Понедельник седмой седмицы по Пасце

А́ще лю́бите Мя, за́поведи моя соблюди́те. И Аз умолю́ отца́, и ина́го Уте́шителя даст вам, да пребу́дет с ва́ми в век. Дух и́стинны Его́же мир не мо́жет прия́т, зане́ [не] зрит Его́, ниже́ зна́ет Его́.

Дел нам тре́ба есть и дея́ний везде́, а не е́же глаго́лы показа́ния. Рещи́ бо и обеща́тися - вся́ческому удо́бно есть, соде́яти же несть подо́бне легко́. Что ли у́бо сия́ рех? Зане́ мно́зи ны́не суть глаго́лющии боя́тися Го́спода и люби́ти, де́лы же сопроти́вная показу́ющых. Бог же и́же де́лы любо́вь взыску́ет. Сего́ ра́ди и ко ученико́м глаго́лаше: «А́ще лю́бите Мене́, за́поведи моя́ соблюда́йте, поне́же бо рече́, я́ко е́же а́ще про́сите, Аз сотворю́». Да не вознепщу́ют про́сте проше́нию возмощи́, наведе́: «А́ще лю́бите Мене́, тогда́ рече́ сотворю́». Поне́же у́бо ле́по бе им слы́шащым «я́ко Аз ко отцу́ иду́» смуща́тися, рече́: не сие́ есть люби́ти Мя е́же смуща́тися ны́не, но е́же покаря́тися глаго́лемым.

«Дах вам за́поведь, да лю́бите друг друга́, да си́це твори́те друг дру́гу, я́коже и Аз вам сотвори́х». Сие́ есть любо́вь е́же покаря́тися сим и повинова́тися люби́мому. «И умолю́ Отца́, и ина́го Уте́шителя даст вам». Схожде́ния па́ки сло́во. Поне́же бо не у́ Его́ позна́вшим, ле́по бе взыска́ти сопребыва́ние О́ного, глаго́лы, е́же по пло́ти Его́ прише́ствие и ниже́ еди́но приима́ти, утеше́ние не су́щу, что рече́? «Умолю́ Отца́ и ина́го Уте́шителя даст вам», си́речь Ина́го я́коже Мене́. Да постыдя́тся и Саве́лиева му́дроствующии, и о Ду́се не подоба́ющее непщева́ние име́ющии. И́бо чу́до словеси́ сие́ есть, я́ко от сопротивле́ния стоя́щая е́реси, еди́ною я́звою низложи́. Е́же бо рещи́ Ина́го, показу́ет Своея́ ипоста́си разли́чие, а е́же рещи́ Уте́шителя - существа́ сро́дство. Что же ра́ди рече́: «Умолю́ Отца́»? Я́ко а́ще рекл бы «Аз послю́», не у́бо бы подо́бне ве́ровали. Ны́не же потща́тельное сие́ есть, я́ко бы ве́роватися Ему́. По́сле бо сам рече́ Его́ посыла́ет глаго́ля: «Приими́те Дух Свят». Зде же рече́ умоля́ет Отца́, я́ко достове́рно им сотвори́ти сло́во. Поне́же бо Иоа́нн рече: «Я́ко от исполне́ния его́ мы вси прия́хом», а его́же Христо́с имя́ше, ка́ко от ина́го прие́млет? И па́ки: «Той вас крести́т Ду́хом Святы́м и огне́м». Что же апо́столов вя́щше имя́ше, а́ще Отца́ умоли́ти хотя́ше, я́ко бы да́ти ины́м, и́же не́когда они́ мно́жицею и без моли́твы явля́ются сие́ творя́ще? Ка́коже, а́ще по умоле́нию Отца́ посыла́ется, Сам о Себе́ налета́ет? Ка́коже и от ина́го посыла́ется, И́же везде́ Сый, и разделя́я осо́бная коему́ждо я́коже хо́щет и глаго́ля с госпо́дьством: «Отдели́те у́бо Мне Па́вла и Варна́ву»? А́ще и Бо́гу служа́ху служа́щии, но оба́че с госпо́дьством во Свое́ де́ло призва́: не я́ко на и́но де́ло призыва́ше, но да о́бласть пока́жет.

Что про́чее есть: «И Аз умолю́ Отца́»? Показу́ет прише́ствия вре́мя. Егда́ бо их очи́сти же́ртвою, тогда́ налете́ Дух Святы́й. И что у́бо су́щу с ни́ми не на́йде? Я́ко не у́ бе же́ртва вознесе́на. Егда́ же про́чее и грех разруши́ся, и они́ к беда́м посыла́хуся и к подвиго́м совлача́хуся - подоба́ше помаза́ющему приити́. Что же ра́ди не а́бие по воскресе́нии Дух прихо́дит? Да во мно́гом Его́ устро́ившеся вожделе́нии, со мно́гою Его́ прии́мут благода́тию. До́ндеже бо бе с ни́ми Христо́с, не бе́ша в ско́рби. Егда́ же отъи́де, обнажи́вшеся и во мно́зе стра́се устро́ившеся, со мно́гим Его́ хотя́ху усе́рдием прия́ти. А е́же «с ва́ми пребу́дет», сие́ явля́ет, я́ко ниже́ по сконча́нии отступи́т. Да́же не Уте́шителя слы́шавше, па́ки воплоще́ние и́но вознепщу́ют и очесы́ вознепщу́ют Его́ зре́ти исправля́я, рече́: «Его́же мир не мо́жет прия́ти, зане́ не зрит Его». Не си́це бо вам сопребу́дет, я́коже Аз, но всели́тся в ва́шых душа́х. Сие́ бо есть, е́же «да в вас пребу́дет». Ду́ха же Его́ и́стинны нарица́ет, сим о́бразы су́щая во дре́внем явля́я. «Да с ва́ми бу́дет». Что есть с ва́ми е́же сам рече́: «И се Аз с ва́ми есмь». И́накоже и и́но не́что гада́тельствует, я́ко не постра́ждет сия́ я́же Аз, ниже́ отъи́дет. «Его́же мир не мо́жет прия́ти, зане́ не зрит Его́». Что бо рцы ми ины́х зри́мых? Ничто́же, но зде ра́зум рече́. Наведе́ у́бо: «Ниже́ зна́ет Его́». Весть бо и о опа́сном позна́нии зре́ние глаго́лати. Поне́же бо чувств ясне́йше есть зре́ние, сим при́сно опа́сное представля́ет позна́ние. Ми́ра зде лука́вых рече́, и си́це утеша́я их е́же да́ти им изря́дный дар. Зри, коли́кими воздви́же е́же о Нем сло́во. Рече́ я́ко «Ин е́же Аз есть». Рече́ я́ко «не оста́вит вас». Рече́ я́ко «к вам еди́ным прии́де, я́коже у́бо и Аз». Рече́ я́ко «в вас пребыва́ет». Но ниже́ си́це печа́ль их изгна́: Его́ бо иска́ху еще́ и обы́чая Его́. Сие́ бо исцеля́я рече́: «Ниже́ Аз оста́влю вас си́рых». «Прииду́ к вам, не бо́йтеся» рече́. Не сего́ ра́ди рех ина́го Уте́шителя посла́ти, я́ко Сам вас в коне́ц отступа́я, не сего́ ра́ди рех я́ко у вас пребыва́ет, яко не ктому́ зря вас - и́бо и сам гряду́ к вам: «Не оставля́ю вас си́рых». Поне́же бо начина́я глаго́лаше ча́дца, сего́ ра́ди и зде рече́: «не оста́влю вас си́рых».

В нача́ле у́бо глаго́лаше, я́ко «прии́дете иде́же Аз иду́», и я́ко «в дому́ Отца́ Моего́ оби́тели мно́ги суть». Зде же, - поне́же до́лго вре́мя о́но бе, - дае́т Ду́ха, но поне́же не ве́дяще е́же что бе глаго́лемое, не имя́ху дово́льно утеше́ние, «не оста́влю вас си́рых» глаго́ля.

Сие́ бо наипа́че иска́ху. Но поне́же у́бо е́же «гряду́ к вам» явля́ющаго бе прише́ствие, да не па́ки то́же взыщу́т прише́ствие яково́е пе́рвее, зри ка́ко сие́ я́вствене у́бо не рече́, назна́мена же. Рек бо: «Еще́ ма́ло, и мир не у́зрит Мене́, вы же ви́дите Мя», а́ки бы глаго́лал «прииду́ к вам», не у́бо та́коже я́коже пе́рвее на всяк день бесе́дую при́сно, сопребыва́я. И да не глаго́лют: ка́ко у́бо иуде́ом рекл еси́ «отны́не не у́зрите Мене́»?, разреша́ет сопротивле́ние про́чее, рек «к вам» еди́ным, поне́же и Дух тако́в есть. «Я́ко Аз живу́, и вы жи́ви бу́дете»: не разлучи́т у́бо крест в коне́ц, но ра́зве часе́ц мал сотры́ет то́кмо. Живо́т же ми ви́дится не настоя́щий то́кмо, но и бу́дущий глаго́лати.

«Во он день позна́ете, я́ко Аз во Отцы́, и вы во Мне, и Аз в вас». О Отце́ у́бо - существа́ есть, о ни́хже - единомышле́ния и по́мощи я́же от Бо́га рече́нное. И ка́ко и́мать сло́во рцы ми рече́? Ка́ко у́бо сопроти́вное и́мать сло́во? Мно́го бо посре́дство и зело́ безме́рно, Христо́во и ученико́в. А́ще же те же лежа́т глаго́лы, да не чуди́шися. Весть бо писа́ние мно́жицею те́миже глаго́лы о Бо́зе и челове́цех лежа́щых, не та́коже де́йствовати. Поне́же и бо́зи глаго́лемся, и сы́нове Бо́жии: но не ту́же кре́пость име́ет глаго́л о нас и о Бо́зе лежа́щь. И о́браз Сын глаго́лется и сла́ва, и мы, но мно́го посре́дство. И па́ки: «Вы же Христо́ви, Христо́с же Бо́жий». Не та́кожде же Бо́жий Христо́с и мы Христо́ви. Что же есть? Егда́ воста́ну, рече́, уве́сте, я́ко не отдели́хся от Отца́, но ту́же име́ю си́лу, и я́ко с ва́ми есмь всегда́. Веще́м воспропове́дающым ю́же о вас по́мощь от Мене́ быва́ему, враго́м спря́таным, вам дерза́ющым, лю́тым от среды́ быва́емым, про́поведи на всяк цвету́щи день, всем уступа́ющым и отходя́щым сло́ву благоче́стия. «Я́коже посла́ Мя, и Аз посыла́ю вас».

Зри́ши ли, я́ко ниже́ зде ту́же кре́пость рече́ние и́мать. А́ще бо сие́ си́це прии́мем, ничто́же бу́дет растоя́ще апо́столи Христа́. Что же ра́ди рече́ «тогда́ позна́ете»? Я́ко егда́ ви́деша Его́ воскре́сша и соживу́ща им, тогда́ изве́стную ве́ру навыко́ша. Вели́ка бо Ду́ха си́ла бе, я́ко вся их наказу́ющи. «Име́яй за́поведи Моя́ и соблюда́я их, он есть любя́й Мя». Не довле́ет бо е́же име́ти то́кмо, но и хране́ния нам тре́ба есть опа́снаго. Что же ра́ди мно́жицею им то́же глаго́лет, си́речь «а́ще лю́бите Мя, за́поведи Моя́ соблюди́те», и «име́яй за́поведи Моя́ и соблюда́я их», и «а́ще кто сло́во Мое́ услы́шит и соблюде́т е́, он есть любя́й Мя», «не слу́шаяй слове́с Мои́х, не лю́бит Мя»? Мню гада́тельствовати печа́ль их. Поне́же бо мно́го о сме́рти им любому́дрствовати: «Ненави́дяй ду́шу свою́ в ми́ре сем, в животе́ ве́чнем прии́мет ю́», и «а́ще кто не во́змет креста́ своего́ и после́дует Мне, несть мне досто́ин». Хо́щет же и и́на мно́жайша глаго́лати: поноша́я им рече́: Вы непщу́ете от любви́ страда́ти е́же скорбе́ти? Е́же не скорбе́ти - у́бо любви́ бе. Я́коже сие́ чрез все состро́ити хо́щет, в сие́ происходя́, сло́во воизгла́ви: «А́ще бо люби́ли бы́сте Мене́ рече́, возра́довалися у́бо бы́сте, я́ко ко Отцу́ Моему́ иду́». Ны́не же от боя́зни сие́ стра́ждете. А е́же си́це пребыва́ти к сме́рти, несть Мои́х за́поведей помина́ющим. Подоба́ше бо вам распя́тися, а́ще вои́стинну люби́ли Мя бысть: я́ко бо Мое́ сло́во наказу́ет не боя́тися от убива́ющых те́ло. Таковы́х и Оте́ц лю́бит, и Аз и явлю́ся им Сам.

Та́же Иу́да: «М что, рече́, я́ко нам хо́щещи яви́ти Себе́?». Зри́ши ли от боя́зни напо́лнену их ду́шу? Слия́ся бо, и смути́ся, и непщева́, я́коже и ме́ртвых зрим во сне, си́це и Ему́ име́ти зре́тися. Да́же у́бо не сие́ вознепщу́ют, услы́ши, что рече́: «Аз и Оте́ц прии́дем к нему́, и оби́тель у него́ сотвори́м». То́чию не глаго́ля, я́коже Оте́ц явля́ет себе́, си́це и Аз. Не си́це же то́кмо, но и тем е́же рещи́ «я́ко оби́тель у него́ сотвори́м, отъя́т непщева́ние е́же снов несть. Ты же ми смотри́ ученика́: и смуща́ема, и не сме́юща я́вствене рещи́ е́же рещи́ жела́ше. Не рече́: «Го́ре нам, я́ко умира́еши, и я́ко сконча́вшийся хо́щеши нам явля́тися и надстоя́ти». Но не рече́ си́це, но «что есть, я́ко нам хо́щеши яви́ти Себе́, а не ми́рови?». Глаго́ла у́бо, я́ко вас похваля́ю, вы за́поведь Мою́ блюдете́. Да́же бо не по сих зря́ще Его́ мечта́ние бы́ти вознепщу́ют, сего́ ра́ди сия́ предглаго́лет. И да не си́це, я́коже рех, вознепщу́ют им явля́тися глаго́лет и вину́: «За е́же за́поведи Моя́ соблюда́ти». Глаго́лет, я́ко и Дух си́це хо́щет явля́тися. А́ще же толи́ко с ним пребы́вше вре́мя, не у́ терпя́т та́мо существо́, па́че же ниже́ разумева́ют сие́, что у́бо пострада́ли бы, а́ще в нача́ле си́це им яви́лбыся? Сего́ ра́ди и ясть с ни́ми, да не мечта́ние вещь вознепщу́ется. А́ще бо на вода́х ви́девше сие́ непщева́ша: и́бо тому́же зре́нию я́вльшуся, и не пре́жде мно́га разлучи́вшуся, - что у́бо вознепщева́ли бы, а́ще ви́дели бы Его́ а́бие воскре́сша, Его́же ви́деша держи́ма и побива́ема? Сего́ ра́ди ча́сте им глаго́лет, я́ко яви́тся, и что ра́ди яви́тся, и ка́ко, да не мечта́ние вознепщу́ют.

«Не любя́й Мене́, слове́с Мои́х не соблюда́ет. И сло́во е́же слы́шасте, несть Мое́, но посла́вшаго Мя». Я́коже не Мене́ то́кмо, но ниже́ Отца́ лю́бит и́же сих не слу́шаяй слове́с. А́ще бо сие́ зна́мение любви́ е́же слы́шати за́поведей, сия́ же Оте́ческия суть: слу́шаяй не Сы́на то́кмо, но и Отца́ возлюби́л есть. Ка́коже Твои́ и не Твои́? Си́речь, я́ко ничто́же вне Отца́ веща́ю, ниже́ Свое́ и́но па́че уго́днаго О́ному.

«Сия́ глаго́лах вам, у вас пребыва́я». Но поне́же сия́ не я́вственна бе́ша - и о́ва у́бо ниже́ разуме́ша, мно́гая же и сомнева́хуся. Да не смуща́ются па́ки, не глаго́лют, кото́рыя за́поведи?, - свободи́ их боя́зни вся́кия, рек: «Уте́шитель же, Его́же по́слет Оте́ц во и́мя Мое́, он вас научи́т». Не́гли не я́вствена рече́нная ны́не, но есть сих я́вствен Учи́тель он. А е́же «у вас пребу́дет», гада́тельствующаго есть, я́ко Сам отхо́дит. Та́же да не печа́лятся, рече́, я́ко до́ндеже у них Сам пребу́дет и Дух не прии́дет, ничто́же ве́лие и высо́ко мо́гут све́дети. Сия́ же глаго́лет, устро́я их до́блествене претерпе́ти Его́ разлуче́ние, я́ко вели́ких вину́ быва́ющу им благи́х. Ча́сте же Уте́шителя нарица́ет, содержа́щих ра́ди их тогда́ печа́лей. Поне́же у́бо и сия́ слы́шаще смуща́хуся, помышля́юще ско́рби, бра́ни, разлуче́ние Его́, зри, ка́ко их спряту́ет па́ки, глаго́ля: «Мир оставля́ю вам». То́чию не глаго́ля: чим вреди́теся от мирска́го смуще́ния, до́ндеже ми́рствуете ко Мне? Не тако́в бо сей мир, и́же у́бо от вне и о зле быва́ет мно́жицею, и неполе́зен, и име́ющых ничи́мже по́льзова. Аз же и даю́ тако́в, я́кобы с друг дру́гом ми́ровати: е́же вас крепча́йших твори́т. Но поне́же па́ки рече́ оставля́ю, е́же бе отходя́щаго и дово́льно бе их смути́ти, сего́ ра́ди па́ки рече́: «Да не смуща́ется ва́ше се́рдце, ниже́ да бои́тся». Зри́ши ли, я́ко о́ва у́бо от друголю́бия, о́ва же от боя́зни страда́ху.

«Слы́шасте, я́ко аз рех вам: иду́ ко Отцу́ и прииду́ к вам. А́ще люби́ли Мя бы́сте, возра́довалися у́бо бы́сте, я́ко иду́ ко Отцу́: я́ко Оте́ц бо́льши Мене́ есть». И ко́ю сие́ им ра́дость имя́ше носи́ти, ко́е утеше́ние? Что у́бо есть рече́нное? Не уве́дяху о воскресе́нии, ниже́ яково́ подоба́ше о нем непщева́ние имя́ху. Ка́ко бо, и́же ниже́ я́ко воскре́снет ве́дяще? Отца́ же вели́ка бы́ти непщева́ху. Глаго́лет у́бо: я́ко а́ще и о Мне бои́теся, я́ко не довле́ющем Себе́ заступи́ти, ниже́ наде́етеся, я́ко по кресте́ па́ки вас узрю́ - но услы́шавше я́ко ко Отцу́ отхожу́, подоба́ше ра́доватися про́чая, я́ко к Бо́льшему отхожу́ и могу́щему вся разре́ти лю́тая. «Вы слы́шасте, я́ко аз рех вам». Что ра́ди сие́ положи́л есть? Я́ко си́це зело́ дерза́ю быва́емыми, я́ко и прорещи́ си́це не убоя́хся.

Сие́ у́бо и по сих рех вам пре́жде бы́ти, да егда́ бу́дут, ве́руете я́ко Аз есмь. А́ки бы глаго́лал: Еда́ ви́дели бы́сте, то́кмо Аз рех? Не у́бо же рекл бых, а́ще не дерза́ли бы. Ви́дел ли еси́ схожде́ния сло́во су́ще? И́бо егда́ глаго́лет «мните́ ли я́ко не могу́ умоли́ти Отца́, и предста́вит ми двана́десять легео́нов а́нгел?», ко мне́нию слы́шащых веща́ет.

Ниже́ бо о́но рече́т кто, а́ще и зело́ бу́дет неи́стов, я́ко не можа́ше Себе́ помощи́, но а́нгел тре́боваше. Но поне́же у́бо о Нем а́ки о челове́це непщева́ние имя́ху, сего́ ра́ди рече́ «двана́десять легео́нов а́нгел»: и́бо про́сте их вопроси́ - и пове́рже вспять. А́ще же глаго́лет кто бо́льша бы́ти Отца́, я́ко вино́вна Сы́ну - ниже́ сему́ сопроти́в рече́м: но не у́бо сие́ ина́го бы́ти существа́ Сы́ну твори́т. А е́же глаго́лет, таково́ есть: До́ндеже у́бо зде бу́ду, ле́по непщева́ти вам, я́ко бе́дствуем. А́ще же отъиду́, дерза́йте, я́ко во утверже́ни есмы́: О́ному бо никто́же преодоле́ти возмо́жет. Сия́ же вся к не́мощи ученико́в глаго́лахуся. И Сам у́бо дерза́ю, и не пеку́ся о сме́рти. Сего́ бо ра́ди рече́ «сия́ рех вам пре́жде бы́ти». Но поне́же вы не у́ мо́жете е́же о сих прия́ти сло́во, от Отца́, Его́же непщу́ете вели́ка бы́ти, ввожу́ утеше́ние.

Уте́шив у́бо их, па́ки глаго́лет печа́льна: «Не ктому́ возглаго́лю с ва́ми». Что ра́ди? «Гряде́т бо ми́ра сего́ князь, и во Мне и́мать ничто́же». Ми́ру же кня́зя диа́вола рече́, и лука́вых челове́к си́це нарица́я: не бо челове́ку нача́льствует земли́ или небеса́, - поне́же у́бо разврати́л бы вся и низложи́в, - нача́льствует же преда́вшым ему́ себе́. Сего́ ра́ди и «кня́зя тмы ве́ка сего́» нарица́ет. Тму зде па́ки лука́вая дея́ния нарица́я. Что у́бо? Диа́вол убива́ет ли? Ника́коже: «Не име́ет бо во Мне ничто́же». Ка́ко у́бо Тебе́ убию́т? Поне́же хощу́, и да позна́ет мир, я́ко люблю́ Отца́. Не бо пови́нен сме́рти рече́, ниже́ до́лжен: ея́ за любо́вь ю́же ко Отцу́ стражду́. Сие́ же рече́, да па́ки их воздви́гнет ду́шу, и уве́дят, я́ко не нехотя́, но во́лею на сие́ прихо́дит, и я́ко пренебрегы́й диа́вола.

Не довля́ше бо е́же рещи́ «я́ко ма́ло вре́мя с ва́ми есмь», но ча́сте са́мое сие́ обраща́ет печа́льное, в ле́поту до́ндеже сие́ пред ни́ми удо́бь прия́тно сотвори́т, приплета́я тому́ блага́я. Сего́ ра́ди, овогда́ у́бо глаго́лет «иду́ и прииду́» и я́ко «иде́же есмь Аз, да и вы бу́дете», и «не мо́жете мне ны́не после́довати, после́дуете же по́сле», и «ко Отцу́ иду́», и «Оте́ц бо́льши Мене́ есть», и «пре́жде бы́ти рех вам», и «я́ко не от ну́жди сия́ стражду́, но за любо́вь О́тчу»: я́ко бы разуме́ти им, я́ко не поги́бельна вещь, ниже́ вред нося́ща, а́ще у́бо зело́ его́ любя́й, и люби́мый от Него́, си́це хо́щет.

Сего́ ра́ди у́бо блага́я сия́ примеша́я, ча́сте глаго́лаше и печа́льная, обуча́я их мысль. И́бо е́же «у вас пребу́дет» и е́же «поле́зно есть вам разлуче́ние», утеша́ющаго бе. Сего́ бо ра́ди предвари́в безчи́сленая рече́ о Не́м : е́же «в вас есть», и «мир мо́жет прия́ти», и «Той воспомяне́т вся», и «Ду́ха и́стинны», и «Духа Свята́го», и «Уте́шителя», и «я́ко поле́зно есть вам» - да не скорбя́т, я́ко ни еди́ному же су́щу заступа́ющу и помага́ющу. Поле́зно же глаго́лет, явля́я я́ко духо́вных их соде́лает.

Нравоуче́ние се́дмьдесять пя́тое: О дерзнове́нии по прия́тии Ду́ха апо́стол:

Сие́ убо и зрим бы́вше. Трепе́щущии бо и боя́щеся, по е́же прия́ти Ду́ха, в среду́ бед скака́ху: и к желе́зу, и огню́, и звере́м, и пучи́не, и ко вся́кому совлача́хуся томле́нию. И некни́жнии, и неве́жи с толи́ким бесе́доваху дерзнове́нием, я́ко ужаса́ти слы́шащых. От бре́нных бо, желе́зных их сотвори́л есть Дух и летя́щых сотвори́, и к ничесо́муже челове́ческих низпа́дати оста́ви. Такова́ бо благода́ть о́на: а́ще и ле́ность обря́щет - разруша́ет, а́ще и вожделе́ние лука́во - изнуря́ет, а́ще и боя́знь – изгоня́ет, и не оставля́ет про́чее челове́ку бы́ти причасти́вшагося Ему́, но я́коже в са́мое пресели́вшеся не́бо, вся та́мо мечта́ти устроя́ет. Сего́ ра́ди «ни еди́н же что от име́ний свои́х глаго́лаше свое́ бы́ти», но претерпева́ху в моли́твах: «в ра́дости и простоте́ се́рдца». Сего́ бо или́ па́че тре́бует Дух Святы́й: «плод бо Ду́ха – ра́дость, мир, ве́ра, кро́тость». И у́бо и тужа́т мно́жицею духо́внии рече́? Но печа́ль ра́дости есть сладча́йше. Поне́же и Ка́ин опеча́лися, но мирско́ю печа́лию. И Па́вел опеча́лися, но су́щею по Бо́зе. Все бо е́же а́ще бу́дет духо́вно - приобре́тение и́мать велича́йше, я́коже и мирско́е все - тщету́ после́днюю.

Да привлача́ем у́бо непребори́мую Ду́ха по́мощь, за́поведи соблюда́юще - и ниже́ а́нгел бу́дем ме́ньши: ниже́ бо они́ поне́же безтеле́сни суть такови́ суть, - а́ще бо сие́ бы́ло бы, ни еди́н же у́бо безтеле́сных был бы зол, - но произволе́ние всех вина́. Сего́ ра́ди и в безтеле́сных, челове́к го́рши [и] безслове́сных обрето́шася. И во име́ющих телеса́, безтеле́сных лу́чши. Вси у́бо пра́веднии, на земли́ живу́щии, телеса́ име́юще, испра́виша я́же испра́виша. Я́ко бо прише́льцы су́щии стра́нни зе́млю насели́ша, небо́ же я́ко гра́ждане. Не у́бо и ты глаго́ли: пло́тию обложе́н есмь, не могу́ стерпе́ти су́щых о доброде́тели пото́в. Да не оклеве́щеши Соде́теля.

А́ще бо е́же плоть носи́ти, не́мощну твори́т доброде́тель, не на́ша укори́зна. А я́коже не твори́т не́мощну - показа́ святы́х лик. Па́влу у́бо не возбрани́ пло́ти естество́ бы́ти такову́, яко́в бысть. Ниже́ Петру́, прия́ти ключа́ небе́сныя. И Ено́хже плоть носи́в преложи́ся, и не обрета́ется си́це. И Илия́ восхи́щен бысть с пло́тию. И Авра́ам со Исаа́ком и вну́ком, плоть име́юще, облиста́ша. И Ио́сиф с се́ю бра́ся, к блу́дной о́ной жене́. И что глаго́лю плоть? А́ще бо и вери́гу пло́ти обложи́ши, ничи́мже вреди́т. «А́ще бо и аз свя́зан есмь, рече́ Па́вел, но сло́во Бо́жие не вя́жется». И что глаго́лю ю́зу и вери́гу? Приложи́ и у́зище, и ключа́ - и ниже́ си́це возбране́ния быва́ют сия́ доброде́тели. И си́це у́бо научи́л есть Па́вел. Ю́за бо души́ - не желе́зо, но боя́знь и име́ний вожделе́ние, и безчи́сленыя стра́сти. Сия́ связу́ют, а́ще и разруше́но бу́дет те́ло. Но от телеси́ сия́ ражда́ются рече́? Изве́т сия́ и непщева́ние ло́жно. А́ще бо от телеси́ ражда́лися бы, вси у́бо сие́ страда́ли бы, я́коже бо труда́ и сна и е́же алка́ти и жада́ти немо́щно избежа́ти: поне́же у́бо естества́ суть. Си́це и сия́, а́ще такова́ была́ бы, ни еди́ного же оста́вила бы́ша вне их томи́тельства бы́ти. А́ще же мно́жайши избега́ют, благоявле́нно я́ко леня́щияся суть души́ таковы́и недоста́тки.

Сию́ у́бо да отсеце́м и да не оклевету́ем те́ла, но да покори́м е́ души́, да благопослу́шно име́юще, ве́чных получи́м благи́х благода́тию и человеколю́бием Го́спода на́шего Иису́с Христа́, И́мже и с Ни́мже Отцу́ сла́ва со Святы́м Ду́хом, ны́не и при́сно и во ве́кы веко́в. Ами́нь.

Воста́ните, и́дем отсю́ду. Аз есмь виногра́д и́стинный, и вы ло́зие, а Оте́ць Мой Де́латель есть:

Страшли́ву и нему́жествену ду́шу, неуче́ние твори́т. Я́коже у́бо вели́ку и высо́ку - небе́сных догма́т наказа́ние. Ни еди́наго же бо наслажда́ющися прилежа́ния, боя́знена не́кая есть: не по естеству́, но по произволе́нию. Егда́ бо уви́жу, му́жествена у́бо не́когда, ны́не же боязни́ва - не ктому́ естества́ глаго́лю бы́ти страсть: есте́ственая бо непрело́жна. Па́ки, егда́ уви́жу ны́не боязни́вых, внеза́пу сме́лых бы́вшых, то́жде па́ки усужда́ю, произволе́нию все возложи́в. Поне́же и ученицы́ зело́ бе́ша боязни́ви пре́жде да́же научи́тися я́же подоба́ше и духо́внаго сподо́битися да́ра. По́слеже у́бо львов де́рзостнейши бы́ша. И Петр, отрокови́цы не претерпе́в преще́ние, низгла́в повеша́шеся и бие́н быва́ше и тма́ми бе́дствуя, не молча́ше, но я́коже во сне страда́ша я́же пострада́, си́це дерза́ше: но не пре́жде креста́. Сего́ ра́ди и Христо́с глаго́лаше: «Воста́ните, да и́дем отсю́ду». Что ра́ди рцы ми? Не ве́дяше ли вре́мени в не́же хотя́ше надста́ти? Но боя́шеся, да не та́мо прише́д удержи́т их Иу́да и пре́жде не́же испо́лнити изря́дное уче́ние надста́нут наве́тующии? Не бу́ди. Дале́че сия́ досто́инства Его́. А́ще у́бо не боя́лбыся, что воздвиза́ет их, и по е́же соверши́ти тогда́ в вертогра́д приво́дит зна́емый Иу́де? А́ще же и прише́л бы Иу́да, не можа́ше ли их ослепи́ти зре́ния, е́же и предстоя́щим сотвори́л есть? Что у́бо ра́ди отступа́ет? Ма́ло отдохну́ти дае́т ученико́м. И́бо ле́по бе им а́ки во объявле́ннем ме́сте су́щим, трепета́ти и боя́тися и от вре́мени и от ме́ста. И́бо нощь глубоча́йша, и бе ниже́ вня́ти глаго́лемым, но обраща́тися и мечта́ти напа́дающых. И́но и па́че е́же когда́ и сло́во Учи́телево ча́яти творя́ше лю́тая. «Еще́ бо ма́ло рече́ и несмь с ва́ми». И «гряде́т ми́ра сего́ князь». Поне́же у́бо сия́ и такова́я слы́шаще смуща́хуся, я́ко а́бие наипа́че е́млеми, приво́дит на ме́сто их, по́сле, да непщу́юще во утверже́нии бы́ти, со осла́бою про́чее слы́шат. И́бо имя́ху вели́ких слы́шати догма́т. Сего́ ра́ди рече́: «Воста́ните, и́дем отсю́ду». Та́же и наве́д рече́: «Аз есмь виногра́д, вы же ло́зие». Что бо хо́щет при́тчею гада́тельствовати? Я́ко не внима́ющему глаго́лемым жи́ти несть, и я́ко бу́дущая чудеса́ от Христо́вы быва́ют си́лы. «Оте́ц мой Де́латель есть». Что у́бо? Де́йства ли тре́бует Сын? Не бу́ди. Указа́ние бо сие́, не сие́ явля́ет.

Зри у́бо с ели́ким опасе́нием начина́ет при́тчу: не бо ко́реню наслажда́тися прилежа́ния Де́лателева, но к ло́зиям рече́. Ко́рень же ничто́же ра́ди прия́т есть зде, но да навы́кнут, я́ко кроме́ его́ си́лы ничто́же де́латися мо́жет, и я́ко си́це им соединя́тися подоба́ет ве́ре, я́коже лозе́ виногра́ду. «Вся́ку лозу́ во Мне не нося́щую плода́, изъе́млет ю́ Оте́ц». Зде житие́ гада́тельствует, показу́я я́ко кроме́ дел несть бы́ти в Нем. «И вся́ку нося́щую плод, очи́стит ю́», си́речь, мно́гаго прилежа́ния наслажда́тися твори́т. И́бо и ко́рень тре́бует прилежа́ния, пре́жде лозь окопова́емь, обнажа́емь. Но ничто́же зде о сем рече́, но все о лоза́х, показу́я я́ко Сам у́бо Себе́ довле́ет, ученицы́ же мно́гаго тре́буют от Де́лателя поможе́ния, а́ще и зело́ доброде́тельни бу́дут. Сего́ ра́ди рече́ «плод нося́щую, очища́ет». О́ва бо, поне́же безпло́дна есть, ниже́ в виногра́де бы́ти мо́жет. О́важе, поне́же плодоноси́т, рожда́тельнейшую соде́ловает. Сие́ же и ко ско́рбем их рещи́ся, тогда́ наво́димых, рече́т у́бо кто . Е́же бо очи́стит ю́, си́речь обре́жет, е́же рожда́тельнейшу твори́т ло́зу. Отню́ду же показу́ется, я́ко искуше́ния наипа́че их крепча́йшых соде́ловают. Та́же, да не глаго́лют о кото́рых сия́ глаго́лет и па́ки в печа́ль их вложи́т, рече́: «Уже́ вы чи́сти есте́ за сло́во е́же глаго́лах вам». Зри́ши ли, ка́ко Себе́ вво́дит попече́ние творя́ща о лоза́х? «Аз вас очи́стих» рече́. А́ще и вы́ше показу́ет Отца́ сие́ творя́ща, но ничто́же посреди́ Отца́ и Сы́на подоба́ет же бы́ти про́чее я́же о нас. Та́же, да пока́жет, я́ко не их тре́буя служе́ния сия́ сотвори́л есть, но да преспева́ют, наво́дит: «Я́коже лоза́ не мо́жет носи́ти о себе́ пло́да», си́це ниже́ во Мне не пребыва́яй. Да́же бо от боя́зни не разделя́тся - и ослабе́вшую их ду́шу стра́хом связу́ет, и Себе́ соприлепля́ет, и благи́я простира́ет про́чее наде́жди. Ко́рень бо пребыва́ет, а е́же изъима́тися и оставля́тися - лоз есть. Та́же отобою́ду устреми́в и от благи́х и от печа́льных, я́же от нас истязу́ет пе́рвая: «Во Мне пребыва́яй и Аз в нем». Зри́ши ли и Сы́на не ме́ньше соверша́юща Отца́ ко учени́ческому прилежа́нию? Оте́ц бо отребля́ет, То́йже в Себе́ держи́т. А е́же «на ко́рени пребыва́ти», сие́ твори́т плодоноси́ти лозу́: не отребля́емая бо, пребыва́ющих на ко́рени но́сит плод, а́ще и не ели́к подоба́ше. Не пребыва́ющая же, ниже́ отню́д. Но оба́че и е́же очища́ти показа́ся - Сыно́вне су́ще, и е́же пребыва́ти на ко́рени – Оте́ческо, И́же и Ко́рень Роди́вшаго.

Ви́дел ли еси́, ка́ко о́бща вся и е́же отребля́ти и е́же си́лы от ко́рени наслажда́тися? Вели́ка у́бо тщета́ и е́же ничто́же мощи́ твори́ти, оба́че не до сего́ поставля́ет му́ку, но да́лейше произво́дит сло́во. «Изве́рже бо ся рече́ вне», не ктому́ Де́лательныя наслажда́ющися руки́, и «иссыха́ет», си́речь а́ще что имя́ше Ко́рени, отлага́ет. А́ще не́кую благода́ть [имя́ше], обнажа́ется сей и опустева́ет су́щия отту́ду по́мощи и жи́зни. И что коне́ц? «Во огнь вмета́ется». Но не тако́в пребыва́яй в Нем. Та́же показу́ет и что есть е́же пребыва́ти. И рече́: «А́ще глаго́лы Моя́ в вас пребу́дут». Зри́ши ли, я́ко и пре́жде сего́ в ле́поту глаго́лах, я́ко е́же де́лы показа́ние и́щет? Рек бо «я́ко е́же а́ще про́сите сотворю́», наведе́: «А́ще лю́бите Мя, за́поведи Моя́ соблюди́те». И зде: «А́ще пребу́дете во Мне и дела́ Моя́ в вас». «Е́же а́ще хо́щете проси́те и бу́дет вам». Сия́ же глаго́лаше показу́я, я́ко наве́тующии у́бо ему́ сгоря́т, си́и же плод принесу́т. Страх у́бо и́же от них во о́нех преложи́в, и показа́в, я́ко си́и непобежде́ни бу́дут, рече́: «В сем просла́вися Оте́ц Мой, да вы мне бу́дете ученицы́ и плод мног но́сите». Отсю́ду сло́во достове́рно твори́т. А́ще бо во сла́ву О́тчу восхо́дит е́же плодоноси́ти, не неради́т о сла́ве Свое́й. «И бу́дете Мне ученицы́». Зри́ши ли, ка́ко и́же плод нося́, он есть учени́к. Что же есть «в сем просла́вися Оте́ц»? Си́речь ра́дуется, егда́ во Мне пребыва́ете, егда́ плод но́сите. «Я́коже возлюби́ Мя Оте́ц, и Аз возлюби́х вас». Зде про́чее челове́чнейше бесе́дует: е́же бо к челове́ком рече́но, свою́ и́мать кре́пость. И́же бо и умре́ти изволя́я, и рабо́в су́щых, и враго́в, и ра́тников, толи́кия сподо́бив че́сти и на небеса́ возве́д, ка́ко у́бо показа́ ме́ру любви́: «А́ще у́бо люблю́ вас, дерза́йте». А́ще О́тча есть сла́ва е́же плодоноси́ти, ничто́же непщу́йте лю́то. Та́же, да не лени́вых сотвори́т, зри ка́ко связу́ет па́ки: «Пребу́дите любви́ Мое́й», сему́ бо вы госпо́дие. Ка́ко же ли сие́ бу́дет? «А́ще за́поведи Моя́ соблюде́те рече́, я́коже Аз Отца́ Моего́ за́поведи соблюдо́х». Па́ки челове́чески сло́во произво́дит: не бо́ законополо́жник под за́поведьми хотя́ше лежа́ти.

Зри́ши ли, я́ко е́же при́сно глаго́лю, сие́ и зде показу́ется, не́мощи ра́ди слы́шащых? К непщева́нию бо их мно́гая глаго́лет и все́ми показу́ет во утверже́нии су́щых, и враго́в погиба́ющых, и я́ко все е́же име́ют - от Сы́на име́ют, и я́ко никто́же их преодоле́ет когда́.

Смотри́ же Его́ госпо́дьственейше им бесе́дующа: не рече́ бо «пребу́дите в любви́ О́тчей, но в Мое́й». Та́же, да не глаго́лют «Егда́ всем нас возра́товал еси́, тогда́ нас оставля́еши и отхо́диши», показу́ет, я́ко не оставля́ет, но си́це им прилепля́ется а́ще хотя́т, я́коже лоза́ в виногра́де. И па́ки: да не наде́явшеся бы́ти до́брое, а́ще и разленя́тся. Та́же, да не в Себе́ обста́вит вещь и па́сти устро́ит наипа́че, рече́: «В сем просла́вися Оте́ц». Везде́ бо Свою́ и О́тчу показу́ет любо́вь в них. Не у́бо я́же иуде́й сла́ва, но сия́ я́же хотя́ху приима́ти. Та́же, да не глаго́лют «испадо́хом оте́честв, оста́хом на́зи, и пу́сти всех бы́хом», - «на Мя, рече́, зри́те. Люби́мь есмь от Отца́, но оба́че стражду́ сия́ предлежа́щая. Не у́бо ниже́ вас за е́же не люби́ти оставля́ю ны́не. А́ще бо Аз убива́емь быва́ю, и не творю́ сие́ зна́мение е́же не люби́тися от Отца́ - отню́ду же ниже́ вам смуща́тися подоба́ет: а́ще бо в любви́ пребу́дете Мое́й, ничи́м же вас сия́ лю́тая повредя́т в сло́во любви́».

Нравоуче́ние се́дмьдесять шесто́е: О су́щей во Христа́ любви́, и о лихоима́нии, и я́ко лу́чше убожа́ти не́жели богате́ти:

Поне́же у́бо ве́лия и непобеди́ма любо́вь, и несть глаго́л прост - да пока́жем де́лы сию́. Той враго́в су́щых примири́, мы, дру́зи бы́вше, да пребыва́ем. Той нача́т, мы поне́ да после́дуем. Той не в Свое́ приобре́тение лю́бит, - не тре́бующь бо есть, - мы поне́ в поле́зное нам. Той враго́в су́щых возлюби́л есть, мы поне́ дру́га су́ща да возлюби́м. Я́ко ны́не у́бо спроти́вная твори́м. На всяк день ху́лится нас ра́ди Бог хище́ний ра́ди, лихоима́ний ра́ди. И не́гли не́кто от вас рече́т: на всяк бо день о лихоима́нии бесе́дует. Да бы и на вся́ку нощь мо́щно сие́ рещи́! Да бы и на то́ржищи после́дующему, и на трапе́зе, да бы и жена́м, и любе́зным, и дете́м, и рабо́м, и земледе́льцем, и сосе́дом, и само́му помо́сту и стена́м мо́щно бы́ло сего́ при́сно отрыга́ти гла́са - да поне́ ма́ло осла́били бы́хом си́це. Вселе́нную пости́же всю сий неду́г и всех держи́т душа́, и мно́го мамо́ны томи́тельство! От Христа́ искупи́хомся, и зла́ту рабо́таем. Ина́го влады́чество пропове́дуем, и ино́му покаря́емся, и е́же а́ще повели́т, со усе́рдием твори́м и повину́емся: и ро́да, и дру́жбы, и естества́, и зако́нов, и всех не ве́мы о́ного ра́ди. Никто́же взира́ет на не́бо, никто́же помышля́ет бу́дущая: но бу́дет вре́мя, егда́ ниже́ слове́с сих бу́дет вре́мя. «Во а́де бо, рече́, кто испове́сться Тебе́?». Жела́тельно зла́то, и мно́го подае́т наслажде́ние нам, и че́стных бы́ти твори́т: но не си́це я́коже не́бо. Бога́таго бо и отвраща́ются мно́зи и ненави́дят - живу́щаго же в доброде́тели стыдя́тся и почита́ют. Но посмеява́ется убо́гий, а́ще и доброде́телен бу́дет рече́? Но не пред челове́цы, но пред безслове́сными: те́мже ниже́ обраща́тися подоба́ет. Ниже́ бо а́ще ржа́ли бы у́бо ослы́, гра́ели же бы [вра́ны], прему́дрии же вси похвали́ли бы - оста́вльше сие́ позо́рище, к безслове́сных ли вопие́ниям возре́ли бы́хом? И́бо подо́бнии осло́в го́рши, настоя́щым чудя́щиися. Та́же а́ще у́бо царь земны́й чуди́тся, ни еди́но же мно́гих твори́ши сло́во, а́ще и вси подсмеява́ют. А́ще же а́нгельскый Влады́ка похваля́ет, осло́в ли и комаро́в похвале́ния взыску́еши? Сие́ бо си́и к Бо́гу, па́че же ниже́ сие́, но а́ще что сих худе́йши. Доко́ле в ти́не обраща́емся? Доко́ле ласка́телей и чре́вообъядли́вых посажда́ем нам позара́таев? Они́ зе́рньщиков мо́гут искуша́ти, до́бре пья́нствующих, чре́ву живу́щых, доброде́тели же и зло́бы ниже́ во сне мечта́ти мо́гут. Та́же, а́ще убо кто тебе́ укори́т, я́ко пото́ков водоте́чных не ве́си изводи́ти, ничто́же непщу́еши лю́то, но и посмее́шися не иску́ство сие́ предложи́вшему. Доброде́тель же ли навыка́ти хотя́, и́же ниже́ сию́ ве́дящых искуша́телей посажда́еши?

Сего́ ра́ди никогда́ же достиза́ет в хи́трость сию́: не бо́ иску́сным, но неуче́ным попуща́ем на́ша ве́щи. Они́же не по сло́ву хи́трости, но по своему́ неуче́нию искуша́ют. Те́мже молю́, да пренебреже́м мно́гих, па́чеже похва́л, да жела́ем не име́ний, ни бога́тства, ниже́ зло не́что да непщу́ем нищету́: и́бо мудрова́ния и терпе́ния и вся́кого любому́дрия учи́тельница нам нищета́. Поне́же и Ла́зарь нищете́ соживя́ше и венча́ся, и Ия́ков хле́ба еди́наго жела́ше получи́ти, и Ио́сиф в после́дней нищете́ быва́ше, и не раб то́кмо бе, но и ю́зник: и сего́ ра́ди па́че ему́ чуди́мся. Не си́це похваля́ем, егда́ пшени́цу разделя́ше, я́ко егда́ в юзи́лищи живя́ше. Не егда́ диади́мою облага́шеся, но егда́ вери́гою. Не егда́ на престо́ле седя́ше, но егда́ наве́товашеся и продая́шеся. Сия́ у́бо вся помышля́юще и су́щая от подвиго́в сих да плете́м венцы́, не бога́тьству и пи́щи и че́стем и могу́тствам, но нищете́ и вери́зе и ю́зам и терпе́нию е́же о доброде́тели чуди́мся. Коне́ц бо о́нех молв испо́лнен и смуще́ния, и настоя́щему совоку́плен есть житию́. Си́хже плод - не́бо и я́же на небесе́х блага́я, «я́же ни о́ко ви́де ниже́ у́хо слы́ша», и́хже бу́ди всем нам получи́ти благода́тию и человеколю́бием Го́спода на́шего Иису́с Христа́, И́мже и с Ни́мже Отцу́ сла́ва со Святы́м Ду́хом, ны́не и при́сно и во ве́ки веко́в. Ами́нь.