Во дни о́ны, став Петр со еди́нем на́десяте, воздви́же глас свой и рече́ им: «Му́жие иуде́йстии, живу́щии во Иеросали́ме вси. Се вам разу́мно да бу́дет, и внуши́те глаго́лы моя́, не я́коже вы непщу́ете си́и пия́ни суть. Есть бо час тре́тий дне.
Толкова́ние: Навы́кни про́чее, что де́йствует Дух Святы́й. Зри, что бе Петр пре́жде благода́ти, и како́в сотвори́ся по благода́ти. Пре́жде да́же не прия́т о́гнеными язы́ки, от еди́ны рабы́ни худы́ устраши́ся вопроша́емь и глаго́ла не ве́де Челове́ка. Зде же мно́жество неизче́тно, и глаго́ла с дерзнове́нием. Почто́ у́бо? «Не́сте вы глаго́лющии, рече́ Госпо́дь, но Дух от Отца́ ва́шего глаго́ляй в вас». Став Петр со еди́нем на́десяте, взят со дерзнове́нием глас свой рече́ к ним. Что глаго́ла к ним? Провеща́ поуче́ние, я́ко не суть пия́ни, а́бие от гла́са яви́л есть, я́ко не иступи́ша умо́м, я́ко не не́кою бедо́ю обдержа́ни бы́вше. Что же ста Петр со еди́нем на́десяте? О́бщий возгласи́ша глас, и всем уста́ той бя́ше. И предстоя́ще единына́десяте, свиде́тельствующе глаго́лемым, воздви́же глас свой рече́, си́речь, со мно́зем дерзнове́нием, да разуме́ют Ду́ха Свята́го благода́ть. Нетерпе́вый бо вопроше́ние худо́й отрокови́цы, сей посреде́ наро́да уби́йц, в толи́це бесе́дует дерзнове́нии, я́ко не неве́рну воскресе́нию се бысть зна́мение, посреде́ челове́к глумя́щихся и такова́я поруга́ющих. Иде́же бо Дух Святы́й прихо́дит, зла́ты ме́сто бре́нных твори́т. Зри ми про́чее Петра́, и испы́туй страху́ющагося , сматря́й апо́стольское обще́ние. Ти́и подава́ху ему́ си́лу сло́ву, и́бо не подоба́ше всем глаго́лати, е́же в тре́тий час сия́ бы́ти. Не про́сто бо бысть. Тогда́ бо о́гненая све́тлость показу́ется, егда́ о де́лех внима́ют челове́цы, егда́ о я́стии и питии́, егда́ вси по торгу́ на ку́пли суть, егда́ све́тлость па́чеже в таковы́й час дню быва́ет. Ви́диши ли коли́ки свобо́ды сло́во испо́лнено есть?
Су́щее: Но се есть рече́нное проро́к Ио́илем: «И бу́дет в после́дняя дни глаго́лет Госпо́дь, излию́ от Духа́ Моего́ на вся́ку плоть. И прореку́т сы́нове ва́ши и дще́ри ва́ша, и ю́ноша ва́ша виде́ния у́зрят, и ста́рцы ва́ши со́ния ви́дят».
Толкова́ние: И́же бо проро́ком обеща́вый Бог посла́ти Дух Святы́й на челове́ки, се и посла́, и Бог Петро́м пропове́дуется, Свое́ обетова́ние испо́лнив. Ви́диши ли, я́ко недоуме́ния челове́ческа ничто́же не разреша́ет, то́чию проро́ческое свиде́тельство в недоуме́нии бы́вшим о нем, глаго́лет Петр: «се есть глаго́лемое проро́ком Ио́илем»?. «Излию́ от Ду́ха Моего́ на вся́ку плоть», не рече́ излию́ Дух Мой, но от Ду́ха Моего́. Не Дух бо излива́ется, но дар Ду́ха. «И прореку́т сы́нове ва́ши», и про́чая. Зри, ка́ко разли́чно Свята́го Ду́ха открове́ние быва́ет. Ов у́бо прорица́ет, имы́й Ду́ха Свята́го благода́ть. Ин, не дово́лен сей е́же послужи́ти таково́й ве́щи, прие́млет виде́ния дар, я́коже Петр, в час шесты́й о́браз ви́де. И я́ко Корни́лие в час девя́тый ви́де а́нгела о́ного, е́же бо в се́рдцы ви́димое, не глаго́лется сон, но ви́димое. Други́й ви́дит виде́ние, я́коже глаго́лет ви́дяй ше́ствуяй. Други́й же лице́м еди́нем ви́дит виде́ние. Други́й сна мечта́нием наказу́ется. Е́же пе́рвое у́бо проро́чество, второ́е е́же виде́ние, тре́тий же сон. Ста́рцы со́ния ви́дяху, поне́же ста́рость немощна́ на послуже́ние бе. А е́же и дще́рем прорица́ти рещи́, се благода́ти по всех ве́рующих, бога́тное дарова́ние я́вственно есть. Ста́рческий же во́зраст глаго́лет, достиже́ние доброде́телем, и преиме́ние, и исправле́ньми све́тлыми состаре́ем. Ю́ность же, ю́же в ве́ре кре́пость, и цвету́щее на бла́го естество́, показа́ние пе́рвому. Блаже́нный Па́вел во сне ви́дев македо́ниянина о́ного глаго́люще: «Прише́д в Македо́нию помози́ нам», бя́ше бо стар умо́м. Второ́му же Ана́ния, к нему́же в виде́нии, глаго́ла ему́ Бог о блаже́ннем Па́вле, бе бо ве́рою мо́щен и ю́ноша естество́м.
Су́щее: И́бо на рабы́ Моя́, и на рабы́ня моя́ во дни о́ны излию́ от Ду́ха Моего́, и прореку́т. И дам чудеса́ на небеси́ горе́, и зна́мения на земли́ ни́зу. Кровь и огнь и куре́ние ды́ма. Со́лнце преложи́тся во тму и луна́ в кровь.
Толкова́ние: Сия́ и о бу́дущем суде́ глаго́лет, о Иеросали́мове плене́нии, в не́же вре́мя бу́дут небе́сная зна́мения и земна́я стра́шна: кро́ви же от грек излия́ни мно́ги на иуде́е, ды́му же быва́ему, градово́м и се́лом запале́ным, суд отдаю́щим иуде́ом безу́много ра́ди беззако́ния, е́же соде́яша на Христа́, е́же ни то са́мое со́лнце зре́ти нетерпе́, но а́бие си́лу све́та своего́ сокры́ и мрак омраче́нным смы́слы показа́. Но ниже́ луна́ рече́ безстра́стна пребы́сть, яря́щи же ся, я́коже рещи́ на беззако́нныя иуде́и, на кровь сребро́ ви́денное, свое́ прело́жи виде́ние. Па́ки кровь и огнь глаго́лют бы́ти: кровь у́бо я́коже от пречи́стых ребр Влады́чних, исте́кшия благода́ть, огнь же - Ду́ха Свята́го соше́ствие. И ина́ко кровь, ю́же взя́ша иуде́е на себе́, глаго́люще: «Кровь Его́ на нас и на ча́дех на́ших». Егда́ же уби́ша, отмета́хуся глаго́люще ко апо́столом: «Что хо́щете нанести́ на ны кровь Челове́ка сего́?».
Су́щее: Пре́жде да́же не приити́ дню Госпо́дню вели́кому и просвеще́нному. И бу́дет всяк и́же а́ще призове́т и́мя Госпо́дне спасе́тся;
Толкова́ние Златоу́стаго: День вели́кий и пресвяще́нный - втора́го прише́ствия Христо́ва глаго́лет. Да не поне́же ны́не без муче́ния су́ще согреша́юще рече́ дерза́ете, сия́ бо зна́мения суть вели́каго дне и лю́таго. Зри у́бо, ка́ко стрясе́ им душа́ и устраши́, и глумле́ния их преложи́ на отве́т. Бу́дут же си́и пре́жде Госпо́дня стра́шнаго па́ки прише́ствия, егда́ хо́щет суди́ти живы́м и ме́ртвым, си́речь, невозмо́жно есть ве́ка сего́ преити́, а́ще не всем глаго́лемым коне́ц бу́дет. «Всяк и́же а́ще призове́т, рече́, и́мя Госпо́дне, спасе́тся». Не про́сто а́ще призове́т, но с прилежа́нием и чи́стым житие́м. «Не всяк бо глаго́ляй ми Го́споди Го́споди вни́дет в Ца́рство небе́сное, но творя́й во́лю Отца́ Моего́» рече́. Оба́че легко́ твори́т сло́во, к ве́ре приводя́ слы́шащая, я́ко призыва́нием спасе́ние быва́ет.
[Ина́го: Ио́иль проро́к во вре́мя Влады́ки Христа́ бы́вшая чудеса́ Свята́го ра́ди Ду́ха проро́чествова со́ния и виде́ния. И в том вели́каго и стра́шнаго прише́ствия Влады́ки Христа́ день провозвеща́ет, е́же и бысть разли́чно. О Ио́сифе бо и о волсве́х во сне благове́щенно, я́коже явля́ет Ева́нгелие. Виде́нием же Симео́н сподобле́н от Ду́ха, на руку́ Влады́ку Христа́ прия́т. А́нна па́ки Фану́илева, испове́дающи о Нем, проро́чествующи же, я́ко Ага́в и дще́ри Фили́пповы. И жены́ же в страсть Госпо́дню виде́ние а́нгел ви́деша, и ученицы́ та́кожде. Что же ли глаго́лати и о соше́ствии Свята́го Ду́ха на апо́столех бы́вшем в день пятдеся́тный? Но и на Корни́лии, и [на] всех ве́рных]. Коне́ц толкова́нию.