Стихи́:

Нача́т себе́ зна́мению му́ченическому

Хваля́ся с ним ме́чною кончи́ною:

В два́десять шесты́й Ермола́е со ине́ми ку́пно посе́чен бысть.

Святы́й Ермола́й и и́же с ним му́чившиися священному́ченицы, Ерми́пп же и Ермокра́т, бы́ста от при́чта Никомиди́йския святы́я це́ркве, изоста́вшии от сожже́ных святы́х, и́же в це́ркви от Максимиа́на мучи́теля, и кры́яхуся в не́коем ме́сте. Егда́ же ят быв святы́й Пантеле́имон оба́жен не́киим христиани́ном вопроша́ющу же Максимиа́ну о Ермола́и, святы́й же не моги́й солга́ти, сказа́ о ста́рце. А́бие же по́слани бы́ша слуги́ от Максимиа́на, и приведо́ша свята́го Ермола́я, и и́же с ним су́щих. И вопроше́ни бы́вше святи́и, с дерзнове́нием испове́даша Христа́ Бо́га И́стинна су́ща. Скве́рным же и́долом и чту́щим я́ поруга́шася. И тогда́ мече́м главы́ их отсеко́ша.

Сия́ бя́ше в ца́рство Анто́ния от преде́л ве́тхаго Ри́ма. Христиа́ну роди́телю, дщи единоро́дна. Упраздня́шеся же в свяще́нных писа́ниях. Роди́телема же ея́ сконча́вшимася, сия́ разда́вши име́ние ни́щым, и мона́шеский о́браз прие́мши, изы́де апо́стольски пропове́дающи Го́спода, и мно́ги к богоразу́мию обрати́. И обо́лгана бысть от иуде́й к царю́: и́же престо́лу своему́ предста́вив ю́. Внегда́ ниже́ ласка́ньми, ниже́ преще́ньми отврещи́ся Христа восхоте́, шлем разжже́н на главу́ прие́млет: И в коно́б ме́дян еле́я и пе́кла испо́лнен, зело́ врящь вмета́ется. И пресла́вне от сих избы́вши, и чудоде́йствовавши, царя́ Анто́ния со и́же о нем Христо́ве призыва́ет вере. И отту́ду отпущена́, изы́де па́ки во и́ны гра́ды пропове́дующи Христа́. И вше́дши в не́кий град, в не́мже ца́рствова Асклипи́й не́кто, предста́ престо́лу его́. И́же ви́дев непрело́жное ума́ ея, посла́ ю́ вне гра́да ко обита́ющему в пеще́ре зело́ стра́шну зми́ю, во е́же расте́рзане бы́ти от него́. Сия же того́ зна́мением кре́стным распа́стися на́двое сотво́рши. Царь же и су́щии с ним ве́роваша Христу́. И па́ки отпущена́ свята́я, прохожда́ше всяк град и страну́, пропове́дающи благоче́стие. И вше́дши во град в не́мже ца́рствова ин царь и́менем Тара́сий, предста́ и о́ного суди́щу, и Христа́ пропове́да. Он же мно́гими и лю́тыми му́ками истяза́в ту, зане́ не можа́ше ю́ увеща́ти, е́же Христа́ отврещи́ся, мече́м честну́ю ея́ отъя́т главу́.

Сей у́бо ро́дом у́грин, зна́емь же бя́ше и вельми́ люби́мь вели́ким кня́зем Бори́сом: И егда́ убие́н бысть вели́кий князь Бори́с от бра́та своего́ Святопо́лка, сей же Моисе́й оста́ся еди́н, и живя́ше в Ки́еве. И егда бывши брани вели́кому кня́зю Яросла́ву, со Святопо́лком, и Болесла́вом, плене́н быв Моисе́й, и веде́н в ля́хи во око́вах тя́жцех, и пребы́сть пять лет. И уве́девши не́кая ляхи́ня от вельмо́жских жен, сего́ блаже́ннаго Моисе́я, добра́ во́зрастом, и прекра́сна лице́м, искупи́ его́ от уз, и уязви́ся неподо́бною по́хотию, е́же ко смеше́нию блу́дному. Сей же не покори́вся: и претерпе́ от нея́ в злострада́нии шесть лет, и мно́ги ра́ны от нея́ подъя́т. И от не́коего и́нока та́йно восприи́м а́нгельский о́браз. Сия́ же окая́нная без преста́ни разжига́ема нань по́хотию неподо́бною, и ви́девши непрекло́нный его́ ум, по мно́го муче́нии, та́йныя уреза ем́у у́ды. Сей же мно́го пострада́, за благоче́стие и чистоту. И по не́колицех ле́тех оздраве́, и прии́де в Пече́рский монасты́рь, и мно́ги по́двиги показа́ и даро́в чудотворе́ния сподо́бися. И проуве́дев свое́ к Бо́гу отше́ствие, и сотвори́в моли́тву, и причасти́вся боже́ственных Та́ин, и преста́вися к ве́чным оби́телем.

Ка́зни сы́на твоего́ от ю́ности его, и поко́ит тя на ста́рость твою́, и даст красоту́ души́ твое́й. И не ослябля́й бия́ младе́нца. А́ще бо жезло́м бие́ши его́, то не у́мрет, но здра́вее бу́дет. Ты бо бия́ его́ по те́лу, ду́шу же его́ избавля́еши от сме́рти. Дщерь ли и́маши, положи́ на ню грозу́ твою́, и ублюде́ши ю́ в теле́сных, да не посрами́ши лица́ твоего́. А́ще бо отда́си дщерь без поро́ка, то а́ки вели́ко де́ло соверши́л бу́деши, и посреди́ собо́ра похва́лишися, и при кончи́не не посто́неши на ню. Любя́й же сы́на твоего́, учаща́й ему́ ра́ны, да последи́ о нем возвесели́шися: Накажи́ его́ от ю́ности, и пора́дуешися о нем в му́жестве, и посреди́ зна́емых похва́лишися о нем, и за́висть прии́мет враг твой. Воспита́й де́тище в наказа́нии со преще́нием, да обря́щеши поко́й и благослове́ние. Не сме́йся игры́ творя́ к нему́, вма́ле бо осла́бишися, а о вели́це поболи́ши скорбя́, и последи́ я́ко оско́мины души́ твое́й сотвори́ши. Не даждь ему́ вла́сти в ю́ности его́, но сокруша́й ему́ ре́бра доне́лиже расте́т, еда́ когда́ ожесточа́в не повине́т ти ся, и бу́дет ти от него́ досажде́ние зло, и боле́знь души́, тщета́ до́му, и поги́бель име́нию, и укори́зна от сосе́д, и посме́х пред враги́, и пред вла́стели тя́жа, и паде́жь и доса́да зла. И па́ки вся преждерече́нная о нем сотвори́, да во ве́ки возра́дуешися. Бо́гу на́шему сла́ва, ны́не и при́сно и во ве́ки веко́в. Ами́нь.