Пове́даше нам не́кто от оте́ц, я́ко егда́ потре́бы ра́ди не́коея взыдо́х в Констянти́нь град. И седя́щу ми в це́ркви, вни́де не́кто христолюби́в, и ви́дя мя прише́лца су́ща, целова́ любе́зно со все́ю ве́рою. И целова́в мя се́де, и нача́т мя вопроси́ти о спасе́нии души́. Я́ко рех ему́, до́бре стро́ящым земна́я, небе́сная да́руются. Глаго́ла он, до́бре рече́ о́тче, вои́стину блаже́н и́же к Бо́гу наде́жду и́мать, и всего́ себе́ и зда́в. И глаго́ла, аз бех ча́до не́коего в ми́ре сла́вных зело́. Бе же оте́ц мой ми́лостив, мно́го дая́ше убо́гим. Во еди́н же от дний возва́ мя, и показа́ ми вся име́ния своя́, и рече́ ми, чадо что тебе́ тре́бе есть, оста́влю ли тебе́ име́ния си, или́ Христа́. Аз же разсмо́трь они́х же рече́ ми, рех ему́, Христа́ па́че. Си убо суть днесь, а у́тре пре́йдут. А́бие отне́леже слы́ша от мене́, бес преста́ни дая́ше. Я́ко же уме́ршу ему́, ма́ло оста́вити. А́зже про́чее убог, и смире́но хожда́х, имы́й наде́жду на Христа́, ему́ же оста́ви мя. Бе же не́кто бога́т па́ки от вели́ких, имы́й жену́ боголюби́ву и боя́щюся Бо́га. Име́ста же дщерь единоча́ду. Глаго́ла ему́ жена́ его́, сию́ дщерь име́ема, и даде́ на́ма толи́ка добра́ Госпо́дь, чему́ се тре́бе а́ще взы́щема да́ти ю не́коему то́чну на́ма, не добра́ же нра́ва, оскорби́т ю. Но па́че взы́щема челове́ка боя́щася Бо́га, да богобоя́зньством и любо́вию прии́мет ю. И глаго́ла ей муж ея́, до́бре мы́слиши, и́дема в це́рковь и помоли́мася приле́жно Бо́гу, и и́же пре́жде вле́зет, се есть пуще́ный муж от Бо́га на́ма, и сотвори́ста та́ко. И я́ко же сотвори́ста моли́тву и седо́ста, обрето́хся аз. Пусти́ста же раба́ и возва́ста мя, и нача́ста вопроша́ти мене́ отку́ду еси́. Аз же рех и́ма, отсего́ гра́да есмь онси́цы сын. Она́ же реко́ста, о́ного ли ми́лостиваго. И реко́ста ко мне, и́маши ли жену́. И рех и́ма, ни. И па́ки рех и́ма я́же рече́ оте́ц мой ко мне. Она́ же просла́вльша Бо́га, и реко́ста, се до́брый строи́тель Христо́с Бог на́ю его́ же избра́, пусти́ тебе́ жену́ и име́ние, да прии́меши обое́ со́страхом Бо́жиим. И даде́ ми ю и име́ние. И молю́ся Го́споду Бо́гу путе́м отца́ моего́ ходи́ти ми доконца́.