Вознесение Господне

Во вре́мя о́но, воскре́с Иису́с от ме́ртвых, и ста посреде́ учени́к свои́х, и глаго́ла им: «Мир вам». Убоя́вшежеся и пристра́шни бы́вше, мня́ху дух ви́дяще. И рече́ им: «Что смуще́ни есте́, и почто́ помышле́ния вхо́дят в сердца́ ва́ша? Ви́дите ру́це Мои́ и но́зе Мои́, я́ко Сам Аз есмь. Осяжи́те мя и ви́дите, я́ко дух, пло́ти и ко́сти не и́мать, я́коже Мене́ ви́дите иму́ща». И се рек, показа́ им ру́це и но́зе. Еще́ же неве́рующим им от ра́дости и чудя́щимся, рече́ им: «И́мате ли что сне́дно зде?». Они́ же да́ша ему́ ры́бы пече́ны часть, и от пчел сот. И взем, пред ни́ми яст. Рече́ же им: «Сия́ суть словеса́ я́же глаго́лах к вам, еще́ сый с ва́ми, я́ко подоба́ет сконча́тися всем напи́санным, в зако́не Моисе́ове и проро́цех, и псалме́х о Мне».

Толкова́ние: И́же вся ко спасе́нию стро́я Госпо́дь, ста посреди́ учени́к Свои́х, уве́рити хотя́ Воскресе́ние. И пе́рвее у́бо по обы́чаю провеща́ мир. Отго́нит им плищь , а́биеже явля́ет, я́ко Сам Учи́тель их Той есть. И сим глаго́лом ра́достная веща́я, вооружи́в тех, а́бие к про́поведи посыла́ет. Се бо рек, изго́нит от душ их плищь, явля́етже им не́кая, я́ко Сын Бо́жий есть, И́же и се́рдца све́дый.

«Почто́ бо рече́ помышле́ния вхо́дят в се́рдца ва́ша?». Нано́сит и́но осяза́ние: ру́ку и но́гу. Вы бо, рече́, Ду́ха мните́ бы́ти, е́же мече́т, я́коже мно́гажды о уме́рших быва́ет, па́чеже при гробе́х мечту́ обы́чай .

«Но ве́дите, я́ко дух у́бо ни пло́ти, ни ко́сти и́мать». Аз же плоть и ко́сти име́ю, и Божество́ духо́вно. Госпо́дне бо Те́ло дух не бе. Духо́вно же ре́кше, в сего́ дебельства́ кроме́, Ду́хом служи́мо. Ны́не бо те́ло е́же и́мамы душе́вно есть и оживля́емо душе́вными и есте́ствеными мастьми́ и си́лами. По воскресе́нии же духо́вно именова́ Па́вел: ре́кше Ду́хом дви́жимо боже́ственым и служи́мо, а не душе́ю, о́бразом же недоуме́нным и духо́вным, преложено́ к неистле́нию и в том соблюда́емо. Таково́ у́бо разуме́ти ле́по и Госпо́дне Те́ло по Воскресе́нии, духо́вно и то́нко вся́кого дебельства́ кроме́, ни пи́щи, ни ино́го что тре́буя, а́ще и на увере́ние яде́. Е́же бо яде́, не по естеству́ яде́, но по смотре́нию, да яви́т, я́ко то страда́вшее Те́ло воста́. Такову́ бо те́лу затворе́ным две́рем входи́ти и без труда́ от ме́ста на ме́сто преходи́ти.

И еще́ же не ве́рующим ученико́м, ни от осяза́ния уве́рившимся, и и́но прилага́ет - пи́щу. Бо́жиею не́коею си́лою погиба́ет ядо́мое. Все бо по естеству́ ядо́мое усты́, во утро́бу вмести́мо. А я́же не по естеству́, я́ко реко́хом, стро́йне не́како снеда́емо.

Име́ти же не́кий ука́з тогда́ яде́ным. Ры́бы у́бо пече́ны часть снед, явля́ет, я́ко на́ше естество́ в сла́ности жития́ сего́ пла́вая. Огне́м Своего́ Божества́ испе́к и всю ю́же име́ от глубины́ волн мокроту́ изъе́м и исте́р, боже́ственое бра́шно сотвори́. Пре́жде бо гну́сно су́ще, Свое́ бра́шно соде́ла Госпо́дь.

И се рече́, явля́ет пчел сот ны́нешнюю сласть, глаго́лю пре́жде изгна́ну на́шему существу́. Или́ сие́ мню явля́ет: пече́ная часть ры́бы - де́йственое, отъе́млющи на́шея мокроты́ и толстоты́, пусты́нными и молча́льными ю́гльми пожещи́, ра́зума же и виде́ния пче́льнаго со́та: сла́дка бо Бо́жия словеса́. Есть же сот плетенови́ден, реку́ же е́ллинская му́дрость. Есть же сот сла́док - Бо́жия пчела́, па́чеже Христо́с. Ма́ла у́бо вели́чеством, и сокраще́но сло́во, и си́лою не́мощно, - не си́лою бо сло́ва Па́вел пропове́да, да не истощи́тся крест, - оба́че ца́рие и прости́и любо́вне на здра́вие теле́сное прие́млют труд ея́.

Ева́нгелие: Тогда́ отве́рзе им ум разуме́ти Писа́ния и рече́ им, я́ко та́ко пи́сано есть, и та́ко подоба́ше пострада́ти Христу́, и воскре́снути от ме́ртвых в тре́тий день, и пропове́датися во и́мя Его́ покая́нию и отпуще́нию грехо́в во всех язы́цех, наче́нше от Иеросали́ма. Вы же есте́ сведе́тели сим. И се Аз послю́ обетова́ние Отца́ Моего́ на вы. Вы же ся́дете во гра́де Иеросали́мсте, до́ндеже облече́теся си́лою свы́ше. Изве́д же их вон до Вифа́нии, и воздви́г ру́це Свои́ и благослови́ их. И бысть егда́ благословя́ше их, отступи́ от них. И возноша́шеся на не́бо, и ти́и поклони́шася Ему́. И возврати́шася во Иеросали́м с ра́достию вели́кою, и бя́ху вы́ну в Це́ркви, хва́ляще и благословя́ще Бо́га. Ами́нь.

Толкова́ние: Егда́ умири́ я́, и уте́шив я́ко Оте́ц, и уста́ви сердца́ их, и́миже рече́, и осяза́нием и яде́нием уве́ри я, и и́стиною те́ла Его́ и Воскресе́нием - тогда́ отве́рзе им ум, да разуме́ют Писа́ния. А́ще не бы упраздни́лася ду́ша их, ка́ко бы разуме́ла мути́ма? «Упраздни́тебося рече́, и разуме́йте». Тем и учи́т я́, я́ко ну́жда бе та́ко пострада́ти Христу́. Та́ко и дре́вом Креста́, поне́же бо дре́ва ра́ди погибе́ние, ну́жда бе дре́вом разруши́ти тле́ние и бы́вшую дре́вом сласть разруши́ти. Та́же воскре́снути рече́ тре́тий день и пропове́датися о и́мени Его́ покая́нию во оставле́ние грехо́в.

О креще́нии же зде рече́. О сем бо покая́ние быва́ет, испове́данием и отложе́нием пе́рвых зол и нече́стия, и после́дует и отпуще́ние грехо́в. Ка́коже креще́ние разумева́ем, о и́мени Христо́ве то́кмо бы́ти, а се и́нде учи́ми, во и́мя Отца́ и Сы́на и Свята́го Ду́ха соверша́ти сие́? Пре́жде реко́хом сия́ у́бо, я́ко креще́ние егда́ глаго́лем о и́мени Христо́ве бы́ти. Не то глаго́лем, я́ко ле́по о еди́ном и́мени Христо́ве соверша́ти се, но я́ко Христо́во креще́ние. Христо́с крести́ся е́же есть духо́вно, а не иуде́йски. Ни я́ко Иоа́нново креще́ние в покая́ние то́кмо, но Ду́ха Свята́го прича́стие, и отпу́ст грехо́в подая́. Я́коже и Сам нас ра́ди показа́, крести́вся во Иорда́ни и Дух Святы́й в виде́нии го́лубя явль. О и́мени же Христо́ве креще́ние, в смерть Христо́ву разумева́й. Я́коже бо Христо́с у́мер, в тре́тий день воскре́се - та́ко и мы погружа́емы в воде́ обра́зно, та́же возника́ем нетле́нни душе́ю и Ду́ха нетле́ния зало́г прие́млюще. И́накоже, Христо́с в Себе́ и́мя явля́ет: Отца́ пома́завша, и пома́зание Дух, и пома́зана Сы́на, о и́мени Госпо́дни оставле́ние грехо́в. Где уже́ скве́рнии язы́цы, креща́ющих в Монта́на, и Приски́ла, и Максими́ла? Вои́стину ни еди́ному тем оставле́ния, но приложе́ние грехо́в быва́ет.

«Во вся же язы́ки сло́во изы́де, наче́н от Иеросали́ма». Подоба́ет у́бо и естеству́ всему́ о Христе́ соедине́ну и прия́ту, не на́двое уже́ разделя́ется, на евре́и и на язы́ки, но нача́ти от Иеросали́ма сло́во и в язы́цех почи́ти.

«Вы же есте́ рече́ сведе́тели сим страсте́м и Воскресе́нию». Та́же, да не смутя́тся помышля́юще в себе́: «ка́ко сведе́тельствуем челове́цы су́ще про́сти, в язы́ки сле́ми, иеросали́мляном не немогу́щим Тебе́ уби́ти?», - «Дерза́йте» рече́: сего́ ра́ди посыла́ю у́бо, елма́ же не у́ обеща́ние Отца́ Моего́, е́же рече́ Ио́илем, я́ко излию́ от Ду́ха Моего́ на вся́ку плоть и про́чая. «Ся́дете» у́бо, е́же ны́не явля́ет нему́жествени, до́ндеже облече́теся си́лою не челове́ческую, но небе́сною. Не рече́ же прии́мете, но облече́теся: всю́ду соблюда́емо есть духо́вное ору́жие.

«Изведе́же я́ до Вифа́нии». Се же разуме́м, я́ко в той четы́редесяте дни́й пребы́, я́же бо ти́и вкра́тце глаго́лют. Ты же разуме́й мно́ги дни бы́ти, я́коже и сам Лука́ явля́ет в дея́ниих, я́ко деньми четыредеся́тьми ви́димь и́ми. Ча́сто бо прихожда́ше и отхожда́ше.

Благослови́ же ученики́, си́лою огражда́я до Ду́ха прише́ствия. О́во же и нас уча́: хотя́щая отъити́, благослове́ния тре́буют.

«И возноша́шеся на не́бо». Илия́ у́бо «я́ко на не́бо», Спас же «на не́бо», Предте́ча всем взы́де со свято́ю Свое́ю пло́тию, ви́дети лице́ Бо́жие и сопресто́льник яви́тися Отцу́. И ны́не покланя́емо есть естество́ на́ше о Христе́, от вся́кия а́нгельския си́лы.

«Ти́и же возврати́шася с ра́достию вели́кою, и бе́ху вы́ну в Це́ркви». Ви́диши ли де́тели: не у́ Дух прия́ша, и духо́вно пребыва́ют. Пре́жде бо затворе́ни, ны́не же среде́ иере́й живу́т, и ничто́ же жите́йскаго боя́щеся, но о всем нерадя́ще, в Це́ркви вы́ну хва́лят Бо́га и благословя́т.

Мо́лимжеся Го́споду на́шему Иису́су Христу́, да и мы подо́бни бу́дем святы́м апо́столом, во святе́м житии́ вы́ну пребыва́юще, хва́ляще таковы́м житие́м и благословя́ще Бога. Сла́ва бо Бо́жия и благослове́ние, свя́то и доброде́телно житие́. Ами́нь.

Све́тло ми сие́ церко́вное позо́рище: не смех бо челове́ком твори́ти су́етен, но ве́лий неприя́зни плачь. Зрит бо выспрь иду́ща, ни́жним ме́ртвым, воскре́снаго ко́рения. Ви́дит пре́данаго ни́зу Кресто́м, от небе́с Нань зря́ща. Ви́дит зе́млю испо́лнь а́нгел. Ви́дит кроме́ обы́чая на не́бо челове́ческую плоть восходя́щу. Ви́дит небе́сныя си́лы срета́юща И́. О́ви убо глаго́лющя: «Возми́те врата́ кня́зи ва́ши, и да вни́дет Царь сла́вы». О́ви же па́ки срета́юще, и отпева́юще глаго́лаху: «Госпо́дь кре́пок и си́лен, Госпо́дь си́лен во брани́». В кое́й брани́? Не ю́же ли по нас на о́бщаго врага́ воздви́же? Ни от проро́к, ни от пра́ведник воздви́гну кто: наси́льствовани бо вси бя́ху от ца́рствия сме́ртнаго, до́ндеже прии́де Царь веко́в и, связа́в кре́пкаго, плени́ сосу́ды его́.

Распя́ту быва́ющу Го́споду, небе́сныя си́лы диви́шася, а тварь вся кла́няшеся, ви́дящи но́вую та́йну и стра́шное чу́до быва́ющее на земли́. Трепета́ше земля́, подви́жеся мо́ре, волня́шеся бе́здна, вся тварь смяте́ся, убоя́шася свети́ла небе́сная, побеже́ со́лнце и луна́, и зве́зды исче́знуша. День той не стерпе́ а́нгел, изы́де смуще́н от це́ркве, раздра́вшися опо́не церко́вней. Тма испо́лни зе́млю, а день измени́ся, не терпя́ху бо ви́дяще своего́ Го́спода и Творца́ ви́сяща на дре́ве. Тогда́ ад разори́ся, и врата́ его́ сокруши́шася, и вереи́ его́ сломи́шася, о ни́хже Дави́д проро́чествуя глаго́лаше: «Я́ко сокруши́л еси́ врата́ ме́дная, и вереи́ желе́зныя сломи́». Тогда́ паде́ ца́рствующая смерть под нога́ма Христо́выма, и влеко́ма я́ко пле́нница облича́шеся.

Непобеди́мый бо телесе́м победи́в си́лу вра́жию и лесть его́ сокруши́. Вскочи́ в ца́рьствия а́дская, и престо́л его разруши́. Вене́ц же све́рже, хоруго́вь разори́, держи́маго пусти́, мучи́теля попра́, глас пусти глаго́ля: «Прииди́те оте́чествия язы́к ко Отцу́ и Бо́гу. Прииди́те и приими́те свобо́ду от рабо́ты, извожду́ бо вы от рабо́ты в свобо́ду, от тмы в свет, от му́ки в Ца́рство присноживо́тное. Вам благовеща́ю Аз Иису́с Христо́с: у́же бо ктому́ не бо́йтеся мучи́теля, но неради́те о стра́се, ни о сме́рти, ни о алкоте́, ни о ско́рби, ни о у́зах, ни о темни́це, ни о вся́цей тузе́, сих бо да боя́тся мучи́телевы во́ини, и́же разори́шася. Аз от всех Еди́н есмь Победи́тель Царь, пострада́вый по вас пло́тию».

Сей у́бо есть вои́стину кре́пок и си́лен Госпо́дь. Сей есть си́лен во бране́х. Сей есть Царь Сла́вы, изводя́ окова́нныя му́жеством, живу́щыя во гробе́х, к Нему́же глаго́лаше па́ки Дави́д: «Вшел еси́ на высоту́, плени́л еси́ плен».

Те́мже всяк у́бо пра́здник христиа́неск - неприя́зни есть осужде́ние паче, о всех бо сей. И [во] ине́х свою́ явль зло́бу и ничто́же не возмо́г, [оба́че] себе́ обличи́л есть. Я́коже се в при́тчу глаго́лю: Де́ве ди́вное и стра́нно рождество́ - в любодея́ние хуло́ю прославля́ше. Неизрече́нно прижи́вшую - и о де́встве ропта́ше. Оклеветова́ше же млеко́ Ссу́щаго, Пита́ющаго вся́ку вещь, - младе́нцы же изби́ти И́рода научи́, непщу́я в тех уби́ти Необдержи́маго. На креще́ние же тща́щуся Ему́ - на иску́шение возво́дит Его́. Стяза́ющуся у́бо со иуде́и - хуле́нию словеса́ Нань глаго́лати сотвори́. Чудеса́ же творя́щу Ему́ - ка́мение мета́ти Нань сотвори́л есть. Уби́йцу и разбо́йника пра́веднейша сотвори́. Распя́ту бы́вшу, разбо́йника с ним распя́т. Погребе́ну бы́вшу, гроб запечатле́. Воскре́сшу животу́, оклеветова́ет Воскресе́ние. Восходя́щу Ему́ на не́бо - не и́мать что глаго́лати, но главо́ю уязви́ся.

Те́мже вся́каго пра́здника сей есть горе́е ему́ бысть, ви́дящу вся а́нгельския во́я ликоству́юща, и о́вы во след иду́ща, о́вы же предтеку́ща, а други́я па́ки ли́ку апо́льстольску глаго́люща: «Му́жие галиле́йстии, что стоите́, зря́ще на не́бо? се Иису́с, вознесы́йся на не́бо от вас, та́кожде прии́дет па́ки, я́коже ви́десте Его́ иду́ща на не́бо».

Сей Иису́с, сотвори́вый мно́жество чуде́с. Сей у́бо день Госпо́дьскаго восхо́да, неприя́зни пла́катися сотвори́л есть, я́коже и пре́жде ре́хом, а ве́рным освяти́тися. Ны́не бо кра́сная весна́ возсия́ла есть, и цветны́я израсли́ суть ле́тныя ви́нныя кра́сныя ле́торасли. Плод дре́ва ма́слична процвете́ смоко́вница, и оре́си ли́ствие и ря́су яви́ша. Изни́кну вся́ка вещь, ю́гу ча́сто ве́ющу, красоте́ волна́м подо́бящися морски́м. Вся́ческая восхо́дом Госпо́дьским с на́ми све́тлятся.

Прииди́те у́бо, да и аз о вас дави́дския воспою́ глаго́лы, я́же ны́не нам за возноше́ние Госпо́дне вопия́ше: «Вси язы́цы восплещи́те рука́ми, и воскли́кните Бо́гу гла́сом ра́дости, я́ко взы́де Бог в воскликнове́нии, и Госпо́дь во гла́се тру́бне». Взы́де иде́же бе, вознесе́ся отню́дуже не разлучи́ся. Сше́дый у́бо, той есть и возше́дый превы́ше всех небе́с. Не ин ете́р я́влься проро́ком, и ин со апо́столы пожи́в. Не ин в не́дрех О́тчих, и ин при понти́йстем Пила́те суди́м. Не ин на Кресте́ гвоздьми́ пригвожде́н, а ин на херуви́ме седя́. Не ин от Ио́сифа плащани́цею обви́т быв, и ин дла́нию, тварь обдержа́. Не ин во гро́бе положе́н, а ин от серафи́м пе́ние прие́мля. Но Той Сам со Отце́м седя́й, вопло́щься без се́мене от ложе́сн Деви́ческих.

«Взы́де Бог в воскликнове́нии, и Госпо́дь во гла́се тру́бнем». Творе́ц веко́в, сотвори́вый от небыти́я в бытие́ вся́ческая, и Зижди́тель Ада́мов, челове́ческаго ро́да Соста́витель. Преста́вль и уго́дника Своего́ Ено́ха на ме́сто живо́тное, сохра́нь и Но́я от пото́па всего́ ми́ра. Призва́вый патриа́рха Авраа́ма от земли́ халде́йския, и образова́вый пре́жде о Исаа́це кре́стную та́йну. Да́вый Иа́кову плод двоенадеся́тный, да́вый терпе́ние И́овови. Поставле́й воево́ду Моисе́я лю́дем, испо́лнивый Саму́ила от ложе́сн проро́чества. Поимы́й Дави́да от ове́ц на ца́рство, да́вый Соломо́ну прему́дрость. Восхи́щь Илию́ ви́хром на колесни́це о́гненней, вдохну́вый прозре́ние проро́ком. Да́вый апо́столом дар исцеле́ния, реки́й тем: «Аз победи́х мир».

Сей есть Госпо́дь Сла́вы, вше́дый на не́бо в восклица́нии и се́де оде́сную Отца́, повину́вшымся Ему́ а́нгелом, влады́чествиям и си́лам. Той духо́вныя ва́ша моли́твы да прии́мет и побе́дники вы да яви́т напа́стем ми́ра. Да покори́т же вам весь полк нечи́стых духо́в, сокруши́в неприя́знь под нога́ми ва́шими, глаго́ля ко всем: «Се дах вам власть наступа́ти на змии́ и на скорпи́и», без па́кости, и неврежде́ны, це́лы, и непоро́чны, и здра́вы, и соверше́ны. Да сохрани́т вы ду́хом, и душе́ю, и те́лом, к исполне́нию плоды́ все́ми пра́ведными, Бог сподобле́й ны собра́тися, и спаси́тельный сей пра́здник сконча́ти: я́ко То́му есть сла́ва во ве́ки веко́в. Ами́нь.

Благ год днесь всем нам возопи́ти, проро́ческое о́но сло́во, и о́бщаго всех нас Влады́ку восхвали́ти и рещи́: «Кто возглаго́лет си́лы Госпо́дня, услы́шаны сотвори́т вся хвалы́ Его?».

Днесь бо нача́ло на́ше на не́бо взы́де, и ю́же от нас плоть взем, и престо́ла до́йде оте́ческа - да преме́ну Влады́ки к рабо́м створи́т, и дре́внюю вражду́ умори́т, и мир го́рних сил земны́м челове́ком пода́ст. О́бща бо нам днесь я́же на смерть одоле́ния, о́бща радова́ния, о́бща побежде́ния, о́бщии венцы́.

Тем ра́дуимся вси днесь, ви́дяще на́шего Нача́ла горе́ седя́ще, и на́шего естества́ одесну́ю Бо́жия сия́юще престо́ла. А́ще бо и чуде́сный проро́к ублажа́ет име́ющиих в Сио́не се́мя и у́жики во Иерусали́ме, коли́ко па́че нам ра́доватися бы, и весели́тися, ви́дяще на́ше Начало, в сам небе́сный верх вшед, и престо́ла взе́мше ца́рска?

Разуме́й лю́блениче у́бо, коли́ка Бо́жия благода́ть, и неизрече́н устро́й и́же и бысть о ро́де на́шем, поро́ды спа́дшу пре́лестию диа́вольскою, и, толи́це кля́тве осуди́вшеся, внеза́пы в коли́ку высоту́ возведе́! То ка́ко мы и́же и земли́ не подо́бни яви́вшеся, днесь в небеса́ возведо́хомся: и н́аше естество́, е́же и поро́де неподо́бно пре́жде яви́вся, то небе́сно первоседа́ние взя: е́же и бесо́м игра́лище бысть , то́ днесь и от а́нгел и от го́рних сил поклоне́ние прие́млет! О́ блаже́нну чудеси́! О́ до́бру обраще́нию, тма́ми тем благода́тных мно́жествие породи́вшу! Возревнова́в на́шему естеству́, неприя́знин той бес, на земли́ хожде́ние иму́щу, ви́дит , кто ны́не на небеси́ поклоне́ние прие́млюще , и опа́костив, я́ко мня́ше вели́ка неисцеля́юща, и ны́не бо́льших и светле́йших нас наслади́вшася ви́дит.

Те́мже ра́дуюся и веселу́юся, и вам приступи́ти со мно́ю к ликоствию́ сему́ молю́ся. И́же бо ни до́льнему нача́лу подо́бни су́ще, к Ца́рствию взыдо́хом го́рнему, превзыдо́х небеса́, взя́хом престо́л царск. И естество́, егоже ра́ди блюдя́ше поро́ду херуви́м, то вы́ше херуви́ма седи́т у́бо днесь. Ужасни́ся, лю́блениче, Влады́ки, бла́гу хи́трост и сла́ви И́же толи́ко дари́вшу тя. Пре́йде бо любезноцеле́ние да́ру тщеты́ вели́чества . Виждь бо: поро́ды испадо́хом - и на не́бо нас возведе́, сме́ртию осуди́хомся - и безсме́ртие дасть нам, и образи́лися бе́хом, и отве́ржени - и сы́нми нас зва́ти сподо́би, и не сы́ны то́чию, но прии́мники Христу́. Ви́де ли, ка́ко бо́ле отне́мшихся, е́же от Него да́ное? Егда́ слы́шиши, я́ко взы́де и вознесе́ся, - не преступле́ние ме́стное [о] Бо́зе помы́слиши: Божество́ бо все наполня́ет и все же пристае́т. Его́же Единоча́дый на́шу плоть взем, яви́тися сподо́би - Той есть, И́же днесь с горы́ вземля́ся.

И сего́ ра́ди о́бще вси день обли́чнейши [изрече́м сий проро́ческий глаго́л: «Взы́де Бог в воскликнове́нии, Госпо́дь во гла́се тру́бне»], све́тло пра́зднуим пра́зднствие, елма́ же си о́бща вси от Него́ наслади́хомся да́ра. Я́коже бо влады́ка человеколю́бец, возлюби́в своего́ раба́, и́же о нем любви́ ра́ди не отме́щется и в ри́зу оде́тися, та́коже и Влады́ка наш, возлюби́в естество́ челове́ческо, и ви́дев глубину́ зло́бы сне́сшеся, и ни еди́нояже наде́жды спасе́нию име́ющу, и мно́го прося́щу, соше́ствию уподо́бил плоть на́шу, взем то́ю яви́тися, и вся от пре́лести сподо́бити, и ко и́стинне привести́. И вопие́т глаго́ля: «Не приидо́х возва́ти пра́ведных, но гре́шных на покая́ние». Е́же у́бо хотя́ше, упра́ви . И челове́ческое естеств́о, до́ле не́где лежа́ще, воста́ви. И толи́ка показа́ челове́ком лю́бствие, я́ко не вместися челове́честей мы́сли обрести́ сло́во бы́вшим. Ка́ко бо, рцы ми, мы же образи́вшиися, и́же земли́ неподо́бни яви́вшеся и нача́ла до́льняго отпа́дшии, к толи́це внеза́пы высоте́ вознесо́хомся? Ка́ко раздруши́ рать? Ка́ко я́рость уби́ся? И́же бо чу́дно и мно́зе у́жасти во́льно се есть, я́ко не нам прите́кшим, но Сам И́же в пра́вду гне́вающуся к нам, моли́вшуся нас ра́ди, та́ко мир бысть. И вопие́т Па́вел глаго́ля: «Христа́ у́бо ра́ди мо́лим, я́ко Бо́гу моля́щу нас ра́ди». Ви́де ли устро́ену му́дрость влады́ки и человеколю́бие неизрече́но?

Ны́не сме́ртная си́ла упраздни́ся, [ны́не положи́ся коне́ц побе́де а́да, ниспрове́ржеся ны́не могу́тство сме́рти,] н́ыне вражда́ раздреши́ся, му́тная угасну́ рать, [челове́цы а́нгелом уподо́бишася], челове́цы со а́нгелы смеси́шася, мно́го от обои́х естество́м еди́наго ума́ соу́з весели́тся. Взы́де бо, премени́в Своему́ Отцу́ челове́ческ род. И я́ко того́ ра́ди взы́де, слы́ши его́ глаго́люща: «Я́ко у́не есть вам, да Аз иду́. А́ще бо Аз не иду́, Уте́шник не прии́дет к вам». И зна́мение премени́: обеща́ется нам да́ти Уте́шнику прише́ствие. Виждь бо предрече́ние бесе́де: ка́ко изве́сто приложи́ши. «И Той, рече́, поведе́ вы ко всей и́стинне». Явля́я, я́ко бляду́ща зде и ону́де, Дух Святы́й испуще́н, ко и́стине нас поведе́т. Елма́ бо Оте́ц ся яря́ше, мы же и та́ко отвраща́хомся Человеколю́бца Влады́ки, между́ ся вложи́в Христо́с, ре́ну сотвори́ [и пои́стинне «сокруши́ средосте́ние огра́ды»]. Тем благи́я и́мамы наде́жды, к Нача́лу на́шему взира́юще.

И́же бо рече́ши, тем уже́ не бою́ся: а́ще бо червь рече́ши, или́ прах, [или́ огнь, или́ нака́зание, или́ скре́жет зубны́й,] или́ по́пел, [или́ а́ще что и́но] - все́ми оби́дно , Нача́ла моего́ ви́дяще горе́ седя́ща и то́чию не всем ли челове́ком глаго́люща и вопию́ща: «Отступи́те у́бо ле́ности, и уве́дете своего́ благоро́дия, разуме́вше вели́чества дар[о́в], его́же не [по] мнозе сущи́ми прия́ти вы бу́дете». Сходя́ бо ся со [апо́столы ] рече́, «запрети́ бо от Иерусали́ма не отлуча́тися, но ожида́ти обеща́ния О́тча». Виждь бо и в сем благодея́ния Влады́ки. Ве́дый бо челове́ческа естества́ не́мощь и я́ко мно́зей хо́щет по́мощи, дарова́ Свята́го Ду́ха по́мощь, да не одоле́н бу́дет уже́ челове́к диа́волом лука́вствием. И ктому́ бу́дет я́коже кто воево́да хитр, ви́дев е́же под ним су́ща во́ины не терпя́ща проти́вных преще́ний, но ту́жащим от беды́, вся покрепля́ет, угради́в всю броня́ми, и щиты́, и шле́мы, и наколе́нники, и про́чиим устро́ем . Та́коже и Госпо́дь на́ш Иису́с Христо́с, ви́дев мно́гу су́щу проти́вящихся си́лу, и того́ ра́ди мно́ги прося́щу по́мощи челове́ческу естеству́, дарова́ Свята́го Ду́ха даре́ние - небоди́мую си́лу, да и и́же пе́рвее боя́ся бе́сных полк, ны́не тех ужаси́т то́чию [ся] яви́в , [да подви́гнет лука́ваго зми́я на бе́гство]. Тако́в бо Свята́го Ду́ха дар: где бо а́ще ся яви́т, отбе́гнути сотвори́т всем проти́вящимся си́лам.

«Во́змете бо, рече́, си́лу, прише́дшу Ду́ху Свято́му на вас, и вы бу́дете Ми сведе́тели во Иерусали́ме, и во всей Иуде́и, и Самари́и, и до после́дка земли́». Кто же си́ла, иде́же Свята́го Ду́ха дар? И́же и пе́рвее им глаго́лаше: «Неду́жны я́же, цели́те, прокаже́ныя очи́стите, бе́сы изго́ните». Ники́й же бо неду́г та́ко кре́плий есть, я́ко не покори́тися Свято́му уму́ Ду́ху си́ле.

Толи́ко нам благоде́тных вина́ дне́шний день бысть. Днесь бо препоя́ша а́нгели, его́же давно́ жада́ху, естества́ на́шего ви́дяще от престо́ла Ца́рскаго блеща́щася.

Да уве́си у́ньшину раба́ и Владыки: егда́ же Илия́ взима́шеся - на колесни́це о́гненей се претерпе́, егда́ же Влады́ка наш - о́блак вознесе́нию подъи́де. «Зря́щим же рече́ взя́тся, и о́блак подъя́т Его́ от оче́с их». Он же «на не́бо я́ко взы́де» - раб [бо] бе, [Той] же «на не́бо» - Влады́ка бо бе. Да егда́ же рабу́ бе взя́ти - колесни́ца спуща́шеся, егда́ Сы́на - престо́л Царск, и не про́сто престо́л Ца́рск, но Оте́ческий. Слы́ши бо рече́ Иса́ию велегла́сно глаго́люща о Отце́: «Се Госпо́дь седи́т на о́блаце ле́гце». Елма́ у́бо Оте́ц на о́блаце седи́т, того́ ра́ди Сы́ну о́блак испусти́. Илия́ же вшед, оста́ви овчи́ну на Елисе́и. Иису́с же вшед, оста́ви дарова́ния на ученице́х: ни еди́ного проро́ка творя́ща, но тма́ми, Елисе́я па́че о́ного вельми́ бо́льша и светле́йша.

Я́же вся разуме́юща, лю́бленицы, отдади́м своему́ Влады́це и мы до́брую жизнь: да я́коже Он нас восла́ви Свои́ми дарми́, та́ко и мы упра́влеными свои́ми делесы́ Его́ сла́вим, [та́ко бо Свята́го Ду́ха дарова́ния оби́льнейша прии́мем] . Сла́вим убо на́шего Влады́ку изве́стною жи́знию и презре́ния прише́дших. То бо [наипа́че у́ньше есть] уче́ние, могу́ще и неве́рных ко и́стине привести́, и не та́ко бо, и́же от нас глаго́ланым ве́руют, я́ко от вас де́лающих: «Блаже́н сотвори́ и научи́в» ка́жа, я́коже слове́с и уче́ния, делесы́ суть тве́рдейши и па́че навести́ могу́ще неразу́мничных. Послу́шаим убо Влады́ки, и тве́рдию свою́ жизнь устро́им, да и духо́вный дар приведе́м: та́ко бо от диа́вольских лук добродея́нию управле́ния бо́льшу доби́зну име́ти ны, от Свята́го Ду́ха си́лы поспеша́имы: где бо ви́дит ду́шу трезвя́щуся благода́ть, ту со оби́лием прико́снется.

Угото́вимся молю́, да и́же от Бо́га соде́лания насладя́щеся, и ны́нешнюю жизнь без печа́ли пре́йдем, и бу́дущих благи́х получи́м, и́хже бу́ди всем нам сподо́битися благода́тию и человеколю́бствием Го́спода на́шего Иису́с Христа́, И́мже и с Ни́мже Бо́гу и Отцу́, вку́пе Свято́му и Животворя́щему Ду́ху сла́ва и держа́ва, честь и поклоне́ние, ны́не и при́сно, и во ве́ки веко́в. Ами́нь.

Трие́ пресла́вная Госпо́дня чудеса́ из пе́рвых време́н, пе́рвое, на́ землю сни́тие, второ́е, из ме́ртвых Воскресе́ние, тре́тие, на небеса́ Вознесе́ние. Илия́ бо а́ще и на небеса́ взят бысть, но ме́сто измени́ от ме́ста: Христо́с же взы́де отню́ду же и сни́де. Проро́к бо Дави́д о Вознесе́нии Госпо́дни рече́, взы́де Бог в воскликнове́нии, Госпо́дь во гла́се тру́бне. И па́ки, взы́де на Херуви́м и лете́, возлете́ на крилу́ ве́треню. О сем и Авваку́м рече́, вознесе́ся Со́лнце, и Луна́ ста в чину́ свое́м. Христа́ Со́лнца нарече́, а Луно́ю Це́рковь именова́, прему́дрый же усмотри́в таце́х дел высоту́, и рече́, се Христо́с прии́де скача́ по гора́м, и прескача́ хо́лми. Скака́ние имену́ет с небесе́ во чре́во Де́выя сни́тие, от чре́ва же во я́сли, от я́слей же на Крест, со Креста́ же во гроб, от гро́ба же я́ко Бог воста́в вознесе́ся на не́бо. Вся нас ра́ди Христо́с сотвори́. Ено́х бо и Илия́ взя́та бы́ста на высоту́, Госпо́дне Вознесе́ние прообразу́юще. Днесь Госпо́дь на небеса́ взы́де. Блаже́нный И́ов, птенце́м Го́спода нарече́, я́ко те́ло пе́рстное от земли́ вознесе́. Я́ко возноше́ния та́йны не разуме́юще иуде́и ви́девше. Се Го́спода Бо́га и Спа́са на́шего Вознесе́ние на небеса́, всех чудне́е пра́здник. Днесь бо небе́сный круг ликовству́я, о́блаком подъе́млет Го́спода, на неизрече́нный Оте́чь Престо́л с пло́тию восходя́ща: и вся ли́ки а́нгельския на весе́лие собра́в, единогла́сно Трисвяту́ю песнь повеле́ воспева́ти глаго́ля: Сла́ва в вы́шних Бо́гу, и на земли́ мир, в челове́цех благоволе́ние. Днесь неви́димых бесо́в вся лесть низложи́ся. Днесь лику́я и веселя́ся проро́к Дави́д вопие́т глаго́ля: вознеси́ся на небеса́ Бо́же, и по всей земли́ сла́ва Твоя́. Днесь апо́стольский лик без сумне́ния со а́нгелы бесе́дует, поне́же Христо́с челове́чу плоть прии́м, и обожи́в ю́ Воскресе́нием Свои́м, и на не́бо одесну́ю Отца́ посади́, я́коже Лука́ Евангели́ст глаго́лет: пои́м Иису́с ученики́ своя́, изведе́ я́ вон до Вифа́нии, и рече́ им: се Аз посыла́ю обетова́ние Отца́ Моего́ на вы, вы же седи́те во гра́де Иерусали́ме, до́ндеже облече́теся си́лою свы́ше. И воздви́г ру́це и благослови́ я́ и отступи́ от них. И се о́блак све́тел подъя́т Его́ пред очи́ма их. Не то́кмо же ученицы́ еди́ни зря́ще бя́ху, но и Ро́ждьшая Его́, и ини́и наро́ди мно́зи с боя́знию зря́ху Христа́ с пло́тию возноси́ма. Чу́до же сие́ всех чуде́с преди́внее и гро́знее, егда́ от земли́ взя́тся я́ко челове́к бе ви́дим, а егда́ на высоту́ к небеси́ восхожда́ше, бо́лее ви́дети бя́ше. Егда́ же до́йде до небесе́, и вся займе́ небеса́ сла́вою Божества́, не исповеди́мо бо бе вели́чествие Его́, я́ко и небесе́ не ви́дети в сия́нии луч Сла́вы Его́. А́нгелом же послу́шествующым о виде́нии Его́, и второ́е пове́дающым прихо́д Его́. Два а́нгела ста́ста во оде́жди све́тле, и ре́ста ко апо́столом, что дивите́ся му́жие галиле́йстии, и что зрите́ на не́бо, се Иису́с вознесы́йся от вас на не́бо, па́ки прии́дет хотя́й суди́ти живы́м и ме́ртвым, и возда́ти кому́ждо по дело́м его́, Тому́ бо Оте́ц преда́ст суд весь. О коли́ко благода́тный Влады́ка Христо́с спасе́ние на́ше соде́я; с небесе́ бо прии́де, и па́ки вознесе́ся на небеса́ во сла́ве. Не а́ки на корабле́ спя, ни я́ко у кла́дязя утруди́вся жа́жда, ни я́ко на жребя́ти о́сли седя́, но сла́вно на кру́зе о́блачне вознесе́ся. Взы́де бо на не́бо, и се́де одесну́ю Бога́. Не я́ко на то́ржищи пред судия́ми стоя́, но Сам судя́й всей Вселе́нней, и апо́столом суди́ти власть даде́, глаго́ля им: егда́ ся́дет Сын Челове́ческий на Престо́ле Сла́вы Своея́, ся́дете и вы на двоюна́десяте престо́лех, судя́ще обемана́десяте коле́нома изра́илевома. И я́ко же подъя́т о́блак Христа́, та́ко и мы по рече́нию Па́вла апо́стола на о́блацех восхище́ни бу́дем. И я́коже Госпо́дь взы́де в восклица́нии и во гла́се тру́бне, та́ко и мы бра́тие страстны́й о́блак отъе́мше, оста́немся зло́бы и непра́вды, да всегда́ со Христо́м бу́дем. Днесь ве́рнии Вознесе́ние Госпо́дне духо́вне и боже́ственне почте́м, я́коже ле́по христия́ном, а не я́ко неве́рнии ядьми́ и пия́ньством, и игра́ми пусто́шными, и пе́сньми бесо́вскими: но пра́зднуем ве́рнии к Це́ркви теку́ще без зло́бы, ни́щыя же и сироты́ ми́лующе, бе́дным помога́юще, а́ще бо земны́х князе́й слуга́м честь воздае́те, то кольми́ па́че служи́телем небе́снаго Царя́ досто́ит честь и дар́ы дая́ти, ти́и бо вожди́ суть к Бо́гу. Мир и любо́вь ме́жду собо́ю име́йте, се бо глава́ доброде́тели: смире́ние же всяк грех побежда́ет. Сам бо Госпо́дь наш смири́ся нас ра́ди, и бысть челове́к пло́тию, страсть во́лею прия́т, и смерть вкуси́, но в тре́тий день воскре́се я́ко Бог, и вознесе́ся на небеса́. Смири́мся у́бо и мы ве́рнии, да вознесе́мся; Госпо́дь бо рече́, я́ко вознося́йся смири́тся, смиря́яй же ся вознесе́тся. Ми́лостыню же по си́ле да сотвори́м: я́коже бо вода́ огнь гаси́т, та́ко и ми́лостыня очища́ет грехи́. Бо́гу на́шему сла́ва, ны́не, и при́сно и во ве́ки веко́в. Ами́нь.

Весели́теся небеса́, и ра́дуйся земле́, поне́же посре́днюю сте́ну прегра́да разгради́в Иису́с, я́коже Па́вел глаго́лет: «Вражду́ я́же бе ме́жду Бо́гом и челове́ком, естество́м и мир сотвори́в, совокупи́ вы́спренняя с до́льними». Да сего́ ра́ди и мы убо́зии глаго́лем: «Днесь бо верх и нача́ток на́шея пло́ти, на не́бо Христо́с вознесе́», зане́же апо́стол глаго́лет: «Возста́ви с собо́ю, и посади́ ны с небе́сными о Христе́ Иису́се», отню́дуже испе́рва злы́й греху́ обре́тельник дия́вол, дме́ния де́льма оби́диваго, и презо́риваго велича́ния, спаде́. Те́мже вели́ким свои́м человеколю́бием, и́же бе того́ пре́лестию из рая́ изгна́н челове́к, того́ же Христо́с во о́ного ме́сто введе́.

Да сего́ ра́ди вся́кия че́сти досто́ин есть пра́здник сей вели́кий, и вся́коя ра́дости духо́вныя. Есть у́бо дру́зи, о дне́шнем дни́, - реку́ же о возше́ствии Христо́ве на не́бо, - по́весть сицева́. Дави́д о нем глаго́лет, пе́рвое о схо́де реки́й: «И прекло́нь небеса́ и сни́де, и примра́к под нога́ма Его́». А о дне́шнем восхо́де рече́: «Взы́де на херуви́м, и воспре́ти крилы́ ве́треными». «На херуви́м» же рече́, и́мже Сам Сей на небесе́х со Отце́м сый, херуви́м престо́л име́яше, и с челове́ки же по земли́ ходя́, херуви́мскаго и небе́снаго престо́ла ника́коже Себе́ не отлуча́ше. «Крила́ же ве́треняя» - о́блаки мени́т, и́миже восхи́тися, я́коже и в дея́ниих апо́стольских пи́шется: «И о́блак подъя́т И́ от о́чию их». Та́же содержа́ глаго́лет: «И я́ко зря́ще бя́ху на не́бо иду́щу Ему́, чу́до и у́жас апо́столом прибы́сть». Сме́ртни бо естество́м су́ще, и не обы́кше та́цех ви́дов, ужасо́шася умо́м.

Но а́ще и рече́т не́кто: я́ко и пре́жде ви́дели бе́ша преображе́ние, Петр и Иа́ков и Иоа́нн? Ви́деша пра́во ти́и преобрази́вшагося Го́спода, и о́блака осени́вшаго И́, но не ви́деша о́блака, на возду́х восхи́тивша И́, ни на небеса́ подъи́мшаго Влады́ку. Чу́до и то, ди́во же и се, но чу́до чу́да горде́е. Сие́ о́ного вы́ше есть, а́ще и того́ же Бо́га си́ла и та́йна бе́яше. Тогда́ Моисе́й и Илия́ яви́стася Петро́ви ча́ди, с Бо́гом бесе́дующая. А ны́не престо́л херуви́меск, ре́кше неви́димая си́ла, о́блак покрыва́ющи, внеза́пу приста́вши, Влады́ку с рабы́ бесе́дующа восхити́. Тогда́ Петр дерза́я, глаго́лаше: «Го́споди, добро́ есть нам зде бы́ти. Сотвори́м зде три жили́ща: Тебе́ еди́но, и Моисе́ю еди́но, и Илии́ еди́но». А ны́не ни словеса́ рещи́ ученицы́ мого́ша, ни уст отве́рсти свои́х, но стра́хом вели́ким ужасо́шася и убоя́шася.

Глаго́лет Писа́ние о том, реки́й: «Се му́жа два ста́ста во оде́жди бе́ле, я́же и ре́ста: «Му́жие галиле́йстии, что стоите́, зря́ще на не́бо? Вели́кое ли вы чу́до преужаси́ло есть? Забы́ли ли есте́ ре́кшаго: «Иду́ ко Отцу́ Моему́, и Отцу́ ва́шему»? И того́ ли ра́ди глаго́лаше к вам: «Не оста́влю вас си́ры»? И па́ки: «Мир Мой даю́ вам, мир Свой оставля́ю вам»? Не обеща́ ли вам Ду́ха Свята́го посла́ти? Сей Иису́с, возше́дый от вас на небо́, та́ко прии́дет о́блаки небе́сными со сла́вою и си́лою мно́гою. Сей прии́дет в год, егда́ бу́дет суди́ти ми́ру пра́вдою. Сему́ даст Оте́ц суд весь. Не по́мните ли, я́ко Сый с вами глаго́лаше: «Дана́ Ми есть вся́ка власть на небеси́ и на земли́»?».

Тогда́ апо́столи в себе́ бы́вше, обрати́шася пою́ще и благословя́ще Бо́га, жду́ще боже́ственных даро́в, и́же есть Пресвята́го Ду́ха прихо́д.

И сконча́ся Дави́дом глаго́лемое: «Взы́де Бог воскликнове́нием, Госпо́дь гла́сом тру́бным». Воскликнове́ние же мени́т, и́мже безпреме́нным гла́сом Трисвяту́ю хвалу́ воспущаю́т херуви́ми Бо́гу. А «глас тру́бный» - арха́нгельский мени́т, пре́жде назнамену́я Его́ восхо́д на не́бо.

Но и Святы́й Дух го́рним си́лам повеле́нием глаго́лаше: «Возми́те врата́ кня́зи ва́ши, и отъи́метеся врата́ ве́чная, и вни́дет Царь Сла́ве». А си́лы глаго́лаху, та́же дух суть: «Госпо́дь кре́пок и си́лен, Госпо́дь си́лен на́ брани». Победи́ бо ра́тника, вооружи́вся челове́ческою пло́тию на сатану́ и мучи́теля, угаси́ бо ему́ ражже́ное ору́жие. И на Кресте́ распя́т, и сме́рти вкуси́в, победи́ а́да и одоле́. Возста́в из ме́ртвых, и заблу́ждьшая овча́та обрати́в. Се у́бо восхо́дит, на плещу́ несы́й к девяти́десяти и девяти́м, я́же не бе́ша заблуди́ли, но горе́ живу́т на небеси́. «Госпо́дь кре́пок и си́лен, Госпо́дь си́лен во́ брани».

И па́ки глаго́лет си́лам: «ССей есть Царь Сла́ве». И си́лы я́ко слы́шаша, Госпо́дь си́лам, единогла́сие и обы́чное славосло́вие вопию́ще, прие́мляху Го́спода, и провожда́ху до Вы́шняго Превысо́каго Престо́ла.

И сконча́ся Дави́дом глаго́ланное: «Рече́ Госпо́дь Го́сподеви Моему́, седи́ одесну́ю Мене́, до́ндеже положу́ враги́ Твоя́ подно́жие нога́ма Твои́ма». О супоста́те! К ко́ему естеству́ рече́: «Седи́ одесну́ю Мене́»? Не Ему́же ли, от нас прия́ти плоть одушевле́нную, реку́ же, от Пречи́стыя Мари́и?

Да поне́же на́ша плоть на Престо́ле высо́цем днесь се́де, того́ ра́ди ра́дуемся бра́тие. Днесь бо Единоро́дный Сын Бо́жий, нача́ло пло́ти на́шея, ю́же прия́т от нас, ко Отцу́ вознесе́. Днесь змий разсе́чен бысть. Днесь грех челове́ческ не помина́ется. Днесь Ада́м преслуша́нием из поро́ды изгна́ный, вторы́м Ада́мом не в земны́й рай, но в Ца́рство Небе́сное восхо́дит.

И кто суть свиде́тельствующии Христо́ву Вознесе́нию? Двана́десяте ученицы́. Или́ не ве́руеши жидови́не, не ве́руеши апо́столом Христо́вым, очесы́ свои́ми ви́девшым восходя́ща на небеса́ Го́спода? Не ве́руеши ли толи́цем свиде́телем, то и Моисе́ови не ве́руеши. Рече́ бо Моисе́й: «Пред усты́ двою́ или́ трех свиде́телей, да ста́нет всяк глагол». Ха́бленый жидови́не, Моисе́й три по́слухи досто́йны сотвори́ вся́цей ре́чи, а Лука́ четы́режды три свиде́теле досто́йно ве́рны пове́дает: тем ли не ве́руеши па́губниче и поги́бле?

Да глаго́лет проро́к Иса́ия о тебе́, па́че же Бог Иса́иею: «Уве́дех, я́ко же́сток еси́ и ослушли́в, и жи́ла желе́зна вы́я твоя́, и чело́ ме́дяно». Не ве́руеши ли на́шым двана́десятим по́слухом, самови́дцем су́щым восхо́ду Госпо́дню?

И́мже уста́ ти загради́т еди́н то́чию Дании́л проро́к, ему́же а́ще и мно́гажды ся хо́щещи проти́вити, то не мо́жеши. То, что Дании́л глаго́лет, о возше́ствии Госпо́дни прорица́я, послу́шай ми: «Ви́дех, рече́, и се со о́блаки небе́сными, я́коже Сын Челове́чь восходя́, ре́кше гряды́й».

Подо́бен бо есть и вторы́й Ему́ прихо́д к пе́рвому восхо́ду, я́ко и дея́ния апо́стольская назнамену́ют, реку́ще: «И я́ко зря́ще бе́ша апо́столи, гряду́щу Го́споду на не́бо, се му́жа два ста́ста пред ни́ми во оде́жди бе́ле, я́коже и реко́ста: Му́жие галиле́йстии, что стоите́, зря́ще на не́бо? Се Иису́с, возше́дый от вас на не́бо, та́кожде прии́дет, я́коже ви́десте Его́ иду́ща на не́бо».

Смотри́ зело́ бра́те, ка́ко ти поставля́ет проро́к я́ве ипоста́сь. Се же рече́: «На о́блацех небе́сных, я́ко Сын Челове́чь гряды́й, и до Ве́тхаго дне дости́же», и та́ко бысть коне́ц проро́честву. Разуме́й ми: «Тому́, рече́, да́стся власть и честь». Не бо, но я́ко присносу́щному со Отце́м. Бог Сло́во у́бо, честь ту и держа́ву и́мать при́сно со Отце́м. Но и́же от Мари́и Де́вы соеди́нься одушевле́нною пло́тию, ре́кше те́ло видо́му, восходя́щему днесь о́блаком на не́бо. Чу́ден, Бог бо есть, и Челове́к соверше́н. Сему́ ся даст власть и честь и Ца́рство, по пло́тному смотре́нию. И вси лю́дие, племена́ и язы́цы рабо́тати Ему́ и́мут. И́мже и власть Его́, власть честна́, я́же не пре́йдет, ни поги́бнет, и Ца́рство Его́ ине́м лю́дем не оста́вится.

Срамля́йтеся жи́дове, проро́ки почита́юще, о Не́мже суть прорица́ли, глаго́люще, Христа́ Того́ не хотя́ще уве́дети, Его́же мы убо́зии уве́девше, кла́няемся. О́ чудеса́ пристра́нная! И́мже и рай ся заключи́, то тем не́бо ся днесь отве́рзе. Ему́же Пила́т суди́, Той днесь на небеси́ Судие́ю седа́ет. Ему́же ся жи́дове руга́ша, Того́ а́нгельския си́лы сла́вят.

О́ пречи́стый у́ме Дави́дов, и́мже сего́ до зря глаго́лаше, реки́й: «Рече́ Госпо́дь Го́сподеви Моему́, седи́ одесну́ю Мене́», И́маже сла́ва, честь и держа́ва, с Пресвяты́м и Животворя́щим Ду́хом, ны́не и при́сно и во ве́ки веко́в. Ами́нь.

Стихи́:

Одесну́ю се́л еси́ Отца́ Сло́ве:

Ве́ру ученико́м изве́стншую показа́вый.

В то́йже де́нь, в четверто́к шесты́я неде́ли по Па́сце, Вознесе́ние пра́зднуем Го́спода Бо́га и Спа́са на́шего Иису́са Христа́. Поне́же бо со ученики́ пре́жде стра́сти пребыва́я, Всесвята́го Ду́ха обеща́ прише́ствие, ре́к: поле́зно е́сть, да Аз иду́: а́ще бо Аз не иду́, Уте́шитель не прии́дет. И па́ки: егда́ же прии́дет Он, научи́т ва́с на всю́ и́стину. По воскресе́нии же из ме́ртвых, во дне́х четы́редесятих явля́яся и́м, не вку́пе, но особопребыва́нием яды́й с ни́ми и пия́, изве́стнейшее воскресе́ние представля́я. Коне́чнее мно́га о Ца́рствии Бо́жии обетова́в, запове́даше си́м от Иерусали́ма не отлуча́тися, но та́мо пребыва́ти, Пресвята́го Ду́ха прише́ствия жда́ти, и Те́м креща́емым: водо́ю бо бя́ше и еди́ною пре́жде креще́ние от Иоа́нна, а́ще и по́слежде Епифа́ний Ки́прский повествова́: я́ко Богосло́в у́бо Иоа́нн Богоро́дицу крести́, Пе́тр же и то́й и про́чыя апо́столы. Запове́да же и́м пребыва́ти во Иерусали́ме, да та́мо пре́жде про́поведь Ева́нглиа извести́тся, да не ка́ко в чужда́я отше́дше места́, удо́бно обо́лгани бу́дут, и я́ко до́лжно бя́ше, я́ко во́ином не́ким отсю́ду угото́витися ору́жием Ду́ха, и та́ко на бра́нь поити́ вра́г Христо́вых. Но поне́же вре́мя наста́ Вознесе́ния, возво́дит у́бо и́х на го́ру Елео́нскую: нарица́ется же си́це, зане́ мно́жайшими ма́слинами насажде́на бе́. И глаго́лав и́м о е́же в конце́ сего́ пропове́дания: еще́ же и о непостижи́мом Свое́м Ца́рствии в бу́дущем, поне́же и о́нех не искуша́ти Его́ хотя́щих зря́ще, су́щей та́мо и Пречи́стей Его́ Ма́тери, приставля́ет а́нгелы и́м, на небеса́ восхожде́ние показу́ющыя. И зря́щым у́бо взя́тся от среды́ и́х, о́блаку О́наго подъи́мшу, и та́ко от а́нгел предсыла́емь, повелева́ющих дру́г дру́гу небе́сных двере́й взя́тие, и дивя́щихся е́же от крове́й пло́ти Его́ червле́нному, взы́де и се́де одесну́ю Отца́, обожи́в пло́ть и дерзну́ глаго́лати, сотвори́в сию́ ку́пно боже́ственную, е́юже мы́ примири́хомся, дре́вней вражде́ разруши́вшейся. Апо́столом у́бо а́нгели в ви́де муже́й предста́ша глаго́люще: му́жие галиле́йстии, что́ стоите́ дивя́щеся, и на не́бо взира́юще? Се́й Его́же ви́дите с пло́тию Бо́га Иису́са, Се́й прии́дет па́ки с пло́тию я́ве: оба́че не я́коже пе́рвее, убо́зе же и молчали́вне, но со сла́вою вели́кою, я́коже ны́не зрите́ от а́нгел провожда́ема. Тогда́ апо́столи е́же взира́ти оста́вльше, возврати́шася от горы́ Елео́н: бли́з же сия́ е́сть от Иерусали́ма две́ ты́сящи и четы́редесять ножны́х сто́п, разстоя́щи е́й: се́ бо е́сть суббо́те пу́ть. Си́це же узако́нено бы́сть Моисе́ем на толи́ко сто́п в суббо́ту ходи́ти, зане́же и се́нь свиде́ния, толи́цеми стопа́ми но́гу бя́ше отстоя́щи от иуде́йскаго полка́. Возмо́жно бо бе́ не́ким та́мо в суббо́ту ходи́ти поклони́тися, и не вя́щшее ше́ствие протяза́ти, сего́ ра́ди нарече́ся и суббо́ты пу́ть. Мни́тся же не́ким отсю́ду, я́ко и Христо́во Вознесе́ние в суббо́ту бы́сть, оба́че погреши́ша. Возвра́щшеся же апо́столи внидо́ша в го́рницу, в не́йже бе́ша соше́дшеся с мироно́сицами жена́ми, и Ма́терию Сло́ва, посто́м и моли́твами, и моле́нием упражня́ющеся, и наше́ствия Всесвята́го Ду́ха ожида́юще, я́коже бе́ обеща́ние. Вознесы́йся во сла́ве Христе́ Бо́же, поми́луй на́с. Ами́нь.

{k|Исходя́ще в притво́р, пое́м стихи́ру хра́ма:

И а́бие сло́во: Cло́во на Вознесе́ние Го́спода на́шего Иису́са Христа́, и я́ко да благоуго́дно жи́ти между́ собо́ю:

Бра́тие и отцы́, пра́здник пра́здником нам и́же пред две́рьми, Вознесе́ние Го́спода на́шего Иису́са Христа́. И та́йна толи́ка же и пачеесте́ствена: возно́ситбося естество́ на́ше на пренебе́сная, я́коже есть пи́сано: «Благода́тию есте́ спасе́ни, и совоскреси́в посади́ на небе́сных о Христе́ Иису́се», И́же естество́ [на́ше] дося́же Бо́га превы́ше вся́каго нача́ла, и вла́сти, и си́лы, и госпо́дьства, и вся́кого и́мене имену́ющагося: не то́кмо в ве́це сем, но и в бу́дущем. И вся́ко покори́л есть под но́зе его́, и тому́ дал есть сла́ву: па́че всех Це́ркви, е́же есть те́ло Его́, исполне́ние всех испо́лнившему.

Ви́дите у́бо на ку́ю высоту́ вознесе́ся челове́чество? Не от земли́ в зе́млю, ни от тли во истле́ние. Ели́ко а́ще кто рабо́тает, да бу́дет любо́вен ни́жнему истле́нному царю́. Оба́че мы, а́ще и су́ще отчужде́ни и врази́ помышле́нием в де́лех лука́вых, не то́кмо примири́хомся Бо́гу и Отцу́ Го́сподом на́шим Иису́с Христо́м, но и в сыно́вство взыдо́хом, от вся́кыя ви́димыя и неви́димыя тва́ри покланя́емому. Таково́ ны́не есть вели́чество неизглаго́ланнаго человеколю́бия Блага́го Бо́га на́шего.

И сие́ разуме́в блаже́ный апо́стол возопи́: «Что есть наде́жда зва́ния Его́? И что бога́тство сла́ве нача́льства Его́ во святы́х? Что превели́кое мно́жество си́лы Его́ в нас ве́рующих по дея́нию держа́вы кре́пости Его́, е́же соде́я о Христе́ Иису́се?». Что бо и бысть. Прии́де к нам Преблагий рожде́нием челове́ческим. Пострада́ бу́дущим зако́на естество́м. Взы́де на крест. Пригвозди́ на нем рукописа́ние на́ше. Сни́де в преиспо́дняя земли́, разруши́в боле́зни сме́ртныя и совоскреси́в с Собо́ю челове́чество. Вознесе́ся в сла́ве. В коне́ц, яви́ся Бо́гу и Отцу́. Сия́ у́бо есть вма́ле рещи́ и о святе́м пра́зднице.

И на сия́ возре́вше бра́тие, я́ко те́ло Христо́во есмы́, усрами́мся да́ра, сохрани́м доброро́дие, не предади́м благода́ти, не сотвори́м Христо́вы у́ды - блудни́ча у́ды, но и еще́ очи́стим себе́, и по́мыслы и де́лы отве́рземся пло́тских похоте́ний, и́же вою́ют на ду́шу, житие́ на́ше иму́ще у себе́ доброми́рно, благове́рно, послушли́во, бла́го, смире́но, доброста́вно: и то есть блаже́ный живо́т. Пи́ща же и игра́ние, смех же и несы́тоство, и ели́ко безако́нная - отсыла́ти плотолюби́вым, и́же зря́ще не ви́дят и слы́шаще не слы́шат, омраче́нно иму́ще се́рдце и отягоще́нне у́ши, не избира́юще до́брое от зла, свет от тмы, живо́т от сме́рти, но в гото́ве ходя́ще огни́. Огнь бо есть по́мысл пло́тский, и па́че необузда́нно теку́т к нему́. Ров есть сребролю́бия - и па́че в ров впада́емии не пременя́ются, самово́льно себе́ протяза́юще де́мона, угоре́нию па́че, а не блаже́нству: усу́ждени су́ще я́ко вои́стинну, я́ко блага́я отри́нуша, поги́бельныя тли па́че любя́ще.

Мы же бра́тие держи́мся во испове́дании в не́мже стои́м, и хва́лимся в наде́жди сла́вы Бо́жия. Име́им пост и́мже пости́шася святи́и, я́коже ны́не воспева́емый блаже́ный Пахо́мий. Здра́во ви́дим, здра́во слы́шим, здра́во прико́снемся все́ми у́ды, здра́во су́щии сло́вом приво́дими, и Сло́ву уго́дницы су́ще, и насле́дницы бу́дем по обетова́нию жи́зни ве́чныя о Христе́ Иису́се Го́споде на́шем, Ему́же сла́ва и держа́ва честь и покланя́ние со Отце́м и Святы́м Ду́хом, ны́не и при́сно и во ве́ки веко́в. Ами́нь.

По чте́нии же, а́бие тропа́рь свята́го Фео́дора, глас 8:

Правосла́вия наста́вниче, благоче́стия учи́телю и чистоты́, / вселе́нныя свети́льниче, мона́шествующих Богодухнове́нное удобре́ние, / Фео́доре прему́дре, уче́ньми твои́ми вся просвети́л еси́, цевни́це духо́вная, // моли́ Христа́ Бо́га спасти́ся душа́м на́шим.

И посе́м а́бие пе́рвый час по обы́чаю.