При́сно име́йте, бра́тие, в па́мяти де́нь сме́ртный. Мно́ги вчера́ с на́ми бы́вше челове́ки, ны́не же у́же не́сть и́х с на́ми: или́ к Бо́гу отше́дше, или́ боля́ще, и к сме́рти спе́юще. Мно́г же в на́с е́сть мяте́жь, и пла́чь о уме́рших. И мно́гажды ва́с моли́х о се́м, и еще́ молю́, е́же с похвале́нием и благотерпе́нием приима́ти ча́д ва́ших и сердобо́ль уме́ртвия. И не я́ко изгиба́ющия мне́ти, отходя́щия к Бо́гу, но па́че о себе́, во гресе́х живу́щих, попеце́мся. Аще бо ны́не не нака́жемся, да когда́ обрати́мся? Аще бра́тня сме́рть не умудри́т, да кто́ тя́ обрати́т к тому́? И а́ще ме́ртва ви́дя лежа́ща, не ока́еши си житие́, когда́ и́маши го́д умоли́ти Бо́га? Или́ когда́ вре́мя ти́ бу́дет пожи́ти в пра́вде и спасти́ ду́шу си́? Те́м молю́ вы, не без ума́ ни в пусто́ши бу́дите, ни а́ки безсме́ртни велича́йтеся: еди́н бо е́сть сме́ртный пу́ть, и еди́на ча́ша все́м, и еди́н ча́с го́рький, и еди́н коне́цъ – Бо́жий ме́чь. Сме́рть ни царя́ бои́тся, ни кня́зя обину́ется, ни святи́теля чти́т, ни седи́ны ми́лует, ни ю́ных щади́т, ни красоты́ во́зраста, ни мучи́теля бои́тся, ни хи́трыми глаго́лы увеща́ется, ни име́нием искупу́ется, но на вся́ ра́вно прихо́дит сме́рть. Дне́сь с на́ми бы́вше, а у́тре пре́жде на́с та́мо. Дне́сь лю́бяще ны́, а у́тре жа́лостно провожда́еми. Дне́сь в житии́, а у́тре во́ гробе. Дне́сь сла́вно благоуха́нием ма́жущеся, а у́тре смердя́ще. Дне́сь пита́ющеся и не́гуеми, а у́тре пла́чущеся. Их же мно́гажды и́щуще, и не ве́дяще уме́ртвия и́х, глаго́лем: где́ о́н сíй кня́зь, или́ оби́дливый судия́, или́ о́н ца́рь злы́й? И услы́шим я́ко уже́ преидо́ша она́мо. Ка́мо? Та́мо, иде́же Судия́ е́сть судия́м, Ца́рь Ве́чный и Пра́ведный, Еди́н все́м, и Безсме́ртный, все́м отдая́ по дело́м. Иде́же стра́х и тре́пет все́м бу́дет, и нелицеме́рный и пра́ведный су́д, иде́же ра́вно вси́ предста́нем: сла́внии и несла́внии, цари́ и кня́зи, бога́тии и ни́щии, раби́ и свобо́днии. Не бу́дет бо царе́м вели́чества, ни кня́зем вла́сти, ни судия́м лицеме́рия. Бы́в зде́ лю́т, а та́мо не поми́лован бу́дет; зде́ неми́лостив бы́сть, а та́мо зле́ му́чим бу́дет; зде́ упива́яйся, а та́мо возжада́ет и ка́пли воды́; зде́ оби́дети гото́в, а та́мо огне́м негаси́мым пали́м; зде́ кра́сныя ри́зы нося́, а та́мо на́г предста́нет; зде́ жде́т обраще́ния на́шего, та́мо же огню́ предае́т. Оле чу́до! Сме́ртная ча́ша страшна́ все́м, люби́ма же в беде́ су́щим. Житие́ ве́ка сего́ дра́го все́м, о́нем же ме́рзско бы́сть. Благослове́н Госпо́дь Бо́г творя́й вся́ на по́льзу все́м: не́сть бо зло́ сме́рть, но па́че скраще́ние животу́. Рече́ бо Иов пра́ведный: сме́рть му́жу поко́й е́сть. Умира́яй оста́вит вся́ зла́я жития́ сего́, и от гре́х премени́тся, и не приложи́т ктому́ зла́, и Бо́га не прогне́вает к тому́. Слы́шите смы́сленно, и внемли́те себе́ разу́мно: сме́рть пра́ведным поко́й е́сть, де́тем уте́ха, рабо́м почива́ние, тру́дным тишина́, должнико́м свобо́да, у́зником льго́та. Вся́ сия́ ко оправда́нию бу́дущия жи́зни. Аще бы не́ было сме́рти, то́ а́ки зве́ри са́ми бы себе́ изъя́ли. Аще бы не́ было пра́веднаго суда́ Бо́жия, и воздая́ния, и ве́чных му́к, не бы́ ча́яли спасе́ния. И а́ще бы не устраша́лися му́к, ника́ко же бы́хом от гре́х востягну́лися, и не бы́хом сотвори́ли пра́вды, и ве́ру бы́хом попра́ли, я́ко ослу́шницы. Ви́дите ли Христа́ Бо́га благода́ть и человеколю́бие? Вся́ на по́льзу сотвори́л е́сть на́м. Аще у́мрет пра́ведный, ра́дуяся и́дет, ча́я мзду́ прия́ти. И а́ще гре́шник у́мрет, и о то́м не скорби́, приобре́те бо себе́ я́коже изво́ли непра́вды де́яти. Аще бы́хом зде́ безсме́ртни бы́ли, то́ пои́стине пла́кали бы́хом по уме́рших. Аще ли же вси́ прехо́дим от жития́ сего́, да ко́ждо на́с о себе́ пла́чем, и пока́емся о свои́х согреше́ниих. Не ви́дите ли, ка́ко уме́рших провожда́ем с пе́сньми и пе́нии, и с фимиа́мом, и со свеща́ми по ни́х и́дем, образу́юще, я́ко те́мнаго избы́вше жития́, и к све́ту и́стинному отыдо́ша. И на восто́к о́бразом погреба́ем, прозна́менающе ме́ртвым воста́ние. Те́м же не скорби́те, бра́тие, по уме́рших, я́ко неве́рнии, не иму́щии наде́жды воскресе́ния: тíи бо пои́стинне пла́чут по уме́рших, я́ко изгибо́ша неве́рием. Мы́ же Христа́ послу́шаем, и ве́руем я́ко прии́дет ча́с, егда́ ме́ртвии воскре́снут, и гла́с Сы́на Бо́жия услы́шат, и, услы́шавше, оживу́т, и не́бо и земля́ обнови́тся. Те́м же ве́руйте: воста́ти бо и́мут ме́ртвии, да не мо́жем ве́рнии неве́рным подража́ти. Не раздира́ем ри́з на́ших, но па́че ду́шу смири́м, и на́с бо та́яжде ча́ша жде́т. И не бие́м в пе́рси, да не уподо́бимся е́ллином. Не терза́ем вла́с главы́ своея́, да не осрами́м Главы́ на́шея – Христа́. И не мно́ги дни́ пла́чем, да не не ве́ровати на́чнем воскресе́нию. Да не изрече́м хулы́ язы́ком, да не сотвори́м па́кости ни себе́, ни ме́ртвым. Отъя́л ти́ сы́на Госпо́дь, поклони́ся Ему́, избра́вшему его́же созда́ и прии́мшему пло́д утро́бы нескве́рен, по Иову. Поклони́ся Творцу́ своему́, и похвали́ И, и принеси́ Ему́ же́ртву непоро́чну, я́ко же дре́вле Авраа́м Исаа́ка, и не поропщи́ я́ко Зижди́тель прия́т, и не похули́ ника́коже, но бу́ди я́ко Авраа́м. Бра́та ли погре́б? Поклони́ся Христу́ взе́мшему и́, я́ко Са́м тебе́ ра́ди Челове́к бы́сть, и сме́рти вкуси́. Младе́нца ли отда́си? Поклони́ся Христу́, Иже младе́нец бы́сть тебе́ ра́ди. Раба́ ли отда́си? Поклони́ся Христу́, тебе́ ра́ди ра́бий о́браз прии́мшему. Единоча́даго ли еси́ погре́б сы́на? Поклони́ся Христу́, и помяни́, я́ко тебе́ ра́ди Бо́г Единоча́даго Своего́ Сы́на на сме́рть предаде́. Деви́цу ли во обруче́нии су́щую преда́си? То́ похвали́ Бо́га, да на тя́ не прогне́вается Госпо́дь, и и́ны во́змет. Подру́жие ли проводи́ де́тем ма́терь до́ гроба? Просла́ви Бо́га, и укрепи́ся, и не скорби́ о то́м, пома́ле и ты́ та́мо же по́йдеши. Что́ се́ твори́ши, о челове́че? Почто́ томи́шися печа́лию без ума́? Не ви́диши ли, ко́ль бе́дно преше́ствие от жития́ сего́ все́х на́с жде́т, и ко́ль тя́жек е́сть сме́ртный пу́ть? Но вси́ по не́м по́йдем. О, челове́че, оста́ви по уме́рших пла́кати и са́м ко исхо́ду гото́вися. Рече́но бо е́сть: не изба́вит бра́т бра́та, ни оте́ц сы́на, ни сы́н отца́. Кто́ е́сть челове́к, и́же поживе́т и не у́зрит сме́рти? Или́ кто́ изба́вит ду́шу свою́ из руки́ а́довы? Благослове́н Госпо́дь Бо́г, творя́й ди́вная и пресла́вная чудеса́. Что́ е́сть челове́к? Ви́дим бы́сть все́ми, в ма́ле же часе́ неви́дим бы́сть, по́йде еди́н в ве́чный пу́ть, в о́нь же поити́ все́м на́м. Те́мже оста́нитеся пла́чуще, бо́йтеся и гото́ви твори́теся. Цари́ и кня́зи, не велича́йтеся, ви́ждьте уме́ршаго, и́же зде́ гро́зен все́м и стра́шен бы́сть, та́мо же веде́тся зле́ осужде́н, я́ко еди́н от убо́гих. Его́же боя́шася вчера́, ны́не же са́м трепе́щет ве́сь, и бои́тся, и, ви́дя вла́сти а́нгельския стра́шны, испаде́ ве́сь. Ви́де себе́ отве́т стра́шный и гро́зный, бои́тся, дивя́ся и мы́сля: где́ вели́чие ца́рское и князе́й вла́сти? Се́ ни вочто́же вся́ бы́ша. Се́ вла́сть и́стинная. Се́ о́брази стра́шнии. Се́ безсме́ртнии во́и. О, бра́тие, мно́га тре́ба на́м моли́твы, и исправле́ния, и де́ла до́брая, и посо́бницы мно́зи, и мно́га заступле́ния, о возду́шном доправле́нии. Аще бо ны́не случи́тся идти́ во и́н гра́д, и ту́ проводя́щих тре́буем, а та́мо бо́льши си́х, ка́ко мо́жем мину́ти старе́йшинства вла́сти, и возду́шныя мздои́мцы, и мытари́ злы́я бе́сы? До́брый пу́тник с на́ми, – смире́ние и покоре́ние, любы́, ми́р, ми́лостыня, чистота́, сле́зы, покая́ние, – та́ мо́гут на́с без па́кости проводи́ти в небе́сная врата́, и соблюсти́ на́с до ту́ду. Те́мже, бра́тие, гото́вимся пре́жде, да не са́ми себе́ в му́ку вве́ржем. Житие́ бо на́ше кра́тко, и коне́ц бли́з е́сть, а та́мо ве́к конца́ не имы́й. Стра́х мно́г, а избавля́ющаго не́сть. О, люби́мии, доко́ле в телеси́ жи́вы есмы́, изы́дем у́бо в гро́бы, да ви́дим пустому́ на́шему житию́ где́ е́сть жили́ще, и что́ вма́ле быва́ет на́м? И не прельща́ем себе́. Ви́дите ли, ка́ко те́ло на́ше смердя́ще червьми́ ядо́мо раста́яся, и оголе́ша ко́сти? Ви́девше же то́ испра́вимся, и попеце́мся собо́ю смотря́ще добро́ты во гробе́х. Испыта́йте у́бо, вельмо́жи и судии́, и убо́йтеся Бо́га. Не милосе́рдии, и жестосе́рдии, велича́вии, и скупíи, прииди́те и ви́дите, ка́ко разсыпа́емся? Смотри́те во гробе́х, и ви́дите иногда́ бы́вшаго царя́, или́ кня́зя в ко́стех. Ви́ждьте стра́шныя ви́ды избы́тка теле́снаго и позна́йте: кíй ца́рь е́сть, или́ кня́зь, и кíй во́ин, или́ воево́да, или́ ни́щ, или́ бога́т, кíй ли ю́н, или́ ста́р, кíй ли жидови́н, или́ му́рин, да в ко́стех мо́жеши ли позна́ти его́? Не вси́ ли пе́рсть, и пе́пел, и пра́х? И бы́вшая люби́ма, ны́не же гну́сна су́ть и смердя́ща. Вели́ка е́сть та́йна сия́ о на́с: бы́в на́м любо́вник, ны́не же его́ ужаса́яся зри́м. Пла́чем о не́м, а́ки о свое́м сро́днице, тле́нием же его́ и червьми́ мерзи́мся, и гнуша́емся а́ки пса́ смердя́ща: добро́та бо лица́ его́ почерне́, и о́чи я́снии растеко́стеся, и власы́ отпадо́ша, вы́я сокруши́ся, бо́рзый язы́к умолче́, ру́к добро́та распаде́ся, вели́чество те́ла раста́яся, и благоуха́ние на смерде́ние преложи́ся, ю́ность и вели́чество преста́. Сия́ же разуме́вше, бра́тие, ве́руйте воскресе́нию ме́ртвым: вси́ бо ме́ртвии воста́нут, и отвеща́ют о де́лех свои́х, и мзду́ восприи́мут проти́ву трудо́в свои́х. О то́м дни́ попеце́мся, егда́ Бо́г прии́дет суди́ти живы́м и ме́ртвым. Помы́сли у́бо, о челове́че, и бу́ди разумева́я, и́бо по сме́рти не́сть покая́ния: во а́де бо кто́ испове́сться? Никто́же. Аще и мно́го тогда́ воспла́чем, но никто́же избавля́яй на́с. Сего́ ра́ди блажи́м па́че умира́ющия младе́нцы. Те́мже, бра́тие, немози́те о ча́дех ва́ших пла́катися и пещи́ся, но о себе́ попече́ние име́йте: на́м бо сме́рть лю́то е́сть, младе́нцем же поко́й и спасе́ние. О че́м бо отве́т да́ти и́мут, ничто́же иску́са грехо́вна прие́мше? О, блаже́нных младе́нцев, блаже́нное почива́ние. О, сме́рть без истле́ния су́щих. О, коне́ц блаже́н, име́яй безконе́чную ра́дость о́ну. Что́ реко́ша тщи́вии? Единоча́дный ми́ о́трок, доброро́ден, и лице́м прекра́сен бя́ше: то́й бе́ насле́дник оте́честву, и ста́рости же́зл, свои́м и чужи́м люби́м, се́ же напра́сно восхище́н бы́сть, а́ки пти́ца от мое́ю руку́, и бы́в ви́дим все́м, ны́не же неви́дим бы́сть. Оста́вль бо, рече́, роди́вшаго и оты́де к Созда́вшему и́. Отлучи́ся утро́бы ма́терни и сни́де во гро́б земли́, ма́тере все́х. Ка́ко же сего́ не пла́чу, или́ ся не жа́лую, пове́ждь ми́? Еже не пла́кати отню́д, сего́ не глаго́лю у́бо, о челове́че, ни сего́ уставля́ю, е́же бы не пла́катися над ча́ды. Аще бы и ре́к, то не́мощная изглаго́лю: и а́з у́бо челове́к же, и от ма́тере рожде́н, и того́ же сы́й естества́, ви́дех о́тчее и ма́терне крича́ние, ви́дех печа́льнаго мо́ря смуще́ние и тугу́. Оле чу́до! Тече́т житие́ се́, и я́ко ло́жь глаго́лы его́. Помяни́, челове́че, терпе́ние Иовле, ка́ко де́тем и рабо́м его́, и вельбу́дом, и все́м и́же у него́ уме́ршим, ника́коже о се́м смяте́ся Иов, ни поскорбе́, и не поху́ли Бо́га, я́коже и́нии челове́цы, но укре́плься, и, па́д на зе́млю, кла́няшеся Влады́це, глаго́ля: а́з на́г роди́хся от ма́тере, на́г и оты́ти и́мам. Госпо́дь да́л е́сть, Госпо́дь и отъя́т. Яко го́де Го́сподеви, та́ко и бы́сть, бу́ди и́мя Госпо́дне благослове́но во ве́ки. Аз ра́б е́смь Сотво́ршему мя́, повину́юся, а не проти́влюся Ему́: изомро́ша бо де́ти моя́, а не погибо́ша. Кíй господи́н не владе́ет ста́дом свои́м? Се́ Па́стырь До́брый избра́ о́вцы Своя́ сия́, пома́ле у́бо и мы́ та́мо же бу́дем. О, ве́рнии, подража́ем сего́, и немно́го пла́чем, но я́ко же о Ла́заре Христо́с пла́кася: То́й бо да́л всему́ мíру уста́в пла́кания. Прослези́ся Он, Творе́ц все́й тва́ри, и Обла́даяй все́ми, хотя́ его́ возста́вити от ме́ртвых и на́с наказа́ти. Си́цевыми глаго́лы младе́нцы отвеща́ют к ро́ждьшим я́: не пла́читеся на́с, отцы́, отлучи́ бо на́с Христо́с Бо́г от ва́с, я́ко от тмы́ на све́т изыдо́хом, и ны́не в стране́ весе́лия есмы́, иде́же поко́й, и вся́ све́тла и боголю́бна, и све́т немерца́емый, и ра́дость неизрече́нная, иде́же не́сть труда́, ни сле́з, ни печа́ли, ни воздыха́ния. Те́мже, роди́телие, толи́ку че́сть слы́шавше, не пла́чите о на́с, я́ко от ну́жды в ра́дость преидо́хом. И в тле́нных ме́сто нетле́нная прия́хом, и со а́нгелы вку́пе Бо́га сла́вим, и о ва́с, гре́шных, мо́лимся Влады́це. Мы́ со избие́нными от Ирода младе́нцы, и со Иовлевыми сы́ны причте́ни бы́хом. Те́м не скорби́те о на́с, но пла́читеся о свое́м уме́ртвии, и ко отве́ту гото́витеся, а о на́с со Иовом та́ко возглаго́лите: Госпо́дь даде́, Госпо́дь и взя́т, я́коже го́де Го́сподеви, та́ко и бы́сть. Бу́ди и́мя Госпо́дне благослове́но от ны́не и до ве́ка. Бо́гу на́шему сла́ва, ны́не и при́сно и во́ веки веко́м, ами́нь.