Во дни о́ны, возложи́ И́род царь ру́це озло́бити су́щыя не́кия и́же от Це́ркви, уби́же Иа́кова бра́та Иоа́ннова мече́м.

Толкование Златоу́стаго: И́рода царя́, не су́щаго при Христе́ глаго́лет, но ино́го по нем. Се па́ки искуше́ние друго́е. Зри и́же изнача́ла рех, ка́ко ве́щи соплета́ются, ка́ко сла́бостию и ско́рбию вся стро́ятся. Не ктому́ иуде́и, ниже́ собо́рище, но сам царь - бо́льшая власть, люте́йша брань.

«Озло́бити не́кия от Це́ркве» рече́: я́коже и зверь неми́лостивно и несмы́слено творя́ше. Се есть, е́же глаго́лаше Христо́с: «Ча́шу Мою́ испие́те, и креще́нием и́мже Аз креща́юся крести́теся». Зри, я́ко ве́рнии лю́дие и е́же от них состоя́ние, Церко́вь нарица́ется.

«Во вре́мя о́но» рече́. Ко́е вре́мя? Е́же при Кла́вдии ке́сари. Га́ие у́бо, самоде́ржец сый гре́ком, Агри́ппу поста́ви царя́ бы́ти иуде́ом, И́рода изгна́в, сконча́вша житие́ свое́ в Логдо́не гра́де галиле́йстем с жено́ю свое́ю Иродиа́дою. Сей есть и́же бе при стра́сти Госпо́дни, я́коже пи́шет Ио́сиф, и я́коже пи́шет Евсе́вие во второ́м сло́ве церко́вного зако́на. Несоглаше́ние у́бо есть, е́же глаго́лати зде Агри́ппу И́рода: или́ погреше́ние списа́теля бысть, или́ ме́ста о́наго, Агри́ппа И́род глаго́лется. Поне́же и вре́мя, и дея́ния того́ су́ща показу́ет, си́речь Агри́ппу при Клавди́и ке́сари, и́же по Га́ии бысть самоде́ржец.

Толкова́ние Амо́ниево: Ве́домо бу́ди, я́ко Иа́ков пе́рвый му́ченик бысть от двою́ на́десяте учени́к: и от И́рода же или́ закла́н быв, или́ мече́м в главу́ усе́чен быв. Бя́ше же ин Иа́ков брат Госпо́день, сего́ ра́ди зна́меная рек: «бра́та Иоа́ннова».

Су́щее: И ви́дев, я́ко го́де есть иуде́ом, и приложи́ я́ти и Петра́. Бя́хуже дни́е опре́сночнии. Его́же и ем, всади́ в темни́цу, преда́в четы́рем четвери́цам во́инов стрещи́ его́, хотя́ по Па́сце извести́ его́ к лю́дем.

Толкова́ние Златоу́стаго: «Ви́дев же, я́ко уго́дно есть иуде́ом» рече́. Уго́дно уби́йство непра́ведно зло́бе . Нече́стие, безме́стных хоте́ний служа́шеся. Па́ки безако́нное иуде́йское собо́рище, и на уби́йство поуча́ется, и в таково́е вре́мя по пра́знице такова́я творя́т.

Су́щее: И у́бо Петра́ стрежа́ху в темни́це. Моли́тва же бе приле́жна быва́ема от Це́ркве к Бо́гу о нем. Егда́ же хотя́ше его́ извести́ И́род, в нощи́ той бе Петр спя между́ двема́ во́инома, свя́зан желе́знома у́жема двема́. Стра́жие же пред две́рми стрежа́ху темни́цу.

Толкова́ние Златоу́стаго: Ели́ко крепча́йша бя́ше у́зы темни́ца, толи́ко чудне́йше бе показа́ние: се же вся бе о Петре́ да иску́снейши бу́дет. «Моли́тва же быва́ше по вся дни к Бо́гу зань» рече́. Зри́те, ка́ко прилежа́ху они́ о учи́телех: не соблазни́шася, ни смути́шася, но на моли́тву обрати́шася, и́стинное побо́рство.

Толкова́ние Севи́ра архиепи́скопа Антиохи́йскаго: Се и нам худы́м поле́зно есть, е́же моли́твы и слез́ы друг о дру́зе приноси́ти: о́бщая бо страда́ния Це́ркви, о́бщаго и моле́ния тре́буют. А́ще бо и верхо́вный апо́столом по́мощь от Це́ркви тре́боваше, кольми́ па́че мы, недоста́точнии и греху́ повин́нии, потре́буем моли́твы от нас приноси́тися от ве́рных бли́жних уд су́щих Це́ркви, и нака́занных стена́ния и сле́зы благолюбе́зны о бли́жних твори́ти.

Су́щее: И се а́нгел Госпо́день прии́де, и свет возсия́ во хра́мине. Ткнув же в ре́бра Петра́, воздви́же его́, глаго́ля: «Воста́ни вско́ре». И спадо́ша ему́ у́жа желе́зная с ру́ку. Рече́ же а́нгел к нему́: «Препоя́шися, и вступи́ в плесни́цы своя́». Сотвори́ же та́ко. И глаго́ла ему́: «Облецы́ся в ри́зу свою́ и после́дствуй ми». И изше́д, в след его́ идя́ше. И не ве́дяше, я́ко и́стинна есть бы́вшее от а́нгела: мня́шеже сон зре́ти.

Толкова́ние Златоу́стаго: «В той но́щи восхи́ти его́ а́нгел, и свет возсия́, рече́, в хра́мине», да не мнит мечта́ние бы́ти. И свет никто́же не ви́де, кроме́ о́ного . И зри Петра́ спя́ща, и не су́ща ниже́ в по́двизе, ниже́ в стра́се в той но́щи, в не́йже извести́ся хотя́ше на суди́ще. Спа́ше, рече́, вся на Бо́га возложи́в. Толи́ко бо доброде́тель мо́жет, ели́ко затворе́ным су́щим две́рем и вери́гам возложе́ным, извести́ апо́стола и изба́вити от всех о́нех. Но я́коже доброде́тели су́щии мно́го мо́жет, та́ко зло́бе бы́вшии ничто́же по́льзует мно́жество. Зри опасе́ние темни́цы: с ним стра́жники бя́ху спя́ще.

«Воста́ни рече́ ему́ а́нгел, и свет восия́». Почто́ свет? Я́ко да ви́дит и слы́шит Петр, и не мнит мечта́ние бы́ти, и вско́ре я́ко да не в малоду́шии бу́дет. «И ткнув его́» рече́: си́це глубоко́ спя́ше, не смуща́ющуся бысть, но да уве́рится бы́вшее. «Мня́ше бо ся сон ви́дя»: па́ки и о сем показу́ет, я́ко не злоде́йство бе, - никто́же бо прокопа́ти хотя́, - и толи́ко потща́ние твори́т, я́ко и в сапоги́ обу́тися и поя́сатся .

Су́щее: Проше́дша же стра́жу пе́рвую и втору́ю, приидо́ста во врата́ желе́зная, вводя́щая во град, я́же о себе́ отверзо́шася и́ма. И изше́дше, преидо́ша сто́гну еди́ну. И а́бие отступи́ а́нгел от него́. И Петр быв в себе́, рече́: «Ны́не вем вои́стину, я́ко посла́ Бог а́нгела Своего́ и изъя́т мя из руки́ И́родовы и всего́ ча́яния лю́дий иуде́йских».

Толкова́ние Златоу́стаго: Егда́ же отъи́де а́нгел, тогда́ разуме́ Петр. Ви́диши ли, коли́ко Петр преиме́ние зна́мения? Ка́ко ужаса́ется ви́дящего, ка́ко не оставля́ет в неве́рии бы́ти? А́ще бо Петр мня́шеся сон ви́дя, толи́ко вре́мя сам опоя́сався и обу́вся, что друзи́и пострада́ти хотя́ше? «Проидо́ста рече́ пе́рвую стра́жу и втору́ю, и, вше́дша во гра́д, проидо́ста сто́гны еди́ны, и отъи́де от него́ а́нгел». Бы́вшая внутрь темни́цы чудне́йша бы́ша, се же челове́чьстейшее есть. Егда́ ни еди́но возбране́ние бе, тогда́ а́нгел отъи́де. Вои́стинну у́жасу досто́йно бе. «Ны́не позна́х реч́е я́ко Госпо́дь посла́ а́нгела Своего́, и изъя́т мя». Не тогда́, егда́ в темни́цы бе. Почто́ же быва́ет се: и не бысть Петру́ в чу́вство быва́емому, такова́го получи́в избавле́ния, и вери́гам от ру́ку спа́дшим, и се вели́ко зна́мение, е́же внеза́пу не избе́гнути? Хо́щет бо повнегда́ изба́витися, тогда́ о сем в чу́вство приити́.

Коне́ц толкова́нию.