Стихи́:

Живу́т в невеще́ственых чино́в девяти́х,

И́же глава́ми посе́чении му́жие де́вять.

Христо́вы му́ченицы боже́ственнии, Феогни́д, Руф, Антипа́тр, Неости́х, Арте́ма, Магн, Феодо́т, Фавмаси́й, Филимо́н, бя́ху от разли́чных мест и стран собра́вшеся. И в Ки́зице я́ти бы́ша, и вопроше́ни быша, христиа́ни испове́дашася. Му́жеским же нра́вом кня́зя посрами́ша, и и́дольскую пре́лесть поплева́ша, и в разли́чныя му́ки и ка́зни вложе́ни бы́ша. И не пожро́ша куми́ром, но па́че жи́ву же́ртву себе́ Го́сподеви приведо́ша. И мече́м главы́ их усе́чени бы́ша. Тем и врачество́ безо́мздное от Го́спода прия́ша. И стра́сти неисце́льныя и неду́ги исцели́ша. И сла́вна му́жа от боле́зни изба́виша, и ны́не Бо́гови мо́лятся за ны.

Седя́ в ке́лии свое́й, собери́ си ум. Помяни́ день сме́рти твоея́. Усмотри́ тогда́ телесе́ умерщве́ние. Помы́сли ну́жду, приими́ боле́знь, зазри́ и́же в ми́ре сем су́етству. Помяни́ и́же во а́де ны́не устрое́ние. Смы́сли ка́ко у́бо суть та́мо души́, в какове́ го́рце молча́нии, в какове́м го́рьком воздыха́нии, в коли́це стра́се и по́двизе, или́ в ко́ем ча́янии, непреста́нную боле́знь душе́вную, и безконе́чную сле́зу. Но и день воскресе́ния помяни́, и предстоя́ния е́же о Бо́зе. Мечта́й вы́ну на уме́, и стра́шный ужа́сный он Суд и суди́ще. Принеси́ в среду́ предлежа́щая гре́шником, студ и́же пред Бо́гом, и а́нгелы, властьми́, и нача́лы и все́ми святы́ми. И мучи́лища вся, огнь ве́чный, червь неусыпа́емый, та́ртар, тму. На́до все́ми же си́ми гро́зу несогре́ему. Скре́жет зу́бный, страши́лища и муче́ния. Принеси́ же и́же святы́м угото́ванная блага́я, дерзнове́ние с Бо́гом, а́нгелы же и арха́нгелы, и властьми́, и всего́ наро́да. Ца́рство, и я́же сего́ дарова́ния. Ра́дость и наслажде́ние, о обои́х сих па́мять принеси́ себе́. И о гре́шных у́бо суде́ воздохни́, прослези́, в плаче́вный облецы́ся о́браз, боя́ся да не и ты и сам в сих бу́деши. О предлежа́щых же пра́ведником благи́х, ра́дуйся и весели́ся и благоду́шствуй. И сих у́бо наслади́тися, о́нех же отчужи́тися. Зри, да не забу́деши сих когда́, лю́бо внутрь ке́лии еси́, лю́бо вне не́где. И от сих па́мяти да не смяте́ши свою́ мысль, я́ко да поне́ си́ми вре́дныя и скве́рныя избе́гнеши мы́сли.