Бу́дите бра́тие ревни́тели до́брым дело́м, да до конца́ поживете́ ми́рно о Го́споде. Не укори́ стра́нна и прише́льца, но приими́ я́ в дом твой. Помяни́ Го́спода Иису́са Христа́ тебе́ ра́ди стра́нна бы́вша, не стыди́ся омы́ти но́зе его́, еда́ бо бу́дет а́нгел искуша́яй тя, и отщети́шися мзды пра́ведных. Слы́ши что сотвори́ Авраа́м? Седя́щу ему́ у ду́ба Мамври́йскаго под се́нию в полу́дни, воззре́в же и ви́де три му́жи ми́мо его́ гряду́ща. И воста́в тече́ на сре́тение их, и поклони́ся им до земли, глаго́ля: «Го́споди, а́ще обрето́х благода́ть пред Тобо́ю, не ми́мо иди́ раба́ Твоего́: Да принесе́тся вода́, и умы́ются ноги ва́ша: И возму́ хлеб, и яди́те, и по сих иди́те путе́м свои́м». Что же бысть ему́ страннолю́бие? Пе́рвое, друг Бо́жий нарече́ся. Посе́м сл́ыша во вре́мя, се роди́т тебе́ Са́рра сы́на, и мно́гим оте́ц бу́деши. Та́коже и Лот два стра́нника умоли́ у себе́ вита́ти, и та изведо́ста его́ из Содо́ма, да не сгори́т со беззако́нники. Та́коже, и Тови́я слеп сый, и той прия́т а́нгела, и́же сотвори́ его́ прозре́ти. К сему́ же и Госпо́дь учи́т ны глаголя: «Прие́мляй проро́ка во и́мя проро́че, мзду проро́чу приимет: И прие́мляй пра́ведника во и́мя пра́ведниче, мзду пра́ведничу прии́мет». Те́мже бра́тие, стра́нники люби́те, и своея́ трапе́зы о́бщники их твори́те, да и вы услы́шите Христа́ глаго́люща: «Поне́же сотвори́сте еди́ному от сих ме́ньших бра́тии Мое́й, Мне сотвори́сте: И Аз вам пода́м жизнь ве́чную».