В ца́рство Феодо́сия ма́лаго, бысть трус стра́шен, боже́ственному смотре́нию бы́вшу, хотя́ Бо́гу показа́ти челове́ком пре́жде воскресе́ния день воскре́сный. И сего́ ра́ди всем лю́дем с царе́м Феодо́сием и с патриа́рхом Про́клом, и со вся́ким исполне́нием церко́вным, вне гра́да ходя́щым по по́лю стра́ха ра́ди. Зане́же благове́рнии лю́дие от настоя́ния вра́жия прии́мше, прилага́ху к Трисвято́й пе́сни, глаго́люще: «Святы́й Безсме́ртный Распны́йся Бо́же поми́луй нас». И внеза́пу отроча́ восхище́но бысть на возду́х, и носи́мо бя́ше на нем. Всем же со у́жасом и стра́хом, на мно́ги часы́ зову́щым: «Го́споди, поми́луй». И а́бие сведено́ бысть отроча́ на зе́млю, я́ко на о́блаце на возду́се седя́ше. И гла́сом вели́ким рече́: «Я́ко а́нгельстии ли́цы, без вся́кого прило́га Трисвят́ую песнь возсыла́ют глаго́люще, Бо́гу: «Святы́й Бо́же, Святы́й Кре́пкий, Святы́й Безсме́ртный, поми́луй нас». И а́бие с таковы́м гла́сом предаде́ ду́шу Бо́гу. И тру́са колеба́ние преста́.