Стихи́:

Па́че вся́ких Тебе́ ра́ди ка́мением

Пострада́ша таи́нницы Твои́

Пе́рсяне, и́хже показа́л [еси́] Спа́се

Сей бя́ше во времена́ вели́каго царя́ Константи́на, пе́рсянин ро́дом. Наста́влен же бысть Ава́ром (Уа́ром) не́ким христиани́ном, о христиа́нстве изве́ствовавшу ему́. И изоста́вль оте́ческое нече́стие и сро́дную любо́вь, до́йде к преде́лом гре́ческим и пе́рсским, во град глаго́лемый Нисиви́я. И вшед в монасты́рь прия́т свято́е Креще́ние, наложи́в на ся мни́шеский о́браз. Показа́в же вся́ко тща́ние и пост. За́вистию же и наве́том лука́ваго бе́са, возненави́ден бысть от та́мо су́щих мних, бежа́ отту́ду и до́йде в монасты́рь святы́х му́ченик Се́ргия и Ва́кха, в Феодо́сиев град, и после́дствоваше житию́ архимандри́та Нурве́ла. [Его́же глаго́лют за шестьдеся́т лет варе́ния не вкуси́в, ниже́ лещи́, ниже́ се́сти, но на тоя́гу (по́сох) налега́я, соверша́ше есте́ственыя ну́жды.] И́же от него́ свиде́тельствован, поста́влен бысть диа́кон. Хотя́щу же архимандри́ту того́ пону́дити на свяще́нство, и се уве́дев святы́й Дометиа́н, отъи́де и на не́кую го́ру вшед, ва́ром со́лнечным и сту́дению и вся́кия быва́ющи зло́бы терпя́. Та́же в не́кий рукотворе́ный верте́п вни́де, и та́мо неколико время пребыв, многая чудеса Христовым именем к нему́ приходя́щим подава́ше, и от и́дольския пре́лести к Христо́ве ве́ре приводя́ше. Прише́дшу же та́мо Иулиа́ну, и я́же о нем уве́дев престу́пник, повеле́ того́ ка́мением поби́ти. Ше́дше же по́слании, и обрето́ша его́ со ученики́ свои́ми, в тре́тий час пою́ща пе́ние. И ка́мением ча́сто на них па́дше поби́ша их. Соверша́ет же ся собо́р и во святе́м его́ муче́нии, су́щем об он пол во Устиа́нех.

Е́же бо чуде́сно, сие́ есть, я́ко не с то́кмо мня́щымися бы́ти ко изве́стию, но и сопроти́вными, вся о нас быва́ют. И да навы́кнеши, смотри́ отсю́ду. Повеле́ фарао́н вверга́емым бы́ти в реку́ младе́нцем. И а́ще не вверга́еми бы́ли бы младе́нцы, и повеле́ние фарао́ново не бы́ло бы, не бы сохране́н был Моисе́й: не бы в ца́рских пола́тах воспита́вся: И егда́ соблюда́шеся, не бе в че́сти: егда́ же изве́ржен быв, тогда́ в че́сти бе. Сие́ же творя́ше Бог, изоби́лие си́лы Своея́, и удобь хи́тростное показу́я. Преща́ше ему иудеянин глаголя: «Еда́ уб́и́ти мя ты хо́щеши?». И сие́ его́ по́льзова. Те́мже по смотре́нию сие́ бысть, да́же виде́ние ему́ о́но ви́дети е́же в пусты́ни. Да́же подоба́ющему вре́мени испо́лнитися. Да́же ему́ филосо́фствовати в пусты́ни, и во изве́стии жи́ти. И во всех я́же нань от иуде́й наве́тах, то́жде быва́ет. Тогда́ светле́йший устроева́ется, егда́ проти́ву ему́ востаю́т, яково́ же и при Ааро́не: воста́ша нань и светле́йша его́ сотвори́ша: Отсю́ду бо ему́ и святи́тельская испещре́нна быва́ет оде́жда, и кида́рь возложе́н есть: и про́чее по чи́ну оде́жды украше́ние, да́же не сумни́тельной бы́ти хиротони́и: да́же и в про́чем чуди́му бы́ти, от блях ме́дяных. Ве́сте вся́ко я́коже мню исто́рию сию́. Те́мже и претека́ю по́весть. И а́ще хо́щете, па́ки свы́ше на та́яжде да прии́дем: Каин бра́та убив, но сим о́бразом па́че по́льзова. Послу́шай бо что глаго́лет: Глас кро́ве бра́та твоего́ вопие́т ко мне. И па́ки и́нде: Кро́вию рече́, лу́чше глаго́лющею над А́веля. Свободи́ и от неявле́ния бу́дущаго, мзду возрасти́. Любви́ научи́хомся вси, я́же Бог имя́ше к нему́. Чим бо оби́ден быв, прие́мый вско́ре кончи́ну? Ничи́м же. Что бо, рцы ми, и́же косне́е умира́юще приобрета́ют? Ничто́же. Ниже́ бо от е́же многая жи́ти ле́та, или́ ма́лая, есть блаже́нство: Но от е́же в потре́бное де́йствовати живото́м. Трие́ о́троцы вве́ржени бы́ша в пещь, и сего ради светле́йши бы́ша. Дании́л же в ров, и отту́ду па́че ясне́йшь устро́ися. Ви́диши ли везде напа́сти вели́кия ражда́ющих блага́я, и зде, а не то́кмо та́мо. В зло́бе же то́жде быва́ет, яково́ же, а́ще кто трость име́я ополча́л бы ся проти́ву огне́ви, таковы́й бо мни́тся у́бо ураня́ти огнь, но того́ светле́йша твори́т, себе́ же изнуря́ет. Пи́ща бо быва́ет зло́ба, и вина́ све́тлости доброде́тели. Непра́вдованием бо в потре́бное Бо́гу де́йствующу, на́ша сия́ют па́че. Па́ки: диа́вол егда́ соде́ловает что таково́, светле́йших твори́т претерпева́ющих. И почто́, рече́, о Ада́ме не бысть что таково́, но безче́стнейшь бысть? Наипа́че у́бо, и о́ному Бог в потре́бное де́йствоваше. А́ще же не́где что пострада́, сам себе́ оби́дел есть. Я́же бо от други́х проти́ву нам быва́емая, вели́ких нам благи́х вино́вна быва́ют: а я́же от нас саме́х, не ктому́. Поне́же бо оби́дими у́бо от други́х боле́знуем, от нас же саме́х не ктому́: показу́ет Бог, я́ко и́же у́бо от друга́го непра́ведне стражда́, благослове́н быва́ет: а и́же сам себе́ оби́дяй, сам ся врежда́ет. И па́че в ле́поту: да́же оное у́бо до́блествене терпи́м, сие́ же не ктому. И́накоже, все та́мо Ада́мово бысть. Почто́ бо послу́шал еси́ жены́? Почто́ бо проти́вная сове́тующую, не отрази́л еси́? Ты весма́ вино́вен был еси́. Елма́ а́ще диа́вол был бы, подоба́ше по сему́ искуша́емым всем погиба́ти. А́ще же не погиба́ют, от нас вина́. Но подоба́ше, рече́, всем напа́ствуемым, испра́вленным бы́ти. Или́ а́ще от нас вина́, подоба́ше и кроме́ диа́вола погиба́ти: и сие быва́ет. И́бо мно́зи и кроме́ диа́вола погиба́ют: Не бо вся той устроева́ет, но мно́гая и от самого́ на́шего быва́ют гну́сства. А́ще же не́где и о́ный вино́вен, нам нача́ло подаю́щым. Рцы бо ми: когда́ возмо́же диа́вол над Иу́дою? Егда́ вни́де, рече́, вонь сатана́. Но послушай о вине́, яко тать бе, и влага́емая ноша́ше: Сам той даде́ ему́ ме́сто простра́нно входа. Те́мже не диа́вол нача́ло влага́ет, но мы того́ прие́млем и призыва́ем. Но а́ще не он рече́ был бы, не бы ве́лия была́ лю́тая, но неотрече́нна нам хотя́ше бы́ти му́ка. Ны́не бо возлю́бленне, я́же суть муче́ния, кротча́йша нам суть. А́ще же са́ми собо́ю соде́яли бы́хом лю́тая, нестерпи́мо бы́ло бы томле́ние. Рцы бо ми: а́ще сия́ я́же согреши́ Ада́м, кроме сове́та согреши́л бы, кто бы его́ восхи́тил от бед? Но не бы согреши́л, рече́. Отку́ду ми сие глаго́леши? И́же бо си́це слаб и уны́л, и к безу́мию гото́в, я́коже прия́ти сицевы́й сове́т, мно́го па́че и кроме́ сего́ сие́ бы́ло бы. Кий бо диа́вол бра́тий Ио́сифовых к за́висти приведе́? Те́мже а́ще трезви́мся, возлю́бленнии, и благоиску́сства нам вино́вен диа́вол быва́ет. Что бо повреди́ И́ова, толи́кое его́ злоко́зньство? Да не глаго́леши, рече́, сего́, но немощны́й врежда́ется. Но немощны́й, а́ще и диа́вол не бу́дет, врежда́ется. Но бо́льше, рече́, со о́ного действом? Но ме́ньше, егда́ со о́ного де́йством согреши́в, му́чится, не бо всех согреше́ний та́яжде томле́ния. Да не прельща́ем себе́, несть нам диа́вол вино́вен, аще трезви́мся. Он нас па́че возбужда́ет, он нас воздвиза́ет. Рцы бо ми пре́жде сия́ да истя́жем, да не бу́дут зве́рие, да не бу́дут злорастворе́ния возду́хов, ни неду́ги, ни ско́рби, ни туги́ серде́чныя, ни друго́е что от таковы́х: что не бы соде́лал челове́к? Свиния́ па́че, не́жели челове́к мнит ми ся был бы, объяда́яся и упива́яся, и ни от еди́наго же сих стужа́емь. Ны́не же, попече́ния и печа́ли, обуче́нием, суть филосо́фии и учи́лищем, и приведе́нием к наказа́нию изря́дному. Смотри́ же и и́нако. Да пита́ется кто во дво́рех ца́рских, ниже́ скорбя́ чим, ниже́ тро́ску име́я, ниже́ пеки́йся, и ниже́ гне́ва име́я вы́ну, ниже́ неполуче́ния: Но вся, я́же а́ще жела́ет, да твори́т, и да получа́ет, и всех да и́мать послу́шающих: А́ще не вся́каго зв́еря безслове́снейшь бу́дет таковы́й? Н́ыне же, я́коже осла́ суть ве́щи обстоя́ний, и скорбе́й истира́юще нас. Сего́ ра́ди от богате́ющих нищии, мно́жайше суть разу́мнейшии: а́ки мно́гими о́крест приража́еми и понуря́еми волна́ми. И́бо те́ло, пра́здное у́бо и недви́жимо собо́ю, боле́знено и ме́рзостно есть: Дви́жащееся же, и тружда́ющееся, и озлобля́емое, красне́йшее есть и здраве́йшее: Сие́ же и в души́ обре́л бы кто. И желе́зо лежа́щее у́бо растлева́ется, де́лаемое же сия́ет. Та́кожде и душа́ дви́жима. Движе́ние же душе́вное, сама́ та обстоя́ния, и хи́трости погиба́ют, невиди́жимой су́щи души́. Дви́жима же быва́ет, егда́ не вся пра́ва бу́дут: дви́жется бо от сопроти́вных. И а́ще бы не была́ сопроти́вная, ничто́же бы́ло бы дви́жущее. Яково́ же, а́ще вся была́ бы до́бре соде́ланна, не бы обрела́ хи́трость дви́жима бы́ти. Си́це а́ще и вся была́ бы, помы́сли нам, не бы обрела́ душа́ дви́жима бы́ти: А́ще везде́ держа́на была́ бы, не сладка́ была́ бы. Не зри́ши ли, я́ко и дои́лицам повелева́ем не всегда́ носи́ти дете́й, да́же не во обы́чай та устроева́ти, ниже́ не́мощна та твори́ти. Сего́ ра́ди я́же пред очи́ма воспитова́емая роди́телей, не́мощнейша быва́ют, щаде́нию безвре́менному же и безме́рному растлева́ющу тех здра́вие. Добро́ и скорбь по ме́ре быва́ющая. Добро́ и печа́ль. Добро́ и ску́дость, кре́пких бо нас твори́т. Добра́ и сопроти́вная. Ко́еждо бо от сих без ме́ры быва́емое, погубля́ет. И о́во у́бо разслабева́ет, о́во же растерза́ет. Не зри́ши ли, я́ко и ученики́ Своя́ Христо́с, си́це наставля́ет? А́ще же они́ сих тре́боваху, мно́го па́че мы. А́ще же тре́буем, да не негоду́ем, но да и ра́дуемся в печа́лех. Лечбы́ бо сия суть, прили́чныя на́шым ра́нам. О́ва у́бо горька́, о́ва же сладка́. Ко́ждо же от сих о себе́ само́, не потре́бно бы́ло бы. Те́мже благода́ть да и́мамы Бо́гу о сих всех: Не бо про́сте сим попуща́ет быва́ти, но о поле́зном душ на́ших. Те́мже на́ше благода́рство показу́юще, да благодари́м, да сла́вим, до́блествене да держи́мся, привре́менное тех помышля́юще: На бу́дущая же простира́юще свою́ мысль, да и настоя́щая до́блественне понесе́м, и бу́дущих получи́ти благ да сподо́бимся, благода́тию Го́спода на́шего Иису́са Христа́. Ему́же сла́ва, и держа́ва, во ве́ки веко́в. Ами́нь.