Отъ са́мыхъ веще́й ви́дѣсте, возлю́бленніи, по́стную добро́ту и ю́же отъ нея́ по́льзу. Иже бо кто́ искуси́лся е́сть пе́рвую сію́ недѣ́лю свята́го великаго поста́, то́й больма́ разумѣ́етъ свое́ къ Бо́гу приближе́ніе, и на про́чія недѣ́ли бо́дрѣе бу́детъ. Аще ли кто́ сію́ недѣ́лю въ лѣ́ности пребы́сть, то́й не вѣ́сть, ка́я отъ поста́ по́льза е́сть: сла́ждьши бо ме́да, и семида́льнаго бра́шна е́сть. О се́мъ Дави́дъ проро́къ рече́: вкуси́те и ви́дите, я́ко бла́гъ Госпо́дь. И са́ми бо вѣ́сте по́стную добро́ту, я́ко ни сва́ра, ни доса́ды нѣ́сть: не я́коже въ пія́нствѣ, но вся́кое здѣ́ молча́ніе и тишина́, зло́му обы́чаю посто́мъ преста́вшу. Тѣ́мъ молю́ вы́, вѣ́рніи, не отложи́мъ нача́тка по́стнаго: се́ бо пе́рвая недѣ́ля поста́ премину́ла е́сть, да на про́чія недѣ́ли бодрѣ́йши бу́демъ, я́коже досто́итъ преспѣва́ти на благо́е, я́коже апо́столъ Па́велъ рече́: за́дняя забыва́юще, на пре́дняя простира́йтеся. Послу́шайте, вѣ́рніи, съ любо́вію: се́дмь недѣ́ль е́сть свята́го и вели́каго поста́, отъ ни́хъ же всѣ́хъ честнѣ́е седма́я недѣ́ля, я́же Вели́кая имену́ется. Не часы́ бо мно́гими инѣ́хъ бо́льши, но зане́же въ не́й бы́ша вели́кія та́йны Госпо́днихъ Страсте́й. Та́ко и сія́ предъиду́щая недѣ́ля бо́льши пе́рвыя е́сть. Якоже ца́рь бо́лѣе кня́зя е́сть, а кня́зь бо́лѣе е́сть боля́рина; а боля́ринъ бо́лѣе воево́ды; а воево́да бо́лѣе со́тника; а со́тникъ деся́тника. Се́ же разу́мно да вѣ́сте, а́ще кто́ о каковѣ́ дѣ́лѣ ити́ хо́щетъ къ ца́рю, пе́рвіе ми́лъ ся дѣ́етъ ме́ньшимъ, да́же и до вельмо́жъ, кто́ бы о не́мъ возвѣсти́лъ царю́. Аще ли же зло́ сотвори́лъ е́сть вельми́, то́ бо́лѣе пече́тся, ка́ко бы оправда́тися. Но и мы́, бра́тіе, не то́кмо яви́тися хо́щемъ Небе́сному Царю́, но и въ сердца́ на́ша прія́ти Та́инъ Причаще́ніе, сія́ бо недѣ́ли на очище́ніе грѣхо́мъ на́шимъ даны́ су́ть, а́ще я́ до́брѣ соверши́мъ. Хощу́ у́бо ва́мъ при́тчу повѣ́дати. Бѣ́ въ нѣ́коей странѣ́ ца́рь вельми́ бла́гъ, вся́ бо я́ко своя́ дѣ́ти любля́ше, и о всѣ́хъ ра́вно печа́ловашеся, не то́кмо о тѣлесѣ́хъ, но и о душа́хъ и́хъ, и не бѣ́ никто́ же убо́гъ въ странѣ́ то́й. Бѣ́ бо земля́ та́ испо́лнена вся́каго оби́лія, я́коже проро́къ Дави́дъ глаго́лаше: отъ плода́ пшени́цы, вина́ и еле́я умно́жишася. И царе́ви тому́ бя́ше все́ раче́ніе, е́же бы подава́ти бѣ́днымъ и неиму́щимъ. И за́повѣдь положи́, да бога́тіи подаю́тъ ни́щимъ. Та́ко бо и апо́столъ въ Дѣя́ніихъ рече́: бѣ́ мно́жество люде́й я́ко еди́на душа́, раздава́юще, кто́ чего́ хотя́ше, или́ тре́боваше. Такова́ бѣ́ та́ страна́, и тако́въ бѣ́ то́й ца́рь. Имѣ́яше же благíй то́й ца́рь у себе́ се́дмь дще́рей вельми́ красны́, и заповѣ́да всѣ́мъ лю́демъ, да прише́дше почтя́тъ его́, и дще́ри его́. И посади́ и́хъ по еди́ной: ме́ньшую пода́лѣе, а бо́льшую бли́зъ себе́ посади́. Нѣ́ціи же всѣ́хъ ра́вно почти́ша, и угоди́ша царе́ви. Нѣ́ціи же ме́ньшую почти́ша, а про́чихъ мимоходя́ще, не цѣлу́я минова́ху. И се́ ви́дѣвъ благíй о́нъ ца́рь, милосе́рдіе свое́ на гнѣ́въ преложи́, и повелѣ́ слуга́мъ отгна́ти я́ отъ себе́, и мучи́телемъ преда́ти на истяза́ніе. По непра́вдѣ ли у́бо се́ сотвори́ благíй о́нъ ца́рь? Аще хо́щете разумѣ́ти, что́ е́сть ца́рь о́нъ? Да реку́ ва́мъ. Ца́рь благíй е́сть Творе́цъ и Содѣ́тель всѣ́хъ, и Влады́ка, Христо́съ и́стинный Бо́гъ на́шъ. А земля́ испо́лненная благи́хъ, е́сть Це́рковь Бо́жія, въ не́й бо ве́сь мíръ душе́внѣ спаса́ется покая́ніемъ. Зако́нъ бо, и проро́цы ту́ проповѣ́даютъ о Христѣ́, и извѣству́ютъ, ка́ко сни́де на зе́млю, и бы́сть человѣ́къ подо́бенъ на́мъ, кромѣ́ грѣха́, распя́тся и погребе́нъ бы́сть, и въ тре́тій де́нь воскре́се. И пото́мъ апо́столы посла́, тѣ́ми призыва́я на́съ въ Ца́рство небе́сное, и по вся́ дни́ уча́ не преста́етъ, вопія́ и глаго́ля: пріиди́те, обремене́ніи, и Азъ поко́ю вы́. И па́ки: гряду́щаго ко Мнѣ́ не изжену́ во́нъ. Что́ сея́ благода́ти бо́лѣе е́сть? Дще́ри же царе́вы сказу́ются — се́дмь недѣ́ль свята́го и вели́каго поста́, я́же на́мъ повелѣ́но чти́ти па́че всего́ лѣ́та днíй, посто́мъ, и моли́твами, и ми́лостынею. Да а́ще, бра́тіе, пе́рвую сію́ недѣ́лю почти́хомъ до́брѣ, си́рѣчь ме́ньшую дщи́ царе́ву, да́лѣе отъ отца́ сѣдя́щую, то почти́мъ и другíя. Аще ли же пе́рвую почти́вше, а и́ны съ небреже́ніемъ мине́мъ, о бра́тіе, что́ и́мамы отвѣща́ти въ стра́шный де́нь пра́веднаго суда́ Бо́жія? Ка́ко ли ся оправда́емъ, я́ко ни тѣ́хъ по́стныхъ дне́й хо́щемъ чи́сто сохрани́ти? Но молю́ вы, не вѣща́емъ сего́, я́ко не мо́жемъ та́ко всѣ́хъ по́стныхъ дне́й преити́, я́коже пе́рвую сію́ недѣ́лю. Се́ зла́ вина́ е́сть, и недо́бръ извѣ́тъ испо́лненъ вины́. Аще бо отъ толи́каго объяде́нія и пія́нства пе́рвую сію́ недѣ́лю преидо́хомъ, то кольми́ па́че навы́кше возмо́жемъ та́ко ве́сь по́стъ преити́. Не понужда́ю бо никого́ же па́че си́лы пости́тися, но я́коже ели́ко кто́ мо́жетъ, то́кмо жите́йскихъ отве́ржемся нече́стій, пія́нства, блуда́, хулы́, осужде́нія, злопомнѣ́нія, за́висти, лжи́, клеветы́, гнѣ́ва, оби́ды, татьбы́, лихоима́нія, грабле́нія и про́чихъ зло́бъ. Ми́лостыню твори́те па́че ины́хъ дне́й, да чи́стою со́вѣстію Честно́му Кресту́ поклони́мся, и Христо́выхъ Страсте́й до́йдемъ, и досто́йни бу́демъ Тѣ́ло и Кро́вь Госпо́дню прія́ти. Убо́гимъ же и бѣ́днымъ сирота́мъ, и вдови́цамъ благотвори́те: тíи бо о всѣ́хъ на́съ всегда́ мо́лятся Бо́гу, и тѣ́хъ ра́ди ли́шшее дарова́лъ е́сть на́мъ Бо́гъ. Ничто́ же бо принесо́хомъ въ мíръ се́й, и ниже́ па́ки взе́млюще что́ отхо́димъ. Тѣ́мъ же, бра́тіе, потщи́мся, посто́мъ и моли́твами, и колѣ́ннымъ поклоне́ніемъ, и ми́лостынею душа́ и тѣлеса́ очи́стити, да съ любо́вію Воскресе́нія Христо́ва дости́гнемъ. Нѣ́сть бо тя́жко, а́ще хо́щемъ добро́ твори́ти: то́кмо да не ослабѣ́емъ, ни облѣни́мся, и не впаде́мъ въ сла́сти тѣле́сныя, да не погуби́мъ труда́ своего́, и́же въ пе́рвую недѣ́лю подъя́хомъ. Бо́гу на́шему сла́ва, ны́нѣ и при́сно и во́ вѣки вѣко́мъ. [Ами́нь.]