Сей святы́й оте́ц наш Фадде́й, слуга́ бя́ше Фео́дора оби́тели Студи́йския, и́же от царя́ прие́мшу, и кинови́ю сотвори́вшу. И той постри́г власы́ главны́я, в той оби́тели бысть монах: и житие́ стяжа́в богоуго́дно, возлю́блен бысть все́ми. Пост бо и бде́ние мно́го имы́й, и язы́ку воздержа́ние, и внима́ние боже́ственных слове́с, до́лу лега́ние, послуша́ние ко всем. Ни кое ино что име́я, то́чию и́мже бя́ше оде́ян. Злочести́вым же тогда́ царе́м иконобо́рцем, Михаи́лу реку́ Тра́влому, и Фео́филу сы́ну его, держа́щым по Бо́жию попуще́нию, вся благочести́выя епи́скопы, и игу́мены. И о́вех в темни́цах затворя́ху, ине́х же прогоня́ху. В ни́хже бя́ше и вели́кий Фео́дор, сего́ наста́вник. С сим не́когда в пала́ту вшед, и богоно́сный Фадде́й ре́вностию Бо́жиею разжже́гся, обличи́ нечести́ваго о́ного царя́ пред всем сигкли́том. Он же повеле́ ико́ну Спа́са на́шего принести́, и положи́ти ю́ на зе́млю. Свята́го же сего́ му́жа поста́вити верху́ ико́ны, и нево́лею повлече́н кре́пкими мужи́ тве́рдо. О́ному же вельми́ откланя́ющуся, е́же не наступи́ти, и не хотя́ возвлече́н наступи́. И царь к нему́ рече́: Се своего́ Христа́ ико́ну потопта́л еси́, и про́чее подложи́ себе́ и на про́чая. Просвеще́нный же душе́ю отвеща́в к нему́: Аз прокля́тче и злочести́вый, и вся́кия нечистоты́ испо́лнене, не от своея́ со́вести сие́ сотвори́х, да не бу́ди ми то: но твои́м кова́рством, и непр́аведным судо́м возвлече́н, и сие показа́ся: аз же па́че покланя́юся, и целу́ю святу́ю ико́ну Христа́ Бо́га моего́, и о ней возжеле́нно хощу́ умре́ти. Си́ми словесы́ сей окая́нный постыде́ся, яко неве́ждею и препро́стием всесоверше́нне опсова́н бысть и поруга́н. И повеле́ пред собо́ю того́ на земли́ поврещи́, и без ми́лости би́ти. И толи́ко бие́н бысть па́лицами, доне́леже не наде́ятися уже́ тому́ и дыха́ти. Та́же у́бо мне́вше того́ уме́рша, и извлеко́ша того́ за но́зе вон. И та́мо не́цыи от предстоя́щих связа́вше его́ за но́зе, влача́ху я́ко уме́рша посреде́ то́ржища, и поверго́ша его́ близ стены́ к стране́ Пиги́и. И не́кими измове́н быв от нечистот́ы влаче́ния. Блаженный же Фадде́й благода́рственно, и до́блественно вся подъя́т, и три дни пожи́в, отъи́де ко Го́споду.