По шестой песни:
И поется кондак и икос (или мученичен, аще несть).Стихи́:
Я́ко изнача́ла и вы́шше пре́дано,
И́же боже́ственое и неизрече́нное
И преесте́ственое та́инство услугова́вшему,
Тебе́, провозвести́вшему воплоще́ние Ума́
Че́стию подо́бною, вся́ка плоть чтет, Сло́ве:
В два́десять шесты́й на пе́ние Гаврии́л тварь подви́же.
Сей святы́й архистрати́г Гаврии́л, еди́н есть от вели́ких князе́й небе́сных во́инств, и́же искони́ Бо́гом посыла́емь на зе́млю, и вся́ку доброде́тель творя́ челове́ческому естеству́. Егда́ же Моисе́й избежа́ от фарао́на, и учи́мь бе Гаврии́лом в пусты́не, тогда́ написа́ быте́йския кни́ги, и пе́рвыя ро́ды и ле́та. Заха́рии же служа́щу во свята́я святы́х, яви́ся ему́ Гаврии́л вели́кий арха́нгел, возвеща́я ему́ от непло́дове рождество́ Предте́чево, внима́й, глаго́ля, аз есмь благовеству́яй ти сло́во и́стинное, ра́дость бо исхода́тайствую ро́ду челове́чу. И паки сей же арха́нгел Гаврии́л, по́слан бысть от Бо́га во град Назаре́т к Деви́це Мари́и, благовеству́я Ей воплоще́ние Сы́на Бо́жия Сло́ва, И́же прии́дет и спасе́т всего́ ми́ра. Того́ ра́ди сотворя́ем ны́не собо́р вели́каго арха́нгела Гаврии́ла, искони́ творя́ща блага́я челове́ческому ро́ду, и ра́достно пра́зднуем. Да моли́твами его́ приимем вси грехо́в оставле́ние.
В то́йже день свята́го священному́ченика Ирине́я епи́скопа
В ца́рство Диоклитиа́на и Максимиа́на нечести́вую царю́, Ирине́й священному́ченик в Галиле́йских страна́х уча́ше вся ве́ровати во Христа́, и облича́ше кумирослужи́тель, и тре́бы их разсы́паше. И того́ нетерпя́ще еллини, е́мше приведо́ша и связа́вше к Про́ву иге́мону. И ре́ша: Сего́ не терпя́ще де́рзости, поне́же укоря́ет бо́ги, и пропове́дает не́коего волхва́ Иису́са, его́же распя́ша жидо́встие лю́дие, сего предае́м тебе́. Ну́дяше же его́ иге́мон пожре́ти и́долом, и казнь вели́ку показа́ ему́. Ирине́й же ничто́же отвещав́аше ему́. И повеле́ иге́мон привести́ мучи́тельныя сосу́ды. И показа́ ему́ кол набие́н гвозде́й, и коно́б иму́щь смолу, и ру́ки желез́ны: И рече́ Ирине́ю: а́ще не поклони́шися бого́м, си́ми все́ми му́ками искуше́н бу́деши. И посе́м ка́мение ве́лие на вы́ю ти навяза́ти, и во глубине́ морсте́й погрузи́ти те́ло твое́. И рече́ Ирине́й: Сих всех мук, днесь или́ у́тро коне́ц бу́дет, а ве́чной му́це никогда́же конца́ есть: о не́йже Госпо́дь Иису́с Христо́с мой рече́: А́ще кто отве́ржется Мене́ пред челове́ки, отве́ргуся его́ и Аз пред а́нгелы на небесе́х. О́ го́ре отсту́пльшым от Него́: огнь бо их не уга́снет, и червь их не у́мрет. Да не ну́ди мене́ к тому́, но твори́ е́же хощеши. И повеле́ иге́мон главу́ его́ отсещи́ мече́м. И та́ко сконча́ся за Христа́ блаже́нный Ирине́й.
В то́йже день страсть святы́х два́десяти, и шести́ му́ченик в Го́тфии му́чившихся, от ни́хже суть презви́тери два, Вафу́са и Уи́рка, со двема́ сы́нома свои́ма и дще́рема, и Арпи́ла мона́х: мирсти́и же Ави́па, Рагн, Ре́а, и Гафра́кс, и Ской, Си́ла, Си́гица, Сонири́ла, Сови́мвла, Ферм, Фи́лла: и от жен А́нна, А́лла, Моико́, Мами́ка, Уирко́, и Анимаи́да
Стихи́:
Толи́ко огне́м попале́но бысть мно́жество му́ченик,
Ели́ко до дне́шняго дне ме́сяц дний и́мать.
Сия́ бе́ста при Уиггури́фе царе́ го́тфстем, и Иулиа́не, и Гратиа́не, и Уалентиа́не же ри́мских царе́х. Пою́щым у́бо сим в це́ркви христиа́нстей, и Бо́га сла́вящым, посла́в Уиггури́ф, пожже́ це́ркви, и вся су́щыя в них сожже́, три́сте и осмь. А́ще принося́ше просфо́ру христиани́н, и́мше вопроша́ху его́: и а́ще Христа́ испове́дает, во огнь вмета́ху его́, в приноше́ния ме́сто Христо́ви тех бя́ху телеса́. И собира́ше тех мо́щи другаѓо кня́зя жена́, язы́ка го́тфскаго, христиа́на су́щи и правове́рна: Сия́ оста́вльши власть сы́ну своему́, е́мши же попы́, и от ме́ста до ме́ста преходя́щи, прии́де до земли́ Си́рския, и дщи ея́ с не́ю. Посе́м возвести́ сы́нови своему́, прише́дшу ему́, и и́де с ним, оста́вльши мо́щи святы́х у дще́ри. Дщи же прише́дши в Кизи́к, в ца́рство Уалентиа́на и Феодо́сия, и даде́ часть от мощей во гра́де на освяще́ние. А́лла же ше́дши па́ки в го́тфы со Агафо́ном, и ту ка́мением побие́на бы́ста и сконча́стася. Сама́ же последи́ Дукли́да с ми́ром у́спе.