А́ще Аз сведе́тельствую о Себе́, сведе́тельство Мое́ несть и́стинно. Ин есть сведе́тельствуя о Мне, и вем, я́ко и́стинен есть.

А́ще кто струну́ ру́дную копа́ти на́чнет, хи́трости сея́ не иску́сен сый, зла́то у́бо не соде́лает, вся же про́сте и вку́пе слива́я, труд неполе́зен претерпева́ет и вре́ден. Си́це и боже́ственых писа́ний после́довании неве́дящии, ниже́ сво́йство и зако́ны его́ истяза́юще, но про́сте и еди́ным о́бразом вся проходя́ще, зла́та с земле́ю смеша́юще, никогда́же внутрь лежа́щее ей сокро́вище обрета́ют. Сия́ же рех ны́не, поне́же у́бо предлежа́щее нам ме́сто име́ет мно́го зла́та, не у́бо я́вствено, но мно́гих посы́пано свы́ше утверже́нием. Те́мже подоба́ет копа́ющим и очища́ющым на при́сная разуме́ния приити́. Кто бо не а́бие смути́лбыся, слы́шав Христу́ глаго́лющу: «А́ще Аз сведе́тельствую о Себе́, сведе́тельство Мое́ несть и́стинно»? И́бо во мно́гих ме́стех явля́ется сведе́тельствовав о Себе́. Самаряны́ни у́бо бесе́дуя, рече́: «Аз есмь Христо́с». И слепо́му: «Глаго́ляй с тобо́ю, Он есть». И иуде́ем: «Ка́ко вы глаго́лете, я́ко ху́лит, зане́ рех Сын Бо́жий есмь», и друго́ицы же во мно́гих ме́стех сие́ твори́т. А́ще у́бо вся сия́ ло́жна бу́дут, ка́я нам бу́дет спасе́ния наде́жда? Отку́ду же и́стинну обря́щем, егда́ сама́я И́стинна глаго́лет: «Я́ко несть сведе́тельство Мое́ и́стинно»? Не сие́ же ви́дится сопротивле́ние быти то́кмо, но и и́но, не ме́ньши сего́. Происходя́ бо рече́: «И а́ще Аз сведе́тельствую о Себе́, сведе́тельство Мое́ и́стинно есть». Ко́е у́бо, рцы ми, прииму́? Ко́е бы́ти вознепщу́ю ло́жно? А́ще си́це прии́мем про́сте я́коже рече́ся, ни а́ще испыту́юще, ни вину́, ни и́но от таковы́х ничто́же - обоя́ бу́дут ло́жна. А́ще бо сведе́тельство Его́ несть и́стинно, ниже́ сие́ само́е и́стинно, не второ́е то́кмо, но и пре́жнее. Что у́бо есть рече́нное? Мно́гаго нам тре́ба есть бде́ния, па́чеже Бо́жия благода́ти, да не во глаго́лех пребу́дем про́стых. Си́це бо и еретики́ заблужда́ют, егда́ ниже́ ра́зума истеза́ют глаго́лющаго, ниже́ нра́ва глаго́лемых о слы́шащих. А́ще бо не сия́ приложи́м и ина́я же: си́речь, времена́, и мес́та, и изволе́ние послу́шателя, - мно́га после́дствуют безме́стная.

Что же у́бо есть рече́нное? Хотя́ху глаго́лати ему́ иуде́и: «А́ще Ты сведе́тельствуеши о Себе́ Сам, сведе́тельство Твое́ несть и́стинно». Сего́ ра́ди сия́ предвари́в, рече́, а́ки бы глаго́лал: «Не́гли рече́те Мне, я́ко Тебе́ не ве́руем, никто́же бо вско́ре себе́ сведе́тельствуя достове́рен в челове́цех».

Что у́бо? Несть ли и́стинно не про́сте прочита́ющему, но прилага́ющему оне́х непщева́ние, си́речь, я́ко «вам несть и́стинно», не у́бо к досто́инству Своему́, но к непщева́нию оне́х веща́ше сия́. И егда́ у́бо глаго́лет «сведе́тельство Мое́ несть и́стинно», ра́зум облича́ет оне́х и хотя́щее Ему́ о оне́х сопротивле́ние наводи́тися. Егда́ же «я́ко а́ще и Аз о Себе́ сведе́тельствую, и́стинно есть сведе́тельство Мое́» - само́е показу́ет ве́щи естество́, зане́ я́ко Бо́га достове́рна Его́ подоба́ше непщева́ти и о Себе́ глаго́люща.

Поне́же бо рече́ воскресе́ние ме́ртвых и суд, и я́ко ве́руяй ему́ не осу́дится, но в живо́т прии́дет, и я́ко ся́дет всех вины́ истязу́я, и я́ко ту же о́бласть име́ет О́тчу и си́лу, хотя́ па́ки вся си́я устрая́ти, и и́нако ну́жне спротивле́ние их положи́ пе́рвое. Рех, рече́, «зане́ я́коже Оте́ц воскреша́ет ме́ртвых и животвори́т, си́це и Сын и́хже хо́щет животвори́т». Рех, «я́ко Оте́ц ни еди́ного же су́дит, но суд весь даде́ Сы́нови». Рех, «я́ко подоба́ет почита́ти С́ына я́коже Отца́». Рех, «я́ко не почита́яй Сы́на, ниже́ Отца́ почита́ет». Рех, «я́ко слу́шаяй словеса́ Моя́ и ве́руя не у́зрит суда́, но пре́йдет от сме́рти в живо́т». Рех, я́ко глас Мой ме́ртвых воскреси́т, о́вех у́бо ны́не, о́вех же по сих. Рех, я́ко истяжу́ сло́во прегреше́нных всех. Рех, я́ко пра́ведне сужу́, и возда́рую исправля́ющих.

Поне́же у́бо сия́ вся изрече́ние бе, и глаго́лемая у́бо вели́ка, указа́ние же не бе не у́ рече́но я́вствено о́нех, но нея́снейше, пе́рвее полага́ет хотя нас строе́ние рече́нных устремля́тися си́це не́како глаго́ля: «А́ще и не глаго́лы си́ми, но не́гли рече́те «вся сия́ Ты глаго́леши, не́си же достове́рен сведе́тель Себе́ сведе́тельствуя»» - сим пер́вым разор́яя их любопре́ние е́же положи́ти, е́же хотя́ху рещи́, и показа́ти, я́ко ве́дяще их неизрече́нныя мы́сли. И сие́ пе́рвое показа́ние Своея́ си́лы подая́, по́слежде по сопротивле́нии, и ина́я указа́ния подае́т я́вствена и не сопроти́в рече́нна, трие́х привод́я сведе́телей глаго́лемых: де́ло я́же от него́ бы́вшая, сведе́тельство О́тче и Иоа́ннову про́поведь. И полага́ет пе́рвое ме́ньшее Иоа́нново, рек бо: «Ин есть, сведе́тельствуя о Мне, и вем, я́ко и́стинно есть сведе́тельство его́», наведе́:

Ева́нгелие: Вы посла́сте ко Иоа́нну и [той] сведе́тельствова и́стинну.

Толкова́ние: И́бо а́ще несть и́стинно сведе́тельство твое́, ка́ко глаго́леши, «Зане́ вем, я́ко и́стинно есть сведе́тельство Иоа́нново» и «сведе́тельствова и́стинну»? Зри́ши ли, ка́ко я́вствено и отсю́ду я́ко «е́же сведе́тельство Мое́ несть и́стинно», к непщева́нию оне́х рече́ся? Что у́бо а́ще он сведе́тельствова благода́тию, рече́? Да́же бо не сие́ глаго́лют, зри ка́ко и сие́ отъя́т непщева́ние. Не рече́ бо: «И Иоа́нн сведе́тельствова Мне», но пе́рвое: «Вы посла́сте ко Иоа́нну». Не бы же у́бо посла́ли бы́сте, а́ще недостове́рна вознепщева́ли бы́сте. И е́же у́бо бо́льше: не посла́ша бо его́ о Христе́ вопраша́юще, не о нем [саме́м]. А его́же в су́щих о себе́ достове́рна непщева́ху, мно́го па́че в су́щих о ино́м. Обыко́хом бо я́ко рещи́ вси челове́цы, не си́це ве́ровати о себе́ глаго́лющим, я́коже о ины́х. Сих же си́це достове́рна бы́ти непщева́ше, я́ко и в су́щих о себе́ не тре́бовати сведе́тельства ино́го. По́сланнии бо не ре́ша е́же «что глаго́леши о Христе́?», но «ты кто еси́, что глаго́леши о себе́ само́м?». Си́це ве́лие му́жа чу́до имя́ху. Сие́ у́бо все назна́мена за е́же рещи́: «Вы посла́сте ко Иоа́нну». Сего́ ра́ди евангели́ст не я́ко посла́ша рече́ то́кмо, но и о по́сланных опа́сно сло́вит, я́ко бе́ша иере́и и от фарисе́й, не прилу́чшиися, ниже́ отве́ржении, ниже́ якови́и растле́тися и прельсти́тися, но со опасе́нием дово́льни навы́кнути, я́же от о́ного глаго́лемая.

Ева́нгелие: Аз же от челове́ка сведе́тельства не прие́млю.

Толкова́ние: Что у́бо ра́ди Иоа́нна приве́л еси́? И́бо ниже́ о́ного челове́ка сведе́тельство бе: «Посла́вый бо мя, рече́, крести́ти водо́ю, Он мне рече́» - я́ко бы и Иоа́нново сведе́тельство, Бо́жие сведе́тельство бе. От О́ного бо навы́к глаго́лаше, я́же глаго́лаше. Но да не глаго́лют: «Отку́ду сие́ я́ко от Бо́га уве́дел есть», и о сих пребыва́ют, от преходя́щаго их зауща́ет еще́, к непщева́нию их бесе́дуя. Ниже́ бо бе ле́по сия́ мно́гим ве́дети, но, я́ко от себе́ глаго́лющу, еще́ внима́ху Иоа́нну. Сего́ ра́ди рече́: «Аз от челове́ка сведе́тельства не прие́млю». И а́ще не хоте́л бы еси́ от челове́ка сведе́тельства приима́ти и отсю́ду укрепля́тися, что ра́ди приве́л еси́ сведе́тельство его́? Да́же у́бо не сия́ глаго́лют, услы́ши, ка́ко сие́ испра́ви наведе́нием таково́е сопротивле́ние.

Рек бо, я́ко «от челове́ка сведе́тельство не прие́млю», наведе́:

Ева́нгелие: Но сия́ глаго́лю, да вы спасе́ни бу́дете.

Толкова́ние: А е́же глаго́лет, таково́ есть: Аз у́бо не тре́бовах сего́ сведе́тельства, Бог сый, челове́ческаго. Поне́же па́че ему́ внима́сте, и всех достове́рнейша непщева́сте, и о́ному у́бо я́ко проро́ку притеко́сте, - и́бо град на Иорда́н излия́ся, - Мне же ниже́ чудоде́йствующу ве́ровасте: сего́ ра́ди вам воспомина́ю сведе́тельства о́ного.

Ева́нгелие: Он бе свети́льник горя́ и светя́. Вы же восхоте́сте возра́доватися в час све́та его́.

Толкова́ние: Да́же бо не глаго́лют: что у́бо он рече́, мы же не прия́хом, - показу́ет, я́ко и прия́ша рече́нная, [и́бо ниже́ прилу́чшыхся посла́ша], и восхоте́ша возра́доватися. Си́це и му́жу чудя́хуся, и глаго́лемых сопроти́в рещи́ не имя́ху когда́. А е́же к «ча́су», ле́гкость их показу́ющаго есть, и я́ко во ско́ре его́ отскочи́ша.

Ева́нгелие: Аз же име́ю сведе́тельство бо́льше Иоа́ннова.

Толкова́ние: А́ще бо хоте́ли бы́сте по после́дованию веще́й приима́ти ве́ру, от дел па́че вас приве́л бых. Но поне́же не хо́щете, ко Иоа́нну вас привожу́, не я́ко о́ного тре́буя сведе́тельства, но поне́же вся творю́, яко бы вас спасти́.

Име́ю бо сведе́тельство Иоа́ннова бо́льше - еже от дел. Но не сие́ смотря́ю то́кмо, я́ко от достове́рных благоприя́тен вам был бых, но я́ко и от ближа́йшых вам и от вас чуди́мых. Та́же косну́вся их и рек, я́ко «к ча́су восхоте́ша возра́доватися во све́те его́», и привре́менное показа́в тща́ние и неутверже́нно, «свети́льника» его́ нарече́, явля́я, я́ко не от себе́ имя́ше свет, но от духо́вныя благода́ти. А е́же к разделе́нию его́ , сие́ не положи́л есть, я́ко Сам есть Со́лнце пра́вды, но еще́ гада́тельствуя сие́, косну́ся зело́ их, показу́я я́ко от того́же изволе́ния от него́же о́ного пренебрего́ша, ниже́ Христу́ ве́ровати возмо́гоша: и́бо чуди́маго от них «к ча́су почуди́шася» то́кмо. Я́ко а́ще не сие́ сотвори́ли бы, вско́ре у́бо их ко Иису́су наста́вил бы. Показа́ у́бо их отвсю́ду недосто́йных су́щых проще́ния, наведе́ глаго́ля: «Аз же име́ю сведе́тельство бо́льша Иоа́ннова». Ко́е ли у́бо? Сие́ е́же от дел, «дела́ бо, рече́, я́же дасть ми Оте́ц, да совершу́ сия́, сама́ та дела́ о мне сведе́тельствуют, я́ко Оте́ц мя посла́». Зде разсла́бленаго, неиспра́вленаго воспомя́ну и ины́х мно́жайшых.

Глаго́лы бо, рекл бы у́бо кто от них, киче́ние бы́ти и дру́жбы Иоа́нновы благода́ть, а́ще и ниже́ сие́ мо́щно бе им рещи́ о Иоа́нне – му́же, со опасе́нием любому́дрити ве́дящем и сиц́е от них чуди́мом. Ве́щи же [Христо́ве] не ктому́ ниже́ от неи́стовящых зело́ сие́ зазре́ние име́ти можа́ху. Сего́ ра́ди второ́е сие́ наведе́ рек сведе́тельство: «Де́ло я́же даде́ ми Оте́ц, да совершу́ сия́, та дела́ я́же Аз творю́ сведе́тельствуют о Мне, я́ко посла́ Мя Оте́ц». Зде ко оклевета́нию разреше́ние субо́ты стои́т. Поне́же бо глаго́лаху: «Ка́ко мо́жет бы́ти от Бо́га, я́ко суббо́ты не храни́т?». Сего́ ра́ди рече́: «Я́же даде́ Мне Оте́ц». А́ще и госпо́дство творя́ше, но показу́я со мно́гим вели́чеством, я́ко ничто́же сопроти́вно Отцу́ твори́т: сего́ ра́ди и е́же мно́го ме́ньше положи́л есть. Что бо ра́ди не рече́ та́ко: «Де́ла я́же даде́ Ми Оте́ц, сведе́тельствуют о Мне я́ко ра́вен есмь Отцу́?». Обоя́ бо бе́ша от дел уве́дети, я́ко [не твори́т ничесо́же проти́вно и я́ко] ра́вен есть Ро́ждшему, е́же и́нде устрая́я глаго́лаше: «А́ще Мне не ве́руете, дело́м ве́руйте, да позна́ете и ве́руете, я́ко Аз во Отце́, и Оте́ц во Мне». Обоя́ у́бо ему́ сведе́тельствоваху, я́ко ра́вен бе Отцу́ и я́ко ничто́же сопроти́вно творя́ше о Нем. Что у́бо ра́ди не си́це рече́, но бо́льшее оста́вль, сие́ положи́л есть? Я́ко потща́тельное сие́ пре́жде бе. А́ще же бо и мно́го ме́ньше е́же уве́ритися, я́ко от Бо́га прии́де, е́же уве́ритися, я́ко Бог есть ра́вен Ему́, [о́но бо и проро́ков бе, сие́ же не ктому́]ⷩ҇, оба́че о ме́ньшем мно́го полага́ет тща́ние, ве́дый я́ко сему́ рече́нну, и́но бу́дет про́чее удо́бь прия́тно. И бо́льшаго помяну́в сведе́тельства, ме́ньшее его́ де́ло полага́ет, да и сие́ прии́мут. И «посла́вый же Мя Оте́ц, рече́, и Той сведе́тельствует о Мне». И где сведе́тельствова о Нем? На Иорда́не: «Сей есть Сын Мой возлю́бленный, Того́ послу́шайте». Но и сие́ уготовле́ния тре́боваше. Иоа́нново бо я́вствено бе, са́ми бо посла́ша и отврещи́ся не имя́ху. И е́же от зна́мений та́коже, ве́дяху бо быва́емыя, и от исцеле́ннаго, слы́шаша и ве́роваша, те́мже и порица́ху. Оскудева́ше у́бо про́чее е́же о Оте́ческом сведе́тельстве показа́ти. Та́же хотя́ сие́ устрая́ти, рече́: «Ниже́ глас Его́ слы́шасте когда́». И ка́ко Моисе́й глаго́лет: «Моисе́й отвещева́ше, Бог же глаго́лаше» ? Ка́коже Дави́д рече́: «Язы́ка его́же не ве́дях услы́ша» . И па́ки Моисе́й: «А́ще есть язы́к тако́в, и́же слы́ша глас Бо́жий?» . «Ниже́ ви́де Его́ ви́десте», и́бо и ви́дети его́ глаго́лются и Иса́ия, и Иереми́я, и Иезекеи́ль, и ини́и мно́жайши. Что у́бо есть е́же рече́ Христо́с? В любому́дреное их возво́дит уче́ние пома́лу, показу́я, я́ко ниже́ глаго́л о Бо́зе, ниже́ вид, но высоча́йшь о́браз есть и веща́ние таковы́х.

Я́коже бо рек я́ко «ниже́ гла́са Его́ слы́шасте», не сие́ рече́, я́ко глас у́бо испуща́ет неслы́шателен же; си́це рек «ниже́ вид Его́ ви́десте», не сие́ рече́, я́ко вид у́бо име́ет незри́телен же - но я́ко ничто́же сих о Бо́зе. Да́же бо не глаго́лют: я́ко кичи́шися, Моисе́ю глаго́ла Бог еди́ному, [Сие́ у́бо и глаго́лаху: «Мы ве́мы я́ко Мои́сею глаго́ла Бог. Сего́же не ве́мы отку́ду есть»] ‐ глаго́лет, я́ко ниже́ глас о Бо́зе, ниже́ вид. И что глаго́лю, рече́, но то́кможе я́ко гла́са Его́ не слы́шасте, ниже́ вид Его́ ви́десте, ниже́ о нем же наипа́че хвали́теся и о не́мже наипа́че вси есте́ извеще́ни, я́ко повеле́ния Его́ прия́сте и держите́ - ниже́ сие вам мо́щно рещи́. Сего́ ра́ди наведе́: «Ниже́ сло́ва Его́ име́ете пребыва́юще в вас», си́речь, запове́дания, повеле́ния, зако́на, проро́ков. А́ще бо и Бог сия́ запове́да, но оба́че у вас несть, поне́же не ве́руете Мне. А́ще бо горе́ и до́лу сие́ глаго́лют Писа́ния, я́ко в Мя подоба́ет ве́ровати, вы же не внима́ете – благоявле́нно, я́ко и сло́во его́ отступи́ от вас. Сего́ ра́ди наведе́: «Я́ко Его́же посла́ Он, Сему́ вы не ве́руете», та́же, да не глаго́лют «ка́ко у́бо а́ще ни гла́са Его́ слы́шахом, ка́ко Ти сведе́тельствова?», глаго́ла: «Испыта́йте Писа́ния, и о́на суть сведе́тельствующая о Мне» - си́ми бо сведе́тельствова. И у́бо и на Иорда́не сведете́льствова, и на горе́: но не изно́сит на среду́ гла́са о́ного. Не́гли бо у́бо и не ве́ровали бы им: о́вого же у́бо ниже́ слы́шаша и́же на горе́, о́вогоже слы́шаша у́бо, не вня́ша же. Сего́ ра́ди посыла́ет их к Писа́ниям, показу́я я́ко и Оте́ческое сведе́тельство отту́ду есть. Пе́рвее у́бо дре́вняя отъя́т, они́ же велича́хуся, или́ я́ко ви́девше Бо́га, или́ я́ко гла́са Его́ слы́шавше. Поне́же бо ле́по бе Его́ гла́су не ве́ровати и и́же в Сина́йстей горе́ мечта́ти, исправля́я е́же о оне́х непщева́ние пре́жде и показа́в схожде́ние су́ще быва́емая, тогда́ их на сведе́тельство посла́ Писа́ний.

Нравоуче́ние четыредеся́тое: я́ко соверше́н есть в доброде́тели, и́же за́поведи вся творя́ Бо́га ра́ди, и о ми́лостыни:

И мы у́бо егда́ к еретико́м бо́ремся и вооружа́емся, отсю́ду укрепля́емся. «Вся́ко бо Писа́ние богодохнове́нно и поле́зно, ко уче́нию, ко обличе́нию, ко исправле́нию, и наказа́нию е́же в пра́вде, да соверше́н бу́дет Бо́жий челове́к, ко вся́кому благоуготовле́н» - не я́ко, да о́ва у́бо име́ет, о́ва же не име́ет: таковы́й бо несоверше́н. Ка́я бо по́льза, рцы ми, егда́ мо́лится у́бо приле́жне, не ми́лует же изооби́льне? И ни егда́ ми́лует изооби́льне, лихои́мствуя же и принужда́я? Или́ егда́ не лихои́мствуя ниже́ принужда́я, к показа́нию же челове́ка и любоче́стию зря́ще? Или́ егда́ ми́лует у́бо со вся́ким опасе́нием и ко уго́дному Бо́гови, взима́ет же ся [сим] в [себе́] само́м и велему́дрствует? Или́ егда́ смире́н у́бо бу́дет и посто́в внима́ет, сребролю́бець и купе́ц и земли́ пригвожде́н, и ма́тере злых привводя́ души́? Ко́рень бо всем злым есть сребролю́бие. Да ужасне́мся у́бо ве́щи, да бежи́м греха́. Сие́ вселе́нную смуще́нну сотвори́, сие́ вся слия́, сие́ блаже́ннейшия нас рабо́ты отво́дит Христо́вы. «Несть бо, рече́, рабо́тати Мне и мамо́не» - сопроти́вное бо повелева́ет Христу́. Ов бо глаго́лет: дава́й своя́ тре́бующим, о́ва же: похища́й я́же тре́бующих. Христо́с глаго́лет: и наве́тующим и оби́дящим проща́я, сия́ глаго́лет: устроя́й се́ти на ничи́мже оби́дящих. Христо́с глаго́лет: человеколюби́в бу́ди и кро́ток, сия́ же: лют бу́ди и же́сток, ничто́же непщу́й сле́зы бы́ти ни́щих - да в день он же́стока нам устроя́т Судию́. Тогда́ бо вся пред очи́ма прии́дет соде́янная: и оби́деннии и обнаже́ннии от нас, вся́ко отвеща́ние нам отрева́ющи. А́ще бо Ла́зарь оби́девся у́бо ничи́мже от бога́таго, не наслади́вжеся су́щих о́ного, го́рек стал есть оглаго́льник и ни еди́ного же оста́ви проще́ния, кото́рого отве́та получа́т, рцы ми, иж́е ко е́же не ми́ловати от себе́ и чужда́я прие́млюще и си́рых превраща́ющих до́мы?

А́ще не препита́вшии а́лчуща Христа́, толи́к на главу́ свою́ привлеко́ша огнь, и́же ничи́мже им предстоя́щая похища́юща, и безчи́сленыя плету́ще оби́ды, и я́же всех непра́ведне облага́ющеся, кото́раго насладя́тся утеше́ния? Да отри́нем у́бо сие́ жела́ние. Отри́нем же, а́ще помы́слим пре́жде нас оби́девших, лихои́мствовавших [и] отше́дших. Не име́ний ли у́бо их насладя́тся ини́и, ти́и же в му́це и томле́нии и неисце́льных злых? Та́ко у́бо не после́дняго сия́ безу́мия ссеца́тися и злострада́ти, да и живу́ще трудо́в простира́емся, и отше́дше, нестерпи́мыя постра́жем му́ки и томле́ния. Потре́бно и зде наслажа́тися, [ничто́же бо си́це сла́дость соде́ловает, я́коже ми́лостыни со́весть], и отше́дшим та́мо всех свободи́тися злых и безчи́сленых получи́ти благи́х.

Я́коже бо зло́ба и пре́жде гее́нны, зде де́йствующих ю́ му́чити обы́че, си́це и доброде́тель. И пре́жде Ца́рствия зде сию́ де́лающих, устроя́ет наслажда́тися наде́ждами благи́ми и сла́дости всегда́шней сожи́ти творя́щи. Да́же у́бо сия́ получи́м и зде и бу́дущей жи́зни, да держи́мся благы́х дел, си́це бо бу́дущих получи́м венце́в, и́хже бу́ди всем нам получи́ти благода́тию и человеколю́бием Го́спода на́шего Иису́са Христа́, И́мже и с Ни́мже Отцу́ сла́ва со Святы́м Ду́хом, ны́не и при́сно и во ве́ки веко́в. Ами́нь.