И егда́ сконча́шася дни́е Пятидеся́тницы, бе́ша вси апо́столи единоду́шно вку́пе. И бысть внеза́пу с небесе́ шум, я́ко носи́му дыха́нию бу́рну. И испо́лни весь дом, иде́же бя́ху седя́ще.

Толкова́ние Златоу́ста: Подоба́ше у́бо пра́зднику су́щу сия́ бы́ти, да су́щии в распя́тии Христо́ве и сия́ зрят. Поне́же у́бо в день Пятьдеся́тницы да́сться зако́н, Бо́гу я́вльшуся и зако́но положи́вшу, и Моисе́ю скрижа́ли прие́мшу, - подоба́ше в то́йже день и Ду́ха Свята́го благода́ть Христо́вым ученико́м и апо́столом ниспосла́тися, да и госпо́дьство Ду́ха пока́жется, и Бо́жие явле́ние яви́тся, и пока́жется неразде́льно естество́ Бо́жия соста́ва: в Ве́тсем заве́те и Но́вем, и в разли́чных времена́х еди́но содева́я согла́сие боже́ственных слове́с. Я́коже Спас наш Иису́с Христо́с, хотя́ испо́лнити святу́ю стра́сть, не изво́ли во и́но вре́мя Себе́ вда́ти на страсть, но в не́же вре́мя дре́вним да́сться зако́н, да яви́тся я́ко Святы́й Дух и тогда́ зако́н положи́, - и ны́не зако́н полага́ет.

Северия́на. Христо́с Бог наш пострада́в во́льное страда́ние пло́тию, и воскре́се из ме́ртвых, и воскреси́в с Собо́ю грехо́м умерщвле́нных нас, и дия́волю держа́ву разруши́в, - сего́ ра́ди да́же до Пятьдеся́тницы на земли́ не покланя́емся, моля́щеся, но на вразе́х на́ших пое́м, глаго́люще: «Ти́и спя́ти бы́ша и падо́ша, мы же воста́хом и испра́вихомся» . О́гнеными же язы́ки Ду́ху Свято́му боголе́пно я́вльшуся нам, коле́но прекланя́ем, виде́ния не терпя́ще, явля́я, я́ко Ду́хом Святы́м Тро́ичное соверше́ное поклоне́ние научи́хомся: «Дух бо Бог, и покланя́ющимся Ему́, ду́хом и и́стинною подоба́ет кла́нятися» . И испо́лни, рече́, весь дом, иде́же бя́ху седя́щеи, дом - всему́ ми́ру о́браз бе.

Су́щее: И яви́шася им разделе́ни язы́цы, разделя́юще, я́ко о́гнени.

Толкова́ние: И я́ко о́гнени рече́, да не еди́но чу́вственно, но о Ду́се помы́слиши. Егда́ бо Иоа́нну Крести́телю Святы́й Дух позна́тися хотя́ще, виде́нием голуби́нным на главу́ Христо́ву сни́де. Ны́не же, егда́ все мно́жество обрати́ти подоба́ше, я́ко язы́цы о́гнены яви́шася.

Севериа́на: Не рече́ о́гнени, но я́ко о́гнени. И́бо не бя́ше огнь ви́димое, но огнь Ду́ху Свято́му предте́ча бе, да в страх подви́гнет апо́столы Ду́ха Свята́го виде́ние. И да не в доса́ду прии́меши тогда́ свято́е и покланя́емое естество́, я́ко о́гненое виде́ние яви́ся. Сказа́ет но́вая бы́вша дре́вле Моисе́ом: глаго́лет Моисе́й виде́ние Бо́га Изра́илева в горе́ Сина́йстей я́ко огнь горя́. Зри сказа́ние согла́сно су́ще, сла́ва о́на Изра́илева я́ко огнь. Не рече́ «огнь», но «я́ко огнь». И зде яви́шася язы́цы я́ко о́гнени разделя́юще, не рече́ «разделя́ющеся», но «разделя́юще». Внима́й ма́ло, ка́ко се бысть. Не яви́шася а́бие язы́цы, но огнь мно́го, та́же я́ко сломя́шеся огнь, и разделя́шеся язы́цы. Кто разделя́ше или кто разделя́емый? Не естество́ Ду́ха разделя́шеся, но бе Дух Святы́й разделя́яй. Разделя́емо е́же бе дарова́ние Свята́го Ду́ха. Дух бо не разделя́ется, но разделя́ет. Яви́шася, рече́, разделя́юще язы́цы, я́ко о́гнени. Почто́ я́ко о́гнени, почто́ язы́цы? Поне́же пропове́данием бе спасе́ние; да о́браз ска́жет де́йство, я́ко ничи́м же ины́м не дае́тся Дух Святы́й виде́нием язы́к, но о е́же пропове́данию процвести́ апо́стольским уче́нием. И я́же лиша́еми бы́ша ры́бари не навыче́нием свое́ю гру́бостию, сия́ даде́ся им их ра́ди, да те́ми глаго́лемая разли́чными язы́ки, и преиме́ние дарова́ние иму́ще просвеща́ти слы́шащих. Подоба́ше же и о́гненую си́лу име́ти, во е́же сне́сти су́щий по всему́ ми́ру тиме́нный грех. И я́коже огнь и́мать све́тлостную и горя́щую си́лу, си́це и сло́во апо́стольское просвеща́ше ве́рующая и снеда́ше сопроти́вящаяся. Тако́в имя́ше о́гненный язы́к Па́вел, и́мже и анфипа́та просвети́ и Ели́ма волхва́ ослепи́. То́юже си́лою мно́гия просвети́, и сего́ омрачи́.

Севериа́на епи́скопа Антиохи́йскаго: По е́же на небеса́ восхожде́ние вели́каго Бо́га и Спа́са на́шего Иису́са Христа́, по обеща́нии нело́жнаго гла́са о́наго, о́гнеными язы́ки на апо́столы Дух Святы́й сни́де, и́мже вся́ческими язы́ки по всей вселе́нней глаго́люще и Ца́рство небе́сное пропове́дающе: явля́ху, я́коже дре́вле челове́ческому гла́су, еди́ну су́щу, на мно́ги раздели́в, ны́не всех язы́к во еди́но дыха́ние сочета́.

Сущее: И се́де же на еди́ном кого́ждо их, и испо́лнишася вси Ду́ха Свя́та.

Толкование Иоанна Златоуста: И се́де на еди́ном кого́ждо их рече́, си́речь, пребы́сть, почи́. Е́же бо се́сти, спожи́ти и спребыва́ти назна́менует. У́бо ли на двунадесятих то́чию сни́де? Ни, но на сто и два́десятих. Не про́сто у́бо приведе́ свиде́тельство проро́ка Петр глаго́ля: «И бу́дет в после́дняя дни, глаго́лет Бог, излию́ от Ду́ха Моего́ на вся́ку плоть» , и про́чая.

Севериа́на епи́скопа Габа́льскаго: И бе ви́дети над глава́ми их огнь не попаля́я, но освяща́я и просвеща́я. Почто́ у́бо язы́ки во усте́х свои́х не прия́ша, но на главы́? Подо́бно, я́ко не в язы́це, си́речь, в есте́ственный орга́н да́стся Дух Святы́й, да не мнят я́ко свои́ми бо́ки или́ свои́ми усты́ глаго́лют, я́же не име́яху. Но я́коже во́ды на не́бо взе́млеми верху́ гор достиза́ют, и от высо́т в де́бры схо́дят, та́ко верх апо́стольский, я́ко го́ры благода́ть Свята́го Ду́ха дости́гнеши, про́чее пода́ст се по всей главе́, та́же во усте́х и в се́рдцы и вся́ко, всего́ челове́ка испо́лни. Почто́же па́ки на главу́ сни́де Святы́й Дух? Поне́же апо́столы рукоположе́ние прия́ша, е́же бы́ти всей вселе́нней учи́телие. Прия́ша бо от Спа́са Иису́са Христа́ рукоположе́ние е́же бы́ти апо́столы не всей вселе́нней, но то́чию во Иуде́и. Те́мже запреща́ше им Спас глаго́ля: «В путь язы́к не иде́те, и во град Самари́йский не вни́дете». Дух же Святы́й соше́д, рукоположи́ апо́столы всей вселе́нней. И а́ще не бы́ша прия́ли Ду́ха Свята́го благода́ть, не бысть подало́ им апо́стольство всего́ ми́ра. Свиде́тельствует сих глаго́л Влады́ки рече́: «И приими́те си́лу прише́дшу Свято́му Ду́ху на вы. И бу́дете Ми свиде́телие во Иеросали́ме и по всей Иуде́и и Самари́и и до после́дних земли» . Нача́ло у́бо от Спа́са прия́ша апо́столы, коне́ц же, си́речь, соверше́ние, прише́ствием Свята́го Ду́ха. «И испо́лнишася вси Свята́го Ду́ха», рече́, испо́лнишася и нача́ша глаго́лати, я́коже Дух Святы́й дая́ше им провещева́ти. Не рече́ веща́ти, но провещава́ти. И́бо не о себе́ глаго́лаху, но Святы́м Ду́хом. Про́чее, Бо́жия благода́ть дая́ше смотри́ изнача́ла, апо́столом искуше́но бы́ти сло́во. Ка́я бе потре́ба пропове́дник, слы́шащих не су́щих, ка́я потре́ба се́мени, земли́ неора́не? Поне́же у́бо подоба́ше нача́ток язы́к от самы́х ученико́в и апо́стол чин прия́ти, приво́дит списа́тель, «и нача́ша глаго́лати ине́ми стра́нными язы́ки», и про́чая.

Су́щее: И нача́ша глаго́лати ине́ми язы́ки, я́коже Дух дая́ше им провещева́ти.

Толкова́ние: Почто́ у́бо пре́жде ине́х даро́в язы́ки дарова́ние прия́ша апо́столы? Повсю́ду проходи́ти хотя́ху. Я́коже во вре́мя столпотворе́ния еди́н язы́к на мно́ги разделя́шеся, си́це тогда́ мно́ги язы́цы мно́гажды в еди́ного челове́ка бя́ше, и то́йже челове́к, пе́рский, гре́ческий, инди́йский, и ины́х мно́гих язы́к глаго́лаше, Ду́ху внуша́ющу ему́. И дар нарица́шеся «дарова́ние язы́к», поне́же мно́гими внеза́пу можа́ше глаго́лати гла́сы.

Су́щее: Бя́ху же во Иеросали́ме живу́ще иуде́и, му́жие благогове́йни, от всего́ язы́ка и́же под небесе́м. Бы́вшу же гла́су сему́, сни́деся наро́д и размеси́ся, я́ко слы́шаху еди́ного кого́ждо свои́м язы́ком глаго́лющим им.

Толкова́ние: Е́же от всех язы́к та́мо жи́ти, благогове́инства зна́мение бе. Оте́чества оста́вивше, и дом, и сро́дники, да пока́жет им по дре́внему зако́ну, три́жды на год в це́ркви явля́тися. Сего́ ра́ди та́мо живя́ху от всех язы́к. Поне́же в хра́ме сотвори́ся бы́вшее, подо́бно отвну́ наро́ды стеко́шася. Бысть, рече́, внеза́пу с небеси́ глас, да бы́вшаго ра́ди гла́са мно́жество собере́тся та́коже, я́коже есть обы́чай челове́ком, друг дру́га вопроша́ху, глаго́люще: «Трус ли бысть? Ветр ли бысть? Бо́жие ли смотре́ние се бысть?». Та́же глаго́лет: Ни, но ученицы́ Распя́таго Дух Святы́й прия́ша и нача́ша вси не я́ко дру́зи су́ще, но я́ко самови́дцы стра́ннаго виде́ния та́мо собира́тися. Бы́вшу же, рече́, гла́су тому́, сни́деся наро́д и размеси́ся стра́ха ра́ди, и да пока́жет, я́ко размеше́ние страх сотвори́, и стра́нное виде́ния: «Размеси́шася, рече́, стра́хом», есть бо размеше́ние устрое́ние содева́я, егда́ страх Бо́жий смуща́ет тя, во умиле́ние тя прино́сит. Смути́лся еси́ сове́стию грехо́вною? Устро́ился еси́ упова́нием покая́ния.

Су́щее: Дивля́хужеся вси, и чужда́хуся глаго́люще друг ко дру́гу: «Не се ли си́и вси суть глаго́лющеи галиле́яне. И ка́ко мы слы́шим ко́ждо свои́м язы́ком на́шим, в не́мже роди́хомся, парфя́не и ми́дяне и елами́те, и живу́щеи между́ река́ма, во Иуде́и же и Каппадоки́и, в По́нте и во Аси́и, во Фриги́и же и Памфили́и, во Еги́пте и страна́х Ливи́йсках, и́же по Кирини́и? И приходя́щеи ри́мляне, иуде́и же и прише́льцы, кри́тяне и ара́влян, слы́шим глаголю́щим им на́шими язы́ки вели́чия Бо́жия». Толкова́ние Севи́ра епи́скопа Габа́льскаго: Помышля́ху у́бо в себе́ глаго́лаху друг ко дру́гу вси, и́же от язы́к: «Не се ли вси глаго́лющеи суть галиле́яне?», - познава́ху бо ся ученицы́ от пребыва́ния Спа́сова, и от глаго́лания пе́рваго. Пятна́десятим язы́ком у́бо прия́ша дарова́ния: ели́ко к настоя́щему тогда́ наро́да. Ка́я у́бо потре́ба бя́ше пе́рскаго язы́ка, пе́рсян не су́щих? Но я́коже во бране́х вся́ко ко́зньство стро́ится, и вся́ко ухищре́ние ко́ждо сих де́йствует в потре́бе и ну́жди бы́вшей, си́це толи́цы язы́цы яви́шася тогда́, ели́ко бе́ша язы́ком нача́тки, да и Тро́ичное де́йство яви́тся, и слуги́ двана́десяте. Бя́ше бо ви́дети галиле́янина Петра́, ри́мски глаго́люща, язы́ком его́же не зна́яше, да испо́лнится сло́во проро́ческое: «Язы́ка его́же не ве́деша, услы́шаша» . Сматря́ет же Дух Святы́й, да не бу́дет ра́спря во апо́столех, где подоба́ет кому́ждо их поити́, дае́тся кому́ждо язы́к я́коже пра́вило: Ри́мски ли глаго́леши? Иди́ в Рим. Пе́рски ли глаго́леши? Иди́ в Пе́рсию. И я́коже рукоположе́ние свяще́нническо пове́дует рукоположе́наго досто́инство: или́ дия́кон, или́ презви́тер, или́ епи́скоп, не мо́жет по оглаше́нии са́на своего́ похи́тити и́но досто́инство, си́це и апо́столы Ду́хом Святы́м прия́ша пра́вило: и како́в язы́к кому́ дая́шеся, на такову́ страну́ идя́ше. Но поне́же па́ки, до́ндеже хотя́ху поити́ ко́ждо в свою́ страну́, имя́ху проходи́ти сквозе́ мно́гих язы́к, того́ ра́ди приима́ху я́ко помо́щники и́ни язы́ки, от рукоположе́ния иму́ще. Обрета́ется у́бо ко́ждо от апо́стол разли́чными язы́ки глаго́ля, поне́же и посреде́ мно́гих язы́к прохожда́ху. И бысть пра́вило и преде́л, ему́же ко́е отлуче́но бе: сей да взы́дет восто́чныя стра́ны, сей же на за́пад, ов у́бо на се́верныя, ов же на ю́жныя. И растека́хуся пропове́дницы, я́коже мо́лние внеза́пу, я́коже о них глаго́ланно бысть проро́ческим язы́ком: «Просвети́ша мо́лния Твоя́ вселе́нную ви́де, и подви́жеся земля́» . И́бо мо́лния не подвиза́ют зе́млю, но трус; но поне́же апо́столское пропове́дание свободи́ язы́ки от беззако́нных обы́чаев, ви́де и подви́жеся земля́. И ка́ко подвиза́шеся? Егда́ вни́де Па́вел в Македо́нию, подвиза́ся земля́: нача́ша бо е́ллини глаго́лати: «Я́ко и́же вселе́нную смуща́ющеи, си́и зде приидо́ша». Сия́ же о́браз нам бы́ша, да никогда́ же, слы́ша досажде́ния, сло́во поскорби́ши. Не оскудева́ет бо доброде́тель за́вистию, ни Бо́жие уче́ние злых муче́нием.

Сущее: Ужаса́хужеся вси и не домышля́ху еди́н ко друго́му глаго́люще, что у́бо хо́щет се бы́ти. Ини́иже руга́ющеся глаго́лаху: «Я́ко мстом испо́лнени суть».

Толкование Златоустаго: О безу́мию и несту́дству! Тре́тий час дню бе, и глаго́лаху: «Вино́м пия́ни суть». И что чу́дно? И́же бо и Самого́ Влады́ку, бе́сы изгоня́ща, бе́са име́ти глаго́лаху. Иде́же бо зло́ба и за́висть, не и́щет, что рещи́, толи́ко бы рещи́ .

Севериа́на: Бог де́йствоваше, и пия́нству сия́ воспомина́ху, пия́нству вмени́ся Ду́ха Свята́го плод! Позри́ зло́бу, и вре́менем, и ча́сом облича́ему. В Пятдеся́тницу отку́ду есть мсто? Но лжа сле́па есть, и не весть, ка́ко лжет. Та́же егда́ пия́нство ли разли́чныя язы́ки дае́т, или́ и су́щаго безве́стна твори́т? Зри у́бо что сотворя́ет Бог: оставля́ет доброде́тель на поруга́ние, да пре́жде сни́дет мно́жеству поруга́тель, и тогда́ просия́ет си́ла святы́х, и та́ко де́йство яви́тся, разруша́я лжу. А́ще бо и не помышля́ху иуде́е руга́ние бы́ти, оба́чеже не хотя́ху приити́ и слы́шати. Попусти́ у́бо Бог, да мне́ние поруга́ния мно́зех на таково́е виде́ние собере́т. Апо́столом у́бо ева́нгельское уче́ние принося́щим обновле́нием Ду́ха, а не обетша́нием пи́смени; и се зна́мение, е́же глаго́лати им вся́кому ро́ду их язы́ком, и́же в гресе́х состаре́вшиися иуде́е и́стинну, и не хотя́ще, глаго́лаху, «я́ко мстом испо́лнени суть»: вино́ бо но́во бе соверше́на Ду́ха Свята́го благода́ть, е́юже апо́столы, о́гнеными язы́ки очи́стившеся, испо́лнишася. Коне́ц толкова́нию.