Све́тла и ра́достна есть о всех святы́х бесе́да, обои́м хотя́т подо́бити: и бесе́дующим, и послу́шающим кни́гам, и́же бесе́дуют, ка́ко суть от ве́ка на сем све́те Го́споду Бо́гу угоди́ли, и уго́ждьше в ми́лости Его суть и сла́ве, ве́лию по́льзу челове́чу ро́ду подаю́ще: ве́рою же, и упова́нием, и любо́вию. Ве́ра бо есть ча́емаго бла́га упова́ние, на не́же у́бо упова́ху не ве́дуще, терпе́нием приима́ху, неве́рующе неве́рныя , любве́ ра́ди. Я́коже есть ны́не ви́дети, ка́ко честны́х оста́нцы, си́речь мо́щи, ме́ртви лежа́ще, я́ко и жи́ви чудеса́ творя́т, неду́ги целя́ще, нечи́стыя ду́хи изгоня́ще и вся́ку напа́сть си́лою Христо́вою отре́юще от призыва́ющих я́ на по́мощь. Прилежи́т бо при́сно святы́х моще́м, благода́ть Свята́го Ду́ха вся́ка чудеса́ творя́щи. Поне́же бо му́жски Христа́ испове́даша пред челове́ки, мно́гим терпе́нием стра́ждуще: те́мже и Той Сам просла́ви я́, не то́кмо жи́вы су́ща, но и ме́ртвы пред Бо́гом Отце́м и святы́ми а́нгелы.
«И́же бо Мя, рече́, испове́сть пред челове́ки, испове́м и́ и Аз пред отце́м Мои́м И́же на небесе́х. А и́же Мене́ отве́ржется пред челове́ки, отве́ргуся его́ и Аз пред отце́м Мои́м и́же есть на небесе́х».
Да и мы подо́бящеся им ра́вным терпе́нием, прие́млюще стра́сти терпи́м, тща́щеся улучи́ти блага́я та, и́хже о́ко не ви́де, и у́хо не слы́ша, и на се́рдце челове́ка умира́юща не взы́де, на неже жела́ют а́нгели прини́кнути, я́же есть угото́вал Бог лю́бящим И́. Сего́ ра́ди Сам прекло́нь небеса́ и сни́де, да бы ны извле́кл горе́ ни́зу лежа́щая и в грехо́внем паде́нии.
«Сше́дшый бо, рече́, Той есть и возше́дый вы́шше всех небе́с, да испо́лнит вся». Той бо есть в Це́ркви положи́л, о́вы апо́столы, о́вы же проро́ки, о́вы же евангели́сты, о́вы же па́стыря и учи́теля в сверше́ние святы́х, «и́хже ви́дяще, рече́, прехожде́ние жития́ подо́битися ве́ре, пости́жуще в ра́зум Сы́на Бо́жия, в муж соверше́н, в число́ возрасте́ния исполне́ния Христо́ва».
В сверше́н бо муж бысть Христо́с Сын Бо́жий, я́коже и сверше́н Бог Сый, и вся и́мать сам Собо́ю. И посла́ Своя́ ученики́, рек к ним: «Ше́дше научи́те вся язы́ки. Храни́те вся я́же запове́дах вам, крестя́ще я́ во и́мя Отца́ и Сы́на и Свята́го Ду́ха: всяк бо рече́ ве́ровавый и крест́ящейся спасе́тся, а неве́ровавый и не крестя́щейся осу́дится». Сам бо сия́ твори́т.
Всяк бо, и́же слы́шав благода́ть Бо́жию, не послу́шает, но ослу́шает, или́ свое́ю ле́ностию, или неве́рованием. Несть бо преста́л есть никогда́ же де́лая, си́речь челове́ча спасе́ния, я́коже рече́ Сам Спас: «Оте́ц Мой досе́ле де́лает, и Аз де́лаю». А́ще бо рече́ «И почи́ в седмы́й день от всех дел Свои́х», я́же сотвори́ ви́димую сию́ тварь сотвори́, но от сего́ не почива́ет де́лая: е́же сотвори́ пе́рвый челове́к Ада́м прегре́шь, да и бы па́ки возврати́л на то́жде, его́же бе ра́ди створе́н.
По изгна́нии бо пе́рваго челове́ка из рая́, а́бие яви́[ся] благове́рующь А́вель, убиеный пе́рвее рве́ния ра́ди. Пото́м же Ено́с, иже упова́ призыва́ти и́мя Го́спода Бо́га. И по тою́ – Ено́х, угожда́я Ему́, и жив преставля́емь на со́весть после́дняя кончи́ны от того́ ро́да. По сих же пра́ведный Ной, я́коже рече к нему́ Госпо́дь: «Я́ко тя ви́дех предо Мно́ю пр́аведна в ро́де сем»: из него́ же па́ки бысть порожде́ние челове́че по пото́пе. По те́хже па́ки всех воздви́же в други́й род, Авраа́ма и Исаа́ка и Иа́кова, да бу́дут челове́цы не были никогда́ же без Б́ожия уго́дника, хода́тающаго к Нему́ за ня. «Бе бо рече́ Авраа́м стоя́ пред Го́сподем и рече́: не погуби́ пра́веднаго с нечести́выми, и бу́дет пра́ведный я́ко нечести́вый». По тех же обана́десять патриа́рха. И па́ки законода́вца Моисе́я и Ааро́на. И судию́ Иису́са На́вгина. И Гедео́на, и Вараа́ка. По сих же и проро́ки, от Саму́ила наче́н и про́чая. Иса́ия и Дани́ла. Да́же до Иоа́нна Крести́теля: «Бо́ле в рожде́нных жена́ми не воста́». Сам бо Иису́с не бе от про́стыя жены́ рожде́н, я́коже ини́и челове́цы, но от Де́вы Чи́сты. По сих же всех и 12 ученика́ посла́ сам, свои́ми усты́ рек к ним: «Иди́те научи́те вся язы́ки».
Пе́рвее бо пома́лу приве́д челове́чь род, от и́дольскых треб на жидо́вскаго зако́на же́ртвы Моисе́ем запове́дав: не удо́бно бо есть ста́раго обы́чая иногда́ премени́ти. По сих же па́ки же́ртвах, на и́стинную сию́ же́ртву ева́нгельския за́поведи, е́же есть свята́я слу́жба без кро́ве и смра́да твори́ма при́сно по всей земли́ христиа́нскою слу́жбою. «Бы́ша бо, рече́, в пога́н ме́сто иуде́и, и в иуде́й ме́сто христиа́не», пома́лу преба́влени на и́стинную слу́жбу.
Ти́и же святи́я апо́столи, христиа́нския че́сти о́браз на себе́ взе́мше, и отре́кшеся не то́кмо сего́ жития́, но и свои́х душь на сем све́те, внидо́ша в весь мир, я́ко и в мо́ре влага́ющеся пога́нством и жидо́вством, и́же совещева́ющеся между́ собо́ю, не то́кмо ты са́ми апо́столы избива́ху, но и ве́рующая в Бо́га сло́вом их. Мно́гами му́ками скончева́ху, а и́же избива́ху мучи́тель тех осо́бь живу́ще. Подо́бящеся му́кам Христо́вым и страсте́м тех святы́х, са́ми ся в страсть предая́ху. И стражду́ роди́тся. И всего́ ро́да своего́. И поко́я жити́йскаго све́та. То́кмо на моли́тве пребыва́юще свои́м трудо́м. Не то́кмо потре́бною слу́жбою себе́ послужа́юще. Но ино́му держа́щу ева́нгельское сло́во во уме́ свое́м, я́ко Иоа́нн Крести́тель: «Ну́димо есть Ца́рство небе́сное, и ну́жницы восхища́ют е́». То́жде и ны́не есть в челове́цех, и быти и́мать до после́дняго дне.
Сия́ же рече́ вси изве́стовании верою. И не прия́ша обетова́ния Бо́жия. О нас Бо́гу лу́чше что прозре́вшу. Да не без нас сверше́ни бу́дут. Суть же на ми́лости Бо́жии в ве́ки живу́ще. О Го́споде бо рече́ мзда их и строе́ние их от Вы́шняго. И не ко́снется их му́ка, зане́же душа́ пра́ведных в руце́ Бо́жии. В ми́ре бо, рече́, моля́щеся за весь род челове́чь при́сно, во мно́гих оби́телех Отца́ Го́спода Бо́га на́шего. И́хже моли́твами бу́ди нам улучи́ти часть и насле́дие с ни́ми о Христе́ Иису́се Го́споде на́шем, Ему́же хвала́ и сла́ва со Святы́м Ду́хом, ны́не и при́сно и во ве́ки веко́в. Ами́нь.