Стихи́:

Я́ко а́гнец Иа́ков приведе́н и закла́н бысть,

Благочести́вая и́ объюха́яй словеса́:

Уби́, мечь уби́йцы, Иа́кова в тридеся́тый.

Сей бя́ше сын Зеведе́ов, брат же Иоа́нна Богосло́ва. По призва́нии у́бо Петро́ве и Андре́ове, зва́нием самого́ Го́спода на учени́чество, со свои́м бра́том прии́де. Я́же а́бие оста́вльша отца́ и кора́бль, и после́доваста Ему́. И толи́ко та возлюби́, я́ко о́вому пе́рси Своя́ вдаде́: о́вому же обеща́ пи́ти чашу, ю́же Сам испи́. И та толи́ко Того́ возлюби́ста, и толи́ку о Нем ре́вность показа́ста, я́ко и огнь с небесе́ восхоте́ста свести́, и погуби́ти неве́рующих. И се сотвори́ста бы, а́ще не бы Христо́с терпели́вый возбрани́л и́ма. Сею́ обою́ и верхо́внаго Петра́ ника́коже оставля́ше Госпо́дь, е́же не пове́дати им что. Сего́ блаже́ннаго Иа́кова по стра́сти и по вознесе́нии Го́спода Бо́га и Спа́са на́шего Иису́са Христа́, не терпя́ зре́ти И́род необину́ющася, спасе́ное пропове́дание возвеща́юща, ру́це нань возложи́в уби́ его́ мече́м. Втора́го му́ченика по Стефа́не отсла́ Влады́це Христу́.

Стихи́:

Похвали́в Клим земленоро́дными пе́сньми до́лу,

Взы́де, непщу́я, я́ко хва́лен небе́сными умы́.

Стихи́:

Макси́м обре́т посреде́ чре́ва ме́чное пронзе́ние,

Дре́вняго нам возвеща́я посреде́ меча́.

Бе не́кто магистриа́н и́же пуще́н бысть на посо́льство царе́во. И по пути́ иды́й, обре́те ни́ща на́га на пути́ лежа́ща, и ви́дев его́ умилосе́рдися. И рече́ о́троку, поими́ ми конь и отъиди́ ма́ло. И сни́де с коня́, и совлече́ срачи́цу свою́, и положи́в на лежа́щем мертвеце́, и отъи́де. И па́ки по вре́мени по́слан бысть от царя́ то́йже магистриа́н на ино́е посо́льство. Случи́жеся ему́ изы́ти из гра́да, спаде́ с коня́ и разби́ся, и возврати́ся в дом свой. Вра́чеве же и́же прилежа́ху ему́ приидо́ша посети́ти его́, и ви́девше его́, наману́ша друг ко дру́гу, я́ко подоба́ет но́гу его́ отсещи́. А́щели же не отсече́тся, то все те́ло его́ изгние́т, и у́мрет челове́к. И глаго́лаша ему́, зау́тра прии́дем и исцели́м тя. Больны́й же рече́ рабу́ своему́, изле́зи в след враче́в, и слы́ши что глаго́лют о мне. И глаго́лаша ему́, нога́ господи́на твоего́ осине́ла есть. А́ще не отсече́т ея́, то у́мрет. Но прии́дем зау́тра, и и́же что повели́т то и сотвори́м ему́. Шед же раб, и пове́да господи́ну своему́ глаго́ля, та́ко совеща́ша о тебе́. Он же слы́шав то, и печа́лен бысть, и от мно́гия туги́ нача́ не спа́ти. Бе же кади́ло в хра́мине его́ горя́ше. Полу́нощи же ви́де челове́ка две́рми вле́зша, и прише́дша к нему́ и глаго́лавша. Что ся пла́чеши. Он же рече́, господи́не, ка́ко ми не пла́кати, я́ко есмь разби́лся, и вра́чеве совеща́ша отсещи́ но́гу мою́. И глаго́ла ему́ яви́выйся, покажи́ ми но́гу твою́, и показа́ ему́. Он же рече́, воста́ни и походи́ ны́не. И рече́ магистриа́н, не могу́, я́ко сокруши́ламися нога́. И глаго́ла ему́, утверди́ся о мне. И воста́в по́йде с боле́знию. И рече́ ему́ явле́йся, еще́ ли хра́млеши. А́ще ли, то возлязи́ ма́ло. И я́ко бы пома́за не́коею ма́стию потира́я по но́зе его́. И глаго́ла ему́, возлязи́ и поспи́ у́же. И не́кая словеса́ о ми́лостыни рече́ ему́ и́же рече́ Госпо́дь. Блаже́ни ми́лоствии, я́ко ти́и поми́ловани бу́дут. И не ми́лостивен суд несотво́ршим ми́лости. И рече́ ему́ исцеле́вый, отхо́диши у́же от мене́. Он же рече́ ему́, что хо́щеши, поне́же исцеле́л еси́. Рече́ ему́ магистриа́н, та́ко ти Бо́га посла́вшаго тя, рцы ми кто еси́ ты. Он же рече́, возри́ на мя, и зна́еши ли лняни́цу сию́. Он же рече́, ей, моя́ есть го́споди. И рече́ явле́йся, и́же ты ви́дел еси́ на́га мя на пути́ лежа́ща ме́ртва, и возложи́ на мя сию́ лняни́цу, и сего́ ра́ди посла́л мя Бог исцели́ти тебе́. Да у́бо хвали́ Бо́га всегда́. И все рек, изле́зе из двере́й и́миже влезл бе. Исцеле́вый же Бо́га просла́вив, и бысть здрав.

Уже́ вре́мя наво́дит вы ве́чнаго живота́ на де́ло, и неразори́мыя сла́вы. Сию́ бо жизнь прие́млет смерть, и сла́ву постига́ет студ. Мно́зи же от вельмо́ж пре́же го́да в пес ме́сто во ад сведе́ни бы́ша. И судии́ от ху́ждьших осужде́ни бы́ша. Бога́тии обнища́ша, и му́дрии внеза́пу преоби́дени бы́́шя. Крепцыи изнемого́ша, здра́вии неду́жни бы́ша, и ра́дующихся объя́ печа́ль. И держа́й па́губу лю́дем, сам в ме́́сто тоя сведе́ся, зане́же ничто́ же преподо́бно в ми́ре сем сотвори́. И и́на мно́га такова́я в ми́ре сем показа́шася. Ча́да безче́ствуют оте́ц свои́х, а отцы́ гнуша́ются чад свои́х. Жены́ отме́щутся муже́й свои́х, и му́жи не храня́т со́вести жена́м. Ю́нии блудя́т на ста́рыя, и ста́рыя грозя́тся на ю́ныя. И несть ве́ры я́ти дру́гу, ни наде́ятися на бра́та. Глаго́лют бо ми́рная, а в се́рдцы свое́м помышля́ют зла́я. За́вистию жиру́ют вражду́ют лстят, несы́тьства держа́тся. И никто́же помина́ет Бо́га, и никто́же ча́ет осужде́н бы́ти. Сего́ ра́ди умно́жишася зла́я, зане́ отмета́емь Бог быва́ет. Ра́зум нам дал есть, да в нем сове́туем блага́я, мы же в нем сове́туем зла́я. Самовла́стие нам дал есть, да в нем стя́жем пра́вду, мы же де́лаем в нем беззако́ние. Бога́тьство нам по́дал есть, да от него́ дае́м убо́гим, мы же и ну́жная отъима́ем убо́гих. О́бласть поручи́л есть нам Бог, да храни́м в ней в ну́жи пребыва́ющыя, мы же в ней му́чим и не заступа́ем. Несть пути́ и́стиннаго, ни суда́ пра́ваго. Изся́кну любы́, и не́нависть умно́жися. Уничиже́на бысть доброде́тель, и возлю́блено бысть лицеме́рьство. Постыде́ смире́ние, и почте́на бысть го́рдость. Исчезе́ и́стина, и лжа покры́ зе́млю. О глубина́ бла́гости и долготерпе́ния Бо́жия, я́ко во всех злых быва́ющих ожида́ет на покая́ние. Не я́ко не моги́й мсти́ти не прие́млет гне́ва, но милосе́рдует я́ко оте́ц, да бо́льшую пода́ст мзду. Хо́щет бо на́шего покая́ния и обраще́ния, и не хо́щет сме́рти гре́шничи.

Глаго́лаху о еди́ном ста́рце, я́ко умира́я в ските́ возвести́. И обступи́ша бра́тия одр его́, и просте́рши нача́ша пла́катися. Отве́рз же о́чи свои́ возсмея́ся. И па́ки помолча́в возсмея́ся. И па́ки возсмея́ся и трети́цею. И моли́ша его́ бра́тия, глаго́люще: «Рцы нам о́тче, почто́ ся мы пла́чем, а ты смее́шися?». Он же рече́ им: «Возсмея́хся, я́ко вси боите́ся сме́рти. И втори́цею возсмея́хся, я́ко не́сте гото́ви. И возсмея́хся трети́цею, я́ко в поко́й гряду́». И а́бие сомже́ о́чи ста́рец.

И́же дре́вле бысть, се пове́да нам не́кто от ве́рных. Бе муж е́тер богобоя́знив и той сына име́ еди́наго. И бысть в стране́ той глад кре́пок, и оскуде́ богобоя́знивый той муж, и рече́ сы́нови своему́, о ча́до, ви́диши ли я́ко осироте́хом, и неи́мам что я́сти. Хо́щешили да тя прода́м, да и ты бу́деши жив, и мы твоя́ роди́теля гла́дом не у́мрема. И глаго́ла сын, твори́ о́тче е́же хо́щеши. Оте́ц же пои́м веде́ и к еди́ному от вельмо́ж, и взят це́ну на сы́не свое́м. И рече́ ему́, ча́до, се запове́даю ти, егда́ ти бу́дет слу́жба, и у́зриши пою́щих в святе́й це́ркви, немози́ от ити́ доко́ле сконча́ют. И то рек отъи́де в дом свой. О́трок же послушли́в бя́ше, и соверша́ше отца́ своего́ повеле́ние. И мину́вшу ле́ту, ви́де госпожю́ свою́ творя́щю блуд со слуго́ю, и никому́ сего́ непове́да. Но моля́ше Бо́га, да и́ма грех оста́вит. Госпожа́ же его́ испо́лньшеся гне́ва, сра́ма не терпя́щи, глаго́ла му́жу своему́, сий новоку́пленый раб несть добр, о главе́ бо твое́й мы́слит. Да лу́чши его́ уби́ти, не́же он тебе́ моего́ живота́. Сю блу́дная льсти́вая жена́ му́жеви своему́ глаго́лаше. Он же лука́вая ея́ слы́ша словеса́, ят ве́ру, и осуди́ пра́веднаго умертви́ти, сего́ же он неве́дяше. И совеща́ся с епа́рхом, его́же ти со убру́сом пришлю́, того́ усецы́ главу́, и да́си ю кто ти поне́м прии́дет, а не нарече́ ни еди́наго слуги́ и́менем. И прише́д в дом, посла́ пра́веднаго дав ему́ убру́с. Он же неве́дяше на смерть идя́. Бысть же иду́щу ему ми́мо це́рковь, слы́ша боже́ственую песнь пое́му, и воспомяну́ отца́ своего́ наказа́ние, ста в це́ркви ждый с верше́ния слу́жбы. Госпожа́ же его́ гне́вом одержи́ма, ускори́ посла́ти винова́таго к ме́чнику. То́йже и́де, и ви́де дру́га си стоя́ща в це́ркви. Он же рече́ ему́, ка́мо и́деши. По́сланный же рече́, к ме́чнику рече́но ми ити́. И той глаго́ла, и аз ктому́ же есмь по́слан с сим убру́сом, неси́ ты, да не о́бася труди́ма. Он же взем убру́с и́де, и в той час усе́кну ме́чник главу́ винова́таго, и во убру́с обви́т ю. Соверше́неже бы́вши боже́ственей слу́жбе в це́ркви, прии́де пра́ведный о́трок к ме́чнику. Он же главу́ взем, даде́ ю рек, неси́ ю господи́ну своему́. Госпожа́ же его́ и господи́н удиви́стася, я́ко по́сланный на смерть прии́де жив. А и́же по главу́ и́де, той у́мре, и вопроси́ша и. О́трок же пове́даше пред все́ми, аз не ослуша́яся отца́ своего́ за́поведи, стоя́х в це́ркви до соверше́ния слу́жбы. По́йде же друг мой ско́ро, и дах ему́ убру́с, и се у́мре зле, аз же приидо́х жив. И вси просла́виша Бо́га, я́ко соблюде́н бысть о́трок от сме́рти сотвори́вый за́поведь о́тчю, а винова́тый зле у́мре. Се́же бра́тие и сестры́ слы́шаще, не мози́те исходи́ти из це́ркве пре́жде конца́ пе́ния, па́че же в час литорги́и, да изба́влени бу́дете бед, и до́бре поживете́. Бо́гу на́шему сла́ва, ины́не и при́сно и во́веки веко́м.