Стихи́:

Что мне главны́й посе́к, - Миро́н рече́, -

К хотя́щему мя венча́ти венце́м?

Седмьна́десятаго Миро́на посече́ мечь остр.

Сей бя́ше при Де́кии царе́, и антипа́тре кня́зе Аха́йстем, презви́тер церко́вный, нра́вом благ, ро́да че́стна и бога́та, к Бо́гу и челове́ком любо́вен. В день же Христо́ва Рождества́, антипа́тру в це́рковь вше́дшу, е́же я́ти христиа́ны и му́чити. Святы́й же Миро́н ре́вностию испо́лнься, досади́ и поруга́ся ему́. Тем пове́шен и стро́ган бысть. И пещи́ раззже́не бы́вши, я́ко шуме́ти и исходи́ти пла́меню на мно́зе, в ню́же вве́ржен бысть. Пещь же прие́мши свята́го, сохрани́ его́ невреди́ма. Огнь же исше́д опали́ от слуг сто и пятьдеся́т. Святы́й же пону́жен е́же пожре́ти не послу́шав, крое́н бысть на реме́ние от ра́ма до ногу́. От ни́хже исто́рг святы́й еди́н реме́нь ве́рже на лице́ антипа́трово. К сим же стро́ган бысть по дра́ному телеси́. И посе́м вдан бысть звере́м, ему́же от них це́лу и невреди́му соблюде́ну бы́вшу. Ви́дев же антипа́тр испо́лнься студа́, уби́ себе́ свои́ма рука́ма. Святы́й же в Кизи́к веде́н. И антипа́тром ме́чное осужде́ние восприе́м, отсеко́ша ему́ главу́. И та́ко вене́ц муче́нию восприя́т.

Стихи́:

Стихи́ на Стра́тона, Фили́ппа и Евтихиа́на:

Положи́ша мя ме́рзость, рече́ Стратони́к,

Му́жи скве́рнии огне́м побива́ют мя:

Любя́й Бо́га Фили́ппе бо́льше своея́ души́,

Осужде́н бысть во огнь, ему́же душелю́бец бы́вый:

Евти́хия в пещь вве́рженаго,

Я́ко и конь, в наказа́ние сло́ву.

Стихи́ на Киприа́на:

Огнь Киприа́не претерпе́ пе́щный,

Кроме́шняго о́гня угонсти́, и́миже Писа́ние глаго́лет.

Си́и в Никомиди́и проходя́ще, наро́читии челове́цы, на позо́рище восходя́ще, я́же собра́вшыяся лю́ди о себе́ учи́ти, и от идолослуже́ния отступи́ти, и ко Христо́ве ве́ре приходи́ти. Не́когда же князь позо́рище пра́здно без челове́к ви́дев, и вину́ уве́дев, я́ко святы́ми му́ченики наро́ди учи́ми суть, и позо́рныя то́лпы оста́виша, и но́вое не́кое проходя́ще житие́, оте́ческия обы́чаи преоби́дяще. И́же и на́скоре святы́я предста́вити повеле́. И уже́ предста́вшым, и Христо́ву веру в себе име́ти испове́даша, и ины́х учи́ти. Приведе́ни же бывше на позо́рище, и звере́м вданы́ б́ыша, и́же без вре́да от них сохране́ни бы́ша. И вся́кими разли́чными му́ками искуше́ни б́ывше. Коне́чное во огнь вве́ржени бы́вше. И Христа́ ра́ди по́прище преидо́ша, и соодоле́вше венцы́ восприя́ша.

Ны́не же мно́зи от челове́к, о за́поведех у́бо Спа́совых я́ве не радя́т, преда́нию же челове́ческому повину́ются па́че. Е́же бо в горах жи́ти и пусты́нях, и е́же в кле́ти себе́ затворя́ти, и е́же еди́ною днем я́сти, и е́же вся́чески освеня́тися хле́ба и воды́, вре́тище же носи́ти, и желе́зом свя́зовати свое́ те́ло, и е́же без обу́щи ходи́ти, на земли́ же лега́ти, и бе́гати мно́гия бесе́ды, предание есть святы́х муже́й до́бре умышле́но. Но до́лжни суть сия́ творя́щии, пре́жде храни́ти за́поведи Госпо́дни: Долготерпе́ние глаго́лю и и́стину, смиреному́дрие, и воздержа́ние, злых непомина́ние, и настоя́щих безпристра́стие: Ве́ру же и терпе́ние, и любо́вь нелицеме́рну, ея́же кроме́ невозмо́жно угоди́ти Богу. Подоба́ет бо вои́стину и та́я храни́ти, и о́на не оставля́ти, и злых освеня́тися дея́ний по Госпо́дню преда́нию. Бе́гаем у́бо гне́ва и памятозло́бия, кля́твы же и укоре́ния, и жела́ния е́же к жена́м: Дме́ния же и тщесла́вия, лжи и клеветы́, вражды́ и за́висти, и вся́кия зло́бы. Аз у́бо не храня́щаго сия́ реченныя за́поведи Госпо́дни, клену́щася же и лжу́ща и укоря́юща, и ра́дующася о чу́ждих злых, не прие́млю: ниже́ а́ще все житие́ свое́ во вре́тище и по́пеле живе́т, и ни еди́ну же восприе́млет пи́щу: Но зане́же лу́чшее бы́ти мню, е́же благода́рне просты́х бра́шен причаща́тися, и е́же по си́ле по́стничество уме́рити себе́, не́же челове́ческих преда́ний держа́тися, не не ради́ти же и о за́поведех Госпо́дних. Аз у́бо мно́гих ви́дев, коне́чное воздержа́ние иму́ща, и ме́ртво те́ло обнося́ща, мно́гаго ра́ди по́стническаго чрезме́рия, зело́ тех прие́млях: Зане́же вем воздержа́ние и бе́сы изгоня́щее, егда́ и́мать основа́ние за́поведи Госпо́дни, и злых освене́ние. Я́коже пото́м ви́дех их клену́щихся, и лжу́щих, и укоря́ющих, моли́х тех глаго́ля: О́ бра́тие елма́ святы́х муже́й преда́ния твори́те, прилежи́те и за́поведем Госпо́дним, и освеня́йтеся совеща́ний лука́вых, кля́твы, и хулы́, лжи, и памятозло́бия, и про́чих. Они́ же не прия́ша сове́та, и от сего́ яви́шася я́ко и они́ я́же творя́ху, сла́вы ра́ди челове́ческия та́ко де́яху, и вя́щше ничто́же. Воздержа́ние бо боле́знь и́мать пло́тску: А е́же освени́тися лжи, и укоре́ния, и кля́твы, внима́ния тре́бует еди́наго, Сия́ бо законополо́жник Христо́с взако́нил есть. О ни́хже и му́чит, и прети́т преступа́ющым.

Мно́го мо́жет душа́м пресвята́я же́ртва помощи́, в не́йже за усо́пшия душа́ просфи́ры прино́сят, сея́ бо и са́ми ду́ши уме́рших от нас тре́буют, я́коже сказа́ ми Фили́кс епи́скоп, слы́шав от не́коего че́стна презви́тера, и́же бе в Пе́рсстем гра́де в Кенту́ле, служа́й в це́ркви свята́го Иоа́нна. Той же поп име́яше обы́чай в ба́ни мы́тися. Прише́дшу же ему в не́кий день на умове́ние в ба́ню, и обре́те не́коего мужа незнаема, гото́ва на послуже́ние ему́, и́же изу́ его́, и ри́зы его́ прии́м, и положи́ я́ в ба́не, и служа́ше ему́. И изле́зшу ему́ из ба́ни, и поня́вы ему́ вда, и все послуша́ние соверши́. Мно́гажды же сему́ быва́ему и за до́лго вре́мя. Той же презви́тер па́ки в не́кий день в ба́ню идя́, помы́сли глаго́ля в себе́: «Не ле́по бысть мне тщи́ма рука́ма ити́ в ба́ню мы́тися ко о́ному му́жу служа́щему ми с попече́нием». Две же у́бо просфи́ры взем и и́де в ба́ню, и па́ки обре́те о́ного му́жа ту. И по обы́чаю па́ки все соверши́вшу ему послуже́ние. Мы́вшужеся ему́, и па́ки отходя́щу ему́ в дом свой, и послужи́вшему му́жу вдад́е две просфи́ре, моля́ и́ да прии́мет я́. Он же пла́чася рече́: «Сий хлеб свят есть», - и отрече́ся его́ глаго́ля: «Не могу́ я́сти его́». И отвеща́в поп: «Чесо́ ра́ди?» Он же отвеща́в: «Мене́ бо се его́же ви́диши, аз есмь был господи́н ме́ста сего́, но грех мои́х ра́ди осуди́хся зде служи́ти мы́ющимся. А́ще ли хо́щеши пода́ти ми хлеб сей, то пода́й мене́ ра́ди ко Всемогу́щему Бо́гу, и моли́ о мне о́тче, и тогда́ уве́м а́ще тебе́ послу́шает Бо́га, егда́ се́мо прише́д и не обря́щеши мене в сем ме́сте». Се же рек, и неви́дим бысть челове́к той, и показа́ся я́ко дух бя́ше. Поп же он неде́лю его́ ра́ди алка́ше, со слеза́ми Бо́га моля́ о нем, и спасе́ныя же́ртвы творя́. Пото́м же шед в ба́ню, и не обре́те ктому́ челове́ка того́. От сего́ же есть разуме́ти, коль поле́зно свята́я Литурги́я на по́мощь уме́ршим, и сея́ и са́ми ду́ши от нас прие́млют сих. И о сем ве́домо вы бу́ди, я́ко о́ноя де́ля спасе́ныя слу́жбы, греси́ проща́ются. Бо́гу на́шему сла́ва, ны́не и при́сно и во ве́ки веко́в. Ами́нь.