Христо́с Бог наш от ева́нгельских слове́с трапе́зу нам духо́вную устро́и, и созыва́ет ве́рныя, да чуде́с Его́ наслади́мся вси. «Во вре́мя о́но, иды́й Иису́с со ученики́ свои́ми, ви́де челове́ка, и́же слеп роди́ся», я́ко ни о́чною ве́жду не ви́дети зна́мения. О нем же ученицы́ вопроси́ша Го́спода, глаго́люще: «Го́споди, кто согреши́: сей ли, или роди́теля его́, да слеп роди́ся?». Не ве́дуще ученицы́ се ре́коша. Госпо́дь же и́стину им пове́да рек: Ка́ко сей не роди́вся еще́ имя́ше согреши́ти? Ни се пра́ведно, е́же за грехи́ роди́тель, де́тем му́ку прия́ти: но ко́ждо по дело́м свои́м прии́мет.
Па́ки же рече́ Иису́с ученико́м свои́м: «Ни сей согреши́, ни роди́теля его́, но да явя́тся дела́ Бо́жия на нем». Ку́пно бо хотя́ше с теле́сным зра́ком и душе́внии ему́ о́чи просвети́ти. Рече́ бо Иису́с: «Да явя́тся дела́ Бо́жия»: се рече́ о Себе́, а не о Отце́: о Отце́ бо сла́ва бе явле́на, а Тому́ подоба́ет яви́тися. Того́ ради прирече́: «Мне де́лати подоба́ет дела́ посла́вшаго Мя».
«И сия́ рек плю́нув до́лу, и сотвори́ кал от сли́ны, и пома́за о́чи слепо́му», да всем я́ве сотвори́т, я́ко Той И́же Ада́ма от земли́ созда́. И посыла́ет в Силоа́м, да яви́т послуша́ние нам име́ти уче́ния. Слепы́й же умы́вся, прии́де ви́дя.
«Сосе́ди же видевше глаго́лаху: «Не сей ли есть седя́ и прося́ ми́лостыню?». Ини́и же глаго́лаху: «Подо́бен есть ему́». Он же глаго́ла: «Я́ко аз есмь»». Того́ бо ра́ди Госпо́дь в Силоа́м посла́ его, да лю́дие у́зрят преди́вное и пресла́вное чу́до. Глаго́лет бо Евангели́ст о смире́нии Госпо́дни, я́ко и к ни́щим прихожда́ше, да и мы навы́кнем не горде́ти сирота́ми, ни оби́дети их: но па́че наделя́ти, и ми́ловати их. Толма́ же бе правди́в слепы́й, я́ко испове́да жидо́м исцели́вшаго ѝ Христа́. Они́ же реко́ша: «Где есть?». И рече́: «Не вем». Иису́с бо творя́й чудеса́, уклоня́шеся наро́да ради.
Ведо́ша же его́ к фарисе́ом, да устраши́вся запре́тся чу́да. И вопроси́ша ѝ: «Ка́ко еси́ прозре́л?». Он же бо́лее пропове́да: «Я́ко умы́хся, рече́, и се ви́жу». Ка́ко же вы гре́шника Ѝ глаго́лете? Не мо́жет бо гре́шник сих чуде́с де́яти. Они́ же реко́ша: «Разоря́ет суббо́ту, проти́вник есть Зако́ну».
Призва́вше же роди́теля его́, вопроси́ша их. Они́ же реко́ша: «Се есть сын наш, сей слеп роди́ся, а ны́не ка́ко ви́дит не ве́мы». О злосе́рдии и прокля́тии! И второ́е вопроси́ша роди́телей его́: «А́ще сын есть ва́ю, и а́ще слеп роди́ся, ка́ко ны́не ви́дит?». Они́ же второ́е ре́ста: «Се сын на́ю, сей слеп роди́ся: а ка́ко исцеле́, самого́ вопроси́те».
И фарисе́и второ́е слепца́ вопроси́ша: «Пове́дай, како́ еси́ прозре́л? Мы ве́мы, я́ко гре́шник есть». И рече́ слепе́ц: «А́ще гре́шник не вем: но о мне чу́до сотвори́ преди́вно».
И па́ки фарисе́и вопроша́ху и́, не я́ко хотя́ще уве́дети, но да бы укори́ти Го́спода суббо́ты ра́ди. Отвеща́ же руга́яся им прозре́вый: «Глаго́лах вам мно́гажды, и не слы́шасте, еда́ и вы ученицы́ Его́ хо́щете бы́ти?». О себе́ явля́я, я́ко учени́к есть Его́. Фарисе́е же реко́ша: «Ты учени́к еси Его́, а мы Моисе́овы ученицы́». О беззако́ннии! А́ще бы́сте Моисе́ю ве́ровали, то не бы ху́лили Го́спода: Моисе́й бо Того́ раб есть. Прозре́вый же рече́: «Еда́ мо́жет гре́шный сицева́я зна́мения твори́ти? Вем бо я́ко гре́шников Бог не послу́шает: но а́ще кто богочте́ц, и во́лю Его́ твори́т. От ве́ка несть слы́шано, кто бы отве́рз о́чи сле́пу рожде́ну». Ине́м у́бо отверзо́шася о́чи, но не сле́по рожде́нным, но от неду́га слепото́ю стра́ждавшым: а се чу́до преди́вно есть.
Фарисе́е же не хотя́ще слы́шати и́стины глаго́лемыя, укори́ша его́, я́ко во гресе́х роди́вшася, и из со́нмища изгна́ша. О лжи́вии сы́нове, ненави́дящии и́стины!
Пото́м обре́те его́ Иису́с в це́ркви, и уте́ши его́, рек: «Ты ве́руеши ли в Сы́на Бо́жия?». Он же вопроси́: «Кто еси́, Го́споди?». Иису́с же рече́ ему́: «И́же тя исцели́л есть, и глаго́ляй с тобо́ю, Той есть». Он же ве́ры де́ло ско́ро явля́ет, глаго́ля: «Ве́рую, Го́споди», и поклони́ся Ему́.
Ве́руем и мы бра́тие всеси́льному Влады́це, творя́щему ди́вная чудеса́, да поми́лует ны и введе́т во Ца́рствие Свое́, Ему́же сла́ва ны́не и при́сно и во ве́ки веко́в. Аминь.