Стихи́:

Пе́рвый за Христа́ огнь стерпе́ Елеаза́р,

Страда́нию предложи́ и про́чим стопы́:

Первострада́льницу другу́ю пре́жде Фе́клы имы́й,

Соломони́ю, ею́же огнь опали́ Христа́ ра́ди:

Седмери́цею предпосла́ша о́трок седмь,

Ору́дия мучи́тельная огнь и коле́са ко осмери́це:

Пожже́ же еди́ну Соломони́ю огнь в пе́рвый а́вгуста.

Антио́ху сы́ну Селе́вкову, прии́мшу ца́рство Еги́петское: и уби́вшу Птоломе́а, вознесе́ся се́рдцем. И по́йде в зе́млю иуде́йскую, и плени́вшу ему́ весь язы́к евре́йский. И вшед во Иеросали́м, все бога́тство их взят. И запове́да Полифо́су воево́де, да прину́дят изра́ильтяны вкуси́ти свины́х мяс, и Моисе́ова зако́на отврещи́ся, и оте́ческих обы́чаев. Непокоря́ющыяся же повеле́ му́чити без ми́лости. И сопроти́вившиися мучи́телю, и оте́ческия держа́ще зако́ны, мно́зи убие́ни бы́ша от них. Зане́же Елеаза́р ста́рец учи́тель сый зако́ну и наказа́тель, и́же и пре́жде бы́вый во Еги́пте, и еди́н бе от преписа́вших зако́н Моисе́ов, Птоломе́ю царю́ Еги́петскому. И седмь о́трок от него́ учи́ми. Сей приведе́н пре́жде пред мучи́теля, и пону́жден свина́я мяса́ я́сти. Рече́ бо ему́: сотвори́ во́лю царе́ву, и жив бу́деши: Аз бо си́це тя возлюби́ти восхоте́х, я́коже себе́. Темже ми́лую твою́ ста́рость, да не без ума́ погуби́ши себе́: Но взем свина́я мяса́ снеждь пред все́ми, да и про́чии ви́девше убоя́тся, и сотворя́т та́кожде: А́ще ли ни, зле у́мреши. Отвеща́ же ста́рец и рече́: «Не подобае́т ми о́ воево́до, и не поле́зно есть е́же послу́шати земна́го и тле́ннаго царя́, и́же днесь су́ща, и у́тре не су́ща, и по е́же отсю́ду исхожде́нии червьми́ снеда́ема, и го́рце и безконе́чно му́чима: Но паче небе́снаго Царя́, И́же Еди́н име́яй безсме́ртие, и во све́те Живы́й непристу́пне, И́же Сло́вом Свои́м сотвори́ вся́ческая ви́димая же и неви́димая: Его́же никто́же ви́де от челове́к, ни ви́дети мо́жет: И Той облада́ет живы́ми и ме́ртвыми, и в после́дний день прии́дет со сла́вою, И́же и просвети́т та́йная тмы, и откры́ет сове́ты серде́чныя, и и́мать суди́ти живы́м и ме́ртвым, и возда́ст кому́ждо по дело́м его́, Его́же Ца́рствию несть конца́, Его́же никто́же от челове́к ута́итися, или́ избежа́ти от кре́пкия ру́ки Его́ возмо́жет. И́же и всех нечести́вых и гре́шных и престу́пники зако́на Его́, и Того́ су́ща И́стинна Бо́га отве́ргшихся, зле и безконе́чно му́чити и́мать, и отве́ржет тех пред а́нгелы Свои́ми, и огне́ви ве́чному в снедь преда́ст. Пра́ведницы же с Ним водворя́тся в небе́снем Ца́рствии, в ра́дости неизрече́нней в безконе́чныя ве́ки. И́хже бо о́ко не ви́де, и у́хо не слы́ша, и на се́рдце челове́ку не взы́де, я́же угото́ва Бог лю́бящым Его́. Есть бо ми доны́не лет де́вятьдесять, и пре́жде сего́ несмь никол́иже соблазни́л люде́й Бо́жиих: кольми́ па́че ны́не подоба́ет ми возжеле́нно и му́жески умре́ти зако́на ра́ди Бо́жия, да о́браз бу́ду по́льзы зря́щым мя, да и ти́и укрепя́тся, и та́коже без боя́зни и му́жески постра́ждут, и умру́т возжеле́нно зако́на ра́ди Бо́жия: Да и аз сугу́бу мзду от Бо́га восприиму́, и я́ко бла́га мя су́ща и ве́рна Своего́ раба́ поста́вит над мно́гими, и сподо́бит вни́ти в ра́дость Свою́ неизрече́нную и безконе́чную и блаже́нную: И́же бо рече:́ сотвори́т и научи́т, сей ве́лий нарече́тся во Ца́рствии небе́снем». Сия́ рек во услы́шание всем предстоя́щым, весь удиви́ и возвесели́ собо́р. Мучи́теля же нема́ло подви́же на гнев. Вско́ре бо повеле́ му́чити его́ без ми́лости. И́же и свя́зан рука́ма, и нога́ма крепко бие́н бысть. И в но́здри его́ о́цет лют влия́ша со смра́дом злым. И во огнь вве́ржен, и помоли́вся кро́ви его́ и сме́рти, во изме́ну прия́те бы́ти. И́же и всего́ ра́ди язы́ка предпосла́. До́блествении же о́троцы приведе́ни бы́ша пред царя́, и с ма́терию их блаже́нною Соломони́ею, и пону́ждени отврещи́ся зако́на своего́, и вкуси́ти свины́х мяс. Глаго́лаше бо к старе́йшему их: «Послу́шайте повеле́ния моего́, и сотвори́те во́лю мою́, да прии́мете от мене́ честь ве́лию: А́ще ли ни, разли́чными и лю́тыми му́ками уму́чив, злей и го́рцей сме́рти преда́м вы». Отвеща́вше же вси я́ко еди́неми усты́ ре́ша: «Нам Антио́ше Еди́н Царь и Бог, от Него́же бы́хом, и к Нему́ возвраща́емся. Оте́чество же на́ше Иеросали́м Вы́шний кре́пкий, и непребори́мый. Те́мже научи́хомся от оте́ц презира́ти земну́ю честь: И се гото́ви есмы́ пострада́ти со вся́цем усе́рдием, и умре́ти зако́на ра́ди Бо́жия, я́коже пострада́ блаже́нный наш ста́рец и учи́тель, и сподо́битися от Бо́га небе́сней и нетле́нней и непреходи́мей че́сти же и сла́ве, и ра́дости безконе́чней, ю́же и сполучи́ он». Такова́я мучи́тель слы́шав, и разгне́вався, повеле́ разжещи́ сковраду́, и одра́вше главу́ и ру́це и но́зе пре́жде старе́йшему бра́ту их, и верго́ша и́ в ню пред очи́ма их, и ма́тере его́, устраша́я их: и тако сконча́ся пе́рвый о Го́споде. И втора́го та́кожде не можа́ху прину́дити, рече́ бо: «Я́ко аз несмь ху́ждьши. Но си́це до́лжен есмь пострада́ти я́коже и брат мой, и тоя́жде сподо́битися че́сти и сла́ве». И повеле́ царь сре́зати его́ на у́ды, и та́ко сконча́ся благодаря́ Бо́га. Тре́тий же рече́: «Не помышля́й царю́, и не заме́дли, не возмо́жеши бо прельстит́и ни еди́наго от нас. Мы бо я́ко на брак, си́це на му́ку, по чи́ну и житию́ восхо́дим». И стро́гани бы́вше желе́зы, и по колесе́х протяза́еми, и разсека́еми мечи́, и огне́м скончава́еми. И разли́чными ору́дии по еди́ному коего́ждо их мучи́тель, яково́ю же сме́ртию осуди́, и́же и подви́гшеся, и в му́ках уме́рше, и и́стинен по́мысл, и самодержа́вен страсте́м показа́вше, терпе́нию венец́ восприя́ша. И оста́ седмы́й юне́йший, и́же бе мал де́тищь, и предаде́ его́ царь ма́тери его́, рек: «Увеща́й его́, да сотвори́т во́лю мою́, и дам ему́ зла́та мно́го». Она́ же па́че укрепи́ его́ ре́кши ему́: «Ча́до мое́ умри́ Го́спода ра́ди, и да не оста́неши бра́тии твоея́, но пости́гни я́ в Ца́рствии небе́снем: Ра́достен бо ми днесь сий день, я́коже бо на брак си́це вам на муче́ние приведо́х». Рече́ же де́тищь к царю́: «Злочести́ве, чесо́ ра́ди ме́длиши, и не да́си ми после́дствовати бра́тии мое́й?». Разгн́евався же царь уму́чи его́ па́че всех бра́тий его́ и благодаря́ Бо́га сконча́ся. Ма́ти же их Соломони́я, поне́же сконча́вшихся о́нех ви́де, и не стерпе́вши рук челове́ческих напада́ния, помоли́вшися, и в разже́гшуюся сковраду́ себе́ вве́рже, и та́ко Бо́гу дух предаде́. Соверша́ется же собо́р их во свое́м их муче́нии, су́щем в Домни́новех преде́лех обою́ пол Галиле́и.

Стихи́:

От Памфили́и девятери́ца посече́нная,

Не́которую любо́вь иму́ще му́ченическую.

Си́и бя́ху во времена́ Диоклитиа́на царя́, и иге́мона Флавиа́на, от Перги́и Пафили́йския. От пра́дед су́щих христиа́не. Мине́он у́бо древоде́ль бя́ше, про́чии же земледе́льцы. Еди́н нрав вси иму́ще, и вдобр сове́т совеща́вшеся, к му́ченическому по́двигу отлучи́шася, и вся жите́йская оста́вльше. И доше́дше в же́ртвище Артеми́дино но́щию, и вся я́же в нем почте́ния разори́ша. Того́ ра́ди я́ти б́ы́вше и вопроше́ни. Бие́ни бы́ша неща́дно, и огне́м по ра́нам жго́ми, и ноготьми́ телеса́ их да́же и до косте́й содра́ша, и мы́шцы их свеща́ми о́гнеными опали́ша, и рожны́ о́чи их избодо́ша. И в темни́цу вве́ржени, мучи́телю повеле́вшу, ни пи́щи ни воды́ пода́ти им. Пото́м звере́м вданы́ бы́ша, и сих укроти́ша. Всем же о сем ужа́сшымся, и возопи́вшым: «Вели́к Бог христиа́нский!». А́бие же быша гро́мове и мо́лнии и до́ждеве, па́ле же и гра́дове размеше́ни снидо́ша на зе́млю. И глас не́который слы́шимь бя́ше святы́я призыва́ющь. И́же и сла́дкаго о́ного гла́са слы́шавше, обвесели́шася. Тогда́ иге́мону повеле́вшу, и отсеко́ша им главы́. И та́ко сконча́ся муче́ние их.

Ве́дети есть нам о сем возлю́бленная бра́тия, е́же Пантокра́тный (Вседержи́телев) день днесь ми́лости Бо́жия пра́зднуем. Благочестив́ому царю́ и кня́зю Андре́ю уста́вльшу сей пра́здновати с царе́м Ману́илом, повеле́нием патриа́рха Луки́ и митрополи́та Константи́на всея́ Руси́и, и Не́стора епи́скопа Росто́вскаго.

Ману́илу царю́ в Царегра́де в ми́ре и в любви́ и в братолю́бии живу́щу, со благочести́вым кня́зем на́шим Андре́ем [в Руси́и]. Случи́жеся им изы́ти во еди́н день на брань: Ману́илу царю́, из Царя́ гра́да на срацы́ны, а Андре́ю кня́зю из Росто́ва на болга́ры. Обы́чай же име́яше князь Андре́й егда́ к бра́ни идя́ше, всегда́ чи́стою душе́ю ико́ну Влады́чицы на́шея Богоро́дицы и при́сно Де́вы Мари́и носи́ти. С ним же и крест в то время два презви́тера в свяще́нных ри́зах ноша́ста, и ту прии́м от святы́х Та́ин Плоть и Кровь Госпо́дню, и су́щии с ним, глаго́ля си́це: «О́ Влады́чице Богоро́дице роди́вшая Христа́ Бо́га на́шего, всяк упова́яй на Тя не поги́бнет. Аз же раб Твой име́ю Тя сте́ну и покро́в, и крест Сы́на Твоего́ – ору́жие на враги́ обою́ду остро́, огнь попаля́я ли́ца проти́вных на́ших хотя́щих с на́ми бра́ни». И па́дше вси на коле́ну, Пресвяты́я Богоро́дицы пред ико́ною со слеза́ми вопию́ще и целу́юще. И ше́дше на щит взя́ша четы́ре гра́ды болга́рския, а пя́тое Бряхи́мов на ка́мени, и возврати́шася от се́чи пога́ных. И вси ви́деша лучи́ о́гнены от ико́ны Спа́са на́шего Влады́ки и Бо́га, и весь полк его́ покры́. Он же возврати́ся вспять, и попали́ гра́ды те огне́м, и положи́ зе́млю ту пу́сту. А на про́чия гра́ды возложи́ дань плати́ти.

То́же виде́ние и Ману́ил царь ви́де во свое́м полце́, в пе́рвый день а́вгуста ме́сяца, пра́здновати уста́виша день ми́лости Бо́жия и человеколю́бия. Я́коже рече́ проро́к: «Его́же хощу́ поми́лую, и поми́лован бу́дет». И ны́не Влады́ко та́ко покры́й Ру́сския земли́ царя́ и лю́ди Твоя́ вся упова́ющыя на Тя. Тем вси припа́даем Ти глаго́люще: «Го́споди Иису́се Христе́, что возда́мы Тебе́?» Но то́чию: «Ве́лий еси́ Го́споди, и чу́дна дела́ Твоя́, и вели́чию Твоему́ несть конца́!» В род и род восхва́лят дела́ Твоя́. Благослове́н еси́ Го́споди Бо́же наш, И́же не даде́ нас в плен враго́м на́шим, но Сам призре́ на ны ми́лостию Свое́ю и человеколю́бием Свои́м защити́ ны, и сла́вою вознесе́ десни́цу упова́ющих на Тя. И Ма́тери моле́ние услы́шав, и поми́лова лю́ди Своя́ ми́лостию человеколю́бия Своего́. И Церквы́ испо́лнися сла́вы Твоея́ Влады́ко, ю́же я́ко дверь показа́л еси́ небе́сную на земли́. Те́мже и ны́не в ней же Ти ся мо́лим, глаго́люще: «Го́споди при́зри с небесе́ и виждь, и посети́ виногра́д Свой его́же соверши́, я́же насади́ десни́ца Твоя́ свята́я. Всех бо о́чи Влады́ко на Тя упова́ют. И Твоея́ ми́лости ча́юще и щедро́т, пе́ния и похвалы́ возсыла́ем сла́ве Твое́й. И просла́ви Сам упова́ющих на Тя, многоимени́таго Бо́га и Спа́са на́шего. Ты бо име́я престо́л не́бо, подно́жие зе́млю. При́зри ми́лостивныма Си очи́ма на вся лю́ди упова́ющыя на Тя, моли́тв ра́ди Пречи́стыя Твоея́ Ма́тери, и всех святы́х Твои́х, и́же пострада́ша за и́мя Твое́ свято́е, о нас гре́шных Тебе́ моле́ние принося́ще.

Аз же написа́х сие́ ма́лое писа́ние повеле́нием царя́ Ману́ила, и всего́ при́чта церко́внаго, да пра́зднуем вси о́бще пра́здник сей, ме́сяца а́вгуста в пе́рвый день. Во сла́ву Всеми́лостиваго Бо́га и Спа́са на́шего Иису́са Христа́, и Пречи́стыя Его́ Ма́тери Преблагослове́нныя Влады́чицы на́шея Богоро́дицы и при́сно Де́вы Мари́и, с любо́вию, мир и любо́вь между́ собо́ю иму́ще, и ми́лостыню ко убо́гим, от всех дел удаля́ющеся злых, и стра́ху Бо́жию внима́юще с боя́знию. А́ще пребу́дем в до́брых де́лех, то и ми́лости Бо́жия сподо́бимся. А́ще вре́мя испу́стим, а друго́е не све́даем, в кото́рое вре́мя по́йдем ко Всемогу́щему Судии́, и на́ша дела́ вся предста́нут пред на́ми я́ве, и напи́сана бу́дут, е́же кто что сотвори́л, то и восприи́мет ко́ждо по дело́м свои́м: пра́веднии жизнь ве́чную, а гре́шнии – му́ку ве́чную. Того́ ра́ди бра́тие вели́цыи и ма́лии, пре́жде того́ дня Су́днаго потщи́мся сотвори́ти до́брая дела́, да не посты́дни обря́щемся на Стра́шнем суди́щи, и ми́лостив глас услы́шим от Всеми́лостиваго Бо́га Спа́са на́шего Иису́са Христа́, спасе́ния жела́юща душа́м на́шим.

Не вели́кая му́дрствуем бра́тие в житии́ сем и пребыва́нии, ни велич́аемся си́лами, ни возно́симся бога́тством. Но преоби́дим плотски́я по́хоти, и попеце́мся о душа́х на́ших. Помяни́те, где суть отцы́ на́ши? Где ли проро́цы и апо́столи? Что ли отнесо́ша собира́ющии на земли́ бога́тство? Не на́зи ли роди́шася, та́ко и умро́ша, ничто́же в рука́х держа́ще. Но пра́вда пра́веднаго на нем есть. И па́мять их с похвала́ми, и греси́ гре́шнаго на нем суть. Вси же есмы́ от пе́рсти, и в персть возврати́мся. И всяк челове́к я́ко ри́за обетша́ет. Нача́ло жития́ его́ хлеб и вода́, и дни́е его́ изочте́ни суть, а́ки уча́стие от песка́, и ско́ро к концу́ а́ки пото́к тече́т. Те́мже бра́тие кончи́ну на́шу помяну́вше, оста́немся от вся́кого зла дела́. Ни кра́сная бо све́та сего́ ве́чна, ни ско́рбная без конца́. Смотри́те ка́ко верти́тся: днесь ты зе́млю оре́ши, а у́тре други́й, а пото́м ин, и ничто́же бу́дущее, но а́ки путе́м теку́ще, он погуби́, а ин нале́зе. Да а́ще погуби́хом душя́ на́ша грехи́, то взы́щем ны́не покая́нием. На се бо и Сам Госпо́дь поуща́ет ны глаго́ля: «Ища́й обря́щет, и толку́щему отверза́ется».