Стихи́:

Изды́х коне́чный е́же о Бо́зе Сло́ве

Отда́ша Флор же и Лавр [в о́семь на́десятый].

Сия́ свята́я бра́тия бе́ста близнеца́ су́ща, каменостру́жца же ху́дожеством, и́же нака́зана бы́вша Про́клом и Макси́мом. Поучи́тели же за Христа́ муче́нию. И оста́виста византи́йская прохожде́ния, и идо́ста во Иллири́к, в весь Дардани́йскую, и во град Улпиа́нский, иде́же повеле́нием Ликио́на иге́мона, с други́ми не́которыми обходя́ща, свое́ худо́жество де́ласта. Та́же от него́ по́слана бы́ста к Ликини́ю сы́ну Елпиди́и цари́цы. И́ма же Ликини́й подаде́ стяжа́ния, и рукоположе́ние. И повеле́ созда́ти и́ма це́рковь и́дольскую, начерта́в ю́ и написа́в воображе́ние. Свята́я же стяжа́ния тре́бующым разда́ста. Но́щию же к боже́ственей упражня́стася моли́тве. Дни́ю же де́лу каса́хуся, воспева́юща це́рковь де́ласта и прилежа́ста. И я́ко пома́ле сверше́не ей бы́вши, а́нгелу сопомога́ющу и́ма и укрепля́ющу. А́бие Меренти́н иере́й ве́рова во Христа́. Уже́ пе́рвее ве́ровавшу сы́ну его́ Анаста́сию, зане́же отве́рзшуся о́ку его́ слепо́му святы́ма. И ни́щих собра́вша Христо́ва му́ченика, и́мже подава́ста име́ния, и связа́ста за ши́я истука́нныя, и на зе́млю о́на низложи́ста. Та́же запа́льша свещи́ мно́ги, и це́рковь освяти́ста. Да егда́ нача́ста пе́ти: «Сла́ва Ти Христе́ Бо́же, апо́столом похвало́», предъидя́ше же пред ни́ми о́браз честна́го Креста́. Се все уве́дав Ликини́й, повеле́ зажещи́ пещь, и та́мо ни́щих воврещи́. И та́ко вве́ржени преда́ша ду́хи. Святы́й же Флор и Лавр ко о́си колесе́м привя́зана, бие́на бы́ста. Та́же по́слана бы́ста Лик[и]о́ну. И́хже прие́м Лик[и]о́н, вве́рже я́ в студене́ц глубо́к, иде́же сше́дше, мольбы́ Бо́гу приноша́ху о воспомина́ющих тех, и о благостоя́нии ми́ру, и е́же преста́ти гоне́нию, и испусти́ста душа́. В не́кая же ле́та пренесе́на бы́ста телеса́ ею́ в Константи́нь град, и положе́на че́стно в ра́це, точа́ща уха́ния цельба́м притека́ющим с ве́рою. Соверша́ет же ся собо́р ею́ во святе́м ею́ муче́нии, близ це́ркве свята́го апо́стола Фили́ппа.

Стихи́:

Е́рмо, ну́ждею по ка́мению влачи́мь,

Бы́вый ка́мень за́яц прибе́жищный на возду́се,

И́же от ка́мения вселю́тое влаче́ние нося́:

И Серапио́н и́же мно́жайшее тверде́йши Петра́,

И Полие́н кровь точа́й по влаче́нию ка́менному,

Бо́га ра́ди, пролия́вшему от ка́мене во́ду.

Си́и оклевета́ни бы́ша от неве́рных, я́ко Христа́ чтут, а и́дол отвраща́ются и гнуша́ются. Я́ти бы́вше и предст́аша ри́мскому епа́рху, и испове́даша Христо́ву ве́ру со дерзнове́нием. И пе́рвое же в смра́дней темни́це их затвори́ша. И па́ки изведе́ни бы́ша отту́ду, и пожре́ти и́долом не восхоте́ша. Того́ ра́ди сквозе́ те́сная, и непроходи́мая ме́ста влачи́ми бы́ша. И та́ко о ка́мение ударя́еми, честны́я своя́ ду́шы Бо́гу преда́ша, восприе́мше та́мо присносу́щное блаже́нство, иде́же всех веселя́щихся жили́ще.

Подвиза́йтеся бра́тие те́сным путе́м входя́щим в жизнь ве́чную. Е́же есть ско́рбный путь веду́щий в Ца́рство небе́сное: ве́ра, любы́, ми́лостыня, послуша́ние, бде́ние воздержа́ние. Ни упива́йтеся, ни оклеветава́йте, ни зави́дите, ни лжит́е и не свари́теся, ни уби́йте, ни кра́дите, и не гне́вайтеся ни яри́теся ни горди́те ни велича́йтеся, ни тщесла́вия жела́йте. Но смире́но и сокруше́но се́рдце име́йте, пла́читеся грехо́в свои́х, тужи́те и пецы́теся о свое́м спасе́нии. Па́че вся́кого челове́ка смири́теся, ни осуди́те никого́же. Всего́ бо есть зле́е, е́же ине́х осужда́ти. Рече́ бо Господь: «Не осужда́йте, да не осужде́ни бу́дете». Но се есть спасе́ние, е́же осужда́ему терпе́ти, и укоря́ющему смири́тися, и гре́шнейша себе́ всех твори́ти пред Бо́гом и челове́ки. Сий труд пред на́ми есть. О не́мже рече́ Дави́д: «Смири́хся и спасе́ мя». «Обрати́ся душе́ моя в поко́й твой, я́ко Госпо́дь бла́го сотвори́ тебе́». А се простра́нный путь и широ́кий веды́й в поги́бель: неве́рие, непоко́рство, непослуша́ние, горды́ня, велича́ние, тщесла́вие и ле́ность, пия́нство и объяде́ние, блуд, за́висть, клевета́ и не́нависть. Ропта́ние и хула́, душегу́бная я́рость, и е́же осужда́ти бли́жняго. И к сим грех на грех прилага́ти, и беззако́ние к беззако́нию. Всего́ бо зле́е есть е́же ин́ех осужда́ти. Но егда́ нас похва́лят челове́цы, или́ бесо́вския по́мыслы велича́ти на́чнут, тогда́ мы грехи́ своя́ помы́слим. Те́мже зазри́м себе́, да свято́е смире́ние пребу́дет в нас, и духо́вная благода́ть покрыет ны. А́ще ли возвелича́емся или́ возв́ысимся, послу́шающе бесо́вских помышле́ний, и бу́дем велича́вы, то Дух Святы́й отсту́пит от нас, и бу́дем бе́зо мзды. Те́мже бра́тие со вся́цем тща́нием рабо́таем Бо́гу в та́йне, и Той возда́ст нам я́ве.

Смиря́йтеся бра́тие и люби́те друг дру́га, и Бог ми́ра и любве́ да бу́дет с ва́ми. Ничто́же бо есть ми́ра и любве́ добре́е, те́ми бо рать и вся́ка зло́ба разруша́ется: Бу́дите друг дру́гу милосе́рди и бла́зи. Я́коже о сем и Христо́с рече: Се за́поведь но́ву даю́ вам, да люби́те друг дру́га. И от сего разуме́ют вси, я́ко Мои́ есте́ ученицы́, а́ще любо́вь между́ собо́ю и́мате. Да иде́же аз есмь, ту и вы со мно́ю бу́дете. И па́ки рече́: Блаже́ни миротво́рцы, я́ко ти́и сы́нове Бо́жии нареку́тся. Да что есть сего́ блаже́ннейше, е́же в Ца́рствии небе́снем с Бо́гом бы́ти? Всегда́ бо Христо́м зово́ми есмы́ вне. Того́ ра́ди не мози́те бра́тие зло́бою отлучи́тися от Бо́га возлю́бльшаго ны, и преда́вшаго Себе за ны, и искупи́вшаго ны Своею кро́вию: и оста́нитеся от злоб ва́ших. И во всем любо́вь гоните, е́же есть соу́з соверше́ния: я́ко любы́ покрыва́ет множество грехо́в, и гнию́щыя у́ды душе́вныя исцеля́ет. Любяй бо бра́та своего́, во све́те пребыва́ет. Поне́же Бог любы́ есть, и стра́ха несть в любви́, но соверше́ная любо́вь, вон изме́щет страх. Те́мже а́ще кто хо́щет без труда́ спасти́ся, да име́ет ко всем любо́вь к ма́лым и вели́ким. Любы́ бли́жнему зла не твори́т. Хотя́щии бо ми́ра, возвеселя́тся в любви́. Лу́чше есть я́сти хлеб с зе́лием сух с любо́вию, не́жели теле́ц упита́нный со враждо́ю. Бо́гу на́шему сла́ва, ны́не и при́сно, и во ве́ки веко́в. Ами́нь.