Си́и бя́ху в ца́рство Клавди́ево, иге́мону су́щу Вика́рию, и Улпи́ю ри́млянину. И уже́ Кенсури́н пе́рвый бяше сигкли́това сове́та, маги́стр са́ном, и́же и обо́лган быв, и вопроше́н, и Христа́ испове́дав, и в темни́цу всажде́н быв. Мно́гим же чудесе́м от него́ сбыва́ющымся, и́же и ви́девше мертвеца́ воста́вша, вси та́мо прилучи́вшиися во́ини, во Христа́ ве́роваша: и главы́ их отсеко́ша, число́м су́щим, два́десятим. Приведена́ же бы́вши блаже́нная Хриси́я, и пове́шена бы́вши, и волу́ями жи́лами бие́на бысть по ребром, и огне́м сожжена́, и в темни́цу вве́ржена. И па́ки по не́ких днех изведена́ бы́вши, и ка́мением че́люсти ея́ сокруши́ша. И мла́том оловя́ным по плеще́ма бие́на бы́вши. Та́же ка́мень навяза́вше на вы́ю ея́, и во глубину́ морску́ю вверго́ша: и та́ко сконча́ муче́ние. Блаже́нный же Сави́н мла́том тя́жким по ты́лу бие́н бысть, и на дре́ве обе́шен, и свеща́ми опале́н быв, и терпя́ муче́ние, и Бо́га благода́рствуя, в таковы́х му́ках и дух предаде́. Сия́ уве́дев вели́кий Ипполи́т, па́па Ри́мский, ко иге́мону прише́д, и суровство́ и безчелове́чество его́ обличи́в, и кровоя́дца того́ наре́к. Христа́ же Бо́га и Творца́ вся́ческих, дерзнове́нно испове́дав. И бие́н бысть по о́чию, и ины́я нань му́ки наложи́ша. Коне́чное же ру́це и но́зе его́ связа́вше, в мо́ре ври́нуша. И та́ко муче́ние испо́лнив, и Ца́рствию Бо́жию быв насле́дник.