Якоже пучи́ну мо́ря, по́стное се́ вре́мя преидо́хомъ, и бо́лѣе на сію́ недѣ́лю по́двигъ воспріи́мемъ, вѣ́рніи, и пре́йдемъ отъ чуде́съ Госпо́днихъ на бо́льшая чудеса́, Ла́заревымъ воста́ніемъ озари́вшеся: съ Ма́ріею и Ма́рѳою по́честь и хвалу́ я́ко Влады́цѣ Христу́ усрѣ́тше Его́ принесе́мъ, и я́ко младе́нцы съ вѣ́твьми, единогла́сно возопіе́мъ: Благослове́нъ Гряды́й во́ имя Госпо́дне, Бо́гъ Госпо́дь и яви́ся на́мъ! Рцы́ на́мъ, проро́че, я́вѣ, кто́ е́сть Гряды́й во́ имя Госпо́дне? Слы́шимъ, бра́тіе, проро́ка Иса́ію о Не́мъ глаго́люща: се́ Дѣ́вая во́ чревѣ пріи́метъ, и роди́тъ Сы́на, и нареку́тъ и́мя Ему́ Емману́илъ. То́й е́сть Сше́дый съ небе́съ, и во́лею на́съ ра́ди обнища́въ, да мы́ нището́ю Его́ обогати́мся. То́й е́сть Рожде́йся отъ Отца́ пре́жде вѣ́къ, и въ послѣ́дняя лѣ́та отъ Дѣ́вы Богоро́дицы. То́й Ла́заря воскреси́лъ е́сть четверодне́внаго. То́й е́сть, во́ имя Госпо́дне прише́дый во́лею на́ страсть. На́нь же зло́бніи евре́и въ сла́вы мѣ́сто за́вистію совѣ́тъ сотворя́ху уби́ти Его́, не то́кмо Самого́, но и Ла́заря съ ни́мъ, поне́же мно́зи его́ ра́ди вѣ́роваша Го́сподеви. Дне́сь земля́ ра́дости о то́мъ испо́лнися, цвѣты́ благово́нными пу́ть постила́етъ, и на ра́дость человѣ́ки собира́етъ. Мы́ же, я́ко вѣ́твіе садо́вное добродѣ́тели пригото́вльше, пѣ́сньми возопіе́мъ: Благослове́нъ Гряды́й во и́мя Госпо́дне, Бо́гъ оте́цъ на́шихъ, хотя́ наступи́ти на діа́вола, и сме́рть погуби́ти, и ца́рство а́дово разруши́ти, и держи́мыхъ во а́дѣ отъ у́зъ свободи́ти! Того́ бо ра́ди во́лею на́ Страсть пріи́де, хотя́ Кресто́мъ мучи́теля погуби́ти, и оживи́ти уме́ршія. То́й же Кре́стъ и на́мъ даде́ ору́жіе на діа́вола, и на враги́. Тѣ́мъ бо зна́менающеся, ле́сть діа́волю всю́ разоря́емъ. И того́ ра́ди глаго́лемъ: Благослове́нъ Гряды́й во́ имя Госпо́дне! Пріи́де бо спасти́ по́стники и возда́ти мзду́ проти́ву труда́ и́хъ. Мно́ги бо, рече́, су́ть оби́тели въ дому́ Отца́ Моего́, раздѣля́еми кому́ждо проти́ву дѣ́ломъ. Да не лиши́мся и́хъ за малого́дныя сла́сти житія́, я́же я́ко стѣ́нь мяту́тся, и я́ко ды́мъ исчеза́ютъ. Прише́ствіе же Христо́во приближа́ется. Потщи́мся, бра́тіе, до́ндеже вре́мя и́мамы, да не затворя́тся покая́нію две́ри, ре́кше, сме́рть не пости́гнетъ. Покая́ніемъ ны́нѣ да убѣжи́мъ, да не услы́шимъ о́наго отвѣ́та, глаго́люща: ны́нѣ ли, убо́гій человѣ́че, ка́ешися, егда́ нѣ́сть у́же вре́мени покая́нію? Тѣ́мъ, люби́міи, въ житіи́ се́мъ прожене́мъ обы́чай гнѣ́вный отъ себе́, погаси́мъ сатани́нскую вражду́, оста́немъ не́нависти бра́тни, и ще́дри, и пода́тливи къ неиму́щимъ бу́демъ. Никто́же бо съ бога́тствомъ и съ сла́вою отхо́дитъ свѣ́та сего́, но то́кмо съ дѣ́лы: а сла́ва и бога́тство вся́ здѣ́ оста́нутся. Тѣ́ло же на́ше гро́бъ пріи́метъ, черве́мъ на снѣ́дь, и ко́сти оголѣ́ютъ. Тѣ́мъ подви́гнемся, бра́тіе, на до́брая дѣ́ла, и сконча́емъ по́стное сіе́ вре́мя безъ лѣ́ности: при́сно бо на концѣ́ вѣнцы́ подаю́тся трудя́щимся. Аще и дѣ́ло кто́ на́чнетъ, а не соверши́тъ, посра́мленъ бу́детъ: та́ко и мы́ соверши́мъ до́брѣ, да мзду́ си́ соверше́нну пріи́мемъ. Аще ли кто́ отъ хлѣ́ба удержи́тся, а гнѣ́въ и́мать, таковы́й подо́бенъ е́сть звѣ́рю, то́й бо не я́стъ хлѣ́ба. Аще же отъ питія́ и отъ ры́бы кто́ удержи́тся, и на го́лѣй земли́ лега́ніе твори́тъ, а зло́бу имѣ́я и непра́вду дѣ́я, да не хва́лится у́бо, ху́ждьши бо скота́ е́сть, зане́ о́ный не и́мать гнѣ́ва, ни за́висти, ни непра́вды дѣ́етъ. Но удержи́теся, вѣ́рніи, тѣле́сныхъ похоте́й, да подо́бни бу́демъ а́нгеломъ. Се́ у́бо Христо́вы приближа́ются Стра́сти, я́же за ны́ во́лею воспрія́тъ: да очи́стивше си́ ду́шу, и тѣ́ло, и у́мъ, бу́демъ прича́стницы Боже́ственныя Его́ Ве́чери, вопію́ще къ Нему́ и глаго́люще: Благослове́нъ Гряды́й во́ имя Госпо́дне, на́ Страсть во́льную на́съ ра́ди Прише́дый, и па́ки съ небесе́ пріити́ хотя́й суди́ти живы́мъ и ме́ртвымъ, ре́кше пра́веднымъ и грѣ́шнымъ, и возда́ти кому́ждо по дѣ́ломъ его́. Бо́гу на́шему сла́ва. [Ами́нь.]