Во дни о́ны, Стефа́н испо́лнь сый ве́ры и си́лы, творя́ зна́мения и чудеса́ ве́лия в лю́дех. Воста́ша же не́цыи от со́нма глаго́лемаго Ливерти́нска, и Кирине́йска, и Алекса́ндрьска, и и́же от Килики́я, и Аси́и, стяза́ющеся со Стефа́ном, и не можа́ху проти́ву ста́ти прему́дрости и Ду́ху и́мже глаго́лаше.

Толкова́ние Златоу́стаго: Зри у́бо, ка́ко и в седми́х, еди́н пе́рвый бе: а́ще бо и рукоположе́ние о́бще бе, оба́че благода́ть множа́йшую име́яше. Зри, ка́ко пре́жде сего́ зна́мения не творя́ше, но егда́ явле́н бысть: да пока́жется я́ко не довле́ет еди́на благода́ть, но тре́бует и рукоположе́ния, да приложе́ние Ду́ха Свята́го бу́дет. «Воста́ша же не́цыи и́же от со́нма» рече́. Па́ки воста́ние поощре́ние их и я́рость глаго́лет. И зри о́браз ны́не осужде́ния: поне́же у́бо возбрани́ им Гамали́иль, ничто́ же о сем глаго́люще, и́но осужде́ние приво́дят. Ливерти́ни бе́ша, и́же от ри́млян свобо́днии зане́же живя́ху ту, мно́зи стра́ннии, и со́нмища имя́ху, иде́же зако́н прочита́ху и моли́твы творя́ху. Сего́ ра́ди со Стефа́ном стяза́хуся, да пону́дят его́ рещи́ что. А́ще бо бы явле́не, я́же о зако́не глаго́лал, не бы ся приложи́лися про́чих му́жий, ниже́ ло́жных сведе́тель.

Су́щее: Тогда́ изведо́ша му́жа глаго́люща, я́ко слы́шахом его́ глаго́люща глаго́лы ху́льныя на Моисе́я и на Бо́га. Сподвиго́шаже лю́ди и ста́рцы и кни́жники, и напа́дше, и восхи́тивше его́, и приведо́ша на со́нмище.

Толкова́ние Златоу́стаго: На апо́столы у́бо глаго́лаху, я́ко воскресе́ние пропове́дуют и я́коже мно́жество наро́да ве́руют, зде же я́ко исцеля́хуся: о и́хже благодари́ти подоба́ше, о сих укоря́ют и разъяря́ются. О безу́мию! Зна́мения и чудеса́ творя́щих, словеси́ ра́ди осужда́ют, е́же и на Христа́ творя́ху, и при́сно словеси́ оболга́ют их: похи́тити у́бо про́сто стыдя́тся, и сло́вом его́ оболга́ют.

Су́щее: Поста́виша же свиде́теля ло́жны глаго́люща: я́ко челове́к сей не престае́т глаго́лы ху́льныя глаго́ля, на ме́сто свято́е сие́ и зако́н. Слы́шахом бо его́ глаго́люща, я́ко Иису́с назаря́нин, сей разори́т ме́сто сие́ и измени́т обы́чая, я́же предаде́ нам Моисе́й.

Толкова́ние Аммо́ниево: Зна́менай, я́ко и ти́и са́ми ло́жнии сведе́телие, и́стинная пририца́ху и не хотя́ще о церко́вном погубле́нии и измене́ния зако́ннаго плотска́го служе́ния.

Златоу́стаго: Иису́с рече назаряни́н, поноша́юще се глаго́лаху, разори́т ме́сто сие́ и измени́т обы́чая. Се о Христе́ глаго́лаху. Мно́го бо их бе благогове́инство о хра́ме и о и́мене Моисе́ове, и сугу́бо осужде́ние, а́ще измени́т обы́чаи и ины́я поста́вит.

Су́щее: И воззре́вше нань вси седя́щии в со́нмищи, ви́деша лице́ его́ я́ко лице́ а́нгелово. Рече же архиере́й: А́ще у́бо сия́ та́ко суть?

Толкова́ние: Си́це есть и в после́днем степе́ни су́щу сия́ти. Что у́бо, рцы ми, от апо́стол се лише́ние и́маше? Не мно́гу ли наро́ду предста́, множа́йша показа́ дерзнове́ния? «Ви́деша лице́ его́ я́ко лице́ а́нгелово». Се у́бо благода́ти бе, се сла́ва Моисе́ова бе, ра́достна и све́тла, сотвори́ его́ тогда́ Бог: Моисе́й на лицы́ свое́м то́чию име́яше све́тлость, се́йже в души́ мно́жае па́че. Моисе́ово бо чу́вственейшее, се же безтеле́сное бе.

Су́щее: О́нже рече́: Му́жие бра́тия и отцы́, послу́шайте: Бог сла́вы яви́ся отцу́ на́шему Авраа́му, су́щу в Междоре́чии, пре́жде да́же не всели́тися ему́ в Харра́нь, и рече́ к нему́: «Изы́ди от земли́ твоея́, и от ро́да твоего́, и от до́му отца́ твоего́, и прииди́ в зе́млю, ея́же а́ще ти покажу́». Тогда́ изы́де от земли́ Халде́йския и всели́ся в Харра́нь, и отту́ду по уме́ртвии отца́ своего́ пресели́ся в зе́млю сию́, на не́йже вы ны́не живете́.

Толкова́ние Златоу́стаго: А́бие испе́рва отъе́млет им сла́ву: о и́хже глаго́лет, я́ко ничто́же есть храм и ничто́же обы́чай, и я́ко такова́я пропове́дания победи́ти не мо́гут, и я́ко от нехи́трых Бог благохи́тростная устро́и. Си́ми у́бо словесы́ и тех неблагода́рное показу́ет, я́ко мно́гаго прии́мше при́сно человеколю́бия, сопроти́вная благода́телю воздая́ху. «Бог сла́вы яви́ся Авраа́му отцу́ на́шему» рече́, си́речь, ни храм бе, ни же́ртва - и боже́ственнаго виде́ния сподо́бися: и пра́отцы пе́рсян име́яше, и чужде́й земли́ бе. И до́бре нача́т, Бо́га сла́вы призва́, и поне́же безче́стныя сла́вны Бог сотвори́, рече́, - и вас сотвори́т. Зри у́бо, их от теле́сных изво́дит, поне́же о ме́сте ему́ и о хра́ме сло́во: я́ко Бог сла́вы, рече́, не тре́бует сла́вы ва́шея, ю́же хра́ма ра́ди - Той бо исто́чник есть. Я́ко и про́чии апо́столы к глаго́лющым ино́го Бо́га бы́ти Творца́ ми́ру, ино́го Отца́ Го́спода на́шего Иису́са Христа́, тща́хуся показа́ти Еди́ного Бо́га су́ща. Си́це и зде Стефа́н Свята́го Ду́ха при́емь, та́коже глаго́лет: мно́га у́бо рече́ о Да́вшем зако́н и о Сотво́ршем ми́ра приведе́. «Я́ко ви́де небеса́ отве́рста и Христа́ одесну́ю Бо́га, о Не́мже вся глаго́лемая повеле́ » - показу́ет, я́ко не суть сия́ ча́да Авраа́мля. Он ве́рова Бо́гу, к нему́ глаго́люща: «Изы́ди от земли́ твоея́ и от сро́дства твоего́», я́же обоя́ бя́ху тя́жка. И я́ко он труд претерпе́, вы же плод хо́щете прия́ти я́коже и вси пра́отцы, [и́же] житие́ свое́ во злострада́нии положи́вша , вы же в поко́и и сла́ве хо́щете бы́ти.

Су́щее: «Не дасть ему́ насле́дия на ней, ни стопы́ но́зе. И обеща́ да́ти ему́ во одержа́ние ю́, и се́мени его́ по нем, не су́щу ему́ ча́ду». Глаго́ла же си́це Бог: «я́ко бу́дет се́мя его́ прише́льцы в земли́ чужде́й, и поработя́т е́, и озло́бят лет четы́реста. И язы́ку ему́же порабо́тают, сужду́ Аз, рече́ Бог. И по сих изы́дут и послу́жат Ми на ме́сте сем».

Толкова́ние Златоу́стаго: Зри, я́ко не про́сто па́ки сло́во прие́млет: е́же «не дасть», и е́же «обеща́ся», и «се́мени его́ по нем», и «не су́щу ему́ ча́ду» - па́ки си́льное Бо́жие показу́ет, е́же от не́мощна мо́щна сотвори́ти: его́же в Перси́де и толи́ко отстоя́щаго, сему́ обеща́ся го́спода Палести́ны сотвори́ти. Показу́ет зде обеща́ние пре́жде ме́ста бы́вше, пре́жде обре́зания, пре́жде же́ртвы, пре́жде хра́ма и я́ко не досто́инство прия́т, ни обре́зание, ни зако́н: но послуша́ния то́чию мзда бе земля́. И обре́занию да́нну бы́вшу, обетова́ние не исполня́ется и я́ко о́брази вся бы́ша. И е́же оте́чество оста́вити Бо́гу повеле́вшу, не по зако́ну: о́но бо оте́чество его́, иде́же облада́ет Бог. «Изы́ди рече́ от Халде́йския». И а́ще кто опа́сно испыта́ет, пе́рсяне суть иуде́и. И я́ко кроме́ зна́мений послу́шати подоба́ет Бо́гу повелева́ющу, а́ще и не́кая лю́тая приключа́тся: поне́же патриа́рх и гроб оста́вив отца́ своего́ и про́чая вся, послу́ша Бо́га, и обеща́ся рече́ «да́ти ему́ ея́ и се́мени его́ по нем». Мно́го бо зде Госпо́дне человеколю́бие показу́ется, и Авраа́мова ве́ра. «И не су́щу ему́ ча́ду». Показу́ет послуша́ния ра́ди и ве́ру. И́бо бы́вшая сопроти́вна явля́хуся, си́речь, пре́жде да́же не прии́де, не име́ достоя́ния, ни стопы́ ноги́, ча́да не име́я, я́же сопроти́вная суть ве́ре. Сия́ ве́дяще и мы я́же обещава́ет Бог прие́млем, а́ще и сопроти́вна суть быва́емая: и́бо к нам не суть сопроти́вна, но и зело́ подо́бна. Сего́ ра́ди «не дасть» рече́, поне́же во удержа́ние да́ти ему́ обеща́ся. И́же стра́нен сый прише́лец и вма́ле преста́витися хоте́, ка́ко держа́ти можа́ше? Це́ло бо есть достоя́ние Авраа́мово се́менем его́, И́же есть Христо́с: егда́ же и соца́рствует Его́ Святый по пи́санному, «егда́ прии́дет в сла́ве Отца́ Своего́», всем язы́ком Царь Сый.

Су́щее: И дасть ему́ заве́т обре́зания. И та́ко роди́ Исаа́ка, и обре́за его́ в день осмы́й. И Исаа́к Ия́кова, и Ия́ков обана́десяте патриа́рха. И патриа́рси позави́девше Ио́сифу, прода́ша его́ во Еги́пет. И бе Бог с ним, изъя́т его́ от всех скорбе́й его́, и дасть ему́ благода́ть и прему́дрость пред фарао́ном царе́м еги́петским, и поста́ви его́ вожда́ над Еги́птом и над всем до́мом своим.

Толкова́ние Севи́ра архиепи́скопа Антиохи́йскаго: «И дасть ему́ заве́т обре́зания» рече́. Подо́бно есть ве́дети, чесо́ ра́ди дре́вным обре́занием законоположе́но бысть. Не́цыи сицеву́ю вину́ глаго́лют бы́ти : Поне́же рече́ Авраа́м халде́янин бе, халде́ом же пре́дано бе по оте́ческому обы́чаю, я́коже и ми́дяном и пе́рсяном, ма́терем и сестра́м приобща́тися - сея́ ра́ди вины́ обре́зан бысть Авраа́м, сво́йство плотско́е отве́ргий и сро́дства своего́ неподо́бныя бра́ки оставля́я. Ве́мы же, я́ко е́же по пло́ти обре́зание бы́вшее Авраа́му, о́браз бя́ше спасе́ннаго Креще́ния: обре́занием отверже́ние явля́ше, е́же по пло́ти рожде́ния, и сы́ны Бо́жия обре́зающеся творя́. В пе́рвых Исаа́к в осмы́й день обре́зан бысть: те́мже иуде́и во осмы́й день обре́зуются. Исма́иль же трина́десятим ле́том обре́зася: сего́ ра́ди и́же от него́ исма́ильтяне си́це обре́зуются, я́коже Ио́сиф глаго́лет. «Про́дан же бысть Ио́сиф от бра́тии свои́х», Христо́в о́браз испо́лни : и́бо наве́т наве́тующим, путь успе́ха бысть по зави́денному. А́ще у́бо не бы про́дан был, не бы прише́л в Еги́пет, не бы у́бо еги́птяны [предвари́л ], ни целому́дреныя по́двиги показа́в. А́ще не бы целому́дреныя венцы́ показа́л, не бы в темни́цу всели́лся, не бы сказа́тель со́ния был, ниже́ князь еги́петский. «Благода́ть и прему́дрость даде́ ему́ Бог» рече́, над ва́рваром царе́м, ра́бу, пле́ннику, его́же бра́тия своя́ за́вистию преда́ша, Он почте́ и вознесе́.

Су́щее: Прии́де же глад на всю зе́млю еги́петскую и Ханаа́ню и скорбь ве́лия, и не обрета́ху сы́тости отцы́ на́ши. Слы́шав же Ия́ков су́щую пшени́цу во Еги́пте, посла́ отцы́ на́ша пе́рвее. И внегда́ второ́е приидо́ша, по́знан бысть Ио́сиф от бра́тии свое́й. И я́ве бысть фарао́нови род Ио́сифов. Посла́в же Ио́сиф, призва́ отца́ своего́ Ия́кова, и весь род душ се́дмьдесять и пять.

Толкова́ние Златоу́стаго: Снидо́шася рече́ бра́тия Ио́сифови в Еги́пет купи́ти жи́та, и второ́е позна́ся с ни́ми рече́. И не да́же до сего́ человеколю́бие показа́, но и фарао́нови возвеща́ет. «И возра́довася фарао́н» рече́ и и́же с ним, поне́же позна́ от свобо́дна ро́ду бы́ти Ио́сифа: и́бо вои́стинну ра́дости досто́йно бе е́же позна́тися, я́ко не раб в них ца́рствова, но от благоро́дных благоро́ден. И посла́ Ио́сиф, и призва́ Ия́кова отца́ своего́ рече́ и и́же с ним, снидо́ша в Еги́пет, и бысть стра́нный - во Еги́пте граждани́н.

[Статия 2]

Су́щее: Сни́деже Ия́ков во Еги́пет, и сконча́ся сам и отцы́ на́ши. И пренесе́ни бы́ша в Сихе́м, и положе́ни бы́ша во гро́бе, е́же купи́ Авраа́м цено́ю сребра́, от сыно́в Еммо́реов, Сихе́ма. И я́коже прибли́жашеся вре́мя обетова́ния, и́же кля́тся Бог Авраа́му, возрасто́ша лю́дие и умно́жишася во Еги́пте, до́ндеже наста́ царь ин во Еги́пте, и́же не зна́ша Ио́сифа.

Толкова́ние Златоу́стаго: В Сихе́м по уме́ртвии погребены́ бы́ша и́же со Авраа́мом и вси патриа́рси, е́же нарица́шеся Сики́ма. То у́бо ме́сто купи́ Авраа́м от Емо́ра, и погребе́ ту Са́рру. Зри, я́ко в толи́це четы́риста лет не умно́жи Бог изра́ильтяны в Еги́пте, но егда́ прии́де вре́мя е́же избы́ти, тогда́ возрасто́ша рече́ и умно́жишася.

Су́щее: Сей зле умы́слив о ро́де на́шем, и озло́би отца́ на́ша умори́ти младе́нца их и не оживи́ти, в не́же вре́мя роди́ся Моисе́й. И бе уго́ден Бо́гови, и́же воспита́н бысть ме́сяца три в до́му отца́ своего́. Отве́ржену же ему́, взят его́ дщи фарао́нова и воспита́ его́ себе́ в сы́на. И нака́зан бысть Моисе́й всей прему́дрости еги́петстей, бе же си́лен в де́лех и словесе́х.

Толкова́ние Златоу́стаго: Лука́выми у́бо ко́зньми победи́ти их фарао́н совеща́, си́речь лю́тыми тя́жкими бре́мены искуси́ти их. Се у́бо ди́вно есть, я́ко и́же хотя́ше бы́ти предста́тель лю́дем, ни посе́м, ни пре́жде сего́, но посреде́ само́й я́рости ражда́ется. «И воспита́н бысть ме́сяца три в дому́ отца́ своего́» рече́. Но егда́ челове́ческая наде́жда упраздни́ся, и ме́тнуша его́, тогда́ Бо́жие благодея́ние светя́щеся пока́зовашеся. А́ще о́но ди́вно бе, я́ко от бра́тий свои́х про́дан быв, зде па́ки чу́днейшее, я́ко царь того́ пита́ше: хотя́щаго ему́ нача́льство низложи́ти, той сам хоте́ его́ погуби́ти. Ви́диши ли повсю́ду ме́ртвым я́коже рещи́ прообразу́ющим воскресе́ние? «И спасе́н бысть Моисе́й» - о́браз се бысть Це́ркве, о́бщаго спасе́ния на́шего: ковче́г у́бо от дре́ва бе, и дре́во от воды́, и спасе́ние бысть отрече́нному. И взят его́ жена́ не иуде́аныня, но от язы́к еги́птяныни: и вси сия́ бы́ша, да не я́же от Моисе́я ничто́же мни́тся челове́ческо бы́ти. Роди́телие роди́ша, но ме́тнуша. Еги́птяне воспита́ша, но не роди́ша. Ма́ти воскорми́, но и́на дасть мзду. Те́мже поне́же про́мыслом Бо́жиим, а от челове́к обрета́ется - челове́к есть Бо́жий. Си́це роди́вся и спасе́н бысть Моисе́й, наказу́ется прему́дрости еги́петстей. И́мже о́бразом хотя́ща на брань поити́, пре́жде исхо́дники посыла́ются, да сопроти́вных помышле́ния уве́дят: и та́ко на́чнут бра́ни. Си́це бысть Моисе́й: поне́же у́бо хотя́ше на еги́птяны бра́тися, благоче́стно еги́птяном приложе́н бысть, да я́же во Еги́пте смо́трит, и Бо́га па́че челове́ка почте́т.

Су́щее: И я́коже наполня́шеся ему́ четы́редесят лет вре́мя, взы́де на се́рдце ему́ посети́ти бра́тию свою́, сы́ны Изра́илевы. И ви́дев не́коего оби́дима, посо́бствова. И сотвори́ отмще́ние оби́димому, уби́в еги́птянина. Мня́шеже разуме́ти бра́тиям свои́м, я́ко Бог руко́ю его́ даст им спасе́ние, они́же не разуме́ша.

Толкова́ние Евсе́вия епи́скопа Маси́йска: А е́же бра́тию их нари́чет, не пло́ти ра́ди толи́ко, ели́ко по своему́ прилежа́нию. Уби́ Моисе́й еги́птянина, не гне́вом, ни я́ростию подвиза́ем, но ре́вностию Бо́жиею. Все же е́же а́ще сотвори́тся в сло́во Бо́жие, Бо́жие благоче́стие есть . А́ще и уби́йство Бо́га ра́ди бу́дет, несть уби́йство. И́бо Финее́с два еди́ною руко́ю уби́в, слы́ша: «Ста Финее́с, и угоди́, и преста́ сечь». Разли́чно бо есть прилежа́ние уби́йцы благочести́вому. И вещь бы́вшая Финее́сом, свяще́нство па́че бе́яше, а не уби́йство. Толи́ко возмо́же сугу́бое се уби́йство, я́ко сме́рти простре́вшися на Изра́иля, он уста́ви. И ели́ко возмо́же кади́ло отца́ Ааро́на, толи́ко возмо́же уби́йство, па́че же благоче́стие, е́же бо бысть о́браз бе неви́димых веще́й : я́ко хотя́ше Бог Моисе́ом еги́птяны погуби́ти, глаго́лемыя же изра́ильтяны спасти́. Глаго́лет же и се: я́ко сло́вом то́чию уби́ Моисе́й еги́птянина, я́коже и верхо́вный Петр укра́дших це́ну села́ и солга́вшим сло́вом погуби́.

Су́щее: Во у́трий же день яви́ся им тя́жущимся , и привлача́ше их во смире́ние рек: «Му́жие, бра́тия есте́ вы: вску́ю оби́дите себе́?». Оби́дяй же бли́жняго, отри́ну и́, рек: «Кто тя поста́ви кня́зя или́ судию́ над на́ми? Еда́ уби́ти мя ты хо́щеши, и́мже о́бразом уби́л еси́ вчера́ еги́птянина?». Бежа́ же Моисе́й о словеси́ сем, и бысть пришле́ц в земли́ мадиа́мстей, иде́же роди́ сы́на два.

Толкова́ние Златоу́стаго: Па́ки благода́тель благоразу́мно показу́ется: я́коже бо тогда́ злострада́вшие Ио́сифом спасо́шася, та́ко и ны́не злопострада́вшии Моисе́ом спаса́ются. Что у́бо а́ще несть уби́л его́ де́лом? Моисе́я глаго́лю сло́вом уби́ти. «Кто тя поста́ви рече́ кня́зя» и про́чая. «И бежа́ Моисе́й о словеси́ сем». Они́ у́бо от земли́ своея́ в чу́жду отъидо́ша, си́и же от чу́ждей в чу́жду отгоня́ют бегу́щаго. Зри наве́тники наве́тующим: пови́нны спасе́ния бы́вше, губи́тельством не погуби́ е, и не то́чию се, но и тех ра́ди спасе́ния бы́ша су́ща непщева́ху, спаси́теля своего́ восхоте́вша уби́ти: и ниже́ та́ко его́ уби́ти возмого́ша. Ви́диши ли, я́ко и́миже дия́вол покуша́шеся разори́ти обетова́ние Бо́жие, те́миже возвраща́шеся. Ты́яже глаго́лы и к Христу́ глаго́лаху: «Кто Тя поста́ви Кня́зя и Судию́ над на́ми?». Си́це обы́чаи иуде́ом благода́теля ху́лити. Но не бе́гство Моисе́ово угаси́ я́рость их, но смотре́ние Бо́жие, я́коже и Христо́ва смерть: о́во бо дре́вным спасе́ние бысть, о́важе всему́ ми́ру. Отхо́дит Моисе́й от Еги́пта в Мадиа́м, и Христо́с от иуде́й - в Галиле́ю.

Су́щее: И испо́лньшемся ле́том четы́редесять, яви́ся ему́ в пусты́ни горы́ Сина́йския а́нгел Госпо́день в пла́мени о́гнене в купине́. Моисе́й же ви́дев, дивля́шеся виде́нию. Приступа́ющу же ему́ разуме́ти, бысть глас Госпо́день к нему́: «Аз Бог оте́ц твои́х, Бог Авраа́мов, и Бог Исаа́ков, и Бог Ия́ковль».

Толкова́ние Златоу́стаго: Ви́диши, я́ко не отсеца́ет вре́мя смотре́ние Бо́жие. Егда́ у́бо бегле́ц бе, егда́ стра́нен, егда́ мно́го вре́мя в земли́ чужде́й сотвори́, егда́ и ча́да роди́, и ника́коже ктому́ не ча́я - тогда́ а́нгел ему́ явля́ется, и глас Сы́на Бо́жия слы́шит, я́коже челове́к, в пусты́ни, а не во хра́ме. Зри коли́ка чудеса́ быва́ют, и ника́коже же́ртва: и ни в само́й той пусты́ни, но в купине́: и се како́в глас ему́ показу́ется: «Аз есмь Бог Авраа́мов, и Бог Исаа́ков, и Бог Ия́ковль, И́же вели́каго сове́та а́нгел». Сие́ глаго́ля Стефа́н, показу́ет неизрече́нное человеколю́бие Бо́жие: явля́ет бо Себе́ вся́ческим Бог, и явле́ну бы́вшу, отвраща́ет лице́ Моисе́й. Зна́мение явле́нно бы́вшее, е́же не мощи́ сыно́м Изра́илевым благоле́пную Сы́на Бо́жия ви́дети сла́ву, себе́ теле́сне явля́юща.

Су́щее: Тре́петен же быв Моисе́й, не сме́яше смотре́ти. Рече́ же ему́ Госпо́дь: «Разреши́ сапо́г ногу́ твое́ю, ме́сто бо на немже стои́ши, земля́ свята́ есть. Ви́дя ви́дех озлобле́ние люде́й Мои́х, и́же во Еги́пте, и стона́ние их услы́шах, и снидо́х изъя́ти их. И ны́не гряди́, и послю́ тя во Еги́пет».

Толкова́ние Диди́мово: Си́це стра́шно бе ви́димое. «Тре́петен же быв Моисе́й, не сме́яше смотри́ти» рече́, разреше́ние же сапого́м - ме́ртвости и тли зна́мение есть, поне́же всяк сапо́г от мо́щи ме́ртвому живо́тну есть, и растле́вшему. Непристу́пен бо сый Христо́с, су́щих в зако́не предочища́ти скве́рну грехо́вную тре́бовавшу: подоба́ет у́бо вои́стинну вся́кого ме́ртвенного и плотско́го мечта́ния я́ко не́ких сапо́г отреша́ти, к боже́ственных ве́дений взы́ти показу́ющагося ума́.

Толкова́ние Златоу́стаго: «Ме́сто бо на не́мже стои́ши земля́ свя́та есть» рече́. Ника́коже храм и ме́сто, но явле́нием и де́йством Христо́вым. Мно́жае же ди́внейшее се: ме́ста хра́му свята́я святы́х, та́може ника́коже яви́ся си́це Бог, ника́коже та́ко тре́петен быв Моисе́й. «Ви́дя ви́дех озло́бленыя лю́ди моя́». Зри, ка́ко показу́ет я́ко и благодая́ньми и муче́ньми и чудесы́ воспомина́ше им, они́же вы́ну ты́и же бы́ша. «И воздыха́ния их слы́шах» рече́. Сия́ слы́шаще, в ско́рбех су́ще к Нему́ прибега́ем. А́ще ли кто глаго́лет: «Почто́ оста́ви их озло́битися?» - Та́мо бо па́че озлобле́ния вся́кому пра́ведному вины́ и мзды быва́ют. Та́же: «Чесо́ ра́ди их озло́би?» - Да пока́жет си́лу Свою́, я́коже мо́жет не то́чию се, но да и тех нака́жет. Зри у́бо, егда́ в пусты́ни, тогда́ ути́ша, одебеле́ша, и ушире́ша, и повсю́ду поко́й - зло им есть. Сего́ ра́ди изнача́ла Ада́му глаго́лаше: «Проклята́ земля́ в де́лех твои́х, в печа́лех сне́си ту вся дни живота́ твоего́». И да от мно́га озлобле́ния прише́дше в поко́й, благодаре́ния Бо́гови воздадя́т. Вели́ко бо есть благоско́рбь, слы́ши у́бо проро́ка глаго́люща: «Бла́го мне, я́ко смири́л мя еси́». А́ще вели́ким чу́дным му́жем бла́го есть скорбь, кольми́ па́че нам.

Су́щее: Сего́ Моисе́я его́же отри́нуша ре́кше: «Кто тя поста́ви кня́зя над на́ми и судию́?», сего́ Бог кня́зя и изба́вителя посла руко́ю а́нгела я́вльшагося ему́ в купине́. Сей изведе́ их, сотво́рь чудеса́ и зна́мения в земли́ еги́петстей, и в Чермно́м мо́ри, и в пусты́ни лет четы́редесять. Се есть Моисе́й реки́й сыно́м Изра́илевым: «Проро́ка вам воздви́гнет Госпо́дь Бог ваш от бра́тии ва́шея, я́ко мене́ Того́ послу́шайте».

Толкова́ние Златоу́стаго: Его́же отреко́шася рече́ и уничижи́ша, сего́ Бог воздви́гнув, посла́. Я́коже и са́ми глаго́лаху «не и́мамы царя́ то́кмо ке́саря». Показу́ет, я́ко и зде быва́емая Ду́хом быва́ют. «Воздви́гнет Госпо́дь Бог от бра́тий ва́ших проро́ка я́ко мене́». Не диви́ся, а́ще уничиже́нным от челове́к, Ца́рствие Свое́ Христо́с да́рует, е́же и на Моисе́и бысть: и́же Бо́гови бесе́довав, и́же от пресла́вных спасе́н быв. Показу́ет, я́ко вся́ко испо́лнитися подоба́ет проро́честву, и не проти́витися ему.

Толкова́ние Кири́ллово: Провозглаша́ет бо дре́вле своего́ рожде́ния вочелове́чение, Бог и Оте́ц, и я́ко Вторы́й на нас законоположи́тель пока́жется. Глаго́лав бо дре́вним а́нгелы Зако́н, в после́дниих же ве́ка време́н, Сам Соде́тель в нас показа́ся, и но́ваго быв заве́та А́нгел.

Су́щее: Сей есть, бы́вый в це́ркви в пусты́ни со а́нгелом, глаго́лавшем ему́ в горе́ Сина́йстей, и отце́м на́шим, и́же прия́т словеса́ жи́ва да́ти нам. Его́же не восхоте́ша послу́шати отцы́ на́ши, но отри́нуша и́, и обрати́шася се́рдцем свои́м во Еги́пет. Ре́кше Ааро́ну: «Сотвори́ нам бо́ги и́же предъи́дут пред на́ми. Моисе́й бо сей, и́же изведе́ нас от земли́ еги́петския, не ве́мы что бысть ему́». И сотвори́ша теле́ц во дни о́ны, и принесо́ша же́ртву и́долу, и веселя́хуся в де́лех руку́ свое́ю.

Толкова́ние Златоу́стаго: Показу́ет, я́ко не зна́мения то́кмо сотвори́, но и зако́н дасть. Я́коже и Христо́с, си́це и сей пре́жде зна́мения твори́т, и тогда́ зако́н полага́ет: но иуде́и не послу́шаша его́. Ви́диши ли, я́ко нача́ло и ко́рень спасе́ния от иуде́й бысть? «Со а́нгелом рече́ глаго́лющим ему́, и́же с ним бе в це́ркви в пусты́ни». И зде чудесы́ воспомина́ет, вели́ку бы́вшему в пусты́ни. Что же суть словеса́ жи́ва, си́речь проро́чества? И́мже коне́ц де́лы показова́шеся. О безу́мию! «Сотвори́ нам рече́ бо́ги и́же по́йдут пред на́ми». Ка́мо? В Еги́пет. Зри, ка́ко не хотя́ху раздели́тися от язы́к еги́петских. Что глаго́леши, о́ иуде́ю, не ча́еши изводя́щаго, но бежи́ши благодея́ния и благода́теля отверга́ешися? И зри, ка́ко досажда́ют: Моисе́й бо се рече́: «Изведи́ ны от земли́ еги́петски» - ника́коже Бо́жие и́мя, но все на Моисе́я глаго́лаху. Иде́же бо не благодари́ти хотя́ху, Моисе́я приво́дят посреде́, а иде́же зако́ну ве́ровати хотя́ху - не ктому́ Моисе́я имену́ют, но что глаго́лют? «Сотвори́ нам бо́ги» рече́. Не реко́ша Бо́га, но бо́ги. А́ще Моисе́я его́же ве́дяху и Бо́га толи́кими зна́меньми я́вльшагося не то́чию не послу́шаша, но и и́нако досади́ша е́же сотвори́ти и́долы, кольми́ па́че Христа́? Теле́ц Изра́иль сотвори́ и Бо́га отве́ржеся, не уви́де Благода́теля. И глаго́ла Ааро́нови: «Сотвори́ нам бо́ги». И а́ще сотвори́т, ка́ко бо забыва́ема бу́дут? Си́це зло́ба сего́ помрача́ет. Отсю́ду про́чая обы́чаи си́и, отсю́ду пе́рвый сотвори́ша и́долом же́ртвы. Сего́ ра́ди назна́менает проро́к: «И сотвори́ша теле́ц в Хори́ве, и принесо́ша же́ртвы и́долу». Не бе у́бо ника́коже в них и́мя же́ртвеное, но повеле́ния жи́ва и сло́ва жи́ва.

Су́щее: Отврати́жеся Бог и предаде́ их служи́ти во́ем небе́сным. Я́коже пи́шет в кни́зе проро́к: «Еда́ заколе́ние и же́ртвы принесо́сте ми, лет четы́редесяте в пусты́ни, до́ме Изра́илев?».

Толкова́ние Златоу́стаго: А е́же «преда́сть их во́ем небе́сным служи́ти» - ме́сто их оста́ви. Пи́сано бо есть, я́коже апо́стол Па́вел глаго́лет: «Преда́сть их Бог в неиску́сен ум», си́речь е́же преда́тися, оста́ви их. Глаго́лет бо, поне́же таково́е име́яху иуде́и жела́ние е́же служи́ти тва́ри па́че Творца́, возбрани́в мно́гажды проро́ками таково́е непщева́ние, о́нем же на се пребыва́ющим - оста́ви их на во́ли свое́й. А е́же «от бра́тии», и́ну явля́ет бы́ти во́лю Бо́жию, и и́ну бы́ти попуще́нию. Бе бо Ему́ во́ля е́же и зако́н положи́: «Го́споду Бо́гу своему́ поклони́шися, и Тому́ еди́ному послу́жиши». Пребыва́ющым же в нече́стии, оста́ви их: не по ну́жди у́бо привлачи́т служи́ти Ему́, да не уничижи́т самовла́стное их. Но наказу́ет е́же не согреша́ти, согреша́юще же не зло́бствует, показу́я человеколю́бие, вку́пе же ча́я обраще́ния самовла́стию и вре́мя покая́ния. Пребы́вши бо, та́мо му́чит го́рько. «Во́ем же небе́сным» не а́нгелом глаго́лет, но звезда́м, и́мже и ве́ру приноша́ху: тельца́ у́бо я́ко денни́цу, луну́ же я́ко небе́сную цари́цу. Си́це бо и во Иереми́и проро́це пи́шет: «Егда́ заколе́ния и же́ртвы принесо́сте Ми» рече́, си́речь не и́мате рещи́ я́ко от е́же Мне же́ртвы твори́ти: и о́нем творя́сте, и се в пусты́ни, иде́же па́че им предстоя́ше.

Су́щее: И восприя́сте кровь Моло́хов и звезду́ бо́га ва́шего Ремфа́ма, о́бразы я́же сотвори́сте поклоня́тися им. И преселю́ вы да́лее Вавило́на.

Толкова́ние Кири́ллово: Да яви́тся Бог человеколю́бием спаса́я, а не возме́здием жертвам вещь творя́, глаго́лет. Еда́ заколе́ния и же́ртвы? Но и сим быва́емым рече́, восприя́сте и тогда́ кровь Моло́хов и звезду́ бо́га ва́шего Ремфа́на . Вше́дшу у́бо на го́ру Моисе́ю, и сотвори́ша теле́ц, и звезда́м приклони́шася служи́ти. И кровь сотво́рше, поста́виша и́дола и нареко́ша его́ Моло́х. Се и́дол моави́тский бе, име́я ка́мень све́тел изря́ден на челе́ во о́бразе денни́цы. Сказу́ет бо ся Моло́х царь их, Ремфа́н же помраче́ние. «Восприя́сте бо рече́ кровь Моло́хов», си́речь царя́ ва́шего. Кто же сей бе царь? Звезда́ бо́га ва́шего Ремфа́на. «Но бысть вам рече́ во ослепле́ние», помрачи́ша бо ся се́рдца их. Поклоня́хуся денни́це, я́ко предваря́ющей лучи́ со́лнечная, и нача́ло дню принося́щей су́щым на земли́. Но поклоня́ющимся ей, бысть Ремфа́н, си́речь помраче́ние: я́ко не содева́ющей в них звезде́ помраче́ние, но я́ко слепоты́ вина́ бысть им, я́же на се ве́ра и служе́ние. «Преселю́ ми́мо Вавило́на» рече́, поне́же моави́тския неи́стовства испо́лнисте, приближа́ющихся Дама́ску: Вавило́н у́бо коне́ц Дама́ску Си́рския страны́ есть.

[Статия 3]

Су́щее: Сень свиде́ния бя́ше отце́м на́шим в пусты́ни, я́коже повеле́ глаго́ляй Моисе́ови: «Сотвори́ ю́ по о́бразу его́же ви́де». Ю́же и внесо́ша прие́мши отцы́ на́ши со Иису́сом Нави́ном во одержа́ние язы́ком, и́хже изри́ну Бог от лица́ оте́ц на́ших, да́же до дни Дави́да, и́же обре́те благода́ть пред Бо́гом и испроси́ обрести́ селе́ние Бо́гу Ия́ковлю.

Толкование Златоустаго: «Кровь свиде́тельства» нарече́т, си́речь Бо́жиим повеле́нием и чудесе́м, и́же и по пусты́ни носи́мь бе и не на ме́сте еди́ном стоя́. И а́ще и а́нгел бе глаго́ля Моисе́ю в горе́ сина́йстей, но в горе́ Сина́йстей, но в Бо́жии ли́цы глаго́лаше ему́. Мно́га бо такова́я в боже́ственном писа́нию обрета́ются. Пи́шет бо во Исхо́де, я́ко а́нгел Госпо́день глаго́ла к Моисе́ю: «Да не прибли́жишися се́мо». И на про́чая глаго́лют а́нгел: «Аз Бог Авра́амов, и Бог Исаа́ков, и Бог Иа́ковль». И апо́стол же Госпо́день о зако́не глаго́лет: «А́ще бо а́нгелы глаго́лан был зако́н, и ника́коже храм язы́цы изринове́ни бы́ша». Сего́ ра́ди глаго́лет: «И́хже отри́ну Бог от лица́ оте́ц на́ших». И толи́ка зна́мения - и ника́коже храм да́же до дня Дави́дова рече́, и ника́коже храм испроси́ обрести́ благода́ть пред Бо́гом, и не созда́ храм: та́ко не бысть вели́ко что храм. Испроси́ обрести́ благода́ть Дави́д же вели́кий и чу́дный храм не созда́, но Соломо́н «ни еди́ного поко́я рече́ прииму́, пре́жде да́же не обрести́ ми ме́сто и селе́ние Бо́га Иа́ковля», я́ве я́ко Христу́.

Су́щее: Соломо́н же созда́ ему́ храм. Но Вы́шний не в рукотворе́них церква́х живе́т, я́коже проро́к глаго́лет: «Не́бо Мне престо́л есть, земля́ же подно́жие нога́ма Мои́ма». Кий храм сози́ждете Ми глаго́лет Госпо́дь, или́ ко́е ме́сто поко́ищу Моему́? Не рука́ ли Моя́ сотвори́ сия́ вся?

Толкова́ние: Четвертосо́тное и четыридеся́тное ле́то исхо́да сыно́в Изра́илев из Еги́пта, нача́т Соломо́н созида́ти ему́ храм во Иерусали́ме, я́ко четве́ртая кни́га я́же о ца́рствиих учи́т нас. Сего́ ра́ди же по толи́цех ле́тех е́же из Еги́пта исхо́да Изра́илева, храм зи́жден бысть, да оста́вившеся я́же по гора́м претыка́ния, еди́наго ме́ста Иеросали́мскаго возлю́бят, его́же Бог че́стна зело́ сотвори́.

Толкова́ние Кири́лла Александри́йскаго: А́ще кто хо́щет ве́щи вину́ навы́кнути, ничто́же ло́жно и́стинствующе глаго́лем: сози́жда бо в Иеросали́мех Соломо́н пресла́внаго хра́ма о́ного, возлюби́ша же его́ зело́ иуде́йстии собо́ри. Непщева́ху бо, я́ко всели́ся вонь огражде́н вся́ческих Бог. Ко́сни бо не́како су́ще в ра́зуме и о Бо́жиих словесе́х недово́льны, град Бо́жий мня́ху бы́ти сей Иеросали́м и в нем еди́ном то́чию глаго́лах Бо́га жи́ти. Зане́же глаго́лется гла́сом Дави́довым: «Пресла́вная глаго́лашася о тебе́, гра́де Бо́жий». И поне́же ма́ла не́кая сла́вляху, облича́ет их Бог глаго́ля: «Кий храм сози́ждете Ми, престо́л иму́щаго не́бо и подно́жие зе́млю?». Те́мже у́бо огражде́нно бы́ти на ме́сте еди́ном боже́ственное естество́ мня́щим, я́ве показу́ется я́ко повсю́ду испо́лнен есть и нигде́ же вмеща́ется: я́коже есть на небеси́, та́ко и на земли́.

Су́щее: «Жестоковы́йнии и необре́зании се́рдцы и ушесы́, вы при́сно Ду́ху Свято́му проти́витеся: я́коже отцы́ ва́ши, та́ко и вы. Кого́ от проро́к не изгна́ша отцы́ ва́ши и уби́ша, провозвести́вшая о прише́ствии пра́веднаго? Ему́же вы ны́не преда́теле и уби́йцы бы́сте, и́же прия́сте зако́н повеле́нием а́нгел и не сохрани́сте». Слы́шаще же сия́, распыха́хуся се́рдцы свои́ми и скрежета́ху зубы́ нань.

Толкова́ние Златоу́стаго: Зде про́чее низложе́но сло́во прие́млет на них глаго́ля: «жесто́ции вы́я и необре́заннии се́рдцем» и про́чая. Мно́го у́бо имя́ше дерзнове́ние хотя́щи умре́ти, и́бо смерть свою́, я́ко мню, прови́де. Зри у́бо му́жа, не с гне́вом бесе́дует им, ниже́ доса́дою, но проро́ческими словесы́ воспомяну́ет им. Я́ко бо не бе гнев егда́ злострада́ша, тогда́ моля́шеся о них глаго́ля: «Го́споди не поста́ви им грех сей». Си́це ни гне́вахся, но боле́ па́че о них, и ха́паяся си́це глаго́лаше: «Пре́жде бо и Иереми́я проро́к о них такова́я глаго́лет, вы всегда́ Ду́ху Свято́му противля́етеся» рече́, си́речь егда́ не хотя́ше же́ртвы бы́ти, вы же́ртвы творя́сте; егда́ не хотя́ше да́ти вам повеле́ния прия́ти, прину́дисте; егда́ же прия́сте, неради́сте. Па́киже, егда́ Аста́рху и́долу служи́сте. Егда́ же хо́щет без хра́ма служи́ти Ему́, сопроти́вное же твори́те. И не рече́ «Бо́гу проти́вистеся», но «Ду́ху Свято́му», си́це ни еди́но разли́чие есть Тро́ицы Единосу́щней.

Толкова́ние Севи́рово: Иуде́йский беззако́нный собо́р Ду́ху Свято́му при́сно противля́ющеся и Бо́жиим зако́ном, к худо́му и е́же нас ра́ди смире́нному Бо́жию Сло́ву и Спа́су вочелове́чения, сле́пи су́ще я́ко во тме ходя́ще потыка́хуся. И бысть им ка́мень краеуго́льный и избра́нный че́стный - ка́мень собла́зну, ка́мень претыка́ния. И ника́коже разуме́ша его́ пре́жде существо́, и е́же от Отца́ безтеле́сное рожде́ние, и Роди́вшаго ра́вность, и по всему́ неизмене́ние. «Возвести́вших вам проро́к уби́сте» рече́, и а́нгел[ом] , и Ду́ху Свято́му проти́вистеся рече́. Я́коже и́но писа́ние глаго́лет: «Го́споди, проро́ки Твоя́ уби́ша, и олтари́ Твоя́ раскопа́ша». Се дерзнове́ние му́жа, крест Христо́в нося́щаго.

Су́щее: Стефа́н же, сый испо́лнь Ду́ха Свя́та, воззре́в на не́бо ви́де сла́ву Бо́жию, Иису́са стоя́ща одесну́ю Бо́га. И рече́: «Се ви́жу небеса́ отве́рзста, и Сы́на челове́ча одесну́ю стоя́ща Бо́га».

Толкование Златоу́стаго: Сын челове́ческий есть, И́же одесну́ю Бо́га. И а́ще мни́ши преиме́ние име́ти глаго́лемое - и́же Ду́ха Свята́го испо́лнь, и такова́я па́че сподо́бився ви́дети Стефа́н, и отвещава́ет ти: «Я́ко ви́де Сы́на челове́ча стоя́ща одесну́ю Бо́га, со сла́вою мно́гою».

Вопро́с: Почто́ у́бо стоя́ща, а не седя́ща?

Отве́т: Да пока́жет заступле́ние е́же к му́ченику. И́бо и отцы́ глаго́лется: «Воста́ни Бо́же». Да мно́гое страда́льцу усе́рдие пода́ст, и сотвори́т вражду́ющая посла́бити е́же нань я́рость, помага́ющаго показу́ет о́браз. Я́ко стоя́ у́бо, слы́ши Па́вла глаго́люща: «Се же воздви́же, се посади́ в небе́сных одесну́ю себе́, вы́ше вся́кого нача́лства и вла́сти и госпо́дьства».

Толкова́ние Исихи́ево: Во иуде́ох бо Оте́ц Сы́на своего́ за неве́рие их убо́га су́ща, бога́та в язы́цех сотвори́. Одесну́ю его́ став, е́же ты мни́ши смире́но бы́ти, е́же есть зело́ высо́ко. О Сы́не Еди́нем, я́ко Бо́гу Единосу́щну мо́щно глаго́латися, я́коже бо Сын не то́кмо одесну́ю Отца́ седи́т, но одесну́ю стои́т. Я́коже Стефа́н свиде́тельствует, си́це и Оте́ц стои́т глаго́лется одесну́ю Сы́на, да еди́но мы досто́инство Сы́на и Отца́ навы́кнем. Бо́га ви́дети невозмо́жно, те́мже глаго́лет «ви́дех сла́ву Бо́жию», сию́ сла́ву Бо́гом нари́чет. Те́мже и́же в писа́ниих глаго́лемы ви́дети Бо́га, сла́ву боже́ственную ви́деша: или́ о́гненным виде́нием, или́ столпо́м о́блачном, или́ сапфирови́дных.

Су́щее: Возопи́вше же гла́сом ве́лием, затыка́ху у́ши свои́ и устреми́шася единоду́шно нань. И изве́дше вне гра́да, ка́мением побива́ху его́. И свиде́телие сне́мше ри́зы своя́, положи́ша при ногу́ ю́ноши, нарица́емаго Са́вла. И ка́мением побива́ху Стефа́на, моля́щася и глаго́люща: «Го́споди Иису́се прими́ дух мой». Прекло́нь же коле́ни, и возопи́ гла́сом ве́лием: «Го́споди не поста́ви им греха́ сего́», и сия рек у́спе. Савл же бе споспешеству́я уби́йству его́.

Толкова́ние Златоу́стаго: Я́коже бо на Христа́ сотвори́ша, та́ко и зде. И я́коже Христо́с рече́: «Узри́те одесну́ю Бо́га Сы́на челове́ча седя́ща», и хулу́ вещь наре́кша, устреми́шася Нань, си́це и зде: та́мо расторгну́ша ри́зы, а зде у́ши заткну́ша. А́ще у́бо ло́жная глаго́лаше, я́ко неи́стовна оста́вити подоба́ше. Но хотя́ их привести́, они́же супроти́вна помышля́ют нань: изве́дше вне из гра́да, ка́мением побива́ху. Па́ки вне из гра́да, я́коже и Христа́, и в само́й той сме́рти испове́дание и про́поведь: столпи́ зижда́ху возводя́щая на не́бо. «И свиде́тели положи́ша ри́зы своя́ при ногу́ ю́ноши нарица́емаго Са́вла» рече́. Быв на уби́йство апо́стола Стефа́на му́ченика, обе́щник бе тогда́ уби́йству, всем уби́йцам ри́зы храни́ти восхоте́в, да всех ру́ки на уби́йство обрати́т. Сего́ ра́ди глаго́лет: «Савл же бе спосо́бствуя уби́йству его́». И вели́ко, и изря́дное исправле́ние бысть душа́м на́шим, Го́сподем на́шим Иису́с Христо́м, поне́же бо оправди́хомся ве́рою е́же к Нему́, и в то са́мое безгреше́ние челове́ческо естество́ покая́нием богатя́щее обре́теся. Обнови́ нам е́же не ктому́ во ад сходи́ти душа́м на́шим по разделе́нии те́ла, я́коже и пре́жде, посыла́тися па́че в ру́це Бо́га жи́ва. И се ве́дый блаже́нный Стефа́н глаго́ла: «Го́споди Иису́се приими́ дух мой», си́речь ду́шу мою́. И не про́сто мо́лится. Зри боже́ственную смерть его бы́вшу. Да́же бо до сего́ оста́ви ду́шу в нем бы́ти Влады́ка. В нача́ле пропове́дания Стефа́на, я́коже река́ теку́щая всех везу́щая. И безсту́дныя загражда́я иуде́йския язы́ки, и́мже никто́же проти́витися можа́ше, и све́тлу поста́вив побе́ду, до́блий сей прему́дрый, и́же благода́ти Свята́го Ду́ха испо́лнен сый, и толи́ко Це́рковь по́льзовав, не мно́го вре́мя сотвори́в в пропове́дании, внеза́пу восхи́щен бысть и я́ко ху́льник, благочести́вый от иуде́ев осужда́шеся, и ка́мением до́блий побие́н бысть. Что у́бо не «поста́ви» им согреше́ние, но «оста́ви» рече? И а́ще пока́яшася, оста́вися: и́бо испове́дник уби́йства сего́ и Це́ркви гони́тель Па́вел, Христо́ве Це́ркви предста́тель бысть.

Су́щее: Бысть же в той день гоне́ние ве́лие на це́рковь Иеросали́мскую. Вси же разсе́яшася по страна́х иуде́йских и самари́йских, кроме́ апо́стол. Сотреби́ша же Стефа́на му́жие благогове́йни, и сотвори́ша плачь вели́к над ним.

Толкова́ние Златоу́стаго: Зри, ка́ко па́ки искуше́ния попуща́ет Бог бы́ти, Зри, ка́ко ве́щи стро́ятся: удиви́шася зна́мениих ра́ди, в темни́цы бы́вше, ничто́же пострада́ша, уста́виша слуги́ рукоположе́нием, растя́ше сло́во. Па́ки попуща́ет возбране́ние вели́ко бы́ти и гоне́ние нема́ло. Убоя́ша бо ся, дерзнове́ние о́нем прие́мшим, вку́пеже по́казуется, я́ко челове́цы бя́ху страху́ющеся и бе́гающе. Да не у́бо глаго́леши, я́ко благода́тию то́чию исправля́ху я́же исправля́ху. Гони́ми же ти́и и страшли́вейши бы́ша, они́ же дерзне́йши. Разуме́й, я́ко се смотре́ние бысть и я́ко не ктому́ про́чее во Иеросали́ме всех соде́яти без сумне́ния. Смеша́хуся самаря́ном про́чее, слы́шавше «в путь язы́к не иде́те». «Кроме́ апо́стол» рече́. А́ще благогове́йни бы́ша, почто́ плач сотвори́ша? Еще́ не бя́ху соверше́ни. И се показу́ет челове́чески су́ще: не то́чию страх, но скорбь и плачь. Кто у́бо не попла́кал бы кро́ткого о́ного а́гнца, ка́мением побие́на бы́вша и ме́ртва лежа́ща?

Су́щее: Савл же озлобля́ше Це́рковь, по домо́х входя́ и влача́ му́жа и жены́, предая́ше в темни́цу. Они́же у́бо разсе́явшеся, проидо́ша благовеству́юще сло́во.

Толкова́ние Златоу́стаго: Мно́га зло́ба е́же еди́ного бы́ти и е́же в до́мы входи́ти: ду́шу у́бо свою́ дасть о зако́не. «Пла́каше рече́ му́жие и жены́». Зри дерзнове́ние и доса́ду и вражду́: впа́дающе все в руку́ его́, безчи́сленных влага́ет зло́бы. От заколе́ния бо Стефа́нова де́рзостнейши бы́ша: ни смерть Стефа́нова угаси́ им я́рость, но и па́че простре́. Расточи́ учи́тели, я́ко мно́жае бы́ти учи́тельство. А́ще и плачь бысть ве́лий, но зри па́ки блага́я: в ма́ло вре́мя неду́г бе, и та́ко их свободи́: «Разсе́яни же рече́ приидо́ша благовеству́юще сло́во».

Коне́ц толкова́нию.