Стихи́:

Землено́ю же оде́ждею – честны́й леви́т Е́впл:

По сече́нии же – тве́рдый по и́стине ору́жник.

Сей бя́ше при Диоклитиа́не царе́, от гра́да Ката́нскаго, Сикели́йския епа́рхии. Оклеве́тан же бысть ко кня́зю Кальсиа́ну, и Христа́ не отве́ргся. Пе́рвое связа́ша ему́ ру́це под коле́не. Та́же пове́шен на дре́во высо́ко, и желе́зными ноготьми́ стро́ган. И гла́су боже́ственому к нему́ прише́дшу, е́же дерза́ти. По сих же млаты́ желе́зными лы́ста ему́ сокруши́ша, и в темни́цу всажде́н. И моли́твою исто́чник водны́й истещи́ в темни́це сотвори́. Из темни́цы же изведе́н, и а́бие ме́чную кончи́ну восприи́м сконча́ся.

Ка́ко бу́ду со И́овом, и́же не прилу́чшую скорбь со благодаре́нием прие́мый? Ка́ко ли с Дави́дом, и́же не к ра́тнику долготерпели́вне устро́ивыйся? Ка́коже с Дании́лом, и́же с воздержа́нием всегда́шним и моле́нием трудолю́бным Бо́га не взыска́вый? Ка́ко с ко́имждо от святы́х, и́же не по стопа́м их ходи́вый? Кто си́це не разсуди́телен страстополо́жник, я́ко ра́внем сподо́битися венце́м победи́теля и и́же ника́коже подвиза́вшагося? Кото́рый воинствово́дец, на часть коры́стем ра́вне когда́ победи́вшим, ниже́ я́вльшыяся на бра́ни призва́.

Благ ли есть Бог? Но и Пра́веден. Пра́веднаго же, е́же по досто́инству воздая́ние, я́коже пи́сано есть, ублажи́ Го́споди благи́м. Уклоня́ющыя же ся в развраще́ние, поведе́т Госпо́дь с де́лающими беззако́ние.

Ми́лостив? Но и Судия́. Лю́бит бо рече́ ми́лостыню и суд. Те́мже глаго́лет: «Ми́лость и суд воспою́ Тебе́ Го́споди». Уве́де ли на кого́ есть ми́лость? Блаже́ни рече́ ми́лостивии, я́ко ти́и поми́ловани бу́дут. Зри́ши ли ка́ко усужде́не прие́млет ми́лостыню. Не безсу́дне ми́луя, ни неми́лостивне судя́. Неми́лостив бо суд не сотво́ршему ми́лости.

Ми́лостив бо Госпо́дь и Пра́веден, да не у́бо и́сполу Го́спода познава́ем, ниже́ вину́ разлене́ния Того́ человеколю́бием прие́млем. Сего́ ра́ди гро́мове, и сего́ ра́ди мо́лния, я́ко да не преоби́дима быва́ет бла́гость. И́же со́лнце восиява́яй, и невиде́нием осужда́ет. И́же дождь дая́й, и огнь дожди́т, о́на бла́гости, сия́ отсече́ния.

Или́ ра́ди о́ного возлю́бим? или́ ра́ди сих убои́мся, я́ко да не рече́тся и нам? Или́ бога́тства бла́гости Его́ и долготерпе́ния преоби́диши? Не ве́дый я́ко бла́гость Бо́жия на покая́ние тя веде́т. По же́стокому же твоему́ и непокая́нному се́рдцу, щади́ши себе́ гнев в день гне́ва? Елма́ у́бо ниже́ мо́щно спасти́ся нетворя́щым я́же по за́поведи Бо́жии дела́, ни е́же прозре́ти что от повеле́нных что безбе́дно? Лю́то бо есть возноше́ние. Судии́ нам законополо́жнику седе́ти, и о́вы у́бо вчинева́ти от зако́н, о́вы же препуща́ти.

Принеси́ же у́бо, и́же благоче́стия подви́жницы, и́же безмо́лвное и безве́щное житие́, я́ко споспе́шника хране́нию ева́нгельских за́поведей поче́тшии, о́бщее попече́ние и сове́т предложи́м, я́ко да ничто́же нас убежи́т от запове́данных. А́ще бо досто́ит соверше́ну бы́ти Бо́жию челове́ку. Я́коже пи́сано есть и сло́во в пре́жних показа́. Ну́жда вся́ко вся́кою за́поведию соверши́тися, в ме́ру во́зраста исполне́ния Христо́ва. Елма́ и по боже́ственому зако́ну, а́ще и чи́сто есть врежде́ное, неприя́тно есть на же́ртву Бо́гови. Его́же у́бо ко́ждо име́ти ску́дне непщу́ет, сие́ во о́бщее разсмотре́ние да предлага́ет. Удо́бь бо в трудолю́бнем мно́жайших испытова́нии таю́щееся изобря́щет ся. Бо́гу я́ве я́ко по обетова́нию Го́спода на́шего Иису́са Христа́, да́рующу нам обре́тение иско́маго, учи́тельством и воспомина́ние Свята́го Ду́ха. Я́ко у́бо мне ну́жда належи́т, и го́ре мне есть а́ще не благовеству́ю. Си́це и вам по́двиг ра́вен облени́вшимся ко истяза́нию. Или́ не́мощне и разсла́блене ко хране́нию пре́даных, и и́же ра́ди дел исполне́нии пребыва́ющым. Те́мже рече́ Госпо́дь: «Сло́во е́же глаго́лах, то су́дит ему́ в после́дний день. И раб у́бо не уве́дев во́лю господи́на своего́, сотвори́в же досто́йная ра́нам, бие́н бу́дет ма́ло; уве́девый же и не сотвори́в, ниже́ угото́вав себе́ к во́ли его́, бие́н бу́дет мно́го».

Потщи́мся у́бо ны́не на строи́тельство сло́ва без поро́ка, да пло́дно нам учи́тельство бу́дет. Ве́дяще у́бо я́ко проти́ву лицу́ нам богодохнове́ннаго писа́ния словеса́ ста́нут на суди́щи Христо́ве. Обличу́ бо тя рече́, и предста́влю пред лице́м твои́м грехи́ твоя́. Си́це и во́нмем тре́звене глаго́лемым, и в де́ло произвести́ боже́ственая уче́ния спе́шне потщи́мся, я́ко не ве́мы в кий день или час Госпо́дь наш прии́дет.

Убо́йтеся бра́тие, душевре́дныя неполе́зныя бесе́ды, да в тишине́ бу́дет душа́ ва́ша. У́не бо без ума́ ка́мень врещи́, нежели сло́во пра́здно изрещи́. Весе́лие пра́ведных суд твори́т, и путие́ их твори́ти ми́лостыню. Творя́й ми́лостыню, обря́щет живо́т. Не име́й дру́жбы с жено́ю, да не сгори́ши огне́м ея́. Не име́й дру́жбы с ма́лым де́тищем, да не впаде́ши с ним в сеть. Не име́й дру́жбы со старе́йшиною ме́ста, но послу́шай слове́с его́, а дел не твори́. Не возлюби́ ити́ во град, и не рцы я́ко чи́сто ми есть о́ко, сотвори́ши е́ неприя́знено. Не пий вина́, да не сотвори́т ти се́рдца оскорбле́на в сла́стех по́хотных. Не яждь двокра́ты днем, да не утолсте́ет ти мысль. Не затвори́ двере́й твои́х от стра́ннаго, да не затвори́т Госпо́дь двере́й Свои́х от тебе́. В ню́же ме́ру ме́рите, возме́рится вам. Посеща́й боля́щыя, да и Бог посети́т тебе́. Не мно́го спи, но моли́ Бога на по́мощь ти приле́жно, да избе́гнеши я́ко пти́ца от се́ти. Пребыва́й при́сно в хра́ме Бо́жии. Глаго́лет бо Госпо́дь: Прославля́ющыя Мя просла́влю. Сие́ творя́, сам спасе́шися, и су́щыя с тобо́ю: и его́же про́сиши от Бо́га, ско́ро прии́меши, я́ко чист душе́ю. Не сниска́й себе́ па́че тре́бования, но живи́ в житии́ смире́нном. Тружда́йся рука́ма свои́ма, да и́маши пода́ти тре́бующым. Сия́ а́ще соторите́, даст вам Бог ве́чная блага́я: Ему́же сла́ва, честь и держа́ва, ны́не и при́сно, и во ве́ки веко́в. Ами́нь.