Стихи́:

Лавре́нтия ра́ку Христо́ву глаго́лю,

На сковраде́ у́глием испече́наго,

Кончи́ну у́глием и сла́ву получи́ти хотя́:

Пострада́ страда́нием, Кси́сте от меча́:

Ипполи́та же свя́зана ви́жду:

Супроти́во стра́ждуща у нарече́нною:

Испеко́ша Лавре́нтия на сковраде́ я́ко и ры́бу в деся́тый.

Си́и бя́ху во времена́ Де́кия царя́. И уже́ святы́й Ксист от Афи́н бя́ше, иде́же мудролю́бное сло́во изве́д. Прише́д же в Рим поста́влен бысть епи́скопом, по муче́нии свята́го Стефа́на. Боле́зноваху же гоне́ния ра́ди и́же на христиа́ны, и повеле́ святы́й Ксист Лавре́нтию своему́ архидиа́кону изнести́ сосу́ды церко́вныя. Он же прода́в, раздаде́ це́ну их ни́щим. Де́кию же от Перси́ды возврати́вшуся, приведе́н бысть к нему́ святы́й Ксист епи́скоп, и не поко́рься отврещи́ся Христа́, но дерзнове́нно Бо́га и Соде́теля вся́ческим испове́дав, мече́м главу́ ему́ отсеко́ша. Приведе́н же быв Лавре́нтий архидиа́кон, и о свяще́нных сосу́дех истя́жемь. И коле́са испроси́в и наложи́в слепы́х и хромы́х и немощны́х, и привезе́ их к царю́. И́хже ви́дев царь, и я́рости испо́лнься, повеле́ свята́го Лавре́нтия вельми́ би́ти. Та́же воврещи́ его́ в темни́цу. Иде́же и прише́д мно́гих уврачева́ ели́цы к нему прихожда́ху, яце́м же неду́гом ко́ждо одержи́мь бя́ше. Такова́я же триу́н Калинни́к ви́дев, и́же и к темни́це прист́авлен бя́ше, ве́рова Христо́ви и крести́ся. Посе́м же предста́ святы́й Лавре́нтий царю́, и не поко́рься пожре́ти и́долом, на сковраде́ просте́рт бысть поджига́емь огне́м, и в нем благода́рствуя Бо́га испусти́ дух. И́же и погребе́ние от Ипполи́та прии́м. Се же уве́дев царь, и приве́д повеле́ па́лицами желе́зными би́ти его́, и к ди́виим ко́нем привяза́ти его́. И́же и на мно́зе влачи́мь, Бо́гу дух предаде́. Соверша́ет же ся собо́р их в Триугленем близ Капето́лии. Глаго́лет же ся, я́ко в седмы́й день по страда́нии бе свята́го Ипполи́та, Де́кию и Валериа́ну, седя́щим на ко́нех свои́х, и иду́щым на позо́рище, издхо́ша. Возопи́ же Де́кий в час сме́рти своея́: «О́ Ипполи́те, я́ко пле́нника мя та́ко свя́зана веде́ши». Возопи́ же и Валериа́н: «О́гнеными мя вери́гами свя́зана та́ко влече́ши». Се же явле́но бысть по всей вселе́нней, и вси потверди́шася в ве́ру Го́спода на́шего Иису́са Христа́.

Ходя́ святы́й Ни́фонт, ви́де челове́ка ему́же моля́шеся мно́жество маломо́щных, прося́ще у него́ ми́лостыни. Он же ни озре́ся на них. Прибли́жив же ся святы́й ко а́нгелу храни́телю его́, рече́: «Рцы ми а́нгеле, мно́го ли и́мать челове́к сей име́ния?» Глаго́ла а́нгел: «Мно́го и безчи́сленое и́мать бога́тство о́ Ни́фонте, но сребролю́бец есть, и ца́ты ра́ди у́нит умре́ти. Бие́т же че́лядь свою́, гла́дом моря́ и нагото́ю, и де́ло усиля́я им». Глаго́ла Ни́фонт: «Кото́рым смы́слом составля́ется со́весть его́, е́же не подава́я убо́зей бра́тии?» Глаго́ла ему́ а́нгел: «Послу́шай мене́ Ни́фонте, да скажу́ ти. Прихо́дит к нему́ те́мный бес, воспомина́я ему́ глаго́ля: «Соста́ретися и́маши, и пото́м в боле́знь впаде́ши, и не даждь име́ния своего́ никому́же, егда́ недоста́ток ти бу́дет, и на́чнеши ка́ятися и глаго́лати: «В пу́стошь раздая́х име́ние свое́ ни́щым», и не успе́еши ничто́же». И та́ко прельсти́ его́ нечи́стый бес, ча́сто влага́я ему́ в се́рдце. Он же повину́ется по́мыслу тому́, и пребыва́ет помрача́емь, и не ми́лует ни́щих». «Но смотри́, - рече, - я́коже ве́рует, и бу́дет ему́. Бог бо не Искуси́тель есть злу, и не искуша́ет никого́же. Всяк бо искуша́емь свои́ми грехи́, поне́же послу́шает диа́вола и воспомина́ет его́». И се рек, отъи́де а́нгел от него́. Челове́к же той по ма́ле вре́мени в боле́знь впаде́, и бе боле́знь его́ лю́та зело́. Егда́ же впаде́ челове́к той в лю́тую боле́знь, тогда́ издая́ сокро́вище свое́ все враче́м, и никоея́ же по́льзы обре́те от них, но бо́ле в го́ршее впад. И та́ко мно́го дний му́чився, изы́де от них душе́ю и те́лом у́мер. И сконча́ся о нем рече́нное проро́ком Дави́дом: «Сей челове́к и́же не положи́ Бо́га Помо́щника себе́, но упова́ на мно́жество бога́тства своего́». Не мо́жем бра́тие прельсти́тися от бе́са, да не восприи́мем безми́лостивнаго суда́ ску́пости ра́ди, и име́ния име́юще, да не то́йже суд от Бо́га прии́мем, и погуби́м ду́шу и те́ло и Ца́рство небе́сное. Но е́же бы в ме́сто сих блага́я восприя́ти.

Бежи́м бра́тие за́висти бесо́вския се́ти, да не увя́зше в зло́бе грехо́вней, го́ршей му́це пре́дани буд́ем. Госпо́дь бо го́рдым проти́вится, смире́нным же благодать дает. Иде́же у́бо за́висть и ре́вность, ту несть посеще́ния Божия благодати, но вся ху́льная вещь и диа́воле зломы́слие. Что убо есть за́висти окая́ннее? Зави́дит лени́вый от страды́ богате́ющему, а не пону́дится пре́жде сам к страде́ от нея́же честь. Зави́дит гре́шник чистоте́ пра́ведничи, а не хо́щет сам прежде востягну́тися от греха́. Зави́дит блудни́к целому́дрию кро́ткаго, но не хо́щет уподо́битися житию́ его́. Зави́дит лука́вый властели́н друго́м свои́м, и́же тоя́ доидо́ша че́сти, а не помяне́т Христа́ глаго́люща: Дру́же, не оби́жу тебе́, возми́ твое́, и отъиди́, хощу́ же и после́днему да́ти я́ко и тебе́. Или́ несть ми леть е́же хощу́ сотвори́ти во свои́х Ми? А́ще о́ко твое́ лука́во, но Аз благ есмь. Да тем не высо́ко хо́дите, но за́висть оста́вите: за́висть бо скорбь се́рдцу, и тля души́, суши́ло те́лу, разоре́ние любви́: ко всем вражда́, отлуче́ние ро́ду, спо́на доброде́тели, зало́г муче́нию, лише́ние бу́дущия жи́зни, гее́нне насле́дие. Да сие́ слы́шавше бра́тие, не име́ем за́висти, но в любви́ пребу́дем. Бо́гу на́шему сла́ва всегда́, ны́не и при́сно и во ве́ки веко́в. Ами́нь.

P.S. в некоторых прологах на 11 августа