Послу́шайте, бра́тия возлю́бленная и сы́нове, да ска́жем вам си́лу и честь сего́ свята́го дне, во́ньже Госпо́дь Бог наш попра́в дия́вола и сме́рти держа́ву разруши́в, воскре́се я́ко Безсме́ртен и вся уме́ршыя пра́ведники с Собо́ю воскреси́в. И ны́не проро́ком призыва́ет нас, глаго́ля: «Прииде́те возра́дуемся Го́сподеви, воскли́кнем Бо́гу Спаси́телю на́шему. Предвари́м лице́ Его́ испове́данием, во псалме́х воскли́кнем Ему́» , я́ко сни́де с небесе́ поиска́ти заблу́ждьшаго и спасти́ поги́бшаго челове́ка. Бе́хом бо я́ко о́вцы не иму́ще па́стыря, в расхище́ние волко́м, ре́кше бесо́м порабо́тившеся. Да того́ не моги́й терпе́ти Госпо́дь наш Иису́с Христо́с, преклони́в небеса́, сни́де к нам и в плоть на́шу оде́яся, хотя́ ея́ исцели́ти из истле́ния, е́же прия́т пе́рвый пра́дед наш Ада́м, преступи́в за́поведь Бо́жию в раи́ прельще́нием змии́ным, и отто́ле вни́де в ны смерть, и бе́хом порабо́тилися грехо́ви. Да того́ ра́ди прии́де к боля́щым Врачь, к пле́нником Свободи́тель, к седя́щым во тме незаходи́мый Свет, к ме́ртвым Живо́т безсме́ртный - да уме́ршии о Ада́ме, о Христе́ оживу́т. Той бо есть Мир наш, примири́вый ны Собо́ю ко Отцу́ Своему́ воплоще́нием Си. И стра́сти во́льныя нас ра́ди пострада́ пло́тию, Безсме́ртен Сый Божество́м. Не бе бо ка́ко без стра́сти пло́ти сея́ очи́стити, страсте́м Себе́ и тли повину́вшым. И того́ ра́ди пригвозди́ся на Кресте́, и же́лчи, и о́цта вкуси́, да го́рькаго вку́са изба́вит ны, е́же сотвори́ пра́дед Ада́м в раи́ дре́вле. Дре́внею бо сне́дию испа́ли бе́хом из поро́ды, да того́ ра́ди восхоте́ на Кресте́ пригвозди́тися Бог Безстра́стный. Дре́вом исцеля́я дре́внюю кля́тву на́шу и смерть вкуша́ет пло́тию по нас, Безсме́ртный Сый Божество́м, оживи́ти ны хотя́ и изреши́ти ны от у́зы сме́ртныя. Его́же ви́дев со́лнце распина́ема, во тму преложи́ся, и луна́ в кровь, и земля́ протрясе́ся, и ка́мение распаде́ся, и гроби́ отверзо́шася, и мно́га телеса́ святы́х успо́пших о Го́споде воста́ша и яви́шася мно́гим. Сшед бо на а́да, держа́ву его́ разруши́, извоева́в пле́нники его́, с Собо́ю воскреси́ вся пра́ведники от пе́рваго Ада́ма.
Те́мже, бра́тие, бла́го вре́мя есть проро́ка привести́ и возопи́ти с ним, реку́ще: «Сей день, и́же сотвори́ Госпо́дь, возра́дуемся и возвесели́мся вонь» . Ле́по бо есть ра́доватися преди́вней Его́ ми́лости, ю́же сотвори́ днесь нас ра́ди. Днесь сме́ртию Свое́ю попра́ врага́, воскре́се я́ко от сна, нетле́ние и жизнь источи́в ро́ду челове́ческому. Днесь а́дова врата́ сокруши́шася, и держи́мыя в нем неизрече́нным све́том озаря́еми воста́ша и, со а́нгелы лику́юще, вопию́т: «Сла́ва в вы́шних Бо́гу, и на земли́ мир, в челове́цех благоволе́ние» . Днесь ра́достию лику́ет пра́дед наш Ада́м, пе́рвую кля́тву попира́я, и ру́це простира́ет с Е́вою, востаю́щу ему́ о Го́споде. Днесь не́бо и земля́ ра́дости испо́лнишася, общь лик сотвори́ша, на ра́дость безпло́тныя си́лы и челове́ческа ро́да собира́ют. Днесь апо́стол вопие́т, глаго́ля: «Па́сха на́ша, за ны пожре́ся Христо́с» . Днесь Це́ркви вопие́т, созыва́ющи с высо́ким пропове́данием и глаго́лющи: «Прииди́те ча́да, послу́шайте мене́, стра́ху Госпо́дню научу́ вы» .
Купе́ль угото́вися, обновля́ющи обетша́вший грехо́м род наш. Трапе́за Бо́жия угото́вися, предлага́ющи а́гнца Бо́жия, взе́млющаго грехи́ ми́ра Христа́ Бо́га на́шего, зако́льшагося нас ра́ди и подае́ма всем ве́рным на проще́ние грехо́в и на жизнь ве́чную. Те́мже бра́тие, не мо́жем лиши́тися за ма́лу по́хоть или́ за гнев си́це стра́шныя и неизрече́нныя та́йны, сотворе́ныя на́шего ра́ди спасе́ния. Но чи́стою душе́ю и те́лом, со стра́хом приступа́юще и с ми́ром, та́ко да наслади́мся Пречи́стаго Те́ла Христо́ва и Кро́ве. Прии́мше же сие́, чи́сти да пребыва́ем, от всего́ чи́стящеся, а не возвраща́ющеся на пе́рвыя блево́тины или́ я́ко свиния́, измы́вшеся и па́ки в ка́ле валя́ющеся. Ни, бра́тие, не мо́жем та́цы яви́тися, но я́коже нас Христо́с искупи́ Свое́ю Кро́вию, чи́сты и непоро́чны соверше́ны в любо́вь Бо́жию, да пребу́дем сла́вяще Его́, ку́пно со Отце́м и Святы́м Ду́хом, ны́не и при́сно и во ве́ки веко́в. Ами́нь.