Неделя о слепом

И мимоходя́ Иису́с, ви́де челове́ка сле́па от рожде́ния. И вопроси́ша Его́ ученицы́ Его́, глаго́люще: Учи́телю, кто согреши́: сей или́ роди́тели Его́, да слеп роди́тся?

«И преходя́ Иису́с, ви́де челове́ка сле́па от рожде́ния». Зело́ человеколюби́в Сый и о на́шем спасе́нии промышля́я, и неблагода́рных уста́ загради́ти хотя́, ничто́же от пристоя́щых Ему́ оставля́ет, а́ще и ни еди́н же внима́яй бу́дет. Сие́ у́бо и проро́к ве́дый глаго́лаше: «Я́ко да оправди́шися в словесе́х свои́х, и победи́ши внегда́ суди́ти». Сего́ у́бо ра́ди и зде, поне́же высо́кое слове́с не прия́ша, но и бесну́ющаяся нареко́ша, и уби́ти начина́ху - изше́д от святи́лища, исцеля́ет слепа́го. И отше́ствием я́рость утеша́я, и содея́нием зна́мения жесто́кое их и непоко́рное умякча́я, и рече́нная уверя́я. И твори́т зна́мения не прилу́чшееся, но тогда́ пе́рвее слу́чшеися: «От ве́ка бо рече́ несть слы́шано, я́ко отве́рзе кто очеса́ слепорожде́нну». Сле́пу у́бо не́гли отве́рзе, рожде́нну же не ктому́. И я́ко изше́д от святи́лища, на де́ло прии́де прили́чно - я́вствено отту́ду, Сам бо ви́де слепа́го, а не слепе́ц к Нему́ прии́де и си́це потща́тельне возре́, я́ко и ученико́м чу́вство пода́ти. От сего́ у́бо и на вопроше́ние приидо́ша, зря́ше бо Его́ потща́тельне внима́юща, вопраша́ху глаго́люще: «Кто согреши́, сей или́ роди́тели его́?». Соблажне́нно вопроше́ние! Ка́ко бо согреши́л бы, пре́жде не́же роди́тися? Ка́коже роди́телем согреши́вшим, той у́бо му́чил бы ся?

Отку́ду у́бо приидо́ша на вопроше́ние сие́? Пре́жде сего́ разсла́бленаго исцеля́я глаго́лаше: «Се здрав был еси́, ктому́ не согреша́й». Си́и у́бо помы́сливше, я́ко он грех ра́ди разсла́блен бысть, глаго́лаху Христу́: Бу́ди он грех ра́ди разсла́блен бысть, о сем же что у́бо рече́ши? Сей или́ согреши́? Но несть рещи́: от ро́дства бо есть слеп. Но роди́телие ли его́? Но ниже́ сие́: сын бо о отце́ не стра́ждет ка́зни. Я́коже бо отроча́ озлобля́емо зря́ще глаго́лем: Что у́бо реку́т о сем? Что сотвори́ло есть отроча́? - не вопроша́юще, но недоуме́юще. Си́це у́бо и ученицы́, не толи́ко воспроша́юще сие́ глаго́лаху, но недоуме́юще. Что у́бо Христо́с? «Ниже́ сей согреши́, ниже́ роди́телие его́». Сие́ же не грехо́в свобожда́я их рече́.

Не про́сте бо рече́: «Ниже́ сей согреши́, ниже́ роди́телие его», но наведе́: «Да слеп роди́тся». Но да просла́вится Сын Бо́жий. Согреши́ бо и сей, и роди́телие его́: но не отсю́ду ослепле́ние. Сия́ же глаго́лаше, не сие́ явля́я: я́ко сей у́бо не си́це, ини́и же не́цыи от сих ослепле́ни бы́ша вин за грехи́ роди́телей: ниже́ бо есть согреши́вшу ино́му му́чити ина́го. Поне́же а́ще сие́ да́мы, и о́но да́мы: я́ко пре́жде рожде́ния согреши́л есть. Я́коже у́бо рек: «Ниже́ сей согреши́, ниже́ роди́телие его́», не сие́ рече́, я́ко есть роди́телей ра́ди му́читися. И́бо Иезекии́лем мне́ние сие отъе́млет: «Живу́ Аз глаго́лет Госпо́дь: а́ще будет при́тча сия́ глаго́лемая: отцы́ ядо́ша те́рпкая, и зу́бы ча́дом окрови́шася». И Моисе́й же рече́: «Не у́мрет оте́ц о ча́де». И о не́коем цари́ рече́, я́ко сего́ ра́ди не сотвори́ , соблюда́я зако́н Моисе́ов. А́ще же глаго́лет кто: Ка́ко у́бо рече́ся: «Тре́тий и четве́ртый род…»? О́но у́бо рече́м, я́ко несть собо́рно изрече́ние, но о не́ких рече́ся и́же от Еги́пта исше́дшых. А е́же глаго́лет, таково́ есть: Поне́же у́бо из Еги́пта изше́дше и по зна́мениях и чудесе́х прароди́телей бы́ша го́рши, и́же ничто́же сих ви́деша, та́яже постра́ждут рече́ я́же пострада́шаи они́, поне́же та́яже дерзну́ша. И я́ко о́нех рече́ся, ме́сту не́кто надста́в опа́снейше, уве́сть.

Что ли у́бо ра́ди слеп роди́ся? Да яви́тся сла́ва Бо́жия, рече́. Се па́ки недоуме́нно: и́но а́ще кроме́ сего́ му́ки немо́щно яви́тися Бо́жией сла́ве? Наипа́че у́бо, не сие́ рече́ся, я́ко не мо́щно. Мо́щно бо, но и о сем да яви́тся. Что у́бо рече́, непра́вдовася сла́вы ра́ди Бо́жия? Ко́ею непра́вдою, рцы ми? А́ще бо ниже́ отню́д привести́ его́ хоте́л бы? Аз же и благода́тельствоватися ему́ реку́: от ослепле́ния вну́треними бо прозре́ очесы́.

Ка́я бо по́льза иуде́ом оче́с есть? Бо́лшую у́бо му́ку стяжа́ша. Осле́пльше, внегда́ зре́ти. Кото́рый же сему́ вред от ослепле́ния? Сим бо прозре́. Я́коже у́бо зла́я не суть зла, я́же по настоя́щему житию́: си́це ниже́ блага́я, бла́га. Но грех еди́н зло, ослепле́ние же не зло. Приведы́йже от не су́щаго во е́же бы́ти, о́бласть имя́ше и си́це его́ оста́вити. Ре́ша же не́цыи, я́ко сие́ ниже́ виносло́вно есть прорече́ние, но сбы́тия : си́речь, я́ко егда́ глаго́лет: «Я́ко на суд Аз приидо́х в мир, да неви́дящии прозря́т и ви́дящии сле́пи бу́дут». И па́ки Па́вел: «Разу́мное бо Бо́жие я́вственно есть в них, во е́же бы́ти им неотве́тным, и́бо не сего́ ра́ди им показа́ да лиша́тся отве́та». И па́ки и́нде: «Зако́н привни́де, да умно́жится недоста́точное». А́ще и не сего́ ра́ди привни́де, но да возбрани́тся грех, - зри́ши ли везде́ прирече́ние сбы́тия су́ще? Я́коже бо не́кто зда́тель изря́ден хра́мины: о́во у́бо соде́ла, о́воже оста́ви несконча́нно, я́ко бы неве́рующим оста́тком и о всем отвеща́ти. Си́це и Бог, я́ко хра́мину не́кую согни́вшу, те́ло на́ше соприле́пляет и наполня́ет, и ру́ку суху́ю исцеля́я, разсла́бленыя у́ды стязу́я, хромы́х исправля́я, прокаже́ных очища́я, неду́гующих воздвиза́я, голе́нми напа́ствованных соверше́нных творя́, ме́ртвых от сме́рти взыва́я, сомже́ныя очеса́ отверза́я, не су́щая наложи́в. Я́же вся есте́ственыя не́мощи су́ща напа́ствования та́же исправля́я, показова́ше свою́ си́лу. Ре́к же: «Да яви́тся сла́ва Бо́жия», о Себе́ рече́, а не о Отце́, О́ного бо сла́ва бе я́вствена, поне́же бо слы́шаху, я́ко челове́ка Бог сотвори́, вземь персть от земли́: сего́ ра́ди си́це и Той созда́.

Е́же бо рещи́: «Я́ко Аз есмь прие́мый персть от земли́ созда́в челове́ка», же́стоко ви́дящеся бы́ти слы́шащим. Де́лом же сим показу́емо, не ктому́ про́чее проти́в стоя́ше. Те́мже у́бо и Сам персть взем и растворя́я плюнове́нием, си́це сокрове́нную Свою́ си́лу и сла́ву изъяви́л есть. Нема́ла бо сла́ва е́же Соде́телю Ему́ непщева́тися тва́ри. От сего́ бо и ина́я совхожа́ху от ча́сти и все уверя́ше: я́же бо о бо́льшем ве́ра и ме́ньшее утвержа́ше. Тва́ри бо всея́ честне́йши челове́к, и в су́щых в нас удесе́х честне́йше о́ко. Сего́ ра́ди не про́сте, но о́нем о́бразом очеса́ соде́тельствова. А́ще бо и мал вели́чеством уд, но всего́ телеси́ есть ну́жнейшь. И сие́ Па́вел явля́я глаго́лаше: «А́ще рече́т слух я́ко несмь о́ко, несмь от телеси́, не сего́ ра́ди несть от телеси́?». Вся бо я́же в нас Бо́жия прему́дрости есть указа́ние, мно́го же па́че о́ко. Сие́ у́бо все окормля́ет те́ло, сие́ всему́ те́лу красоту́ соде́ловает, сие́ украша́ет зре́ние, сие́ свети́льник есть всех удо́в. Е́же бо со́лнце по вселе́нней, сие́ о́ко в телеси́. А́ще угаси́ши со́лнце, вся погуби́л еси́ и смути́л еси́. А́ще угаси́ши очеса́, и но́ги не потре́бни, и ру́ки, и душа́. Погиба́ет бо ра́зум, осле́пшим сим: си́ми бо Бо́га позна́хом: «Неви́димая бо от созда́ния ми́ра, творе́ньми познава́ема ви́дятся». Не у́бо те́лу свети́льник о́ко то́кмо, но и пре́жде те́ла - души́. Те́мже я́коже в не́коем ца́рском ме́сте водруже́но есть, вы́шний жре́бий получи́вше и ины́х чувств председя́ще.

Сие́ у́бо назида́ет та́же, да не вознепщу́еши, я́ко ве́щи тре́бует, егда́ твори́т, и да навы́кнеши, я́ко ниже́ в нача́ле бре́ния потре́бу имя́ше, - (И́же бо не су́щая существа́ бо́льшая приве́д, мно́го у́бо па́че сие́ кроме́ ве́щи сотвори́л бы,) - да́же у́бо навы́кнеши, я́ко не потре́бы ра́ди сие́ твори́т, но науча́я Соде́теля бы́ти Себе́ су́щих в нача́ле, - пома́зав бре́нием рече́: «Иди́ умы́йся». Да уве́си, я́ко не бре́ния тре́бую ко е́же сотвори́ти очеса́, но да яви́тся в нем сла́ва Моя́. Я́ко бо о Себе́ рече́ рек: «Да яви́тся сла́ва Бо́жия», наведе́: «Мне подоба́ет де́лати дела́ Посла́вшаго Мя», си́речь, Мне подоба́ет яви́тися Себе́ и сотвори́ти, могу́щая Мене́ показа́ти та́яже Отцу́ творя́ща: не такова́, но та́яже. Е́же бо́льшаго есть непреме́нства и е́же ниже́ пома́лу ра́знствующих глаго́летс. Кто у́бо сопроти́в возри́т про́чее, зря Его́ та́яже могу́ща Отцу́? Не бо́ созда́ то́кмо очеса́, ниже́ отве́рзе, но и е́же зре́ти дарова́: е́же зна́мение есть, е́же и ду́шу вду́нути. О́ной бо не де́йствующе, о́ко а́ще и соверше́нно бу́дет, не у́бо уви́дит когда́ ничто́же. Я́ко и е́же от души́ де́йство дарова́, и уд даде́, вся име́ющь, и арти́рии, и жи́лы, и жи́лицы крова́выя, и кровь, и ина́я вся, от них́же сложе́но есть нам те́ло. «Мне подоба́ет де́лати, до́ндеже день есть». Что сия́ хотя́т глаго́лы? Ко́е же после́дование име́ют? Мно́го. Е́же бо глаго́лет, таково́ есть: «До́ндеже день есть», до́ндеже леть есть челове́ком ве́ровати в Мя, доко́ле житие́ сие́ стои́т, «подоба́ет Ми де́лати. Гряде́т нощь», си́речь бу́дущее вре́мя, егда́ никто́же мо́жет де́лати, е́же есть, егда́ ктому́ ве́ра несть, ниже́ труды́, ниже́ покая́ние. Я́ко бо де́лу ве́ру глаго́лет, глаго́лаху ему́: «Что сотвори́м да де́лаем дела́ Бо́жия?», глаго́ла: «Сие́ есть де́ло Бо́жие, да ве́руете в Того́, Его́же посла́ Он». Ка́ко у́бо сие́ де́ло никто́же мо́жет де́лати тогда́? Я́ко ниже́ ве́ра есть, но и хотя́щии не хотя́ще повину́тся.

Да́же бо не кто рече́т, я́ко тщесла́вяся сие́ твори́т, показу́ет, я́ко щадя́ их вся де́лает: зде то́кмо власть име́ющых ве́ровати и не ктому́ могу́щых припло́дити что. Сего ра́ди ниже́ приступи́вшу слепо́му сотвори́ е́же сотвори́. Я́ко бо досто́ин бе исцели́тися, и а́ще ви́дел бы, ве́ровал бы у́бо и прише́л. И а́ще от не́коего слы́шал бы предстоя́ща, не бы у́бо си́це не ради́л - от су́щых по сих я́вственно: от му́жества, от ве́ры самы́я. И́бо бе ле́по ему́ помы́слити и рещи́: «Что сие́ есть? Бре́ние сотвори́ и пома́за мои́ о́чи, и рече́ мне: иди́ умы́йся. Не можа́ше ли исцели́ти, и тогда́ посла́ти в купе́ль? Мно́жицею умы́хся та́мо с ине́ми мно́гыми, и ни еди́наго же наслади́хся бла́га. А́ще не́кую си́лу име́л бы, предстоя́ у́бо исцели́л бы», - е́же и Елисе́ю Неема́н глаго́лаше. И́бо он повеле́н быв отъити́ умы́тися во Иорда́ни, не ве́рова, и наипа́че ве́сти толи́цей су́щи о Елисе́и. Но слепы́й не неве́рова, ниже́ сопроти́в рече́, ниже́ размышля́ше к себе́. Что сие́ есть? Бре́ние ли подоба́ше наложи́ти? Сие́ ослепи́ти па́че есть. Кто си́це прозре́ когда́? Но ничто́же сих размышля́ше. Ви́дел ли еси́ ве́ру тве́рду и усе́рдие? «Прихо́дит нощь». Показу́ет от сего́, я́ко и по кресте́ хо́щет промышля́ти о нечести́вых и приводи́ти мно́гих: еще́ бо день есть. По се́мже, коне́чно их отдели́т. И сие́ явля́я глаго́лаше: «Егда́ бу́ду в ми́ре, Свет есмь ми́ру». Е́же и ины́м глаго́лаше: «Ве́руйте, до́ндеже Свет с ва́ми есть».

Что у́бо Па́вел нощь настоя́щее житие́ нарече́, о́ноже день? Не сопротивля́яся Христу́, но та́яже глаго́ля: а́ще и не глаго́лы, но разуме́ньми. И́бо рече́: «Нощь пре́йде, день же прибли́жися». Нощь бо настоя́щее нарица́ет вре́мя, седя́щых ра́ди во тме или́ за е́же приложи́ти ю́ дни о́ному. Христо́с же нощь бу́дущее нарица́ет, неде́йственаго ра́ди грехо́в, Па́вел же - за е́же во тме бы́ти е́же во зло́бе пребыва́ющым и неве́рии.

Нравоуче́ние пятьдеся́ть шесто́е: О ми́лостыни, и сосужде́нии настоя́щых благи́х к бу́дущым.

Ве́рным у́бо бесе́дуя глаго́лаше: «Нощь пре́йде, день же прибли́жися», я́ко име́ющых наслади́тися све́та о́ного, и нощь ве́тхое житие́ нарица́ет: «Отложи́м бо рече́ дела́ тмы». Зри́ши ли, я́ко оне́м бы́ти нощь рече́? Те́мже глаго́лет: «Я́ко во дни благообра́зне да хо́дим, да све́та наслади́мся о́ного». А́ще бо сей си́це добр свет, помы́сли коли́к бу́дет он. Ели́ко бо свети́льничнаго све́та со́лнечный лу́чши, толи́ко и мно́го вя́щше он лу́чши сего́. И сие́ явля́я глаго́лаше: «Со́лнце поме́ркнет», си́речь вели́чества ра́ди о́ноя све́тлости, ниже́ сие́ яви́тся. А́ще же ны́не о е́же све́тлы име́ти хра́мины, бла́го возду́шны безчи́сленая изнуря́ем име́ния, зи́ждуще, злостра́ждуще, помы́сли, ка́ко подоба́ет и телеса́ са́мая изнуря́ти о е́же све́тлым нам хра́мом на небесе́х созда́тися, иде́же свет он неизрече́нный.

Зде бо и ра́ти и любопре́ния о преде́лех и стена́х, та́може ничто́же таково́ есть: ни за́висть, ни завиде́ние, ниже́ любопри́тся кто с на́ми о пределоположе́ниих. И сего́ у́бо оста́вити ну́жда вся́чески, он же сопребу́дет всегда́. И сему́ у́бо ну́жда согни́ти вре́менем и безчи́сленым подлежа́ти вредо́м, о́ному же пребыва́ти несостаре́емому вы́ну. И сего́ у́бо ни́щий не мо́жет созда́ти, о́ногоже есть и двема́ пу́лы созда́ти я́коже вдови́ца. Сих ра́ди согнета́ются: я́ко толи́ким нам предлежа́щым благи́м, лени́мся, малоду́шствуем: и е́же ка́ко у́бо зде све́тлы стя́жем хра́мы, вся де́йствуем, а е́же ка́ко на небесе́х, поне́ ма́ло стя́жем оби́телище, не промышля́ем, не пече́мся.

Рцы бо мне, где хоте́л бы храм име́ти, зде у́бо, или́ в пусты́ни, или́ во еди́ном от градо́в ма́лых? Аз бо не мню, но в ца́рственнейшых и вели́ких, иде́же мно́жае бога́тство, иде́же бо́льше све́тлость. Аз же тебе́ веду́ во град тако́в, его́же Худо́жник и Соде́тель Бог. Та́мо молю́ стяжава́ти же и зда́ти ма́лыми име́ньми, ма́лым трудо́м о́ного хра́ма ни́щых созидают ру́ки. И сие́ наипа́че есть зда́ние: я́ко я́же у́бо ны́не быва́ема - после́дняго безу́мия. И́бо а́ще кто тебе́ в пе́рскую вел бы зе́млю зря́ща я́же та́мо, и возвраща́ющася та́же повеле́л бы зида́ти хра́мы: еда́ не его́ ли бы позазре́л еси́ неве́дению после́днему, я́ко безвре́менне изнуря́ти повелева́ющу?

Ка́ко у́бо на земли́ са́мое сие́ твори́ши, его́же ма́ло по́слеже оста́виши? Но де́тем оста́влю рече́. Но и они́ ма́ло по́слежде оста́вят по тебе́, мно́жицею же и пре́жде тебе́: и и́же по о́нех па́ки. И быва́ет тебе́ и зде вещь печа́ли вина́, егда́ насле́дников держа́щых не у́ ви́диши. Та́мо же ничто́же таково́ есть непщева́ти, но неподви́жно стяжа́ние пребыва́ет, и тебе́, и де́тем, и вну́ком, а́ще ту́юже доброде́тель подража́ют. О́ного зва́ния Христо́с каса́ется, о́ного зи́ждущему не ну́жда прилежа́телен устрая́ти, ниже́ пещи́ся, ниже́ скорбе́ти;

Егда́ бо Бог де́ло восприи́мет, ка́я потре́ба попече́ния? Он вся собира́ет и воставля́ет хра́мину. И не сие́ то́кмо есть чу́дно, но я́ко си́це зи́ждет, я́ко тебе́ уго́дно есть. Па́че же и чрезуго́дное и па́че е́же хо́щеши: Худо́жник бо есть изря́ден, и зело́ промышля́ет о по́льзующых тебе́. А́ще и нищь бу́деши и восхо́щеши зда́ти хра́мину сию́, не но́сит тебе́ за́висти, ниже́ ражда́ет тебе́ завиде́ние: никто́же бо ю́ зрит от све́дящих зави́дети, но све́дящии ра́доватися а́нгели благи́м твои́м. Никто́же ю́ предели́ти возмо́жет, никто́же бо ей близ живе́т от неду́гующих такова́я.

Сосе́дов име́еши та́мо святы́х су́щых о Петре́ и Па́вле, проро́ков всех, му́чеников, наро́д а́нгел, арха́нгел. Сих у́бо ра́ди всех су́щая в них да истощи́м, да о́нех получи́м оби́телей, и́хже бу́ди всем нам получи́ти благода́тию и человеколю́бием Го́спода на́шего Иису́са Христа́, И́мже и с Ни́мже Отцу́ сла́ва со Святы́м Ду́хом, ны́не и при́сно и во ве́ки веко́в. Ами́нь.

Сия́ рек Иису́с, плю́ну до́ле, и сотвори́ бре́ние от плюнове́ния, и пома́за бе́рнием на очеса́ слепа́го, и рече́ ему́: Иди́ умы́йся в купе́ли Силоа́мли.

Хотя́щым что от прочита́емых обоима́ти, ниже́ ма́лое глаго́лемых претека́ти подоба́ет. Сего́ бо ра́ди испытова́ти писа́ния повеле́ни бы́хом, поне́же ви́дятся мно́га а́ще и от себе́ су́ща удо́бна, мно́го во глубине́ разуме́ние име́ти сокрове́нно. Зри бо яково́ есть и настоя́щее. «Сия́ бо рек, рече́, плю́ну до́лу». Ка́я сия́? «Да яви́тся сла́ва Бо́жия» и «я́ко подоба́ет Ми де́лати дела́ Посла́вшаго Мя». Не про́сте бо рече́, воспомяну́л есть нам рече́нных евангели́ст и наведе́, я́ко плю́ну, но явля́я, я́ко сло́во де́лы уве́ри. И что ра́ди не водо́ю де́йствует, но плюнове́нием в бре́ние? Хотя́ше его́ посла́ти в Силоа́м, да́же у́бо ничто́же напи́шеши исто́чнику, но навы́кнеши, я́ко я́же от уст Его́ изше́дши си́ла, сия́ и назда́, и отве́рзе очеса́. Плю́ну до́лу, сие́ у́бо и евангели́ст зна́менуя глаго́лаше: «И сотвори́ бре́ние от плюнове́ния». Та́же, да не возмни́тся земли́ бы́ти исправле́ние, повеле́ умы́тися.

Что у́бо ра́ди не а́бие сие́ сотвори́, но к Силоа́му посла́? Да навы́кнеши слепа́го ве́ру, да заусти́тся иуде́йское неблагодаре́ние. Ле́по бо бе всем его́ зре́ти отходя́ща, бре́ние име́юща на очесе́х пома́зано: пресла́вным бо всех у́бо обрати́л бы к нему́, и ве́дящих его́ и неве́дящых, и со опасе́нием у́бо ему́ внима́ли бы. Поне́же бо не удо́бно сле́па прозре́вша позна́ти, мно́гих твори́т пе́рвее сведе́телей долгото́ю пути́ и опа́сных зри́телей пресла́вным зре́ния, да внима́телнейши бы́вше, не ктому́ возмо́гут глаго́лати: сей есть, несть сей. К си́мже, и о́но хо́щет состро́ити: я́ко не чуждь есть зако́на и дре́вняго. Посыла́я в Силоа́м, ниже́ бо о́но про́чее непщева́ти бе, да не Силоа́м во́змет сла́ву. И́бо мно́зи мно́жицею та́мо очеса́ омыва́юще, ни еди́ного же такова́го наслади́шася. И та́мо бо си́ла бе Христо́ва, вся содева́ющая. Сего́ ра́ди и толкова́ние нам прилага́ет евангели́ст, рек бо «в Силоа́м», приложи́: «е́же есть по́слан», да навы́кнеши я́ко и та́мо Христо́с его́ исцели́, я́коже Па́вел рече́: «Пия́ху бо от духо́внаго после́дующаго ка́мене: Ка́мень же бе Христо́с». Я́коже у́бо ка́мень бе Христо́с духо́вен, си́це и Силоа́м бе духо́вен. Мне ви́дится внеза́пное прише́ствие воды́ гада́тельствовати та́инство нам неизрече́нное.

Ко́е ли у́бо? Сие́ ненача́янное Богоявле́ния и па́че наде́жди вся́кия. Но зри слепа́го ра́зум и ко всем повину́ющься. Ниже́ бо рече́: А́ще отню́д бре́ние есть или́ плюнове́ние подаю́щее очеса́: ка́я мне потре́ба Силоа́ма? А́щеже тре́ба Силоа́ма, ка́я потре́ба бе́рния? Что ра́ди пома́за? Что ра́ди умы́тися повеле́?

Но ничто́же сих помышля́ше, но ко еди́ному уготовля́шеся то́кмо во всех покаря́тися Повелева́ющему, и ничто́же его́ от быва́емых соблазни́. А́ще же глаго́лет кто: Ка́ко у́бо прозре́ отложи́в бре́ние? - Ничто́же и́но услы́шит от нас, ра́зве: я́ко о́браза не ве́мы. И что чу́дно а́ще мы не ве́мы? Ниже́ бо евангели́ст ве́дяше, ниже́ сам исцеле́нный. Но бы́вшее у́бо ве́дяще, о́браза же пости́гнути не мо́гут . Сие́ же и вопраша́емь глаго́лаше: «Я́ко бре́ние возложи́ на очеса́ моя́, и умы́хся, и ви́жу». Ка́ко же сие́ бысть, не и́мать глаго́лати, а́ще и тма́ми вопрося́т. «Сусе́ди у́бо рече́ и ви́дящии его́, я́ко проси́тель бе, глаго́лаху: Не сей ли есть седя́й и прося́? Ини́и глаго́лаху: Сей есть». Преди́вное бо бы́вшаго, и в неве́рие их приведе́, а́ще и толи́ким устрое́нным, я́ко бы не обезве́ритися. «Они́ же глаго́лаху: Не сей ли есть седя́й и прося́?». О́ле Бо́жияго человеколю́бия! Ка́мо сни́де, проси́телей со мно́гою прия́знию исцеля́я, и отзде́ иуде́ов зауща́я, я́ко не све́тлых, ниже́ обьявле́нных, ниже́ нача́лников, но и худы́х, того́же сподобля́ше промышле́ния: и́бо на спасе́ние всех прии́де.

А е́же о разсла́бленном бысть, сие́ и о сем быва́ет: ниже́ бо он ве́дяше, Кто есть исцели́вый его́, ниже́ сей. Быва́ше же сие́ отхожде́ния ра́ди Христо́ва. Отхожа́ше же при́сно исцеля́я Иису́с, я́ко бы вся́кому зазре́нию отъя́тися зна́мений. Не ве́дящии бо Его́, Кто есть, ка́ко у́бо угожа́ли бы Ему́ и состро́яли быва́емая? Ниже́ бо от мимоходя́щых бе сей, но от седя́щих при две́рех святи́лища. Сомня́щымжеся всем о нем, что рече́ он? «Аз есмь». Не постыде́ся пе́рвыя слепоты́, ниже́ убоя́ся наро́дныя я́рости, ниже́ отрече́ся показа́ти себе́, да пропове́сть Благода́теля. «Глаго́лаху ему́: Ка́ко отверзо́шася твоя́ очеса́?». Глаго́ла им: «Челове́к глаго́лемый Иису́с». Что глаго́леши, челове́к такова́я соде́ловает ли? Но ничто́же ве́лие еще́ ве́дяше о Нем. «Сотвори́ бре́ние и пома́за». Зри́ши ли, ка́ко и́стинен есть? Не рече́ отку́ду сотвори́: е́же бо не ве́дяше не глаго́лет. Ниже́ бо ви́де я́ко до́лу плю́ну: я́коже пома́за чу́вством навы́кну и осяза́нием. «И рече́ ми: Иди́, умы́йся в купе́ли Силоа́мстей». И сие́ слух сведе́тельствова. И отку́ду позна́вше Его́ гла́са? От бесе́дования су́щаго ко ученико́м. И сия́ глаго́ля вся, и́же де́лы сведе́тельство взем, о́браза рещи́ не мо́жет. А́ще же о чу́вственых и осяза́емых ве́ры тре́ба есть, мно́го па́че о неви́димых. «Глаго́лаху ему́: Где есть Он? Глаго́ла: Не вем». Глаго́лаху же «где есть Он?», уби́йствующе уже́ Нань. Зри Христо́во не велича́вое: ка́ко не близ бе исцеля́емым, не сла́ву бо обоима́ти хотя́ше, ниже́ народоводи́ти, ниже́ пока́зоватися. Зри, ка́ко вся любои́стинне отвещева́ет слепы́й. Хотя́ху у́бо Христа́ обрести́, я́кобы Его́ привести́ ко иере́ом. Но поне́же не получи́ша, приво́дят слепа́го к фарисе́ом, я́ко зе́льнейше вопроша́ющым. Сего́ бо ра́ди евангели́ст назна́менует, я́ко суббо́та бе, да лука́вое их изволе́ние пока́жет, и вину́ ея́же ра́ди иска́ху я́ко изве́т не́гли обрета́юще, и могу́ще чу́до оболга́ти ви́дящымся бы́ти преступле́нием зако́на. И сие́ явля́я от а́бие ви́девшим его́, ничто́же и́но рещи́, но: «Ка́ко отве́рзе твоя́ очеса́?». И зри, ка́ко глаго́лют: не ре́ша бо «ка́ко прозре́л еси́?», но: «ка́ко отве́рзе твоя́ очеса́?», даю́ще ему́ изве́т е́же оболга́ти Его́ о благодея́нии. Он же я́ко пре́жде слы́шавшим скоре́йше веща́ет: ниже́ бо и́мя рек, ниже́ «я́ко рече́ ми: иди́ умы́йся», а́бие рече́: «Бре́ние наложи́ на очеса́ моя́: и умы́хся, и ви́жу», я́ко [бы] мно́гу уже́ бы́вшу оклеве́танию и о́нем ре́кшим: «се, Иису́с якова́ де́лает в суббо́ту - бре́нием помазу́ет». Ты же ми смотри́, ка́ко не смуща́ется слепы́й. Егда́ бо на оне́х глаго́лаше, безбе́дне вопроша́емь, не си́це ве́лие бе е́же и́стинно рещи́. А е́же чу́дно есть ны́не, я́ко во мно́жайшем стра́се устро́ився, ниже́ отмета́ется, ниже́ сопроти́вная глаго́лет пре́жним.

Что у́бо фарисе́и, па́че же ини́и? Ведо́ша у́бо его́ я́ко отмета́ющася, сопроти́вное же пострада́ша, е́же не хоте́ша: и изве́стнейше уве́деша, и сие́ везде́ о зна́мениих стра́ждут. Па́чеже в су́щых по сих, сие́ я́вственнейше пока́жет. Что у́бо фарисе́и? «Глаго́лаху не́цыи, - не вси, но люте́йшии, - Сей челове́к несть от Бо́га: я́ко суббо́ту не храни́т. Ини́и глаго́лаху: Ка́ко мо́жет челове́к гре́шен такова́ зна́мения твори́ти?». Зри́ши ли, я́ко о зна́мении возвожда́хуся? И́же бо пре́жде сего́ посла́вше я́ко бы привести́ Его́, услы́ши, что глаго́лют ны́не, а́ще и не вси: и́бо нача́льницы су́ще, от славолю́бия в неве́рия впа́даху: оба́че же и от князе́й мно́зии ве́роваша в Него́, не испове́даху же. Мно́гии у́бо наро́д удо́бь пренебрего́мь бе, а́ки ничто́же ве́лие споспеша́я в со́нмище их. Кня́зи же па́че све́тли су́ще, неудо́бнейше дерза́ху: о́вех у́бо любонача́льствие держа́ше. о́вех же боя́знь и и́же о мно́гих страх. Те́мже глаго́лаше: «Ка́ко мо́жете ве́ровати, сла́ву от челове́к прие́млюще?». И они́, убива́ти и́щуще непра́ведне, от Бо́га глаго́лаху бы́ти. Слепы́х же исцеля́ющему, не мощи́ бы́ти от Бо́га за е́же «суббо́ту не храни́ти». К сим сопроти́в положи́ша си́и, я́ко гре́шник такова́я зна́мения твори́ти не мо́жет. Они́ у́бо злоде́йствене бы́вше молча́ще, мня́щееся бы́ти преступле́ние на среду́ приноша́ху. Не глаго́лаху бо «я́ко в субо́ту исцеля́ет», но «я́ко субо́ту не храни́т». Си́и же па́ки немо́щне.

Потре́бно бо показа́ти, ка́ко суббо́ту разруша́ет, от зна́мений укрепля́ются то́кмо - и в ле́поту: еще́ бо челове́ка Его́ непщева́ху бы́ти. Поне́же, а́ще не сие́ бы́ло бы, и и́нако име́ли бы изве́ты твори́ти, я́ко суббо́ты Госпо́дь бе, Сам ю́ сотвори́л есть. Но не у́ сие́ имя́ху изволе́ние. Никто́же у́бо от них сме́яше я́же хотя́ше я́вствене рещи́, ниже́ во отвеща́нии, но в сомне́нии: о́ви у́бо за недерзнове́нное, о́ви же за начальстволю́бие. «Ра́спря у́бо бе в них». Сия́ ра́спря пре́жде нача́ся в лю́дех, та́же по́сле [в] нача́льницех. «И о́ви у́бо глаго́лаху я́ко благ есть, ини́и же ни, но льстит наро́да». Зри́ши ли, ка́ко неразу́мнейши мно́гих нача́льницы распре́вшеся по́слежде? Но по е́же распрева́тися па́ки, ничто́же показова́ху до́блествено, зря́ще фарисе́ов належа́щих. Я́ко а́ще у́бо соверше́нно распре́лися бы́ша, вско́ре у́бо и́стинну позна́ли бы: есть бо распре́тися до́бре. Те́мже и сам глаго́лаше: «Не приидо́х вложи́ти мир на зе́млю, но мечь». Есть бо и зло единомышле́ние есть, и до́бре разгла́сие.

Нравоуче́ние пятьдеся́ть семдо́е: Я́ко подоба́ет неисправле́нных и злых бе́гати, и ни еди́наго соблазни́ти:

И́бо столп зи́ждущии, единомы́слиша во свое́м зле: и са́ми, и си́и па́ки нево́лею у́бо, о поле́зном же оба́че распре́шася. И о Коре́и же су́щии зле единомы́слиша: сего́ ра́ди до́бре раздели́шася. И Иу́да единомы́сли со иуде́и зле. Есть у́бо раздели́тися до́бре, и есть единомы́слити зле. Сего́ ра́ди рече́: «А́ще о́ко твое́ соблажня́ет тя, исткни́ е́. А́ще нога́ твоя́ - отсецы́ ю́». А́щеже от удеси́ разделя́тися подоба́ет зле спребыва́ющаго, мно́го па́че от друго́в зле сопребыва́ющых нам. Я́ко не везде́ единомышле́ние до́бро, я́коже у́бо ниже́ везде́ разделе́ние бла́го. Сия́ глаго́лю да́же бе́гаем лука́вых и да пожене́м благи́х. А́ще бо во удесе́х согни́вшее и неисце́льне име́юще отсеца́ем, боя́щеся да не и про́чее те́ло то́йже вред прии́мет, и твори́м сие́ не о́ного пренебрегу́ще, но про́чее сохрани́ти па́че хотя́ще ю́ - коль па́че о соживу́щых нам о зле сие́ де́йствовати ну́жно;

А́ще бо возмо́жем и оне́х испра́вити и са́ми не вреди́тися - вся твори́ти подоба́ет. А́щеже и они́ пребу́дут неисправле́ни, и нас вредя́т - отсеца́ти их и помета́ти ну́жно. Мно́жицею бо си́це приобрета́ют па́че. Те́мже и Па́вел си́це наказу́ет глаго́ля: «Изми́те лука́ваго от вас саме́х», и «да во́змется от среды́ вас де́ло сие́ сотвори́вый». Лю́то бо, лю́то сопребыва́ние лука́вых. Не си́це ско́ро губи́тельство каса́ется и кра́ста растлева́ет смеша́ющыхся неду́гом содержи́мых, я́коже зло́ба лука́вых муже́й. «Тлят бо обы́чаи благи́я бесе́ды злы». И проро́к па́ки: «Изыди́те от среды́ их» и отлучи́теся.

Никто́же у́бо зла́го да держи́тся дру́га. А́ще бо сыно́в злых име́юще отмета́ем, и не стыди́мся естества́, ниже́ сего́ зако́нов, ни су́щия от него́ ну́жди, мно́го па́че обы́чных и зна́емых бе́гати подоба́ет, лука́вых су́щых. А́ще бо и ни еди́н же от них прии́мет вред, лука́выя у́бо сла́вы избежа́ти не возмо́жет. Вне́шнии у́бо не житие́ испыту́ют, но от соживу́щих нас су́дят. Сия́ и жена́м и деви́цам запоруча́ю. «Промышля́юще бо рече́ до́брая» не то́чию пред Бо́гом, но и «пред челове́ки». Вся у́бо да де́йствуем, якобы́ не соблажни́ти бли́жняго. Житие́ бо, а́ще и зело́ пра́во бу́дет, собла́зн ины́м подаю́ще, - все погуби́. И ка́ко есть пра́вому житию́ соблазни́ти? Егда́ сожи́тие́ непра́вых, злу́ю ему́ обложи́т сла́ву. Егда́ бо, наде́ющееся на ся, сопребыва́ем лука́вым: а́ще и са́ми не вреди́мся, ины́м соблазни́м.

Сия́ и муже́м, и жена́м глаго́лю, и де́вам, оставля́я их со́вести со опасе́нием ве́дети, коли́ка отсю́ду ражда́ется зла́я. Аз бо ничто́же непщу́ю лука́во, ниже́ ин кто не́гли о соверше́ннейших: просте́йшии же брат о твое́м врежда́ется соверше́нии. Подоба́ет же и о не́мощи о́ного промышля́ти. А́ще и сей не вреди́тся, но е́ллин поврежа́ется. Па́вел же повеле́ «непреткнове́нным бы́ти и иуде́ом, и е́ллином, и це́ркви Бо́жией». Аз лука́во ничто́же непщу́ю о де́ве: люблю́ бо де́вство, любо́вь же не помышля́ет зло́е. Аз зело́ рачи́тель есмь жи́тельства сего́, и ниже́ помы́слити что могу́ безме́стно. Но ка́ко вне́шних увеща́ем? Подоба́ет бо и о оне́х твори́ти промышле́ние. Си́це у́бо я́же по себе́ да устрая́ем, да ниже́ от неве́рных кто име́ет на нас пра́ведный обрести́ вред.

Я́коже бо житие́ пра́во показу́ющии, прославля́ют Бо́га, си́це и́же сопроти́вное, ху́лиму бы́ти устрая́ют. Но не бу́ди не́ким таковы́м бы́ти у нас, но си́це просвети́тися де́лом на́шим, я́кобы просла́витися Отцу́ на́шему Су́щему на небесе́х и су́щия от Него́ сла́вы нам наслади́тися, ея́же бу́ди всем нам получи́ти благода́тию и человеколю́бием Го́спода на́шего Иису́са Христа́, И́мже и с Ни́мже Отцу́ сла́ва со Святы́м Ду́хом, ны́не и при́сно и во ве́ки веко́в. Ами́нь.

Глаго́лаху слепо́му па́ки: Ты что глаго́леши о Нем я́ко отве́рзе твоя́ очеса́? Он же рече́: «Я́ко проро́к есть». Не ве́роваша иуде́и:

Писа́ния не про́сте, ниже́ чрезде́льне прочита́ти подоба́ет, но со опасе́нием вся́ким, я́кобы не сопрепина́тися. И́бо и ны́не в ле́поту, а́ще кто зде взы́щет, ка́ко ре́кше «несть от Бо́га я́ко суббо́ту не храни́т?», глаго́лют ему́: «Ты что глаго́леши о Нем, я́ко отве́рзе твоя́ очеса́?». И не ре́ша: «Ты что глаго́леши о Нем, я́ко разреши́ суббо́ту?», но е́же отвеща́ния ны́не в ме́сто оглаго́лания полага́ют. Что ли у́бо есть рещи́? Не суть си́и глаго́лющии: «Сей несть от Бо́га», но отдели́вшиися от них и ре́кше: «Челове́к гре́шен не мо́жет такова́ зна́мения твори́ти». Хотя́ще бо их заусти́ти вя́щше, да не возмня́тся они́ помога́ти, прие́мшаго си́лы Его́ иску́с на среду́ приво́дят и вопроша́ют. Зри у́бо ни́щаго прему́дрость: всех бо сих разу́мнейше веща́ет. И пре́жде у́бо рече́ «я́ко проро́к есть», и не ужаси́ его́ развраще́нных иуде́й суд и сопроти́в глаго́лющих. И глаго́лющых: «Ка́ко мо́же бы́ти от Бо́га суббо́ту не храня́?», глаго́лаше «я́ко проро́к есть», и не ве́роваша, я́ко слеп бе и прозре́, донде́же пригласи́ша роди́телей его́. Смотри́, коли́кими о́бразы начина́ют чу́до спокры́ти и отъя́ти. Но са́мое и́стинны естество́ и́миже ви́дится от челове́к наве́товатися си́ми крепча́йше быва́ет, си́ми сия́ет, и́миже спокрыва́ется. А́ще бо не сия́ была́ бы́ша, не бы у́бо зазре́лося от мно́гих чу́до. Ны́не же я́ко тща́шеся обнажи́ти и́стинну, си́це вся де́йствуют.

И не бы и́нако сотвори́ли, а́ще у́бо о Христе́ вся твори́ли бы. И́бо нача́ша о́бразом оклевета́ти Его́, глаго́люще: «Ка́ко отве́рзет твоя́ очеса́? Еда́ волхвова́нием не́коим?». И́бо и́нде ничто́же име́юще зазре́ти о́бразу исцеле́ния, напа́ствовати начина́ют глаго́люще: «Не изгоня́ет бесо́в, ра́зве о Веелзеву́ле». И зде па́ки ничто́же име́юще рещи́, на вре́мя прибега́ют глаго́люще: «Я́ко разреша́ет су́бботу», и па́ки: «Я́ко гре́шник есть». И у́бо убива́ющым и гото́вым су́щим зазре́ти от Него́ де́йствуемым, со вся́ким вопроси́ опасе́нием глаго́ля: «Кто от вас обличи́т Мене́ о гресе́?». И никто́же провеща́ и ниже́ рече́ «я́ко ху́лиши, безгре́шна глаго́ля Себе́», и́бо а́ще име́ли бы рещи́, не бы умолча́ли.

И́же бо за е́же слы́шати я́ко пре́жде Авраа́ма есть, ка́мением поби́вше Его́ и ре́кше я́ко несть от Бо́га, и себе́ саме́х от Бо́га велича́ющеся у́бо бы́ти мужеуби́йц су́щых: такова́я же творя́щаго, поне́же у́бо исцели́, не бы́ти от Бо́га за е́же не храни́ти суббо́ты глаго́люще, - а́ще сень у́бо име́ли бы согреше́ния, не бы у́бо претекли́.

А́ще же сего́ ра́ди гре́шна нарица́ют за е́же суббо́ту ви́дяшеся разреша́ти, и сие́ су́етно яви́лося бы согреше́ние с си́ми учине́нных, студе́ность мно́гу и малоду́шие зазре́вшых саме́х. Отвсю́ду у́бо запя́ти бы́вше, на и́но прихо́дят про́чее безсту́днейше и люте́йше. Ко́е ли у́бо сие́? «Не ве́роваша, рече́, я́ко бе слеп и прозре́».

Ка́ко у́бо порица́ша, я́ко суббо́ту не храни́т? Или́ я́вствено зане́ я́ко ве́ровавше? Ка́ко же [не] вня́сте, мно́гим лю́дем, сосе́дом ве́дящим его́? Но е́же рех всю́ду ложь сама́ о себе́ па́дает, и́миже напа́ствовати и́стинне ви́дится, и́стинну же светле́йшу явля́ет. Е́же у́бо и ны́не бысть. Да́же бо не кто возглаго́лет, я́ко ничто́же изве́стно ре́ша сосе́ди и зря́щии, но приуподобля́ху, приво́дят на среду́ роди́телей, и́миже творя́ху не хотя́ще бы́вшее, и́стинно показу́юще и́бо си́и наипа́че всех ча́до све́дяху свое́.

Поне́же бо его́ ужаси́ти не возмого́ша, но зря́ху со вся́ким дерзнове́нием Благода́теля пропове́дающа, от роди́телей ча́яху сокруши́ти чу́до. И зри вопроше́ния зло́бу. Что бо рече́? «Поста́вивше на среду́», я́ко бы в боя́знь вложи́ти, со мно́гою зе́льностию и я́ростию прино́сят вопроше́ние: «Сей ли есть сын ваш?». И не ре́ша «и́же не́когда слеп», но ка́ко? - «Его́же вы глаго́лете я́ко слеп роди́ся», а́ки бы злоде́йствующим им и Христо́ва укрепля́ющым. О́ скве́рнии и всескве́рнии! И кото́рый бы оте́ц изво́лил такова́ солга́ти на сы́на? То́чию не глаго́лют «его́же вы сотвори́сте сле́па». Но и простро́сте всю́ду сло́во: «Ка́ко у́бо зрит ны́не?». О́ безу́мия! Ва́ше есть рече́ лука́вство и сострое́ние. Двема́ бо си́ми их во отверже́ние привести́ начина́ют, тем е́же рещи́ «е́же вы глаго́лете» и тем е́же рещи́ «ка́ко у́бо зрит ны́не?».

Трие́м у́бо вопроше́нием бы́вшым: а́ще сын их бе, а́ще слеп бе и ка́ко прозре́ - два испове́дуют, то́кмо тре́тияго же не прилага́ют. И сие́же о и́стинне бысть, я́ко бы ни еди́ному же ино́му, но и́сцелевшему и достове́рну су́щу сия́ испове́дати. Ка́ко бо потакну́ли бы роди́тели, и́же и и́хже ве́дяху не́кая умолча́вше стра́ха ра́ди иуде́йска? Что бо ре́ша? «Я́ко сей есть сын наш. Мы ве́мы и я́ко слеп роди́ся, ка́ко же ны́не ви́дит или́ кто отве́рзе ему́ очеса́, мы не ве́мы. Сам во́зраст име́ет достове́рна…». Его́ сотво́рше си́це отреко́шася: несть отроча́ рече́, ниже́ несоверше́н, но дово́лен себе́ сведе́тельствовати. «Сия́ же ре́ша стра́ха ра́ди иуде́йска».

Зри ка́ко па́ки мне́ние их евангели́ст и изволе́ние на среду́ приво́дит. Сия́ же глаго́лю глаго́ла ра́ди о́ного, его́же напреди́ глаго́лаху ре́кше, я́ко «ра́вна Себе́ твори́т Бо́гу». Я́ко а́ще и о́но ра́зума бы́ло бы иуде́йскаго, но не суда́ Христо́ва, приложи́л бы у́бо и рекл, я́ко ра́зум бе иуде́йский. Егда́ бо посла́ша их ко исцеле́нному, па́ки пригласи́ша второ́е. И я́вственне у́бо и безсту́дне не глаго́лют: «отве́рзися, я́ко Христо́с тя исцели́», о́бразом же благогове́ния сие́ состро́ити хотя́т, «Да́ждь бо рече́ сла́ву Бо́гу».

Роди́телем бо рещи́ «отве́рзитеся, я́ко сын ваш есть и я́ко сле́па роди́сте», зело́ ви́дяшеся подсмея́тельно бы́ти: ему́же па́ки рещи́ сие́, я́вствено бе безсту́дие. Те́мже сие́ у́бо не глаго́лют, и́нако же сие́ ухищря́ют. «Да́ждь сла́ву Бо́гу, глаго́люще, испове́дай я́ко сей ничто́же сотвори́. Мы ве́мы, я́ко челове́к гре́шен есть». Ка́ко у́бо Его́ не обличи́сте глаго́люще: «Кто от вас обличи́т Мя о гресе́?»? Отку́ду же ве́сте, я́ко гре́шен есть? Ре́кшим же им «да́ждь сла́ву Бо́гу», и сему́ ничто́же ре́кшу, срет Христо́с похвали́, а не порече́: ниже́ рече́ «что ра́ди не дал еси́ сла́ву Бо́гу?», но что? «Ве́руеши в Сы́на Бо́жия?», да навы́кнеши я́ко сие́ есть да́ти сла́ву Бо́гу. А́ще же не был бы равноче́стен Отцу́, сия́ сла́ва не была́ бы.

Но поне́же у́бо почита́я Сы́на, сей есть почита́яй Отца́, в ле́поту не запреща́ется слепы́й. Егда́ у́бо ча́яху роди́телей обеща́тися и отврещи́ся, ничто́же ему́ глаго́лаху. Но поне́же ни́чтоже вя́щше ви́деша им бы́вше от сего́, на сего́ прихо́дят па́ки глаго́люще, «я́ко гре́шен есть Сей». Отвеща́ он и рече́: «А́ще гре́шен есть не вем. Еди́но вем, слеп сый, ны́не ви́жу». Еда́ не убоя́ся слепы́й? Не бу́ди. И ка́ко реки́й «я́ко проро́к есть», глаго́леть: «а́ще гре́шник есть сей, не вем»? Не си́це име́я, ниже́ сим увеща́ себе́, но хотя́ от сведе́тельства ве́щи, а не от своего́ гла́са свободи́ти согреше́ний Его́ и достове́рно сотвори́ти отвеща́ние, су́щему от благодея́ния сведе́тельству усужда́ющу им. А́ще бо по мно́жайшых словесе́х ре́кшу ему́, я́ко а́ще не бы был богочте́ц, не мог бы такова́ зна́мения твори́ти, си́це вознегодова́ху я́ко рещи́: «Во гресе́х ты роди́лся еси́ весь, и ты ли учи́ши нас?». А́ще изнача́ла сие́ рекл бы, что у́бо не соде́лали бы? Что же не рекли́ бы? «А́ще гре́шник есть, не вем». А́ки бы глаго́лал: ничто́же о Нем глаго́лю ны́не, и́же изъявля́юще, о́но у́бо вем я́вствене и утверди́л бых у́бо, я́ко не бы такова́я сотвори́л, гре́шник сый.

Сего́ ра́ди и незазо́рна сотвори́л есть Его́, и сведе́тельство нелицеме́рно, я́ко не ктому́ угожда́я, но от ве́щи сведе́тельствуя. Егда́ у́бо не возмого́ша преврати́ти, ниже́ отъя́ти бы́вшее, па́ки на пе́рвое прихо́дят, о́браз исцеле́ния испыту́юще, я́коже не́цыи пси дверь утверже́нне заключе́нну, отвсю́ду истязу́юще: и овогда́ у́бо зде, овогда́ же та́мо обтека́юще. И на пре́жняя притека́ют словеса́, да па́ки гнилы́ сия́ сотворя́т, тем е́же ча́сте вопраша́ти. И глаго́лют: «Что сотвори́л есть тебе́, ка́ко отве́рзе твои́ очеса́?». Что у́бо он? Победи́в их и низложи́в, не ктому́ про́чее ти́хо бесе́дует. До́ндеже у́бо вещь истяза́ния тре́боваше и обличе́ний, пода́ше указа́ние, кро́тце веща́я. Егда́ же у́бо ят и одоле́ одоле́нием све́тлым, дерза́я находи́ти на них про́чее. И что рече́? «Рех вам еди́ною, и не слы́шасте. Что па́ки хо́щете слы́шати?». Ви́дел ли еси́ дерзнове́ние проси́теля к муже́м кни́жником и фарисе́ом? Си́це крепка́ и́стинна, си́це немощна́ ложь. О́на бо а́ще и худы́х прии́мется, све́тлых их изъявля́ет. Сия́ же, а́ще и с кре́пиыми бу́дет, немощны́х их показу́ет. А е́же глаго́лет, таково́ ест: Не вня́сте ли глаго́лемым? Не ктому́ реку́, ниже́ отвещева́ю, ча́сте вам вопраша́ющым, ту́не и не о е́же уве́дети хотя́щим слы́шати, но е́же глаго́лемым напа́ствовати. «Еда́ и вы хо́щете ученицы́ Ему́ бы́ти?». Пре́жде себе́ в ученико́в вчини́л есть лик. Е́же бо «еда́ и вы», показу́ющаго есть себе́ ученика́ су́ща. Та́же их подсмея́ и ужаси́ дово́льне: поне́же у́бо ве́дяше, я́ко зело́ их сие́ уязви́, каса́тися со премно́жеством их восхоте́.

Е́же бе души́ дерзнове́нныя и воспере́нныя, и презре́вшия их неи́стовства, и показу́ющия Его́ ве́лие досто́инство, о не́мже зело́ дерза́ше, и явля́ющия, я́ко они́ чу́дну су́щу ему́ досажда́ху. Той же не досажда́ше, но е́же я́ко доса́ду приноша́ху, сие́ я́ко честь похища́ше. «Ты учени́к еси́ о́ного, рече́. Мы же Моисе́евы есмы́ ученицы́». Но не у́бо сло́во име́ет сие́. Вы бо ниже́ Моисе́ови, ниже́ сего́. А́ще бо бы́ли бы́сте Моисе́еви, и Сего́ у́бо бы́ли бы́сте. Сего́ ра́ди вы́ше глаго́лаше им Христо́с: «А́ще ве́ровали бы́сте Моисе́ови, ве́ровали у́бо бы́сте и Мне». Поне́же в сия́ при́сно словеса́ прибега́х: «Мы ве́мы, я́ко Моисе́ю глаго́ла Бог». Кому́ ре́кшу, кому́ возвести́вшу? Прароди́телем ре́ша на́шим. Несть ли достове́рнейшь зна́меньми сие́ известу́яй, и я́ко от Бо́га прии́де, и я́ко я́же свы́ше веща́ет? И не ре́ша «мы слы́шахом, я́ко Моисе́ю глаго́ла Бог», но я́ко ве́мы. Я́же от слу́ха вы я́ко ви́девше укрепля́ете, я́же ли от зре́ния, слу́ха ме́нша бы́сти непщу́ете?

И у́бо о́на не ви́десте, но слы́шасте: сия́ же не слы́шасте, но ви́десте. Что у́бо слепы́й? «О сем бо есть чу́дно, я́ко вы не ве́сте, отку́ду есть» и такова́я зна́мения твори́т. Я́ко Челове́к не от знамени́тых у вас сый, ниже́ све́тлых, ниже́ просла́вленых, такова́я мо́жет: я́ко бы́ти отвсю́ду я́вственно я́ко Бог есть, ниже́ еди́ныя челове́ческыя тре́буя по́мощи. «Ве́мы же я́ко Бог гре́шников не послу́шает». Поне́же у́бо предвари́вше ре́ша: «Ка́ко мо́жет челове́к гре́шен такова́ зна́мения твори́ти?», про́чее и оне́х прие́млет суд, свои́х им воспомина́я глаго́л. Непщева́ние рече́ сие́ и мое́, и ва́ше о́бще, в сем у́бо пребыва́йте.

И зри ми ра́зум. Всю́ду зна́мения обно́сит, поне́же сие́ я́ти не имя́ху, и от сего́ смышля́ют. Зри́ши ли, я́ко изнача́ла глаго́лаше: «А́ще гре́шник есть, не вем». Не сомня́ся, не бу́ди!, но ве́дый, я́ко не гре́шник есть. Ны́не у́бо, егда́ вре́мя прия́т, зри ка́ко отвещева́ше: «Ве́мы же, я́ко гре́шников Бог не послу́шает. Но а́ще кто богочте́ц бу́дет и во́лю Его́ твори́т». Зде бо не то́кмо грехо́в его́ свободи́, но и зело́ угожа́юща Бо́гу показу́ет, и я́же О́ного вся де́йствующаго. Поне́же бо они́ богочести́ви глаго́лахуся, приложи́ и во́лю Его́ твори́ти.

Не довле́ет бо сие́ рече́ е́же зна́ти Бо́га, та́же взима́ет бы́вшее глаго́ля: «От ве́ка несть слы́шано, я́ко отве́рзе кто очеса́ сле́пу рожде́нну». А́ще у́бо испове́дуете, я́ко гре́шников не послу́шает, сей же чудотвори́, и чу́до таково́, яково́ ни еди́н же челове́к сотвори́: благоявле́нно, я́ко вся победи́ доброде́телию, и бо́льша Его́ есть, не́жели по челове́ку си́ла. Что у́бо они́? «Во гресе́х ты роди́лся еси́ весь, и ты ли учи́ши нас?». До́ндеже бо его́ ча́яху отврещи́ся, и достове́рна бы́ти непщева́ху: и еди́ною, и второ́е призыва́юще его́. А́ще же не непщева́сте достове́рна - что ра́ди призыва́сте и второ́е вопроша́сте? Но поне́же и́стинну провеща́, ничто́же устыде́вся, егда́ наипа́че ему́ чуди́тися подоба́ше - тогда́ его́ осужда́ют. Что есть «во гресе́х ты роди́лся еси́ весь»? Зде ему́ и слепоту́ поноша́ют, безсту́дне и неща́дне. А́ки бы глаго́лали: от пе́рваго во́зраста во гресе́х еси́ ты, изъявля́юще я́ко сего́ ра́ди бысть слеп. Е́же сло́во не имя́ше. В сем у́бо его́ утеша́я Христо́с глаго́лаше: «На суд Аз приидо́х в мир, да неви́дящии ви́дят и ви́дящии сле́пи бу́дут». «Во гресе́х ты роди́лся весь, и ты ли учи́ши нас?». Что бо рече́ челове́к? Не бо свои́м ра́зум изложи́? Не о́бщий ли суд истяза́ глаго́ля: «Ве́мы, я́ко гре́шных Бог не послу́шает»? Не от вас ли глаго́ланная не среду́ приведе́? «И изгна́ша его́ вон». Ви́дел ли еси́ пропове́дника и́стинны, ка́ко нищете́ любому́дрию не бысть возбране́ние? Зри́ши ли, ели́ка слы́ша от нача́л, и ели́ка пострада́ и словесы́, и де́лы, ка́ко сведе́тельствова?

Нравоуче́ние пятьдеся́ть осмо́е: Я́ко подоба́ет Писа́нием приле́жно внима́ти ко е́же облича́ти сопроти́вных, и о е́же оша́ятися позори́щь:

Сия́ же восписа́шася, да и мы подража́ем. А́ще бо проси́тель, слепы́й, и́же ниже́ ви́дев Его́, толи́ко а́бие дерзнове́ние показа́ пре́жде Христо́ва утеше́ния, ко всеце́лу наро́ду став уби́йствующу и бесну́ющуся, и от о́ного гла́са хотя́щу осуди́ти Христа́, и не уступи́, ниже́ отъи́де, но со дерзнове́нием вся́ким их заусти́л есть, и избра́ изгна́тися вон па́че, не́жели преда́ти и́стинну. Коль па́че нам, на толи́ко вре́мя в ве́ре жи́вшым, безчи́сленная чудеса́ ве́рою ви́девшим, бо́льшими благоде́тельствованным о́ного, и вну́треними очесы́ прозре́вшым, и неизрече́нна ви́девшым та́инства, и в толи́ку зва́нным честь - вся́ко дерзнове́ние о Не́м показова́ти подоба́ет к начина́ющым порица́ти и глаго́лющым что на христиа́н, и зауща́ти и не проща́ти про́сте. Возмо́жем же сие́ твори́ти, а́ще и дерзнове́ние име́ем, и Писа́нием да внима́ем, и не чрезде́льне сие́ да слы́шим. А́ще бо кто опа́сно зде вхо́дит, а́ще и в дому́ не прочита́ет, внима́ет же зде глаго́лемым: довле́ет и ле́то еди́но во иску́стве его́ устро́ити мно́гом.

Не бо ны́не у́бо сия́, за́втра же и́на прочита́ем Писа́ния, но при́сно та́яже и вы́ну. Но оба́че си́це окая́нне мно́зи пребыва́ют, я́ко по толиком прочитании ниже имене ведети книг, и не стыдятся, ниже ужаса́ются си́це безде́льне в послу́шалище боже́ственное входя́ще. Но а́ще у́бо гу́сельник, или́ плясе́ц, или́ ин кто от су́щых на игра́лищи призове́т град, со тща́нием вси теку́т, и благода́ть ему́ зва́ния воздаю́т, и дни все це́ла пол ча́сти изнуря́ют, о́ному то́кмо внима́юще. Бо́гу же, проро́ки и апо́столы нам бесе́дующу, зия́ем, спим, омрача́емся. И мно́го стуже́ние бы́ти ви́дится, и то́ржище достиза́ем. И в зиме́ па́ки, дождь возбране́ние и грязь, и до́ма седи́м.

И на ко́нских у́бо риста́ниих, ни покро́ву належа́щу и́же от дождя́ покрыва́ющему, мно́жайшии же мно́гим дожде́м низноси́мым и ве́тру во́ду возре́ния ве́ющу, - стоя́т неи́стовящеся и студе́ни, и дождя́, и гря́зи, и долготы́ пути́ пренебрегу́ще, и ничто́же их ниже́ до́ма держи́т, ниже́ та́мо возбраня́ет ходи́ти.

Зде же и кро́вом належа́щым, и теплоте́ су́щи чу́дне, вспять хо́дят и не стека́ются, и наипа́че о приобре́тении своея́ души́. Сия́ ли отра́дна, рцы ми? Сего́ ра́ди, во оне́х всех су́ще иску́снейши, в ну́жных же дете́й есмы́ неуче́ннейши. И а́ще кто у́бо колесни́чника тебе́ и досади́теля нарече́т, досади́тися глаго́леши, и вся твори́ши, я́кобы́ тебе́ поно́с отры́ти. А́щеже навиде́ние тебе́ привлача́ет ве́щи, не отска́чеши, и его́же худо́жества и́мени бега́еши, сие́ го́ниши спроста́ все. А иде́же и и́мя и вещь име́ти до́лжен еси, и бы́ти нарица́тися христиани́н, ниже́ что есть вещь ве́даеши. Что сего́ безу́мия бу́дет у́бо го́рше?

Сия́ хоте́х ча́сте глаго́лати к вам. Убоя́хжеся, да не всу́е вражду́ю и приобре́тения кроме́. Зрю бо неи́стовствующых, не ю́ных то́кмо, но и ста́рых, о ни́хже наипа́че стыжу́ся. Егда́ уви́жу му́жа седино́ю че́стна, посрамля́юща седину́ и отроча́ привлача́юща. Что бо сме́ха сего́ го́рши? Что де́ла сего́ студне́йше? Сын от отца́ науча́ется безчи́нствовати. Ухапля́ют ли глаго́лы? Сие́ и аз хощу́ терпе́ти вам, я́же глаго́лы боле́зни, да и́же ве́щьми студа́ свободи́теся. И́бо суть не́цыи, и́же мно́го студне́йше сих су́ще, и́же ниже́ срамля́ются о глаго́лемых, но долго́ воздвиза́ют о ве́щи сло́во. А́ще у́бо и вопроси́ши, кто есть Амо́с, или́ Авди́я кто есть, или́ ко́е проро́к число́, или́ апо́стол, - ниже́ зевну́ти мо́гут. О коне́х же и колесни́чницех, премудреце́в и ри́торов крепча́йще отвеща́ние слага́ют. И по сих всех глаго́лют: И кий вред? И ка́я тщета́? Сего́ бо ра́ди воздыха́ю, я́ко ниже́ тщету́ ве́сте вещь, ниже́ чу́вство прие́млете злых.

Даде́ тебе́ жития́ уро́к Бог, во е́же угожда́ти Ему́. Ты же всу́е изнуря́я его́ и ту́не, и ни во еди́ноже потре́бно истязу́еши, ли еще́ ка́я тщета́? А́ще бо и сребро́ ма́ло изнури́ши, про́сте тщету́ вещь нарица́еши. Дни же твоя́ изнуря́я все це́лы в сатани́нскы по́чести, ничто́же непщу́еши твори́ти безме́стно. Подоба́ше и мольбы́ и моли́твы изнуря́ти тебе́ жизнь всю, ты же воскли́чи, и молвы́, и сту́дныя глаго́лы, и рать, и услажде́ние безвре́менное, и дела́ от вохвова́ния быва́ема: житие́ свое́ изнуря́еши ту́не и о зле твое́м, и по сих ли всех вопраша́еши: ка́я тщета́? Не ве́дый, я́ко чрез все па́че подоба́ет вре́мя [соблюда́ти]? Зла́то бо а́ще погуби́ши, возмо́жеши па́ки стяжа́ти. Вре́мя же, а́ще погуби́ши, неудо́бне то па́ки прии́меши. Сло́во бо нам соблюда́ется в настоя́щее житие́, а́ще у́бо в потре́бное им не де́йствуем . Рцы бо мне, а́ще не́коему от сыно́в твои́х повеле́л бы еси́ худо́жеству учи́тися, та́же он в дому́ вы́ну пребы́л бы или́ и́нде не́где жил бы: не бы́ ли у́бо его́ отре́кся учи́тель? Не бы́ ли бы рекл к тебе́: списа́ние ко мне сотвори́л еси́, и вре́мя уста́вил еси́. А́ще не хо́щет у́бо вре́мя сие́ у нас, но и́нде изнуря́ти о́трок, ка́ко тебе́ предста́вим ученика́? Сия́ и нам ре́щи ну́жда. Рече́т же и Бог нам: Вре́мя вам дах рече́ ко е́же учи́тися худо́жеству сему́ благогове́ния: что ра́ди ту́не и всу́е вре́мя изнури́сте сие́? Что же ко учи́телю ча́сте не ходи́сте, ниже́ внима́сте глаго́лемым? Я́ко бо хи́трость есть благогове́ние, услы́ши что рече́ проро́к: «Прииди́те ча́да, послу́шайте мене́, стра́ху Госпо́дню научу́ вас». И па́ки: «Блаже́н челове́к, его́же а́ще нака́жеши Го́споди. И от зако́на твоего́ научи́ши и́». А́ще у́бо сие́ изнури́ши ту́не, ко́е прии́меши отвеща́ние? И что ра́ди рече́ «ма́ло нам сокро́виществова вре́мя»? О́ нечу́вствия, о́ неблагодаре́ния! О не́мже наипа́че благодари́ти подоба́ше, я́ко тебе́ труды́ пресече́, и по́ты отсече́, и упокое́ние до́лго сотвори́ и безсме́ртно: о сем ли порица́еши и стужа́еши си? Но у́бо не вем, ка́ко зде сло́во изведо́хом и до́лго соде́лахом? Те́мже е́ ну́жно спря́тати, Па́ки и́бо и сие́ на́шего злостра́стия, я́ко зде у́бо егда́ до́лго бу́дет сло́во, и вси уныва́ем, та́може от среды́ дни начина́юще, от свещь и свети́льников отхо́дят. Но да не при́сно порица́ем, мо́лим вас про́чее и ми́ли ся де́ем: да́йте сию́ благода́ть и нам, и себе́, и всех свобо́дившеся ины́х, сим себе́ да пригвозди́м.

Приобрета́ем бо и мы от вас ра́дость и весе́лие, и е́же услажда́тися от вас, и е́же о сих прия́ти воздарова́ние. Мзду же всю вы обои́мете, я́ко неи́стовствене си́це пригвожде́ни пляси́лищу, пре́жде сего́ стра́ха ра́ди Бо́жия и на́шего моле́ния, отверго́сте себе́ неду́га о́ного, и ю́зы разруши́сте, и к Бо́гу притеко́сте. Не та́може то́кмо при́мете мзду, но и зде обои́мете сла́дость. Таково́ бо есть доброде́тель: с та́мошними венцы́, и зде сла́дко нам устрая́ет житие́. Да повине́мся у́бо рече́нным, да и зде́шних и та́мошних получи́м благи́х благода́тию и человеколю́бием Го́спода на́шего Иису́с Христа́, И́мже и с Ни́мже Отцу́ сла́ва со Святы́м Ду́хом, ны́не и при́сно и во ве́ки веко́в. Ами́нь.

Стихи́:

Све́та Пода́тель, от Све́та сы́й Све́т,

От рожде́ния вооча́еши слепа́го Сло́ве.

В то́йже де́нь, в неде́лю шесту́ю по Па́сце, и́же от рожде́ния слепа́го, пра́зднуем Го́спода Бо́га и Спа́са на́шего Иису́са Христа́ е́же у́бо и то́ от воды́ соде́яся, я́коже и е́же о самаряны́ни, и о разсла́бленнем. Бы́сть же си́це: Христу́ бесе́дующу иуде́ом, и Себе́ ра́вна показу́юща Отцу́, и пре́жде Авраа́ма бы́ти: Аз е́смь, глаго́лющу, они́ ка́мение на Него́ ме́щут. О́н же отходя́ отту́ду, обрета́ет слепа́го претыка́ющася, бя́ше же та́ко роди́вся, о́браз то́кмо еди́н и долины́ име́я о́чию. Обре́т у́бо его́ Спа́с си́це иму́ща, вопроша́емь быва́ет от учени́к слы́шавших во е́же о разсла́бленном: се́ здра́в бы́л еси́, ктому́ не согреша́й. И, я́ко гре́х роди́тельский на ча́дех: Учи́телю, кто́ согреши́, се́й ли, или́ роди́тели его́, да сле́п роди́ся? Ина́ко же, и мне́ние не́кое епику́рское содержа́ше душа́м предбыва́ти, и согреши́вшым невеще́ственно своди́тися в телеса́. Я́же вся́ оте́мля Христо́с, рече́: не си́х ра́ди, но да явя́тся дела́ Бо́га, си́речь Мене́. Ни бо́ о Отце́ сло́во: а е́же да́, изрече́ния е́сть, а не вины́. И се́ ре́к Христо́с, плю́нув на зе́млю, бре́ние сотвори́, и пома́за ему́ о́чию места́, и к Силоа́мскому исто́чнику ити́, и умы́тися повелева́ет, да пока́жет, я́ко То́й е́сть в нача́ле пе́рсть прие́мый от земли́, и созда́вый челове́ка. И поне́же все́м о́ко госпо́дственнейшее в телеси́, сие́ создава́ет не су́щее, показу́я, я́ко и душе́вной си́ле движе́ние То́й е́сть подава́яй: не пома́за же водо́ю, но плюнове́нием. И да ве́домо бу́дет, я́ко благода́ть вся́кая от плюнове́ния у́ст бя́ше, и я́ко к Силоа́му посла́ти того́ хотя́ше. Умы́тися же тому́ повелева́ет, да не кто́ та́мошнею земле́ю и бре́нием да́ст ꙾ (возмни́т) цельбу́. Посыла́ет его́ к Силоа́му, да мно́ги и́мать исцеле́ния послу́хи, мно́ги бо сре́те иды́й пома́заны бре́нием име́я о́чи. Глаго́лют же не́цыи, я́ко умы́выйся не отложи́, е́же бе́ от плюнове́ния бре́ние, но то́е бре́ние приложе́нием мо́краго ко о́чию зда́ния преобразова́шеся. Силоа́м же, по́слан, толку́ется: купе́ль бо та́я вне́ гра́да Иерусали́ма бя́ше. При Иезеки́и же ра́тником обсе́дшым гра́д, и Силоа́м объе́мшым, воспяти́ся вола́ отону́ду: пре́дния же кла́дязи и рвы́ ископа́ша вну́трь, на приня́тие воды́. И а́ще кто́ повеле́нием проро́ка Иса́ии та́мо посыла́емь бя́ше, вода́ па́ки исхожда́ше и почерпа́шеся: а́ще ли же кто́ от ра́тник хотя́ше почерпсти́, удержава́хуся воды́ исто́чницы, и из о́наго та́ко быва́ше. Да у́бо пока́жет и Христо́с, я́ко от Бо́га и Са́м, сего́ ра́ди слепа́го посыла́ет та́мо, и све́т а́бие после́дует. Не́цыи у́бо возмне́ша, по́слан, Силоа́м толкова́тися, и настоя́щаго ра́ди слепца́ по́сланна от Христа́. Вооча́ется у́бо слепы́й, умы́вся, неизглаго́ланною не́коею си́лою, ниже́ самому́ пострада́вшему та́инство уве́девшу. Сосе́ди же ему́ и и́нако зна́емии, ви́девше его́ до́бре прозре́вша, сумня́щеся бя́ху. О́н же у́бо испове́даше себе́ пре́жде бы́ти сле́па, и о вино́вном прозре́нию вопроша́емь, Цели́теля стра́сти Христа́ пропове́даше. фарисе́ем у́бо пресла́вное слы́шащым зна́мение, па́ки Спа́с ху́лимь быва́ет, я́ко суббо́ту не блюды́й. В суббо́ту бо, я́коже обы́че, и е́же на слепо́м соде́яся. Ра́спря у́бо быва́ет посреди́ си́х, о́вем у́бо глаго́лющым от Бо́га бы́ти Иису́су, быва́емых ра́ди чуде́с: о́вем же не от Бо́га, я́ко суббо́ты не храни́т. Благо́е у́бо мне́ние о Не́м иму́щии слепа́го вопроша́ют: ты́ что́ глаго́леши о Не́м? Он же проро́ка Его́ пропове́дает, е́же у́бо о́нех бя́ше честне́йше. Они́ же па́ки не ве́руют, я́ко сле́пу су́щу Христо́с цельбу́ дарова́: у́бо и роди́телей его́ призыва́ют, сосе́дом не ве́рующе, я́ко и па́че то́ покры́ти хотя́ще. Но и вя́щше творя́т явле́нно, роди́телем вся́ испове́дающым, а́ще и от со́нмища отлуче́на бы́ти боя́щяся, на о́наго во́зраст дея́ния возво́дят. Но и па́ки к слепо́му глаго́лют: да́ждь сла́ву Бо́гу, я́ко от Него́ исцеле́ние, а не от Христа́, гре́шен бо е́сть, я́ко разоря́ет суббо́ту. Се́й же де́лы показа́ти хотя́, я́ко Бо́г е́сть: не ве́м, глаго́лет, еди́но ве́м, я́ко сле́п сы́й, Те́м ви́жду. Па́ки у́бо ему́ реко́ша: ка́ко отве́рзе твои́ о́чи? Он же стужа́емь не пото́нку глаго́лет, но составля́ет, я́ко а́ще не бы́ от Бо́га бы́л, не бы́ сицево́е зна́мение сотвори́л. И пе́рвее у́бо досажда́емь быва́ет от ни́х, я́ко испове́давый, и учени́к бы́ти О́наго, и зане́ рече́: никто́же отве́рзл е́сть о́чи слепа́го рожде́ннаго. Слепы́я бо и друзи́и просвети́ша, рожде́ну же сле́пу ниже́ еди́н: поруга́вшеся у́бо ему́ дале́че от со́нмища изгна́ша. По си́х же обрета́ет его́ Иису́с, и глаго́лет ему́: ты́ ве́руеши ли в Сы́на Бо́жия? Он же уве́дев кто́ е́сть, И́же с ни́м глаго́ляй, и ви́ден быва́яй те́м, не бо́ ве́дяше Его́ пре́жде я́ко слепы́й сы́й, поклони́ся Ему́, и учени́к Его́ бы́сть, благодея́ние пропове́дуяй. Рекло́ся бы сие́ и возводи́тельно: Слепы́й у́бо и су́щии от язы́к лю́дие, и́хже преходя́ вме́сто е́же на земли́ пожи́тия, а не на небеси́, обре́те Христо́с, или́ и я́ко евре́йских ра́ди прии́де люде́й. Преходя́ же прии́де и во язы́ки, и плю́нув на зе́млю, и бре́ние сотвори́в пома́за: вме́сто е́же научи́ я́ пре́жде, зане́ я́ко ка́пля сни́де на зе́млю, и воплоти́ся от Святы́я Де́вы. Та́же и Боже́ственное Креще́ние предаде́, е́же е́сть Силоа́м. Посе́м от язы́к христиа́нстии лю́дие за Христа́ на вся́ дерза́ют, и гони́ми быва́ют, и свиде́тельствуют, и по́слежде от Него́ пропове́дуются и прославля́ются. Неисче́тною ми́лостию Твое́ю, Светода́вче Христе́ Бо́же на́ш, поми́луй и спаси́ на́с. Ами́нь.

Исходя́ще в притво́р, пое́м стихи́ру ева́нгельскую: Сла́ва и ны́не, глас 8:

Мари́ины сле́зы / не всу́е пролива́ются те́пле: / се́ бо сподо́бися и уча́щих а́нгелов, / и виде́ния Самаго́ Иису́са: / но еще́ земна́я му́дрствует, я́ко жена́ немощна́я. / Те́мже и отсыла́ется не прикаса́тися Христу́: / но оба́че пропове́дница посыла́ется Твои́м ученико́м: / и́м же благовествова́ние нося́щи, / е́же ко Оте́ческому жре́бию восхо́д возвеща́ет. // с не́ю же сподо́би и на́с явле́ния Твоего́ Влады́ко Го́споди.

И а́бие сло́во: Cло́во я́ко подоба́ет благоуха́ти са́ми себе́ доброде́тельми:

Бра́тие и отцы́, Христо́вым воскресе́нием и тварь, я́ко не́кую ме́ртвость, зи́мнюю се́тость, отве́ргше, - буя́ет, и па́ки возраща́ет. И́бо возри́м зе́млю, си́рово нося́щу, и сады́ растя́ще, и ско́ты игра́юще, мо́ре утиша́емо, вся в бо́льша претваря́ема. Но его́же ра́ди сим рече́на суть, се глаго́лано есть: Я́ко а́ще безду́шна и безслове́сна, си́це просветлева́ются [и] искуша́ются пресве́тлым Воскресе́нием, коли́ко па́че подоба́ет нам, сло́вом и о́бразом Бо́жиим почте́ным, просвеща́ти себе́ и обовоня́ти ду́хом. Благоуха́ние бо Христо́во, [и́же] вои́стину доброде́тельми претворя́еми, и свиде́тельствует апо́стол глаго́ля, «я́ко благоуха́ние есмы́ Бо́гу, во спасе́ных и поги́бших: о́вем у́бо воня́ сме́ртная в смерть, а [о́вем же] воня́ жи́зни в живо́т». И к тому́ о́но есть глаго́лати: я́ко и Ада́м пре́жде преступле́ния, благоуха́ние бе Бо́гу, безсме́ртием же и нетле́нием просвеща́емь и небе́сными воня́ми обходя́ся. Тем я́ко не́кий ово́щник благоуха́нен, многоцве́тен и [досто́йно] в раи́ водворя́шеся, дыха́я доброде́тельми. И у́бо Исаа́к патриа́рх о сы́не свое́м Иа́кове воне́ю свое́ю глаго́ла: Се воня́ сы́на моего́, я́ко воня́ се́льная испо́лнь его́же благослови́ Бог, - указа́ я́ко вони́ духо́вней причаща́тися.

Та́коже у́бо бра́тие и мы укади́мся благоуха́нием духо́вным, е́же ко́ждо себе́ воню́ да де́лает приложе́нием доброде́тели. Я́ко вои́стину воняпрода́вец уго́ден, сия́ воня́ благослове́на, сия́ воня́ сладка́ Бо́гу, сия́ воня́ приводя́ а́нгелы, отвраща́ет же де́моны. Се́ю воне́ю теча́ху восле́д Иису́са жены́, я́коже есть в пе́снех пева́емо. Се́ю воне́ю и мы па́ки теце́м, пра́зднующе преддве́рия свято́й средопентико́стии че́стно . Поне́же пи́шется: «Преполо́вльшуся празднику, взы́де Иису́с во це́рковь и уча́ше. И дивля́хуся иуде́и глаго́люще, ка́ко Сей весть кни́ги не учи́вся». Но сия́ у́бо пре́жде му́ки, ны́не же по воскресе́нии явля́емь и соводворя́емь со святы́ми апо́столы, научева́я же сих та́йнейшими и недоумева́ющимся. О неизрече́нному схожде́нию! Я́ко по воскресе́нии и яде́нию прикосну́ся, а не тре́бующи свято́й пло́ти Его́, но оба́че да Воскресе́ние уве́рит, я́де́ и пит и ося́зан бысть в ре́бра, мня́щим Его́ дух бы́ти. «Се же рече́ ви́дите ру́це Мои́ и но́зе Мои́, я́ко Сам Аз есмь. Осяжи́те Мя и ви́дите, я́ко дух пло́ти и ко́сти не и́мать, я́коже Мя ви́дите иму́ща». Что рече́ши к сим, о́ крестора́тне ? А́ще плоть и ко́сти и́мать, не и́мать ли образи́тися? А́ще у́бо второ́е не и́мать, и пе́рваго не и́мал есть. Но Сам Себе́ свиде́тельствует , но обрати́тися к молча́нию , ка́я же бо друг дру́га обличе́на суть бы́ти. Но ико́ннии ра́тницы ра́вно с манихе́и мудру́юще, ра́вну отдаю́т прю, поги́бель ве́чную, я́коже пи́шется.

Мы же бра́тие правосла́вною му́дростию Го́спода на́шего Иису́са Христа́ вообража́ти и покланя́тися ве́рующе, досто́йно ве́ре и житие́ яви́м чисто́тно, нелицеме́рно, непови́нно, да воспе́х не растае́мся, но вку́пе благоволя́ще улучи́м Ца́рство небе́сное о Христе́ Иису́се Го́споде на́шем, Ему́же сла́ва и держа́ва честь и поклоне́ние со Безнача́льным Его́ Отце́м, и со Пресвяты́м и Благи́м и Животворя́щим Ду́хом, ны́не и при́сно и во ве́ки веко́в. Ами́нь.

По чте́нии же, а́бие тропа́рь свята́го Фео́дора, глас 8:

Правосла́вия наста́вниче, благоче́стия учи́телю и чистоты́, / вселе́нныя свети́льниче, мона́шествующих Богодухнове́нное удобре́ние, / Фео́доре прему́дре, уче́ньми твои́ми вся просвети́л еси́, цевни́це духо́вная, // моли́ Христа́ Бо́га спасти́ся душа́м на́шим.

И посе́м: Христо́с воскре́се: три́жды, и пе́рвый час по обы́чаю.