Въ сíй де́нь па́мять соверша́емъ всѣ́хъ въ поще́ніи просія́вшихъ святы́хъ, муже́й же и же́нъ: пома́лу бо предводи́тельными на́съ пра́здники, богоно́сніи отцы́ наста́вивше, и гото́вы предустро́ивше въ по́прище, и пи́щи и сы́тости отве́дше, и бу́дущаго суда́ стра́хомъ на́съ наказа́вше, сыроя́стною же седми́цею я́ко до́лжно предочи́стивше, прія́тно и два́ поще́нія положи́ша посредѣ́, да по ма́лу на́съ къ нему́ возбу́дятъ. Се́ и преподо́бно вся́ пожи́вшія, и и́нако, болѣ́зньми мно́гими и труды́, му́жи же вку́пѣ и жены́, посредѣ́ предпоста́виша, я́ко да па́мятію тѣ́хъ и боре́ніи си́льнѣйша на́съ сотворя́тъ къ по́прищу, иму́щихъ о́нѣхъ житіе́, о́бразъ нѣ́кій и пу́ть. И е́же отъ о́нѣхъ посо́біе и по́мощь пріе́млюще, къ духо́внымъ подвиго́мъ влече́мся, помышля́юще, я́ко и тíи того́жде на́мъ естества́ общи́шася. Якоже бо воево́ды во́инствомъ ополче́ннымъ и уже́ по чино́мъ стоя́щимъ, словесы́, и образы́, и дре́внихъ муже́й помина́ніи, изря́дно воева́вшихъ и хра́бровавшихъ своя́ во́и обощря́ютъ, и отсю́ду они́ укрѣпля́еми, побѣ́ды наде́ждею вседу́шно ополча́ются. Та́ко и ны́нѣ богоно́сніи отцы́ му́дрѣ содѣва́ютъ: му́жескій бо по́лъ и же́нскій, преподо́бнѣ пожи́вшими, къ духо́внымъ подвиго́мъ укрѣ́пльше, си́це къ по́стному предво́дятъ по́прищу, я́ко да къ первообра́зному, незло́бивому о́нѣхъ мы́ взира́юще житію́, многови́дныя и разли́чныя дѣ́лаемъ добродѣ́тели, я́коже кому́ждо си́ла е́сть. Предводи́тельнѣ у́бо любо́вь, и е́же со умо́мъ быва́емое оша́яніе безче́стныхъ дѣ́лъ и дѣя́ній. И по́стъ се́й, не снѣде́ній у́бо то́чію, но и язы́ка, и я́рости, и о́чію, и про́сто рещи́, вся́каго зла́ пра́здность и отчужде́ніе. Тоя́ ра́ди вины́ святíи отцы́ настоя́щую святы́хъ всѣ́хъ па́мять здѣ́ учини́ша, я́же посто́мъ, и ины́ми благи́ми дѣ́лы Бо́гу уго́ждшія приве́дше, поуща́юще на́съ о́бразомъ си́хъ къ добродѣ́телей по́прищу, и до́блественнѣ на стра́сти и на де́моны вооружи́тися, и нѣ́кій о́бразъ подлага́юще: я́ко а́ще и мы́ ра́вное и́мъ тща́ніе предложи́мъ, ничто́же претыка́ніе бу́детъ содѣ́яти, ели́ка и они́ содѣ́яша, и тѣ́хже сподо́битися че́стей, того́жде бо на́мъ и сíи общи́шася естества́. О сыроя́стнѣй же глаго́лютъ нѣ́цыи, царю́ Ираклíю сію́ вчини́ти, мясоя́стну су́щу пре́жде: на Хоздро́я бо и пе́рсы ше́сть лѣ́тъ воева́въ, обѣща́ся Бо́гу, а́ще на о́нѣхъ укрѣпи́тся, сію́ предложи́ти, и посредѣ́ поста́ и пи́щи уста́вити, е́же и сотвори́. Азъ же мню́, не́гли и сему́ ключи́вшуся, святы́ми отцы́ умы́шлену бы́ти и сію́ предочище́нія ра́ди нѣ́коего, я́ко да отъ мя́съ и многояде́нія, а́біе въ кра́йнее неснѣде́ніе ведо́ми не ту́жимъ. И и́нако, тѣле́снымъ обы́чаемъ вреди́мся, но ти́хо и пома́лу мастя́щихъ, и сладя́щихъ отстоя́ще, я́коже ко́ни некрѣпкоу́здніи отъя́тою снѣ́дію, и брозду́ поста́ воспріи́мемъ. Яко бо о души́ при́тчами сотвори́ша, та́кожде и о тѣлеси́ ухи́триша, я́же къ посту́ претыка́нія пома́лу отсѣка́юще.