Па́вел преподо́бный оте́ц наш, бе у́бо от гра́да Кори́нфа, от христиа́ну роди́ся роди́телю. Измла́да Бога возлюби́в. И вшед во еди́н от монастыре́й, и бысть мних, и мно́го потружа́вся и́миже бысть иску́се. И боря́шеся с ним бес блу́дный. Во еди́ну же нощь моли́тву ему́ де́ющу, став пред ним бес я́ве, и рече ему́: «А́ще не сотвори́ши еди́ныя по́хоти, хощу́ на тя вооружи́тися». Он же запрети́в ему́ Христо́вым и́менем и изгна́ и́. Посе́м вни́де бес в не́кую жену́, и та прине́сши младе́нца, пове́рже его́ на ло́не Па́влу глаго́лющи: «Я́ко от тебе́ взях его́, и зача́х и роди́х». Он же прия́ младе́нца с ра́достию. Прише́дше же еретики́ связа́ша его́ нао́пако рука́ма, и навяза́вше младе́нца на вы́ю его́, и водя́ху его́ по гра́ду. Став же Па́вел посреде́ наро́да, и помаа́в руко́ю рече́: «Слышите бра́тие, да вопроси́м младе́нца ко́е его́ оте́ц». Бе же младе́нцу от рожде́ния тре́тий день. И глаго́ла младе́нцу: «Рцы, ко́е есть оте́ц твой?». Младе́нец же растерза́в пелены́, показа́в руко́ю свое́ю на не́коего ко́вача, и рече́: «Сей есть оте́ц мой, а не Па́вел мних». И па́дше вси поклони́шася ему́. И отто́ле даде́ ему Бог враче́бныя да́ры, и восклада́ше ру́це на неду́жныя, и здра́ви быва́ху. И пожи́в лет се́дмьдесять, в ста́рости до́бре ко Го́споду отъи́де.