м Иоаса́фом, и в покая́ние прии́де.