Сия́ бя́ше в ца́рство Анто́ния от преде́л ве́тхаго Ри́ма. Христиа́ну роди́телю, дщи единоро́дна. Упраздня́шеся же в свяще́нных писа́ниях. Роди́телема же ея́ сконча́вшимася, сия́ разда́вши име́ние ни́щым, и мона́шеский о́браз прие́мши, изы́де апо́стольски пропове́дающи Го́спода, и мно́ги к богоразу́мию обрати́. И обо́лгана бысть от иуде́й к царю́: и́же престо́лу своему́ предста́вив ю́. Внегда́ ниже́ ласка́ньми, ниже́ преще́ньми отврещи́ся Христа восхоте́, шлем разжже́н на главу́ прие́млет: И в коно́б ме́дян еле́я и пе́кла испо́лнен, зело́ врящь вмета́ется. И пресла́вне от сих избы́вши, и чудоде́йствовавши, царя́ Анто́ния со и́же о нем Христо́ве призыва́ет вере. И отту́ду отпущена́, изы́де па́ки во и́ны гра́ды пропове́дующи Христа́. И вше́дши в не́кий град, в не́мже ца́рствова Асклипи́й не́кто, предста́ престо́лу его́. И́же ви́дев непрело́жное ума́ ея, посла́ ю́ вне гра́да ко обита́ющему в пеще́ре зело́ стра́шну зми́ю, во е́же расте́рзане бы́ти от него́. Сия же того́ зна́мением кре́стным распа́стися на́двое сотво́рши. Царь же и су́щии с ним ве́роваша Христу́. И па́ки отпущена́ свята́я, прохожда́ше всяк град и страну́, пропове́дающи благоче́стие. И вше́дши во град в не́мже ца́рствова ин царь и́менем Тара́сий, предста́ и о́ного суди́щу, и Христа́ пропове́да. Он же мно́гими и лю́тыми му́ками истяза́в ту, зане́ не можа́ше ю́ увеща́ти, е́же Христа́ отврещи́ся, мече́м честну́ю ея́ отъя́т главу́.