Стихи́:

Фаво́рское ме́сто просла́влено бысть па́че всея́ земли́,

Восхо́дом Бо́жиим просия́вшее сла́вою есте́ственою,

О́браз потверже́нию в шесты́й показа́ся.

В шесты́й ме́сяца а́вгуста, воспомина́ние боже́ственаго Преображе́ния, Го́спода Бо́га и Спа́са на́шего Иису́са Христа́, свята́я Бо́жия Це́рковь ра́достно пра́зднует: Вина́ же есть сия́: Поне́же мно́га о беда́х Христо́с бесе́доваше ко ученико́м, и о сме́рти и о стра́сти Свое́й, и о учени́к Свои́х закла́нии. И о́ва у́бо бя́ху в настоя́щем житии́ и в рука́х, о́ва же блага́я в наде́жди. Хотя́й же и о́браз тех извести́ти и показа́ти: кото́рая когда́ есть сла́ва о́на, с не́юже хо́щет приити́? – возво́дит их на гору́ высо́ку на еди́не, и преобрази́ся пред ни́ми, и просвети́ся лице́ Его́ я́ко со́лнце. Ри́зы же Его́ бы́ша белы́ я́ко свет: и яви́стася им Моисе́й и Илия́ с Ним глаго́люща. Поя́т же и ины́х трие́х еди́нех я́ко преиму́щих. Петра́ у́бо, за еже зело́ люби́ти тому́ Христа́: Иоа́нна же, за е́же зело́ люби́мому бы́ти Христо́м: Иа́кова же, за е́же мощи́ пи́ти ча́шу ю́же и Госпо́дь пия́ше. Моисе́я же и Илию́ посреде́ приво́дит, непра́выя мы́сли я́же о Нем, у мно́гих бы́вшыя исправля́я. Поне́же бо не́цыи Того́ Илию́ глаго́лаху, ини́и же Иереми́ю, сего́ ра́ди верхо́вных приво́дит, да посре́дственое отту́ду уве́дят, раба́ и Влады́ки. И да навы́кнут, я́ко и сме́рти и живота́ Той есть име́яй вся́ку власть.

Послу́шайте бра́тие, да скажу́ вам си́лу и вели́чество честна́го сего́ дне, и какова́ блага́я вонь яви́шася. В сий бо день Госпо́дь наш Иису́с Христо́с Свои́м ученико́м откры́ сла́ву Своего́ Божества́, показу́я я́ко Той облада́ет живы́ми и ме́ртвыми. Мно́гим бо от Него́ чудесе́м бы́вшым, не имя́ше Ему́ ве́ры, каменосерде́чный род иуде́йский. О́ви у́бо Илию́ глаго́лаху Того́ бы́ти, ини́и же Моисе́я: друзи́и же Иереми́ю, или я́ко еди́н от дре́вних воста́. А́ще бы ре́ша Сын Бо́жий был Сей, то не бы Зако́на Моисе́ова разруши́л и попра́л, его́же прия́хом от Бо́га: но сопроти́вен есть Зако́ну. Сего́ ра́ди ученицы́ Его́ смуща́хуся умо́м, ве́дяху яко Илия́ на не́бо возше́л есть, и Моисе́я законода́вца пре́жде почи́вша. И сумня́хуся, а́ще пои́стине Той есть сше́дый, и в наш о́браз оболки́йся, и ра́спря бе в них со иуде́и. Сего ра́ди потре́бно бе показа́ти сла́ву Божества́ Своего́ ученико́м, да и ти́и не смуща́ются, помышля́юще су́етная. И пое́м с Собо́ю Петра́ и Иа́кова и Иоа́нна, изве́стно им творя́, я́ко есть Сын Бо́жий. И возведе́ их на гору́ высо́ку еди́ны, и преобрази́ся пред ни́ми: и просвети́ся лице́ Его́ я́ко со́лнце. Ри́зы же Его́ бы́ша белы́ я́ко свет. И се яви́стася им Моисе́я и Илия́ с Ним глаго́люща. Глаго́лаху же исхо́д Его, и́же хотя́ше пострада́ти во Иеросали́ме. Ов бо страсть Его́ провозвеству́я. Ов же явля́я, яко Той есть Законода́вец, и Зако́ну Исполни́тель: от Него́же и дре́вле прия́т Зако́н на горе́ Сина́йстей на скрижа́лех ка́менных, напи́сан Пе́рстом О́тчим, си́речь, Святы́м Ду́хом. И пре́жде бо воплоще́ния, и по воплоще́нии Той же есть. Его́же не разуме́вше беззако́ннии иуде́и са́ми преступающе Зако́н, осужда́ют Законода́вца без пра́вды умре́ти. Не прии́де бо разори́ти Зако́на, но испо́лнити. Па́ки же обрати́м сло́во на сказа́ние ева́нгельское. Внегда́ же ви́деша боже́ственую сла́ву Его́, падо́ша ниц, не могу́ще зре́ти нестерпи́мыя зари́ све́тлости лица Его́. И а́бие глас бысть с небесе́ глаго́ля: «Сей есть Сын Мой Возлю́бленный, о Не́мже благоизво́лих, Того́ послу́шайте». И егда́ бысть глас, обре́теся Иису́с еди́н: и ти́и умолќоша, и никому́же ничто́же возвести́ша в ты́я дни, о тех я́же ви́деша. Показа́ бо им не все соверше́но, но ели́ко можа́ху вмести́ти теле́сныма очи́ма. О́во ми́луя их, ку́пно же и щадя́, да не ка́ко со зра́ком и е́же жи́ти погубя́т. И известву́я тем Воскресе́ние, сего́ ра́ди Моисе́я от ме́ртвых предста́ви, Илию́ же от живы́х: Явля́я я́ко Той есть Судия́ живы́м и ме́ртвым, и я́ко вся воскреси́т. Из́ыдут бо рече́, блага́я сотво́ршии в воскреше́ние живота́, а сотво́ршии зла́я в воскреше́ние суда́. И а́ще ме́ртвии не воста́нут, то ни Христо́с воста́. А́ще ли Христо́с не воста́, су́етна ве́ра ва́ша, тще же и на́ше пропове́дание. Да сие́ слы́шаще бра́тие, воста́нем я́коже от сна от гро́ба ле́ности, и потщи́мся сохрани́ти за́поведи Бо́жия, и угоди́ти Ему́ благи́ми де́лы: покая́нием, и моли́твами, и слеза́ми, и ми́лостынею, любо́вию, и смире́нием. Ми́лостынями бо и ве́рою очища́ются греси́. Любо́вь же и смире́ние, о́ва у́бо при́сно воздвиза́ет нас и приво́дит к Бо́гу: о́во же укрепля́ет и соверша́ет. Возлю́бим друг дру́га я́коже и Христо́с возлюби́ нас, и предаде́ Себе́ за ны: И на́шего ра́ди спасе́ния наг на кресте́ пригвожде́н бысть да нас облече́т во оде́жду нетле́ния. И взалка́ся и вжада́ся, да нас насы́тит пи́щи ве́чныя, и напои́т водо́ю безсме́ртия. Си́це и мы сотвори́м, а́лчных напита́им, жа́дных напои́м, наги́х облеце́м. Ели́ко бо рече́, сотвори́сте еди́ному от сих, Мне сотвори́сте. И я́ко вре́мя сокраще́но есть, потщи́мся гото́ви обрести́ся пре́жде сме́ртнаго дне, да не внеза́пу обря́щет ны в зло́бе и без покая́ния, и восхи́тит я́ко лев ду́шы на́ша. Во а́де бо рече, несть покая́ния ни испове́дания: ниже́ мо́щно ми́лостыни сотвори́ти, то́ржищу разше́дшуся, и све́щы на́ши уга́снут я́ко безма́слены. Блюди́те бо рече́, да не когда́ отягча́ют сердца́ ва́ша. И паки: Бди́те и моли́теся, я́ко не ве́сте дне и часа́. И кто у́бо есть рече, ве́рный и му́дрый раб: и про́чая. И па́ки: Блаже́н раб той, его́же прише́д Госпо́дь обря́щет творя́ща та́ко: и про́чая. А́ще ли рече́ злый раб той в се́рдцы свое́м: ме́длит Господи́н мой приити́, и про́чая страшне́йше. Сего́ ра́ди потщи́мся пре́жде сме́ртнаго дне гото́ви обрести́ся, и получи́ти ча́сти ми́лостивых и спаса́емых. Да и к нам рече́т Госпо́дь: «Благи́й ра́бе верный, в ма́ле был еси ве́рен, над мно́гими тя поста́влю, вни́ди в ра́дость Го́спода твоего́». Ему́же сла́ва, ны́не и при́сно, и во ве́ки веко́в. Ами́нь.