Стихи́:

Име́яше Сио́н премно́гая боже́ственая и чу́дная:

Ме́ртво те́ло Стефа́ново по́дано бысть Константи́ню гра́ду.

По претече́нии мно́гих лет по Вознесе́нии Христо́ве, свята́го ра́ди Христо́ва муче́ния, мно́зем уже́ самохо́тно в подвиго́х сконча́вшимся, тишина́ мяте́жь утоли́вши, и вся́кия темни́цы и ору́дия мучи́тельная преста́ша, прише́ствием и́же во святы́х Константи́на христиани́на су́ща, и пе́рваго в царе́х, ми́ра и свобо́ды вселе́нную испо́лнивша, тогда́ многоче́стное бога́тство, си́речь первому́ченика Стефа́на те́ло яви́ся. Мужь бо не́кий живы́й в ве́си, иде́же я́ко и би́сер под земле́ю кры́емь бя́ше, презви́тер же воображе́нием, и са́ном и житие́м наро́чит, Лукиа́н и́менем, не еди́ницею, но и два́жды и три́жды, тому́ я́влься первострада́лец, и о себе́ пове́да. Презви́тер же виде́ние пове́да и епи́скопу Иоа́нну. Он же ра́дости испо́лнився, и до ме́ста доше́л с при́чтом гра́дским, и раскопа́в обре́те ковче́г. Напра́сно же трус бысть вели́к, и благоуха́ния испо́лни прише́дших. И глас бе с небесе́, глаго́лющим а́нгелом Бо́жиим: «Сла́ва в вы́шних Бо́гу, и мир на земли́» вопию́ще. Не то́чию слы́шимо бя́ше зна́мение, но и врачева́ния мно́гая разли́чным страсте́м соде́ловахуся, и первому́ченикову благода́ть пропове́дающе. А́бие убо Иерусали́мский иера́рх, со обои́ми ине́ми прилучи́вшимися епи́скопы, и кли́росом и все́ми людьми́, свято́е о́но те́ло с весе́лием и ра́достию поклони́вшеся, со свеща́ми и пе́ньми и благоуха́ньми, и подо́бною че́стию во святы́й положи́ша Сио́н. По сих же це́рковь вели́ка в такове́м гра́де созда́ся, не́киим Алекса́ндром синкли́тиком, и́же и мно́го архиере́ю помоли́вся, и в ней честно́е те́ло со все́ю че́стию положи́ша. Не уже́ мно́го от пяти́х лет ми́мо идо́ша по преложе́нии о́ном, той боле́в до сме́рти, и ковче́г сотвори́в себе́ подо́бен ковче́гу свята́го, и у́спе, и положе́н бысть близ свята́го. По осми́ же ле́тех кончи́ны синкли́тика Алекса́ндра, ца́рствующу гре́ком свято́му вели́кому Константи́ну, и святи́тельствующу Константи́ню гра́ду Митрофа́ну. Жена́ Алекса́ндра синкли́тика своего́ ра́ди ея́ бога́тства, и виде́ния теле́снаго, ну́дима от мно́гих к бра́честву, я́ко да не та́ко мно́гими ну́дима, и таково́е де́ло соде́ловается, сове́т совеща́ е́же взя́ти те́ло му́жа своего́ и к своему́ оте́честву Константи́ня гра́да поити́. Кири́лу же и́же во святы́х тогда́ престо́л Иерусали́мский пра́вящему, прии́де Улиани́я, та́ко бо бя́ше и́мя ей, и помоли́ся е́му е́же поя́ти те́ло му́жа своего́. О́ному же не повелева́ющу. Она́ же писа́нием пусти́вши ко отцу́ своему́, и прии́мши ца́рский беле́г, архиере́ю не могу́щу ничто́же отвеща́ти. Боже́ственым же про́мыслом прельсти́вшися жена́, погреши́ ра́ку му́жа своего́. И объе́мши ра́ку свята́го, и во́пленыя гла́сы со слеза́ми испусти́вши, и коне́чным безстра́шием свяще́нное о́но те́ло, носи́лом на мски возложи́вши, и нача́т путе́м ити́ всено́щным и пе́сни а́нгельския с небесе́, и боголе́пно слы́шимо бя́ше славосло́вие, и уха́ния благово́нная, я́ко ми́ра мно́га излия́шася, и та́мошняя испо́лнишася. И лука́вии ду́си рыка́юще, го́ре нам что взыва́ху, я́ко Стефа́н среди́ нас хо́дит бия́й нас. Дости́гше же Асколо́нский град, и обрето́ша кора́бль, и уцени́вше его́ за пятьна́десять зла́тиц, и устреми́шася. О́ коли́ка чудеса́ соде́яшася на тако́вое пути́ ше́ствие, немо́щно есть писа́ти, прекраще́нием содержи́ми! Да я́ко ца́рствующий град достиго́ша, и в слу́хи царе́вы все́льшуся таково́му де́лу. Пове́дано же бысть ему́ и о жене́, и́же а́бие и та предста́вши пред царе́м, изве́стно о при́тчи царю́ изрече́, от нача́ла да́же и до конца́ сбы́вшаяся. Тогда́ добре́йший и любоче́стнейший царь такова́я слы́шав, и ра́дости и весе́лия испо́лнився, повеле́ архиере́ю со всем кли́росом и людьми́ твори́ти стре́тение, и с вели́кою че́стию и благоче́стием в ца́рская внести́. Вси же ви́деша свята́го чудеса́ ели́ка на таковы́й день соверши́шася, но не возмо́жно есть исказа́ти сия́. Оба́че мскам ра́ку несу́щим иде́же бя́ше сокро́вище свято́е, доне́леже доидо́ша до ме́ста, нарица́емое Константиа́не, иде́же и положе́н быв. И еди́ней от моск челове́ческим гла́сом проглаго́лавши: «Коея́ ра́ди вины́ млатите́ нас, зде изво́лися свята́го те́лу пребыва́ти?» Такова́го гла́са архиере́й, и весь собо́р людски́й слы́шавше, вели́кими гла́сы хвалу́ Бо́гу возда́ша. Сия́ же уве́дев ве́рнейший царь, ужасе́ся, и на том ме́сте а́бие многоче́стную це́рковь му́ченику созда́, в сла́ву и хвалу́ Го́спода Бо́га и Спа́са на́шего Иису́са Христа́. Соверша́ет же ся собо́р его́ во святе́м его́ муче́нии су́щем близ Константиа́нех.

Святы́й священному́ченик Стефа́н, бе у́бо сей при Иулиа́не в Ри́ме, и кры́яшеся гоне́ния ра́ди. Креща́я же е́ллины приходя́щыя к нему́, ят быв, и в темни́це затворе́н бысть. И па́ки в темни́це поставля́ше презви́теры и диа́коны и четцы́: И от тех не́цыи я́ти бы́ша, и со дерзнове́нием испове́даша Христа Бога на́шего Соде́теля и Творца́ всему́, и муче́ния венцы́ прия́ша. По не́коем же вре́мени кры́яшеся Стефа́н па́па спасе́ния ра́ди ве́рующих. Я́тым же бы́вшым двуна́десятим ученико́м его́, и мече́м в главы́ усече́нным. Стефа́н же поста́ви себе́ я́ве, и приведе́н бысть в храм А́риев, и моли́твою подви́же его́, и часть его́ паде́ на земли́. И отбежа́вшым во́ином, сам и́де на гроб Лукиа́ны му́ченицы, и безкро́вную же́ртву творя́ше, ят же быв во́ины, и усе́кнуша главу́ его́.

Глаго́лаше Иоа́нн ми́лостивый, я́ко а́ще помы́слили бы́хом разу́мно долготерпе́ние Бо́жие и благоче́стие, то ни на не́бо возвели́ бы́хом о́чию на́шею, но при́сно в смире́не о́бразе ходи́ли бы́хом. Но да испове́м вам, ка́ко от небытия́ в бытие́ сотвори́ ны Зижди́тель, и грехо́м преслуша́ния заблу́ждьших ны взыска́, и Свое́ю кро́вию искупи́ ны от сме́рти. Всю зе́млю, и са́мое не́бо на слу́жбу челове́ком учини́. Но и ны́не согреша́ющих ка́ко не потреби́т? Но долготерпе́ние Его́ недви́жимо, и милосе́рдие Его́ незло́биво. Пре́зрит и мно́гажды ху́лящих Его́, утеша́ет Свои́м человеколю́бием. Свы́ше дождь на наш живо́т испуща́ет. Коли́ко злоде́ев иду́щих уби́ти и кра́сти покрыва́ет и заступа́ет и не преда́ст их я́тым бы́ти и му́ку прия́ти. Коли́ко же в галея́х на разбо́й иду́щим, и не вели́т глубине́ уби́йц тех потопи́ти, но и мо́рю запреща́ет не потопи́ти их от злоб. Коли́ки клену́тся во лжу свято́ю Его́ Пло́тию и Кро́вию, и долготерпи́т, и не дая́ им зде нико́его лю́та. Коли́цы на путе́х разбива́ют, и не даст их звере́м на растерза́ние. Коли́цы и́дут подкопа́ти чу́ждих хра́мов, и не оста́вит я́тым бы́ти им от стрегу́щих пес и челове́к. Ини́и же со блудни́цами спя́ще, скверносло́вцы, и про́чее пре́лестию в житии́ сем су́ще, и о всем долготерпи́т, ожида́я к Себе́ обраще́ния. Во и́стину, не хо́щет гре́шничи сме́рти, те́мже но еще́ и сла́дость вся́ку подава́ет. Пчела́ облета́ющи удо́лия и поля́, и́щущи собра́ти плоды́, да услади́т нашь горта́нь. Ово́щь вся́кий тщи́тся зно́ем созре́ти, да напо́лнит на́ша уста́, и обвесели́т сердца́. Те́мже бр́атие постыди́мся Блага́го Влады́ки Бо́га, толи́ка бла́га пода́ющаго нам, и пока́емся о свои́х согреше́ниих, и обрати́мся к Нему́ Христу́ Бо́гу на́шему до́брыми де́лы. Ему́же сла́ва, ны́не и при́сно и во ве́ки веко́в. [Ами́нь.]

Сей блаже́нный Васи́лий бе при благове́рном царе́ и вели́ком кня́зе, Иоа́нне Васи́лиевиче всея́ Росси́и самоде́ржце. И при преосвяще́нном Мака́рии митрополи́те, Моско́вском и всея́ Росси́и. Отца́ имя́ше и́менем Иа́кова, ма́терь же А́нну, от нею́ же моли́твою испроше́н сый от Бо́га: и́маже по ве́ре ею́ и дан бысть. И от мла́да во́зраста Бо́га возлюби́, и во след его́ пойде. Оста́вль бо дом оте́ческий, и род свой, и премени́в тле́нное жи́тельство наде́ждею бу́дущих благ на духо́вное. Вме́сто бо отца́ плотска́го имя́ше, отсече́ние бре́мене грехо́внаго: вме́сто ма́тере, чистоту́: вме́сто бра́тий, жела́ние тече́ния к го́рнему Иеросали́му: вме́сто чад, воздыха́ния серде́чная. И мно́гими жесто́кими труды́ удручи́ себе́. Толи́ко же безъиме́нен бя́ше, я́ко ни верте́па ма́ла име́ у себе́, ни ри́знаго одеяния на теле свое́м ноша́ше, но без кро́ва всегда́ пребыва́ше, и наг хожда́ше и в зиме́ и ле́те. Зимо́ю от мра́за померза́емь, в ле́те же от зно́я опаля́емь. И посреди́ молв и пли́щев живы́й, ду́шу от страсте́й свобо́дну име́я, всегда́ Христа́ ра́ди бу́йственное житие́ жи́тельствоваше. И не глаго́лаше ничто́же, а́ки безгла́сен творя́шеся, утаи́тися мня от челове́к доброде́тельми, Бо́гу же точию ведом быти. Но не мо́жет укры́тися град верху́ горы́ стоя́: до́йде бо сла́ва о нем, жития́ его́ р́ади чи́стаго и терпе́ния кре́пкаго, в слу́ха и благове́рнаго царя́, и вели́каго кня́зя Иоа́нна Васи́лиевича всея́ Росси́и самоде́ржца, и преосвяще́ннаго митрополи́та Мака́рия Моско́вскаго, и всея́ Росси́и. О его́же житии́ сказа́ самодержа́внейшему сий преосвяще́нный митрополи́т Мака́рий, и зело́ диви́стася о его́ терпе́нии, и похвали́ста Бо́га я́ко в их вре́мя дарова́ Бог такова́ свя́та му́жа. И си́це блаже́нный Васи́лий неукло́нно подвиза́вся поживе́, труды́ и терпе́нием, алка́нием же жа́ждею, и на вся́кий день вдая́нием себе́ на беды́ сме́ртныя: и болезнию объя́т быв лежа́ше на одре́. Слы́шав же свята́го к Бо́гу отше́ствие, благове́рный царь, и вели́кий князь Иоа́нн Васи́лиевичь всея Росси́и самоде́ржец, со свое́ю благочести́вою цари́цею, и вели́кою княги́нею Анастаси́ею, и свои́ми благоро́дными ца́ревичи Иоа́нном, и Фео́дором, прии́де к нему́ на посеще́ние, и благословение прия́ти. Блаже́нный же близ сме́рти сый, и при последнем издыха́нии царе́вичу Фео́дору проро́чески глаго́лаше: Вся прароди́телей твои́х твоя́ бу́дут, и насле́дник бу́деши им: и та́ко предаде ду́шу свою́ в ру́це Бо́жии. И испо́лнися от телесе́ свята́го весь град благоуха́ния, и мно́жество гра́да стеко́шася на погребе́ние его́. И бе ви́дети уми́лен позо́р: царь бо и кня́зи те́ло свята́го са́ми несо́ша до святы́я це́ркве на ра́мех свои́х, и архиере́й и свяще́нницы, и весь при́чет во псалме́х и пе́снех блаже́ннаго хв́аляще и пою́ще: Наро́ди же со слеза́ми вопию́ще глаго́лаху: Преблаже́нне Васи́лие, моли́ся приле́жно Христу́ Бо́гу на́шему за град наш Москву́, и за вся Росси́йския гра́ды и ве́си, и за христолюби́ваго царя́ на́шего: и за его благочести́вую цари́цу, и за благоро́дныя ча́да их: и во́инству его́ бу́ди на сопоста́ты побе́да и одоле́ние. Царь же иды́й и со цари́цею ра́достныя и ско́рбныя от о́чию испуща́ху сле́зы: ра́достныя у́бо, я́ко в такове́м сконча́нии в́идеша соверше́на, и святы́х причте́на ли́ку: ско́рбныя же, я́ко лиши́шася такова́ до́браго подви́жника. Мно́зи же тогда́ прикоснове́нием к святы́м его́ мощем, исцеле́ние получи́ша. Преосвяще́нный же Мака́рий митропол́ит со всеосвяще́нным собо́ром, псалмы́ и пе́сни надгро́бныя пе́вше над мощьми́ свята́го, и погребо́ша я́ че́стно: в ле́то седмь ты́сящь шестидеся́тое, ме́сяца а́вгуста во вторы́й день. Жития́ же его́ бе, о́смьдесять осмь лет: из ни́хже благоуро́дствова, се́дмьдесять два ле́та. Его́же и по сме́рти просла́ви Госпо́дь чудесы́, в ле́то седмь ты́сящь де́вятьдесять шесто́е. Бо́гу на́шему сла́ва, ны́не и при́сно, и во ве́ки веко́в. Ами́нь.