Во вре́мя о́но, воскре́с Иису́с от ме́ртвых, и ста посреде́ учени́к свои́х, и глаго́ла им: «Мир вам». Убоя́вшежеся и пристра́шни бы́вше, мня́ху дух ви́дяще. И рече́ им: «Что смуще́ни есте́, и почто́ помышле́ния вхо́дят в сердца́ ва́ша? Ви́дите ру́це Мои́ и но́зе Мои́, я́ко Сам Аз есмь. Осяжи́те мя и ви́дите, я́ко дух, пло́ти и ко́сти не и́мать, я́коже Мене́ ви́дите иму́ща». И се рек, показа́ им ру́це и но́зе. Еще́ же неве́рующим им от ра́дости и чудя́щимся, рече́ им: «И́мате ли что сне́дно зде?». Они́ же да́ша ему́ ры́бы пече́ны часть, и от пчел сот. И взем, пред ни́ми яст. Рече́ же им: «Сия́ суть словеса́ я́же глаго́лах к вам, еще́ сый с ва́ми, я́ко подоба́ет сконча́тися всем напи́санным, в зако́не Моисе́ове и проро́цех, и псалме́х о Мне».

Толкова́ние: И́же вся ко спасе́нию стро́я Госпо́дь, ста посреди́ учени́к Свои́х, уве́рити хотя́ Воскресе́ние. И пе́рвее у́бо по обы́чаю провеща́ мир. Отго́нит им плищь , а́биеже явля́ет, я́ко Сам Учи́тель их Той есть. И сим глаго́лом ра́достная веща́я, вооружи́в тех, а́бие к про́поведи посыла́ет. Се бо рек, изго́нит от душ их плищь, явля́етже им не́кая, я́ко Сын Бо́жий есть, И́же и се́рдца све́дый.

«Почто́ бо рече́ помышле́ния вхо́дят в се́рдца ва́ша?». Нано́сит и́но осяза́ние: ру́ку и но́гу. Вы бо, рече́, Ду́ха мните́ бы́ти, е́же мече́т, я́коже мно́гажды о уме́рших быва́ет, па́чеже при гробе́х мечту́ обы́чай .

«Но ве́дите, я́ко дух у́бо ни пло́ти, ни ко́сти и́мать». Аз же плоть и ко́сти име́ю, и Божество́ духо́вно. Госпо́дне бо Те́ло дух не бе. Духо́вно же ре́кше, в сего́ дебельства́ кроме́, Ду́хом служи́мо. Ны́не бо те́ло е́же и́мамы душе́вно есть и оживля́емо душе́вными и есте́ствеными мастьми́ и си́лами. По воскресе́нии же духо́вно именова́ Па́вел: ре́кше Ду́хом дви́жимо боже́ственым и служи́мо, а не душе́ю, о́бразом же недоуме́нным и духо́вным, преложено́ к неистле́нию и в том соблюда́емо. Таково́ у́бо разуме́ти ле́по и Госпо́дне Те́ло по Воскресе́нии, духо́вно и то́нко вся́кого дебельства́ кроме́, ни пи́щи, ни ино́го что тре́буя, а́ще и на увере́ние яде́. Е́же бо яде́, не по естеству́ яде́, но по смотре́нию, да яви́т, я́ко то страда́вшее Те́ло воста́. Такову́ бо те́лу затворе́ным две́рем входи́ти и без труда́ от ме́ста на ме́сто преходи́ти.

И еще́ же не ве́рующим ученико́м, ни от осяза́ния уве́рившимся, и и́но прилага́ет - пи́щу. Бо́жиею не́коею си́лою погиба́ет ядо́мое. Все бо по естеству́ ядо́мое усты́, во утро́бу вмести́мо. А я́же не по естеству́, я́ко реко́хом, стро́йне не́како снеда́емо.

Име́ти же не́кий ука́з тогда́ яде́ным. Ры́бы у́бо пече́ны часть снед, явля́ет, я́ко на́ше естество́ в сла́ности жития́ сего́ пла́вая. Огне́м Своего́ Божества́ испе́к и всю ю́же име́ от глубины́ волн мокроту́ изъе́м и исте́р, боже́ственое бра́шно сотвори́. Пре́жде бо гну́сно су́ще, Свое́ бра́шно соде́ла Госпо́дь.

И се рече́, явля́ет пчел сот ны́нешнюю сласть, глаго́лю пре́жде изгна́ну на́шему существу́. Или́ сие́ мню явля́ет: пече́ная часть ры́бы - де́йственое, отъе́млющи на́шея мокроты́ и толстоты́, пусты́нными и молча́льными ю́гльми пожещи́, ра́зума же и виде́ния пче́льнаго со́та: сла́дка бо Бо́жия словеса́. Есть же сот плетенови́ден, реку́ же е́ллинская му́дрость. Есть же сот сла́док - Бо́жия пчела́, па́чеже Христо́с. Ма́ла у́бо вели́чеством, и сокраще́но сло́во, и си́лою не́мощно, - не си́лою бо сло́ва Па́вел пропове́да, да не истощи́тся крест, - оба́че ца́рие и прости́и любо́вне на здра́вие теле́сное прие́млют труд ея́.

[Среда:]

Ева́нгелие: Тогда́ отве́рзе им ум разуме́ти Писа́ния и рече́ им, я́ко та́ко пи́сано есть, и та́ко подоба́ше пострада́ти Христу́, и воскре́снути от ме́ртвых в тре́тий день, и пропове́датися во и́мя Его́ покая́нию и отпуще́нию грехо́в во всех язы́цех, наче́нше от Иеросали́ма. Вы же есте́ сведе́тели сим. И се Аз послю́ обетова́ние Отца́ Моего́ на вы. Вы же ся́дете во гра́де Иеросали́мсте, до́ндеже облече́теся си́лою свы́ше. Изве́д же их вон до Вифа́нии, и воздви́г ру́це Свои́ и благослови́ их. И бысть егда́ благословя́ше их, отступи́ от них. И возноша́шеся на не́бо, и ти́и поклони́шася Ему́. И возврати́шася во Иеросали́м с ра́достию вели́кою, и бя́ху вы́ну в Це́ркви, хва́ляще и благословя́ще Бо́га. Ами́нь.

Толкова́ние: Егда́ умири́ я́, и уте́шив я́ко Оте́ц, и уста́ви сердца́ их, и́миже рече́, и осяза́нием и яде́нием уве́ри я, и и́стиною те́ла Его́ и Воскресе́нием - тогда́ отве́рзе им ум, да разуме́ют Писа́ния. А́ще не бы упраздни́лася ду́ша их, ка́ко бы разуме́ла мути́ма? «Упраздни́тебося рече́, и разуме́йте». Тем и учи́т я́, я́ко ну́жда бе та́ко пострада́ти Христу́. Та́ко и дре́вом Креста́, поне́же бо дре́ва ра́ди погибе́ние, ну́жда бе дре́вом разруши́ти тле́ние и бы́вшую дре́вом сласть разруши́ти. Та́же воскре́снути рече́ тре́тий день и пропове́датися о и́мени Его́ покая́нию во оставле́ние грехо́в.

О креще́нии же зде рече́. О сем бо покая́ние быва́ет, испове́данием и отложе́нием пе́рвых зол и нече́стия, и после́дует и отпуще́ние грехо́в. Ка́коже креще́ние разумева́ем, о и́мени Христо́ве то́кмо бы́ти, а се и́нде учи́ми, во и́мя Отца́ и Сы́на и Свята́го Ду́ха соверша́ти сие́? Пре́жде реко́хом сия́ у́бо, я́ко креще́ние егда́ глаго́лем о и́мени Христо́ве бы́ти. Не то глаго́лем, я́ко ле́по о еди́ном и́мени Христо́ве соверша́ти се, но я́ко Христо́во креще́ние. Христо́с крести́ся е́же есть духо́вно, а не иуде́йски. Ни я́ко Иоа́нново креще́ние в покая́ние то́кмо, но Ду́ха Свята́го прича́стие, и отпу́ст грехо́в подая́. Я́коже и Сам нас ра́ди показа́, крести́вся во Иорда́ни и Дух Святы́й в виде́нии го́лубя явль. О и́мени же Христо́ве креще́ние, в смерть Христо́ву разумева́й. Я́коже бо Христо́с у́мер, в тре́тий день воскре́се - та́ко и мы погружа́емы в воде́ обра́зно, та́же возника́ем нетле́нни душе́ю и Ду́ха нетле́ния зало́г прие́млюще. И́накоже, Христо́с в Себе́ и́мя явля́ет: Отца́ пома́завша, и пома́зание Дух, и пома́зана Сы́на, о и́мени Госпо́дни оставле́ние грехо́в. Где уже́ скве́рнии язы́цы, креща́ющих в Монта́на, и Приски́ла, и Максими́ла? Вои́стину ни еди́ному тем оставле́ния, но приложе́ние грехо́в быва́ет.

«Во вся же язы́ки сло́во изы́де, наче́н от Иеросали́ма». Подоба́ет у́бо и естеству́ всему́ о Христе́ соедине́ну и прия́ту, не на́двое уже́ разделя́ется, на евре́и и на язы́ки, но нача́ти от Иеросали́ма сло́во и в язы́цех почи́ти.

«Вы же есте́ рече́ сведе́тели сим страсте́м и Воскресе́нию». Та́же, да не смутя́тся помышля́юще в себе́: «ка́ко сведе́тельствуем челове́цы су́ще про́сти, в язы́ки сле́ми, иеросали́мляном не немогу́щим Тебе́ уби́ти?», - «Дерза́йте» рече́: сего́ ра́ди посыла́ю у́бо, елма́ же не у́ обеща́ние Отца́ Моего́, е́же рече́ Ио́илем, я́ко излию́ от Ду́ха Моего́ на вся́ку плоть и про́чая. «Ся́дете» у́бо, е́же ны́не явля́ет нему́жествени, до́ндеже облече́теся си́лою не челове́ческую, но небе́сною. Не рече́ же прии́мете, но облече́теся: всю́ду соблюда́емо есть духо́вное ору́жие.

«Изведе́же я́ до Вифа́нии». Се же разуме́м, я́ко в той четы́редесяте дни́й пребы́, я́же бо ти́и вкра́тце глаго́лют. Ты же разуме́й мно́ги дни бы́ти, я́коже и сам Лука́ явля́ет в дея́ниих, я́ко деньми четыредеся́тьми ви́димь и́ми. Ча́сто бо прихожда́ше и отхожда́ше.

Благослови́ же ученики́, си́лою огражда́я до Ду́ха прише́ствия. О́во же и нас уча́: хотя́щая отъити́, благослове́ния тре́буют.

«И возноша́шеся на не́бо». Илия́ у́бо «я́ко на не́бо», Спас же «на не́бо», Предте́ча всем взы́де со свято́ю Свое́ю пло́тию, ви́дети лице́ Бо́жие и сопресто́льник яви́тися Отцу́. И ны́не покланя́емо есть естество́ на́ше о Христе́, от вся́кия а́нгельския си́лы.

«Ти́и же возврати́шася с ра́достию вели́кою, и бе́ху вы́ну в Це́ркви». Ви́диши ли де́тели: не у́ Дух прия́ша, и духо́вно пребыва́ют. Пре́жде бо затворе́ни, ны́не же среде́ иере́й живу́т, и ничто́ же жите́йскаго боя́щеся, но о всем нерадя́ще, в Це́ркви вы́ну хва́лят Бо́га и благословя́т.

Мо́лимжеся Го́споду на́шему Иису́су Христу́, да и мы подо́бни бу́дем святы́м апо́столом, во святе́м житии́ вы́ну пребыва́юще, хва́ляще таковы́м житие́м и благословя́ще Бога. Сла́ва бо Бо́жия и благослове́ние, свя́то и доброде́телно житие́. Ами́нь.