Вре́мя, бра́тіе, прибли́жися спасе́нія на́шего: се́ покая́нію вре́мя приближа́ется, се́ днíе очище́нія душа́мъ и тѣлесе́мъ на́шимъ. Се́ гла́съ стра́шенъ изрека́емь Бо́жіими усты́ о стра́шномъ дни́, въ о́ньже пріи́детъ съ небесе́ пра́ведный Судія́, Христо́съ Бо́гъ на́шъ, возда́ти кому́ждо по дѣло́мъ его́, царе́мъ и князе́мъ, бога́тымъ и ни́щимъ, рабо́мъ и свобо́днымъ, оби́дящимъ и оби́димымъ, пра́въ сотвори́ти су́дъ. Се́ бо любя́ ны́ Госпо́дь Бо́гъ на́шъ, и жада́я на́шего спасе́нія, Са́мъ учи́тъ ны́, глаго́ля, кíимъ сло́вомъ вопро́ситъ на́съ /л. 11/ и ка́ко Ему́ отвѣ́тъ дади́мъ. Вся́ко на́мъ Собо́ю прообразова́, стра́сть и сме́рть на́съ ра́ди прія́тъ. Любя́ бо на́съ и хотя́ ны́ сотвори́ти наслѣ́дники Ца́рствія Своего́, вся́ я́же уго́дна Ему́ на́мъ прояви́. Того́ ра́ди дни́ по́стныя положи́, да ели́ко есмы́ во все́ лѣ́то согрѣши́мъ, мяту́щеся въ жите́йскихъ, то си́ми де́ньми очи́стимся, тружа́ющеся и постя́щеся, бдѣ́ніемъ и моли́твами къ Бо́гу приближа́ющеся, покая́ніемъ и слеза́ми грѣхи́ омыва́юще, ми́лостынею две́ри Ца́рствія отверза́юще, ми́ръ и любо́вь межу́ собо́ю иму́ще, воздыха́ніемъ сердца́ смиря́ющеся, я́коже рече́ проро́къ: раздери́те сердца́ ва́ша, а не ри́зы ва́ша. И па́ки Иса́іею прети́тъ, глаго́ля: а́ще въ судѣ́хъ и сва́рѣхъ пости́теся? Не такова́го поста́ избра́хъ, глаго́летъ Госпо́дь, но отве́рземъ вся́къ сою́зъ непра́вды, сло́во ропта́нія, отпуща́й ста́рыя рабо́тныя на свобо́ду, раздава́й а́лчущимъ хлѣ́бъ тво́й, и ни́щія, не иму́щія кро́ва, введи́ въ до́мъ сво́й, не оби́ди, не укра́ди, не зави́ди, и гнѣ́ва не имѣ́й ни на кого́же. Аще та́ко сотворите́, испо́лнятся вся́ проше́нія ва́ша, и возсія́етъ во дне́хъ пра́вда ва́ша, и ра́достно Христо́ви предста́нете, егда́ /л. 11 об./ пріи́детъ во сла́вѣ Свое́й со а́нгелы Свои́ми, и предъ Ни́мъ ста́нетъ вся́къ во́зрастъ во мгнове́ніи о́ка. Аще бу́детъ кого́ звѣ́рь растерза́лъ, или́ пти́цы разнесли́, или́ ры́бы раздроби́ли, — ни вла́съ еди́нъ не поги́бнетъ отъ ни́хъ. Тогда́ разлучи́тъ я́ дру́гъ отъ дру́га, я́коже па́стырь разлуча́етъ о́вцы отъ ко́злищъ, и поста́витъ о́вцы одесну́ю Себе́, а ко́злища ошу́юю. Сíи су́ть и́же одесну́ю: кро́тціи и не иму́щіи зло́бы, ми́лостивіи, страннолю́бцы, миротво́рцы, братолю́бцы, больны́мъ посѣти́тели, вдова́мъ засту́пницы, скорбѣ́вшіи по вся́ дни́ о грѣсѣ́хъ. А и́же ошу́юю, лю́тый отвѣ́тъ услы́шати и́мутъ, и́же во вся́кой непра́вдѣ дни́ своя́ проводи́ша, блудо́мъ, лжа́ми, клевета́ми, за́вистію, объяде́ніемъ и пія́нствомъ, татьбо́ю, гнѣ́вомъ и осужде́ніемъ, горды́нею и велича́ніемъ, ску́постію, и жестосе́рдіемъ, и немилосе́рдіемъ. Якоже бога́тый о́нъ, не послу́шающе уче́нія, и о грѣсѣ́хъ, и о покая́ніи нерадѣ́ша, но во игра́хъ, и въ питіи́, и блудѣ́ все́ житіе́ свое́ изжи́вше. Того́ ра́ди шу́яго стоя́нія осуди́шася, я́ко неми́лостивіи и жесто/л. 12/се́рдіи, тѣ́мъ лю́тъ отвѣ́тъ бу́детъ. Пра́веднымъ су́щимъ, одесну́ю стоя́щимъ, рече́тъ Ца́рь: пріиди́те, благослове́нніи Отца́ Моего́, наслѣ́дуйте Ца́рствіе небе́сное; пріиди́те, сы́нове свѣ́та, и Моего́ Ца́рствія наслѣ́дницы; пріиди́те, пріими́те угото́ванное ва́мъ Ца́рствіе. Алчна бо Мя́ накорми́сте, и жа́дна напои́сте, на́га одѣ́ясте, и про́чая, я́же во Ева́нгеліи слы́шасте, вся́ сотвори́сте. А ошу́юю стоя́щимъ рече́тъ Ца́рь: отыди́те отъ Мене́ прокля́тіи во о́гнь вѣ́чный, угото́ванный діа́волу и а́нгеломъ его́; отыди́те отъ Мене́ неми́лостивіи, я́ко вы́ не поми́ловасте Мене́, та́ко и Азъ не поми́лую ва́съ; отыди́те, и воспріими́те я́же са́ми угото́васте себѣ́, небрего́сте бо Моего́ спасе́нія. Якоже вы́ за́повѣдей и уче́нія Моего́ не послу́шасте, та́ко и Азъ не послу́шаю гла́са пла́ча и рыда́нія ва́шего. Мнѣ́ у́бо не послужи́сте, а́лчна Мя́ не накорми́сте, и жа́дна Мя́ не напои́сте, на́га Мя́ не одѣ́ясте, и про́чая, слуги́ и уго́дницы діа́воли, того́ бо во́лю сотвори́сте и сла́ву его́ прія́сте, и напита́стеся на земли́. Азъ бо учи́хъ ва́съ кни́гами, и не внима́сте, и чту́щимъ руга́стеся, /л. 12 об./ и не пости́стеся, и ми́лостыни не твори́сте, того́ ра́ди ны́нѣ глаго́лю ва́мъ: не вѣ́мъ ва́съ, отыди́те отъ Мене́, прокля́тіи, во о́гнь вѣ́чный, угото́ванный діа́волу и а́нгеломъ его́. Тогда́ оты́дутъ въ му́ку вѣ́чную. Слы́шасте бра́тіе, пра́веднымъ и грѣ́шнымъ воздая́нія. Слы́шасте, како́въ отвѣ́тъ пріи́мутъ, или́ каково́ осужде́ніе пріи́мутъ неми́лостивіи, наси́лующіи сироты́, и вдови́цы оби́дящіи: та́мо бо не мо́жетъ помощи́ ни оте́цъ сы́ну, ни сы́нъ отцу́, ни ма́терь дще́ри, ни дще́рь ма́тери, ни ра́бъ господи́ну, но вся́къ по дѣ́ломъ свои́мъ пріи́метъ, и отвѣща́етъ кíйждо о себѣ́. Того́ ра́ди потщи́мся ко́ждо о свое́мъ спасе́ніи, не льсти́мся, тѣлѣси́ угожда́юще. Слы́шасте ли у́бо, какову́ сла́ву пріе́млютъ ми́лостивіи и миротво́рцы, воздержа́щіи тѣлеса́ своя́ отъ пусто́шныхъ? Тѣ́мъ же потщи́мся въ по́стъ сíй очи́стити душа и тѣлеса́ своя́, ми́ръ и любо́вь между́ собо́ю иму́ще, да въ добродѣ́тели воскресе́нія Христо́ва до́йдемъ, сла́вяще Святу́ю Тро́ицу, Отца́ и Сы́на и Свята́го Ду́ха, ны́нѣ и при́сно и во́ вѣки вѣко́мъ, ами́нь.