Сей блаже́нный презви́тер бя́ше Александри́йския це́ркве. И до́йде в Константи́нь град со алекса́ндряны. И святы́м отце́м сше́дшымся на злочести́выя еретики́, и той сподвиза́вся, епи́скоп собо́ром поставля́емь. Крамоля́щымся же ели́цем Евти́хиева му́дрствующым случа́ющымся, и житопосла́ние преще́нием запрети́вшым. Благочести́вый же царь Маркиа́н, не во Александри́ю жи́ту поити́ оста́вль, но в Нилуси́ю завести́ Ни́лом повеле́но бысть. Сим алекса́ндряне загла́дневше, хода́тая архиере́я мольбу́ слы́шав, па́ки во Александри́ю поити́ жи́ту повеле́. По сме́рти же благочести́ваго царя́ Маркиа́на, Тимофе́й не́который порекло́м Елу́р, безлу́нную не́кую нощь смотри́в, мона́шестующих ке́ллии обшед безвре́менно, а́нгела себе́ наре́к, и́же и отступи́ти приобще́ния Проте́риева снабде́. Они́ же я́ко у́жастию прельще́ни бы́вше, крамолу́ на архиере́я подвиго́ша. Он же бежа́, и ви́де боже́ственнаго проро́ка Иса́ию глаго́люща ему́: возврати́ся, аз жду восприя́ти тебе́. Се же являше ему́ ну́жную кончи́ну. Возврати́вся же у́бо, и во святу́ю купель вшед, та́мо от о́нех о́стрыми тростьми́ закла́н быв. И та́ко сей архиере́й Бо́жий таково́ю сме́ртию обложе́н, взы́де на небеса́: вене́ц восприи́м от страстополо́жника Бога. Егда́ же в его́ ме́сто поста́виша прельсти́вшаго их Тимофе́я, недосто́йна су́ща на архиере́йский престо́л, уве́дев и́же по Маркиа́не ца́рствуяй Лео́н, того Тимофе́я епи́скопом повеле́ по пра́вилом суди́ти, его́же со архиере́йства обнажи́вше. Та́же в Га́нгру прогна́вше. Люди́ны же приобщи́вшыяся уби́йству Проте́риеву, бие́нием и пха́нием, и отсече́нием уде́с царь наказа́в. Друга́го Тимофе́я Салофакиоли́я нари́чему, му́дра правосла́внейша, святи́в во Александри́ю посла́. Тому́ же бы́вшу, и крамола́ коне́ц прия́т.