Трие́ пресла́вная Госпо́дня чудеса́ из пе́рвых време́н, пе́рвое, на́ землю сни́тие, второ́е, из ме́ртвых Воскресе́ние, тре́тие, на небеса́ Вознесе́ние. Илия́ бо а́ще и на небеса́ взят бысть, но ме́сто измени́ от ме́ста: Христо́с же взы́де отню́ду же и сни́де. Проро́к бо Дави́д о Вознесе́нии Госпо́дни рече́, взы́де Бог в воскликнове́нии, Госпо́дь во гла́се тру́бне. И па́ки, взы́де на Херуви́м и лете́, возлете́ на крилу́ ве́треню. О сем и Авваку́м рече́, вознесе́ся Со́лнце, и Луна́ ста в чину́ свое́м. Христа́ Со́лнца нарече́, а Луно́ю Це́рковь именова́, прему́дрый же усмотри́в таце́х дел высоту́, и рече́, се Христо́с прии́де скача́ по гора́м, и прескача́ хо́лми. Скака́ние имену́ет с небесе́ во чре́во Де́выя сни́тие, от чре́ва же во я́сли, от я́слей же на Крест, со Креста́ же во гроб, от гро́ба же я́ко Бог воста́в вознесе́ся на не́бо. Вся нас ра́ди Христо́с сотвори́. Ено́х бо и Илия́ взя́та бы́ста на высоту́, Госпо́дне Вознесе́ние прообразу́юще. Днесь Госпо́дь на небеса́ взы́де. Блаже́нный И́ов, птенце́м Го́спода нарече́, я́ко те́ло пе́рстное от земли́ вознесе́. Я́ко возноше́ния та́йны не разуме́юще иуде́и ви́девше. Се Го́спода Бо́га и Спа́са на́шего Вознесе́ние на небеса́, всех чудне́е пра́здник. Днесь бо небе́сный круг ликовству́я, о́блаком подъе́млет Го́спода, на неизрече́нный Оте́чь Престо́л с пло́тию восходя́ща: и вся ли́ки а́нгельския на весе́лие собра́в, единогла́сно Трисвяту́ю песнь повеле́ воспева́ти глаго́ля: Сла́ва в вы́шних Бо́гу, и на земли́ мир, в челове́цех благоволе́ние. Днесь неви́димых бесо́в вся лесть низложи́ся. Днесь лику́я и веселя́ся проро́к Дави́д вопие́т глаго́ля: вознеси́ся на небеса́ Бо́же, и по всей земли́ сла́ва Твоя́. Днесь апо́стольский лик без сумне́ния со а́нгелы бесе́дует, поне́же Христо́с челове́чу плоть прии́м, и обожи́в ю́ Воскресе́нием Свои́м, и на не́бо одесну́ю Отца́ посади́, я́коже Лука́ Евангели́ст глаго́лет: пои́м Иису́с ученики́ своя́, изведе́ я́ вон до Вифа́нии, и рече́ им: се Аз посыла́ю обетова́ние Отца́ Моего́ на вы, вы же седи́те во гра́де Иерусали́ме, до́ндеже облече́теся си́лою свы́ше. И воздви́г ру́це и благослови́ я́ и отступи́ от них. И се о́блак све́тел подъя́т Его́ пред очи́ма их. Не то́кмо же ученицы́ еди́ни зря́ще бя́ху, но и Ро́ждьшая Его́, и ини́и наро́ди мно́зи с боя́знию зря́ху Христа́ с пло́тию возноси́ма. Чу́до же сие́ всех чуде́с преди́внее и гро́знее, егда́ от земли́ взя́тся я́ко челове́к бе ви́дим, а егда́ на высоту́ к небеси́ восхожда́ше, бо́лее ви́дети бя́ше. Егда́ же до́йде до небесе́, и вся займе́ небеса́ сла́вою Божества́, не исповеди́мо бо бе вели́чествие Его́, я́ко и небесе́ не ви́дети в сия́нии луч Сла́вы Его́. А́нгелом же послу́шествующым о виде́нии Его́, и второ́е пове́дающым прихо́д Его́. Два а́нгела ста́ста во оде́жди све́тле, и ре́ста ко апо́столом, что дивите́ся му́жие галиле́йстии, и что зрите́ на не́бо, се Иису́с вознесы́йся от вас на не́бо, па́ки прии́дет хотя́й суди́ти живы́м и ме́ртвым, и возда́ти кому́ждо по дело́м его́, Тому́ бо Оте́ц преда́ст суд весь. О коли́ко благода́тный Влады́ка Христо́с спасе́ние на́ше соде́я; с небесе́ бо прии́де, и па́ки вознесе́ся на небеса́ во сла́ве. Не а́ки на корабле́ спя, ни я́ко у кла́дязя утруди́вся жа́жда, ни я́ко на жребя́ти о́сли седя́, но сла́вно на кру́зе о́блачне вознесе́ся. Взы́де бо на не́бо, и се́де одесну́ю Бога́. Не я́ко на то́ржищи пред судия́ми стоя́, но Сам судя́й всей Вселе́нней, и апо́столом суди́ти власть даде́, глаго́ля им: егда́ ся́дет Сын Челове́ческий на Престо́ле Сла́вы Своея́, ся́дете и вы на двоюна́десяте престо́лех, судя́ще обемана́десяте коле́нома изра́илевома. И я́ко же подъя́т о́блак Христа́, та́ко и мы по рече́нию Па́вла апо́стола на о́блацех восхище́ни бу́дем. И я́коже Госпо́дь взы́де в восклица́нии и во гла́се тру́бне, та́ко и мы бра́тие страстны́й о́блак отъе́мше, оста́немся зло́бы и непра́вды, да всегда́ со Христо́м бу́дем. Днесь ве́рнии Вознесе́ние Госпо́дне духо́вне и боже́ственне почте́м, я́коже ле́по христия́ном, а не я́ко неве́рнии ядьми́ и пия́ньством, и игра́ми пусто́шными, и пе́сньми бесо́вскими: но пра́зднуем ве́рнии к Це́ркви теку́ще без зло́бы, ни́щыя же и сироты́ ми́лующе, бе́дным помога́юще, а́ще бо земны́х князе́й слуга́м честь воздае́те, то кольми́ па́че служи́телем небе́снаго Царя́ досто́ит честь и дар́ы дая́ти, ти́и бо вожди́ суть к Бо́гу. Мир и любо́вь ме́жду собо́ю име́йте, се бо глава́ доброде́тели: смире́ние же всяк грех побежда́ет. Сам бо Госпо́дь наш смири́ся нас ра́ди, и бысть челове́к пло́тию, страсть во́лею прия́т, и смерть вкуси́, но в тре́тий день воскре́се я́ко Бог, и вознесе́ся на небеса́. Смири́мся у́бо и мы ве́рнии, да вознесе́мся; Госпо́дь бо рече́, я́ко вознося́йся смири́тся, смиря́яй же ся вознесе́тся. Ми́лостыню же по си́ле да сотвори́м: я́коже бо вода́ огнь гаси́т, та́ко и ми́лостыня очища́ет грехи́. Бо́гу на́шему сла́ва, ны́не, и при́сно и во ве́ки веко́в. Ами́нь.