Стихи́:

Изнесе́ сове́т ди́вен досто́ин седи́н:

Законопресту́пный же не восхоте́ послу́шати:

И отъя́ главу́ Евсегни́ю в пя́тый.

Сей бя́ше ро́дом антиохи́анин, во́ин быв при Ко́нсте Зеле́ном, отце́ свята́го и вели́каго царя́ Константи́на. Пребы́сть в во́инстве да́же и до Иулиа́на престу́пника, сто и де́сять лет жив. Во́инствовав же лет шестьдеся́т. Предста́в же Иулиа́ну на вопро́с, и обличи́в его́ я́ко оте́ческое преступи́вша благоче́стие, и Бо́жию честь преложи́вша на и́долы. И воспомяну́в ему́ доброде́тель вели́каго Константи́на, и ка́ко объявле́нием прии́де к ве́ре Христо́ве. Про́чим же разу́мичен показа́вся, и да́льними вре́мены и ве́щьми и писа́нии иску́сен. Иулиа́н же обруга́в его́, повеле́ мече́м главу́ ему́ отсещи́. И та́ко соверши́ся о Христе́ муче́ние его́.

Доброде́тели у́бо теле́сныя сия́, па́че же де́лания. Доброде́тели же в ра́зуме, и́же по Бо́зе быва́емы, вне вся́кого лицеме́рия и человекоуго́дия, в предспея́ние смире́ния, и безстра́стие приводя́щая челове́ки, суть сия́: Воздержа́ние, поще́ние, моле́ние, жа́жда, бде́ние, стоя́ние всено́щное, кла́няние коле́нов ча́стое, неумовение, единори́зие: Су́хо у́бо в ве́чер яде́ние и ма́ло: Водопи́тие, и на земли́ лега́ние: Нищета́, нестяжа́ние, не доброутворе́ние, не самолюбное: Усе́рдну пребыва́ти, неисхо́дное, молча́льное: Свои́ма рука́ма рукоде́лие проходи́ти: И вся́кое злострада́ние, и поще́ние теле́сное, и вся я́же те́ло удруча́ющая, и́же от плотски́х страстей смуща́емая нужне́йша и поле́знейша. Немощну́ющу же, и Бо́жиею по́мощию в сих пребыва́ющу, не по толи́ку и́на потре́бна и ну́жна, ели́ко свято́е смире́ние и благодаре́ние, вся наполня́ющее. Сия́ у́бо о теле́сных доброде́телех.

О душе́вных страсте́х.

До́лжни у́бо есмы́ рещи́, и о душе́вных зло́бах: си́речь страсте́х. Стра́сти у́бо душе́вныя суть: забы́тие, уны́ние, и неразу́мие: От сих я́ве трех, о́ко душе́вное, е́же есть ум помрача́емь, облада́емь быва́ет от всех страсте́й. От них же суть сия́: Нече́стие, злосла́вие, и про́сто вся́ка е́ресь: Хула́, гнев, я́рость, остроже́лчие, человеконенавиде́ние: памятозло́бие, оглаго́лание, осужде́ние, скорбь безслове́сная, страх, у́жас, рве́ние, за́висть, не́нависть: тщесла́вие, презо́рство, лицемерство, лжа, неве́рие, безу́мие, неразсужде́ние, сплете́ние льсти́вно: лихоима́ние, мшелолю́бие, пристра́стие, мудрова́ние земно́е: уны́ние, малоду́шие, неблагода́рствие, ропта́ние: свире́пство, мне́ние, нечу́вство, бу́есть: любонача́льство, человекоуго́дие. И ели́ка а́ще кто рече́т, и пе́рвейшая, сластолю́бие, славолю́бие, и сребролю́бие, от ни́хже ражда́ется вся́кое зло: Не согреша́ет же челове́к ни еди́но согреше́ние, аще не пре́жде си́и кре́пцыи исполи́ни, [я́коже рече́ и́же в по́стницех мудре́йший Ма́рко,] прии́дут и разде́лят его́, или́ забве́нием, или́ я́ростию, или́ неве́дением: Сия бо ражда́ют сласть и осла́бу, е́же люби́ти сла́ву челове́ческую и молву́. Пе́рвая же вина́ всех сих, и ма́ти всех злых предрече́ся, самолю́бие: си́речь безслове́сная любо́вь телесе́, и страстное пристра́стие. Разлия́ние же и уклоне́ние ума́ с буесло́вием и скверносло́вием, мно́гим злым согреше́нием хода́таи суть, де́рзость и смех.

О теле́сных страсте́х

Теле́сныя же стра́сти: Чревобе́сие, горта́нное беше́ние: тайнояде́ние, сластолю́бия разли́чная: блу́дства, прелюбоде́йства, скве́рнства, нечистота́: мужело́жства, деторастле́ния, студоло́жьства, жела́ния зла́я вся чрезъесте́ственая, скверно́вныя стра́сти: татьба́, святота́тство, разбо́йничество: уби́йство по досажде́нию, или́ по безслове́сному гне́ву, и вся́кое теле́сное ослабле́ние, и наслажде́ние во́лям плотски́м, прибыва́ющим па́че телесе́. Обая́ния, волхвова́ния, чароде́йства, любоми́рства, па́кости: доброукраше́ния, натирания лицам: осужде́нная пра́здность, высокопа́рство, ве́щи пристра́стныя, любо́вь телесе́: Жизнь утолстева́ющая ум, зе́мна и ско́тна того́ содева́юща, и никогда́ же к Бо́гу, и доброде́тельному де́ланию воста́ти оставля́юща. Ко́рень же всем злым сребролю́бие.

Да есте́ ве́дуще бра́тие, я́ко в сий день предпра́зднство Преображе́ния Го́спода на́шего Иису́са Христа́, собере́мся в це́рковь на всю слу́жбу церко́вную, и ми́лостынею очи́стимся. В той бо шесты́й день а́вгуста откры́ Госпо́дь Божества́ Своего́ све́тлость. И показа́ ученико́м сла́ву Своего́ Божества́, гото́вы я́ творя́ тем на послу́шество в день Воскресе́ния. Тем чу́дом извеще́ние быва́ше от Бо́га, Отцу́ о Нем глаго́лющу: «Сей есть Сын Мой возлю́бленный, о Не́мже благоизво́лих, Того́ послу́шайте», да ве́ру и́мут Воскресе́нию Христо́ву, я́коже и бысть. В той день показа́ Бо́жию си́лу и сла́ву и честь и власть. В той день возвеще́ние бысть ра́дости. Доше́дше же того́ бра́тие, с похвала́ми боже́ствеными пра́зднуем вонь, чистото́ю украси́вшеся, и духо́внаго бра́шна насы́тимся. И́мже пита́ющеся, душа́ не умира́ет. А́ще бо слове́с святы́х книг не послу́шаете, ни сотворите́ во́ли Бо́жии, осужде́ни бу́дете в му́ку ве́чную. А́ще сотворите́ во́лю Бо́жию, насле́дницы бу́дете ве́чныя жи́зни. За́висть же и я́рость отве́рзите от себе́, и та́ко в до́брых де́лех угодите́ Христу́ Бо́гу, ча́юще блаже́ннаго упова́ния, и Ца́рствия Христо́ва насладите́ся в не́же призыва́я ны, сни́де Сын Бо́жий Безнача́льный Бог наш, сла́вимый в Тро́ице от всея́ тва́ри, поклоня́емый во Еди́ном Божестве́. Ему́же сла́ва, ны́не и при́сно и во ве́ки веко́в. [Ами́нь.]