Стихи́:

Воево́да сей по и́стине андре́я (храбр),

Посе́к главны́й му́жествене подъимы́й:

Поста́виша посе́чене кровна́я езе́ра наро́д,

Тебе́ поста́вльшему езе́ра водна́я:

В девятьна́десятый отсеко́ша Андре́ю вы́ю кра́сную.

Сей бя́ше во времена́ нечести́ваго царя́ Максимиа́на, во́инствуя на восто́чней стране́ под Антио́хом, всего́ чи́на воево́дствующи, по́слан бысть от него́ с ине́ми воево́дами. Пе́рстей же си́ле ми́мо ходя́щи по гре́ческих преде́лех, и та́мо быва́ющыя опогубля́юще. Призва́в Христа́ и научи́в и́же с ним, та́коже призыва́ти, и победи́в пе́рсы, и погна́, и разгна́. И о безнаде́жней побе́де су́щих с ним, и о Христо́ве ве́ре прито́рже, за его́же брань соодоле́на бысть. Оклевета́н же быв той, и и́же с ним ко Антио́ху, предста́ ему́ я́ко осужде́н. И а́бие же по желе́зну одру́ разже́ну просте́рт быв. А ини́и же с ним во́ини на четвероуго́льных древесе́х, ру́це им пригвозди́ша. Та́же от ины́х т́ысяща во́ин, Антио́ху повеле́вшу в подѓорие ве́си тоя́, гна́ни бы́ша. И́хже огласи́в святы́й му́ченик, ко Христо́ве ве́ре приведе́. Се же уве́дев Антио́х, и и́же с ним му́ченики, и того́ пресла́внаго му́ченика, мече́м посещи́ повеле́.

Стихи́:

О́гненая пещь посреде́ иму́щи,

Уха́нии Тимофе́я благоуха́нное па́че:

Ага́пие горе́ние о́гненое пренесе́

И, душе́ казне́ным зве́рем, уха́пан в се́рдце:

Вне же зва́ния Фе́кла Визи́я и оте́чество,

Гази́йское ме́сто позо́рище страда́нию хапле́нием зве́рским.

Сла́вный му́ченик Тимофе́й, бысть от Палести́ны Га́зскаго гра́да, и зане́ житие́м и сло́вом чу́ден, учи́теля благоче́стию устро́ен быв. И ят быв в Га́зе, и предста́ кня́зю Урва́ну, и вопроше́н быв, и испове́да себе́ христиа́на: Христо́во же смотре́ние, и е́же к нам прише́ствие и воплоще́ние извести́в, и того́ ра́ди вся́кими о́бразы мук искуше́н быв, и ника́коже преклони́ся. Посе́м огне́ви пре́дан сконча́ся. Тогда́ же во гра́де том Ага́пий и Фе́кла му́ками злы́ми испыта́на бы́вша. И еще́ же Христо́ву ве́ру держа́ща, вве́ржена бы́ста звере́м, и та́ко муче́ния коне́ц прия́ста, и богопобе́дный восприя́ста вене́ц.

Добро́ есть моли́тися бра́тие моли́твою всегда́, и бесе́довати к Бо́гу. У́тренюющаго бо рече́ к Бо́гу Вседержи́телю в моли́тве, ско́ро услы́шатся моле́ния. Сам бо рече́ Госпо́дь: «Призови́ Мя в день печа́ли твоея́, и изба́влю тя. Моли́темися, и услы́шу вы. Взыщи́те Мене́ всем се́рдцем ва́шим, и явлю́ся вам». Не заме́дли отда́ти моли́твы твоея́ во вре́мя подо́бно. Егда́ же ста́нете моли́тися, оставля́йте а́ще что и́мате на кого́, да и Оте́ц ваш Небе́сный Ми́лостивый оста́вит вам. Вели́ка бо есть си́ла моли́твеная. Та бо Ио́не ки́та дом сотвори́. Моли́тва Иезеки́ю от сме́ртных врат возврати́. И трем отроко́м на ро́су огнь претвори́. И А́нна непло́ды су́щи, моли́твою Саму́ила породи́. Моли́твою Дании́л рыка́ющыя львы укроти́. И сам же Госпо́дь ученико́м глаго́лаше: «Бди́те и моли́теся, да не вни́дете в напа́сть». Свы́ше от Бо́га по́мощи ча́юще, и в само́й беде́ не изнемога́ти, но в терпе́нии молитеся. Да бу́дет во мне Го́споди хоте́ние Твое́, и да отъи́мется от мене хоте́ние диа́воле. Я́коже бо во мра́чней пе́щере свеща́ просвеща́ет, та́ко и моли́тва в ду́шу вше́дши, всю зло́бу грехо́вную отго́нит, и те́ло чи́сто соблюде́т.

В Селу́не граде, бе епи́скоп не́кто, и́менем Фалале́й: Сей Бо́га не боя́ся, ни угото́ваннаго воздая́ния разуме́в, попра́в же и сло́во христиа́нское, и нивочто́же положи́в свяще́нный сан, но и лише́н его́ быв, и обре́теся в па́стыря ме́сто сам волк. Сей бо отве́ргся поклоня́тися Единосу́щней Тро́ице Святе́й, Отцу́ и Сы́ну и Свято́му Духу: и куми́ром покланя́шеся. Во вре́мя же то держа́щии Це́рковь святу́ю, сего́ по пра́вилом зако́нным изверго́ша вон. Ма́лу же вре́мени мину́вшу, паки вся́кого беззако́ния и нече́стия испо́лненый, восхоте́ свяще́нный сан взя́ти, поне́же по прему́дрому Соломо́ну вси послу́шаху зла́та, предержа́щии власть Це́ркве. Возврати́ся же в свой град и хоте́ ити́, бе бо в Константи́не гра́де живы́й. Но Бог не презре́в святы́я Своея́ Це́ркве. Во еди́н у́бо день обо́лкся окая́нный в кра́сныя ри́зы, и хоте́ изы́ти к держа́щым це́рковь, да па́ки по числу́ во́змет свяще́нный сан. Хотя́щу же ему́ изы́ти из до́му своего́, а́бие отече́ ему́ чре́во, и изше́дшу ему́ на прохо́д, и пребы́вшу ему́ я́ко два часа́ не изле́зшу: и внидо́ша от предстоя́щых вне, хотяще рещи́, да и́дет. И обрето́ша главу́ его́ в со́пли прохо́днем, и но́зе его́ горе́ торча́ща. И воздви́гше обрето́ша его́, уже́ уме́рша ве́чною сме́ртию. И та́ко изба́ви Бог Це́рковь Свою́ от кумирослуже́ния.

Братие угото́вим себе́ ко е́же порабо́тати Го́сподеви от всея́ души́, и кре́пости и си́лы. Помы́слим ка́ко ца́ри и кня́зи и влады́ки, бога́тии па́че же и ни́щии, ка́ко ко́ждо их подвиза́ется, и тру́дится е́же украси́ти своя́ жены́. И жены́ подвиза́ются угоди́ти свои́м муже́м. Си́це и мы сотвори́м, ду́шы бо на́шы уневе́щены суть небе́сному Царю́. Услы́шим Па́вла апо́стола о нас глаго́люща: «Обручи́х бо вас рече́, еди́ному му́жеви де́ву чи́сту предста́вити Христо́ви». Те́ло бо на́ше дом и пала́та есть, в не́мже небе́сный Царь живе́т: Душа́ же неве́ста Христо́ва: Ум же, посте́льник: Се́рдце же, престо́л Бо́жий: Смысл же, две́рник. Со́весть же, ри́зничарь. По́мысли же, служи́телие. Предста́ бо [рече́ проро́к] Дави́д цари́ца одесну́ю Тебе́ в ри́зах позлащенных, оде́янна и преукраше́нна: о чи́стей души́ глаго́ла. Вся сла́ва дще́ри царе́вы внутрь, Да убо соблюде́м опа́сно неве́сту Царе́ву: Покры́ем сию́, сохрани́м сию, оде́ждем сию́, одеждею веселия: И украси́м сию́ ри́зами златопря́дными, камением честным, и би́сером благоле́пным, е́же суть добродетельми. Просвети́м сию́ благи́ми де́лы. Вме́сто порфи́ры, ве́рою в Бо́га. Вме́сто диадимы, наде́ждею благо́ю. Вместо ви́сса, любо́вию в Бо́га. Вме́сто иаки́нфа, де́вством. Вме́сто червлени́цы, чистото́ю. Вме́сто гри́вен, целому́дрием. Вме́сто ого́рлий, воздержа́нием. Вме́сто у́шник, послуша́нием. Вме́сто пе́рстней, ми́лостынею. Вме́сто сре́дния порфи́ры, посто́м. Вме́сто ряс и ободе́в, моли́твою и моле́нием. Вме́сто сложе́ния и утва́рия мони́стна, сухояде́нием, и ни́зу лега́нием. Вме́сто ми́ра и мску́са, пе́нием и удруче́нием. Вме́сто златостро́еннаго носи́ла, смиреному́дрием. Вме́сто же́ртвеных разли́чий, хле́ба ску́достию. Вме́сто вина́, воды́ жела́нием. А́ще бо си́це на́ших душ украси́м, и оде́ждем и просвети́м и соблюде́м, до́бре ве́де, и я́вствене зна́ю, я́ко вожделе́ет небе́сный Царь добро́ты душ н́аших, и прише́д всели́тся в ны. И тогда́ бу́дем ему́ не́бо, и престо́л и пала́та, и тогда́ сцарствуем. Вме́сто со́лнца чу́вственаго, иму́ще Со́лнце пра́вды. Вме́сто диади́мы, све́том оде́яни. Вме́сто лучи́, безстра́стие. Вме́сто звезд, доброде́тели. Вме́сто багряни́цы, све́тлость. Вме́сто луны́, боже́ственая исправле́ния, о Христе́ Иису́се Го́споде на́шем. Ему́же сла́ва, ны́не и при́сно, и во ве́ки веко́в. Ами́нь.