Во дни о́ны, умно́жившимся ученико́м, бысть ропта́ние е́ллином ко евре́ом, я́ко презира́емы быва́ху во вседне́внем служе́нии вдови́ц их. Призва́вшеже двана́десяте мно́жество учени́к, ре́ша: Неуго́дно есть нам, оста́вльше сло́во Бо́жие, служи́ти трапе́зам.

Толкова́ние Златоустаго: Егда́ же такова́я бы́ша: егда́ у́зы, егда́ преще́ния, егда́ ра́ны, -тогда́ умножа́хуся учени́цы. И е́ллины у́бо нари́чет, е́ллински бесе́дующа. У́бо ка́ко дне́вно ли служе́ние бе вдови́цам? И не глаго́лет ми́лостыню, но служе́ние: вку́пе даю́щих и служа́щих смиря́я. Се не от зло́бы бысть, но ле́ности и мно́жества ра́ди. Сего́ ра́ди и на среду́ сло́во изно́сится, нема́ло бо вре́да бысть. Зри, ка́ко и в нача́ле бе зло́ба: не то́кмо вне, но и внутрь. И е́же бысть ропта́ние. Не терпя́ху на мно́го сему́ бы́ти, но и́же бя́ху уго́дни всем и от всех свиде́тельствуеми - сих нарица́ют, не двана́десяте, но седмь.

Су́щее: Усмотри́те у́бо бра́тие му́жа от вас свиде́тельствованны седмь, испо́лнены Ду́ха Свя́та и прему́дрости, и́хже поста́вим над слу́жбою сею́. Мы же в моли́тве и служе́нии Сло́ва да пребу́дем. И уго́дно бысть сло́во се пред всем наро́дом.

Толкова́ние Златоу́ста: Можа́ху бо и са́ми избра́ти, Ду́хом Святы́м подвиза́еми, но оба́че свиде́тельство хотя́т от всех: е́же бо число́ уста́вити, и е́же рукоположи́ти, и е́же на таково́й потре́бе тех бе. А е́же по изволе́нию избра́ти му́жа, наро́ду повелева́ют. И уго́дно бысть сло́во пред всем наро́дом, и се тех прему́дрости бе досто́йно, и вси похвали́ша, рече́, глаго́лемое.

Су́щее: И избра́ша Стефа́на, му́жа испо́лнена ве́ры и Ду́ха Свя́та, и Фили́ппа, и Про́хора, и Никоно́ра, и Ти́мона, и Парме́на и Никола́я, прише́льца Антиохи́йскаго, и́хже поста́виша пред апо́столы. И помоли́вшеся, возложи́ша на ня ру́це. И сло́во Бо́жие растя́ше, и мно́жашеся число́ учени́к во Иерусали́ме зело́. И мног наро́д свяще́нник слу́шаху ве́рою .

Толкова́ние Златоу́ста: «Испо́лнени бя́ху ве́ры и Ду́ха Свя́та», рече́. Да не та́кожде бу́дут, я́коже о Иу́де, и о Ана́нии и Сапфи́ре: отлучи́ша их от мно́жества и са́ми предво́дят их пред апо́столы, и не про́сто, но рукоположе́ни бы́вше моли́твою. Се бо рукоположе́ние есть: рука́ лежи́т на главе́ му́жу, все же Бог де́йствует. И ны́не та́же благода́ть есть, прикаса́ющихся главе́ рукоположе́ннаго, а́ще я́коже подоба́ет рукополага́ется. Ко́еже досто́инство имя́ху си́и, и ко́е рукоположе́ние прия́ша? Потре́ба есть ве́дети. У́бо ли церко́внаго ли дия́конства? Но се презви́терское строе́ние есть. Еще́ бо тогда́ ни еди́н епи́скоп не бе, то́чию апо́столы еди́ны: те́мже ниже́ дия́кон. Но оба́че на се рукоположе́ни бы́ша: и не про́сто, но помоли́шася о них е́же мощи́ служе́ние твори́ти.

От силои́змы: Мы апо́стольскому рече́нию ум слага́юще, обрето́хом я́ко сло́во апо́стольское не о и́же в та́инствах служа́щих муже́й бе, но о е́же потре́бам трапе́зным служе́ния.

Коне́ц толкова́нию.