Во дни о́ны, еще́ глаго́лющу Петру́ глаго́лы сия́, нападе́ Дух Святы́й на вся слы́шащая сло́во. Ужасо́шася и́же от обре́зания ве́рнии, ели́цы приидо́ша с Петро́м, я́ко и на язы́цех дар Свята́го Ду́ха излия́ся. Слы́шаху бо я́ глаго́лющая язы́ки и велича́юща Бога.
Толкова́ние Златоу́стаго: Воскочи́ а́бие Дух на Корни́лия, поне́же предъю́ду я́же в себе́ предпоказа́л есть и ве́ру принося́. Си́це все ве́ры есть, ника́коже бо пре́жде не бе Дух Свят на Корни́лии, ни во и́хже с ним: то́чию егда́ слы́шаша сло́во ве́ры и ве́роваша. Те́мже я́ве есть, я́ко язы́чник а́ще вся́ко пра́веден бу́дет, ника́коже не прие́млет дар Ду́ха боже́ственнаго, а́ще не прича́стник бу́дет и́стинныя ве́ры. Сего́ ра́ди в нача́ле пропове́дания прие́млюще креще́нием дар Свята́го Ду́ха в показа́ние благода́ти, язы́ки глаго́лаху и проро́чествоваху: егда́же ве́ра простре́ся, несть потре́ба зна́мением - не в показа́ние у́бо я́же суть Бо́жия быва́ют, но ко спасе́нию и ко благодея́нию челове́ком.
«И ужасо́шася и́же от обре́зания ве́рнии», я́ко пресла́вная вещь мня́щася им бы́ти, и пря́хуся с Петро́м, к ним от Кесари́и прише́дшу. И повнегда́ смотре́ние Бо́жие навыко́ша, еще́ и си́це по мно́гу дивля́хуся, ка́ко и в язы́цех дар Свята́го Ду́ха излия́ся. Е́же «диви́тися» - показу́ет, я́ко никогда́же таково́е пресла́вное ви́дети упова́ху.
Су́щее: Тогда́ отвеща́ Петр: «Еда́ во́ду возбрани́ти мо́жет кто, е́же не крести́тися сим, и́же Дух Святы́й прия́ша, я́коже и мы?». Повеле́же им крести́тися во и́мя Иису́с Христо́во.
Толкова́ние Златоу́стаго: И ка́я бе потре́ба воды́, Ду́ху Свято́му напа́дше на ня? И си́це сокрове́нну та́йну открыва́ет нам, и боже́ственныи о́бразы сим соверша́ются: гроб, и умерщвле́ние, и живо́т . Я́коже удо́бно нам крести́тися и воспряну́ти, си́це удо́бь Бо́гови погребсти́ ве́тхого челове́ка и но́вого показа́ти. Трети́цею же се быва́ет, да навы́кнеши я́ко си́лою Отца́ и Сы́на и Ду́ха Свя́та все исполня́ется. И я́ко не неве́рное глаго́лемое, слы́ши Па́вла глаго́люща: «Спогребо́хомся Ему́ креще́нием». И па́ки: «Ве́тхий наш челове́к распя́тся». И па́ки: «Сорожде́ни бы́хом подо́бию сме́рти Его́». Та́же Петр прие́м вещь, зри ка́ко отвещева́ет: «Еда́ воды́ мо́жет возбрани́ти кто?» и про́чая. И по отве́те тогда́ повеле́ крести́тися. Толи́ко враждова́ху иуде́и, сего́ ра́ди пре́жде отвещава́ет, отъе́мля непщева́ния их, и тогда́ повелева́ет.
Су́щее: Тогда́ моли́ша его́ пребы́ти дни не́кия. Слы́шаша же апо́столы, и бра́тия су́щии во иуде́и, я́ко и язы́цы прия́ша сло́во Бо́жие. И егда́ взы́де Петр в Иерусали́м, препира́хуся с ним и́же от обре́зания, глаго́люще: я́ко к му́жем обре́зания не иму́щим вни́де и яде́ с ни́ми.
Толкова́ние Златоу́стаго: Зри у́бо, ка́ко непрело́жни бы́ху к Петру́ иуде́е. Ви́диши ли ре́вность е́же име́ша о Зако́не? Но не устыде́шася досто́йно, досто́инства же Петро́ва устыде́шася, не бы́вшу зна́мению. О неисправле́ние! Ели́ко бе е́же прия́ти язы́ком сло́во, но о ма́лых о́нех пря́хуся, «соблажня́хуся рече́ нема́ло». И зри, что влага́ют: не глаго́лют «почто́ возвести́л еси́ им», но «почто́ яде́ с ни́ми».
Су́щее: Наче́н же Петр, сказа́ше им по ря́ду, глаго́ля: «Аз бех в гра́де Иопи́йстем моля́ся, и ви́дех во у́жасе виде́ние: сходя́щь сосу́д не́кий я́ко плащани́цу ве́лию от четы́ри кра́я ви́сящу с небе́с, и прии́де да́же до мене́, в ню́же воззре́в сматря́х, и ви́дех четвероно́гая, и зве́ря земны́я и га́ды и пти́цы небе́сныя. И слы́шах глас глаго́лющь мне: «Воста́в, Пе́тре, заколи́ и яждь». Рех же: «Ника́коже, Го́споди, я́ко вся́ко скве́рно ли нечи́сто николи́же вни́де во уста́ моя́». Отвеща́же ми глас втори́цею с небесе́ глаго́лющь: «Я́же Бог очи́сти, ты не скверни́». Се же бысть трети́цею, и па́ки взя́шася вся на не́бо.
Толкова́ние Златоу́стаго: Не ра́зума Петро́ва суть глаго́лы, но Ду́ха Свята́го. И показу́ет отве́та ра́ди, ника́коже себе́ пови́нна: на Бо́га же все возлага́ет. Аз во Иопи́и бех, рече́, То́йже мя во иступле́ние сотвори́, сосу́д Той показа́, аз и пререко́х, и па́ки Той рече́, и ни та́ко послу́шах. Дух же повеле́ ми ити́, и та́ко шед. Рех «яќо Бог посла́ мя», и ни та́коже крести́х посе́м, но па́ки: «Бог все сотвори́»: Бог Сам крести́л есть, а не аз.
Епифа́ния Ки́прскаго: Ерети́к не́кий Кори́нф и́менем подвиза́ся на Петра́, прише́дшу во Иерусали́м мно́жеству и́хже от обре́зания, глаго́ля: я́ко вни́де к му́жема акрови́йстие иму́щим. Сотвори́же се Кори́нф пре́жде да́же не пропове́дав Петр. Посе́м Кори́нф свои́м преле́стным пропове́данием впаде́ся на множа́йшая поги́бели про́пасть. Бо́гуже снабдя́щу Петра́, того́ и су́щих с ним обличи́в, Кори́нфово безу́мие явле́но быва́ет. Дото́ля у́бо сумня́шеся святы́й, до́ндеже Госпо́дь я́ве показа́ ему́, я́же словеси́ и о́бразми его́ поучи́. И а́бие у́бо отве́рзшу Петру́ уста́ своя́, нападе́ Дух Святы́й на Корни́лия. И ви́дев Петр, рече́: «Еда́ воды́ мо́жет возбрани́ти кто?» и про́чая. Все же та́йство, бысть Бо́жия человеколю́бия де́ло: я́ко да святы́й Петр и всяк разуме́ет, я́ко не от челове́к спасе́ние бысть, но от Бо́га.
Су́щее: И се а́бие три́е му́жие ста́ша пред хра́миною, в не́йже бех по́сланы от Кесари́я ко мне. Рече́ же ми Дух ити́ с ни́ми, ничто́же разсужда́я. Приидо́ша же со мно́ю и шесть бра́тия си́и, и внидо́хом в дом му́жа. Сказа́ же нам, ка́ко ви́де а́нгела свя́та в до́му свое́м, ста́вша и ре́кша ему́: «Посли́ во Ио́п му́жа, и призови́ Си́мона нарица́емаго Петра́, и́же рече́т глаго́лы к тебе́, в ни́хже спасе́шися ты и весь дом твой».
Толкова́ние Златоу́стаго: Не глаго́лет Петр я́же от а́нгела глаго́лана бы́ша, я́ко рече́ Корни́лиеви: «Моли́твы твоя́ и ми́лостыня твоя́», и про́чая. Но что глаго́лет? Я́же рече́ «Глаго́лы к тебе́, и́миже спасе́шися ты и весь дом твой» - се подо́бне предлежи́т, и ничто́же глаго́лет о доброде́тели му́жа. «Ду́ху посла́вшу» рече́, «Бо́гу а́нгелом повеле́вшу» - отню́д зва́ну бы́вшу, что́же сотвори́ти подоба́ше? Но не глаго́лет о сих ничесо́же, но о после́дних укреплева́ется, е́же и́стое, не неве́рно бе зна́мение.
Су́щее: Внегда́ же нача́х глаго́лати, нападе́ Дух Святы́й на них, я́коже и на ны в нача́ле. Помяну́хже глаго́л Госпо́день, я́коже глаго́лаше: «Иоа́нн у́бо крести́ водо́ю, вы же и́мате крести́тися Ду́хом Святы́м». Да а́ще у́бо ра́вен дар даде́ им Бог, я́коже и нам ве́ровавшим в Го́спода Иисус́а Христа́, а́з же кто бех си́лен возбрани́ти Бо́га?
Толкова́ние Златоу́стаго: Ничто́же нове́йшее бысть рече́, но е́же пре́жде глаго́ланно Го́сподем. И не глаго́лет «повеле́ им крести́тися», но что? Показу́ет себе́ ничто́же сотво́рша: «е́же и́мамы, рече́, и они́ прия́ша». Да бо́льшее загради́т им уста́, сего́ ра́ди приложи́ ра́вность дарова́ния. Ви́диши, я́ко не оставля́ет их лише́ния име́ти: «Ве́ровавшим, рече́, ра́вный дар дасть». И не глаго́лет «вам», но «нам». Почто́ недосто́йных твори́те рече́, егда́ с на́ми о́бщницы суть?
Су́щее: Слы́шаша же сия́, умолко́ша и сла́вляху Бо́га глаго́люще: «У́бо и язы́ком Бог покая́ние дасть в живо́т».
Толкова́ние Златоу́стаго: Зри, ка́ко Петр отве́тует: не глаго́лет «я́ко сия́ ве́дуще умолчи́те», но что? Прие́млет ум стремле́ние и претя́ще отвещева́ет: «Кото́рый си́льник бех возбрани́ти Бо́гу?». Ви́диши ли, я́ко бесе́дованием Петро́вым вся бысть, до́бре возвести́вшу бы́вшая. Смири́вшеся слы́шавше словеса́ сия́, и отсю́ду отверзо́шася две́ри язы́ком, и про́чая.
Коне́ц толкова́ния.