Реко́ста свята́я апо́стола Петр и Па́вел, повелева́ема лю́дем шесть дней де́лати, в субо́ту же и в неде́лю упраздни́тися в це́рковь уче́ния ра́ди благове́рнаго. Субо́ту у́бо рече́м, созда́ния ра́ди дел. А неде́лю воскресе́ния ра́ди. Вели́кую же неде́лю всю, и я́же по ней, да пра́зднуют раби́, я́ко о́ва стра́сти есть Христо́вы, о́ва же Воскресе́ния. Вознесе́ние же, ра́ди Христо́ва строе́ния. Пятьдеся́тницу да пра́зднуют, прише́ствия ра́ди Свята́го Ду́ха, да́ннаго ве́ровавшым в Христа́. Рождество́ да пра́зднуют, поне́же в той день не нача́емый Дар челове́ком даде́ся, е́же роди́тися Бо́жию Сло́ву от Мари́и Де́вы на спасе́ние ми́ру. Богоявле́ния день да пра́зднуют, поне́же в том яви́ся Христо́во Божество́, свиде́тельствующу Ему́ в креще́нии Отцу́, и Паракли́ту в виде́нии голуби́не показа́вшу предстоя́щим свиде́тельствованнаго. Дни апо́стольския да пра́зднуют, ученики́ бо бы́ша Христо́вы, и Свята́го Ду́ха сподо́бишася прия́ти. День же Стефа́на первому́ченика, поче́тша Христа́, па́че живота́. И моли́твы сотворя́ем во у́трие, и в 3 час, и в 6, и в 9, и в ве́чер и в куроглаше́ние. И во у́трие, я́ко у́бо освяти́ нас Христо́с, препроводи́в нощь, и наве́д день. Тре́тий же, я́ко отве́т Госпо́дь прия́т от Пила́та. Шесты́й же час, я́ко в той распя́тся. Девя́тый же час, я́ко в той подиви́шася вся, Влады́це су́щу ра́спяту, де́рзости нечести́вых иуде́й нетерпя́щи тварь госпо́дня досажде́ния. С ве́чера же благодаря́ще, я́ко нам даде́, от дневны́х трудо́в поко́й в нощи́. В куроглаше́нии же, часа́ ра́ди благове́щения прише́ствия дне, на де́лание све́тлых и чи́стых до́брых дел. Бо́гу на́шему сла́ва, ны́не и при́сно и во ве́ки веко́в;