Стихи́:

Ду́шу за мно́гих Емилиа́н сло́вом положи́в:

Те́ло удручи́в да́же и до конца́

Во осмы́й Емилиа́на земля́ ко́сти прия́т.

Емелиа́н испове́дник Христо́в, бысть в ца́рство Льва иконобо́рца, епи́скоп сый Кизи́ческий. И мно́гажды ну́жен бысть отврещи́ся поклоне́ния честны́х и святы́х ико́н, и не покори́ся, но пребыва́ше во исправле́нии святы́х оте́ц, и мно́га озлобле́ния и заточе́ния претерпе́. Ра́дуяся вку́пе и поспешеству́я, е́же бы вре́менных р́ади скорбе́й ве́чная прия́ти блага́я. И та́ко у́бо в тех потружа́вся озлобле́ниих, в заточе́нии почи́ о Го́споде, и венце́м испове́дания увязе́ся.

Стихи́:

Ми́рон боже́ственый доброде́тельным ми́ром дыша́,

Благоуха́ние принося́ не́кое ны́не Го́сподеви.

Сей роди́ся во Авраки́йстем гра́де, и́же в Кри́те близ Кво́са. И род свой уча́ боже́ственному благоче́стию. Изнача́ла же своего́ жития́ и жену́ поя́т, и зе́млю де́лаше, и от прозяба́ющих плодо́в подава́ше убо́гим. Ели́ко же от плодо́в подава́ше, толи́ко гобзя́хуся. Ми́лостыня ему́ па́че челове́к бяше. Глаго́лют у́бо о нем, я́ко на свое́м ему́ гумне́ е́мшу кра́дущих муже́й десять, и́же напо́лниша вре́тища своя́ жи́та, и не могу́ще подъя́ти. И вме́сто е́же бы ра́ны им наложи́ти, или зло не́кое сотвори́ти, прише́д подъима́ше им бремена́, и свои́ма рука́ма возлага́ше им на ра́мо, и запоруча́ше никому́же вещь пове́дати. Поста́влен же бысть презви́тер в святе́й боже́ственей Це́ркви. Пото́м по е́же преста́ти гоне́нию, на епи́скопский престо́л возведе́н бысть, и мно́гих чуде́с и сил соде́ловав: Тече́ние реки́ уста́вив, зане́же реце́ наводни́вшися. И не́коему Трито́ну и́менем хотя́щу реку́ прейти́, не оста́ви святый тещи́ ю́, доне́леже шед во своя́: И о́ному преше́дшу, жезл свой посла́: С ним же по́сланнии ше́дше, и во́ду возмути́вше обратиша реку́ тещи́ путе́м свои́м. Таковая же у́бо и и́на мно́гая сотвори́в. И про́чее житие́ боголюбе́зне и преподо́бне препроводи́в, и му́ченическия па́мяти све́тле поче́т. И стом ле́том быв, ко Го́споду отъи́де.

Ны́не вре́мя благоприя́тно рече́ апо́стол, ны́не день спасе́ния. Сей век покая́ния, он воздая́ния. Сей де́лания, он мздовоздая́ния. Сей терпе́ния, он утеше́ния. Ны́не Помо́щник обраща́ющимся от пути́ зла́го Бог, тогда́ же Стра́шен и Непремы́слим челове́ческим веще́м же и глаѓолом, и помышле́нием Истяза́тель. Ны́не долготерпе́ние восприе́млем, тогда́ же правдосу́дие позна́ем, егд́а воскре́снем, о́ви в му́ку ве́чную, о́ви же в жизнь ве́чную, и восприи́мет ко́ждо по дея́нию его́. К кото́рому вре́мени отлага́ем послуша́ние Христо́во, позва́вшаго нас в небе́сное Его́ Ца́рствие. Не истрезви́м ли ся, не воззове́м ли себе́ от и́же по обы́чаю жития́ ко опа́ству Ева́нгелия. Не очи́ма ли прии́мем день Госпо́день стра́шный он и объявле́нный, во́ньже и́же у́бо к десни́це Госпо́дни, ра́ди дея́ний приближа́ющиися, Ца́рствие небе́сное восприи́мем. А я́же к ле́вей ра́ди пустоты благи́х дел отри́нутыя, гее́нна о́гненая и тма ве́чная сокры́ет. Ту бу́дет рече́, плачь и скре́́жет зубо́м. Мы же Ца́рствие у́бо небе́сное жела́ти глаго́лем, а о ни́хже есть то получи́ти, не пече́мся. Но ни еди́ну же боле́знь от за́поведи Бо́жии прие́млюще, ра́вных че́стей получи́ти и́же да́же до сме́рти ко греху́ проти́ву ста́вшим, в суете́ ума́ на́шего помышля́ем. Кто во вре́мя се́ятве в дому́ седя́ или́ спя, наста́вши жа́тве ло́но испо́лни рукоя́ти? Кто обыма́ виногра́д, и́же не от него́ насажде́ный и сотворе́ный? О́нех у́бо суть плоды́ ихже тру́дове; Че́сти и венцы́, победи́вших суть; Кто когда́ венчава́ет и́же не совле́кшагося к сопротивубо́рцу, внегда́ не победи́ти досто́ит то́кмо, но и зако́нно пострада́ти по Па́влу. Се же есть е́же ни ма́ло у́бо оста́вити что от запове́данных, си́це ќоеждо сотвори́ти я́коже повеле́ни бы́хом. Блаже́н бо рече́ раб он, его́же прише́д Госпо́дь обря́щет не творя́ща я́ко прилучи́ся, но творя́ та́ко. И а́ще пра́ве у́бо принесе́ши, пра́ве же не раздели́ши, согреши́л еси́. Мы же еди́ну негде от за́поведей сотвори́ти вмен́ивше, ни бо реку́ я́ко сотвори́вше. Вся бо друг дру́зе держа́тся по здра́вому ра́зума сло́ву, я́ко в разоре́нии еди́ныя, и про́чим пону́жди сразоря́тися. Не оста́вленых гнев ожида́ем, но о испра́вленем, я́коже сей че́сти надеемся.

Тем вои́стину вели́к челове́к и че́стен муж ми́лостив. Ми́лостыня бо есть егда́ с любо́вию быва́ет, и до́брым извол́ением, не мни дая́, но благода́ть прие́мля, и а́ки приобрета́я, а не погубля́я. У́не бо не твори́ти добра́, не́жели сотво́ршу уныва́ти на́чнеши. Почто́ скорби́ши челове́че? Еда́ у́бо не наде́ешися воздая́ния от Бо́га? Вои́стину мно́жится на небесе́х. Но зде ли хо́щеши воздая́ния? Почто́ оста́вил еси́ ми́лостыню? Ми́лостынею очи́стити грехи́, а не ку́плею. Мно́зи бо зде восприя́ша, но восприе́мших зде не блажи́т Писа́ние, лише́ни бо мзды о́ноя. Зде бо вси ра́дуются восприя́тию: Христо́с же не такову́ та́мо воздае́т благода́ть, но я́ко и пострада́вшым за Него́ до кро́ве. Ему́же сла́ва, ны́не и при́сно, и во ве́ки веко́в. Ами́нь.