Дия́кону у́бо подоба́ет все твори́ти, но не без во́ли попо́вы, и в кано́нех и потре́бах церко́вных, и о лю́дех не име́ти вла́сти, но с повеле́нием все твори́ти. Без во́ли же попо́вы из це́ркви изгони́ти или́ ино́го чего́ твори́ти, да не дерза́ет, а́ще не су́щу ту попу́. Вла́сти бо дия́кон я́ко поп не име́ет, ра́звее святы́х Та́ин. Егда́ бо отъи́дет поп не́камо, досто́ит ему́ сосе́да своего́ ино́го попа́ моли́ти из ины́я ве́си Литорги́ю твори́ти лю́дем. А́ще ли ту не прии́дет поп, то у себе́ комка́ние твори́т, и повели́т дия́кону лю́дем дая́ти.

Се же о свяще́нникох: А́ще роди́тся отроча́, и небреже́нием попо́вым у́мрет не крещено́, то лю́те попу́ тому́. А́щели небреже́нием роди́телю у́мрет не крещено́, то го́ре есть роди́телем тем. Того́ ра́ди вельми́ досто́ит пещи́ся роди́телем о креще́нии чяд, и храни́ти вре́мене, наипа́че к сме́рти. Отроча́ бо не назна́менано, во́лчия часть есть. Зна́менано же, Христо́во есть, и храни́т и́ иму́щаго зна́мение. Сконча́вше же сло́во о сем, хвалу́ возсыла́ем Святе́й Тро́ице Отцу́ и Сы́ну и Свято́му Ду́ху, ны́не и при́сно и во ве́ки веко́в.