Ле́по с ра́зумом разсмотря́я де́яти: не уме́рших мно́го пла́катися, ни влас терза́я, ни лица́ деры́й я́ко неве́рнии, и́мже не бы́ти с Бо́гом. А ве́рным о тех скорбь име́ти, а́ще кто без покая́ния у́мрет: о такове́м же ни прин́оса в це́рковь несть досто́йно. Пла́кати же и о скупы́х, о бога́тых, и́же не скорбя́ще в животе́ о души́. А́ще кто жив щедр и пода́тлив быв, то и по сме́рти пода́нием мно́го души́ посо́бие есть. О том проро́к Дави́д глаго́лет: «Блаже́н и́же име́нием свои́м ду́шу свою́ искупи́т от му́ки». «Благ, рече́, милуяй дая́: а неми́лостивым без ми́лости будет суд». То́же ра́ди кто печа́луя в животе́ о души́ свое́й: «не роди́ло бо ся [есть] ни с ким же име́ние»: я́ве бо есть, ни умира́я кто отнесе́т что, то́кмо со грехи́ отъи́дем све́та сего́, а име́ние оста́нется ине́м.

О́ челове́че! Сотвори́ си при животе́ па́мять, - еди́на ти есть душа́, и еди́но житию́ вре́мя, - а не глаго́ли: «Де́тем беру́ име́ние: те ми па́мять створя́т». Не ве́си, кацы́ б́удут де́ти или́ ка́ко вре́мя пости́гнет: име́ние у́бо реце́ подо́бно есть. Всяк поспе́й в животе́ свое́м о спасе́нии. Мно́зи бо ску́постию лиша́ются Бо́га. Мно́зи же и при животе́ свое́м име́ния лише́ни быва́ют.

Того́ де́ля в ти́хо вре́мя, да́же беда́ не пости́гнет, отделя́й часть от име́ния душе́вную, доко́ле в твое́й о́бласти есть. Устрая́ем спасе́ние себе́. О сем бо и вели́кий Диони́сий глаголет: «А́ще кто в животе́ скорбь име́л о гресе́х, тому́ и по сме́рти много души́ посо́бие твори́м мы моли́твами и ми́лостынями». А́ще ли ве́рный без покая́ния у́мрет, в животе́ был враг Бо́гу: таково́му по́мощи несть по сме́рти, я́коже и Дави́д глаго́ла: «Несть в сме́рти помина́яй тебе́, и во а́де кто испове́сть Ти ся?».

Тем ве́рнии по си́ле всяк раздава́я по уме́рших: мно́го бо душа́м ве́рным посо́бие, е́же по них дава́ти маломо́щным, и́же попо́ви и диа́кони о ни́хже мо́лятся и слу́жбы творя́т ча́сто: запове́дано бо от апо́стол о преста́вльшихся в ве́ре во святе́й сл́ужбе помина́емым бы́ти, мно́га уме́ршим по́льза.

Се же о ве́рно преста́вленых рече́но. А неве́рнии недосто́йни умерши поминове́ния никогда́ же. Почто́ же ми́ра де́ля всего́, за вся челове́ки повеле́ Бог мольбы́ твори́ти, а мно́зи в миру́ разбо́йницы, та́ти, прелюбоде́и, и мно́га испо́лнени зла? Но за вся рече́ живы́я моли́тися, да бы в покая́ние пришли́: а неве́рнии - да бы в креще́ние пришли́.

А о ме́ртвых рече́но то́кмо о ве́рных моли́тися. А неве́рный, а́ще у́мрет, поги́бе наде́жда спасе́ния его́. Того́ ра́ди неве́рнии жале́ют, я́ко не вид́ети им сла́вы Бо́жия, ни ра́дости святы́х слы́шати. Что Па́вел апо́стол к солу́няном пиша́ рече́? «Не велю́ вам не разумева́ти о уме́рших, да не жале́ете, я́ко и про́чии не иму́щии упова́ния. Ве́руйте, я́ко Христо́с у́мре и оживе́: та́ко и уме́ршая воста́вит и приведе́т к Себе́. Та́ко и ве́рнии с Бо́гом бу́дем». И бу́дем. А саддуке́ом и всем неве́рным с Бо́гом не бы́ти. Того́ ра́ди окая́ннии жале́ют, а мы ве́рнии о гресе́х печаль имы́й кого́ждо о свои́х. И не мо́зем мно́г день и о уме́рших скорбе́ти, но о себе́ печа́ль, да им гото́вим до́брая дела́, да на живо́т покая́нием при́дем. Пра́веднии бо от сме́рти в живо́т гряду́т: а гре́шник а́ще у́мрет, во тме бу́дет душа́ его́ до дни Суда́: а пра́веднии во све́те суть.

Мно́зи бо тщесла́вия де́ля пла́чут, а отше́д кощу́нают и упива́ются. О́ челове́че! А́ще и́стинною скорби́ши, то в хра́ме свое́м пла́чи, не ве́дяще тебе́ никому́же. Се есть пожале́ние серде́чное, се и тебе́ на по́льзу, о о́ном пла́ча: сам ся на покая́ние обрати́ши и стра́шно бу́дут ти грехи́.

Бо́гу на́шему сла́ва всегда, ны́не и при́сно, и во ве́ки ве́ков. Ами́нь.